Phau Ntawv Anplaham

1 Nyob hauv cov Neeg Khadees lub teb chaws, nyob ntawm kuv cov yawg koob qhov chaw nyob, kuv, Anplaham, pom tias kuv yuav tsum mus nrhiav dua ib qhov chaw nyob;

2 Thiab, vim kuv pom tias muaj txoj kev zoo siab thiab kev kaj siab thiab kev so zoo dua rau kuv, ces kuv xav tau tej koob hmoov ntawm cov yawg koob, thiab txoj cai uas tsim nyog tsa kuv los tswj hwm tej koob hmoov ntawd; vim kuv xyaum coj ncaj ncees, lub siab kuj xav ua ib tug uas muaj kev txawj ntse ntau, thiab xav xyaum coj ncaj ncees dua, thiab kom muaj kev txawj ntse ntau dua, thiab yuav ua ib tug yawg koob ntawm ntau haiv neeg, ib tug tub vaj ntxwv ntawm kev thaj yeeb, thiab xav tau tej lus qhia, thiab xav ua raws li Vajtswv tej lus txib, ces kuv los ua ib tug uas muaj cai tau tej koob hmoov ntawd ua kuv tug, ua ib tug Pov Thawj Hlob, tau tuav txoj cai uas yog peb cov yawg koob li.

3 Cov yawg koob tau tso txoj cai no rau kuv; txoj cai no yog los ntawm cov yawg koob los, txij thaum chiv keeb los, muaj tseeb tiag, twb yog txij puag thaum chiv keeb los, los sis ua ntej ntuj tsim teb raug, los mus txog rau lub sij hawm no, uas twb yog txoj cai ntawm tus tub hlob, los yog thawj tus txiv neej, uas yog Adas, los yog thawj leej txiv, los ntawm cov yawg koob los rau kuv.

4 Kuv xav tau kuv txoj kev tsa rau lub Pov Thawj Hwj raws li Vajtswv txoj kev tsa cov yawg koob ntsig txog cov tub ki.

5 Kuv cov yawg koob, vim lawv tig ntawm lawv txoj kev ncaj ncees mus, thiab ntawm tej lus txib dawb huv uas tus Tswv lawv tus Vajtswv tau muab rau lawv, mus teev tiam cov neeg tsis hwm Vajtswv tej vaj tswv, lawv xyeej hlo tsis mloog kuv lub suab;

6 Vim lawv tso siab rau txoj kev ua phem, thiab tau tig tag nrho mus rau Elakenas tus vaj tswv, thiab Linpenas tus vaj tswv, thiab Mamakalas tus vaj tswv, thiab Kolas tus vaj tswv, thiab Falaus tus vaj tswv, tus Falaus uas ua vaj ntxwv hauv Iyiv teb chaws;

7 Yog li ntawd lawv tau muab lawv lub siab tig mus rau txoj kev cov neeg tsis hwm Vajtswv muab lawv cov me nyuam tua txi rau tej mlom tsis txawj hais lus thiab tsis muaj sia nyob no, thiab tsis mloog kuv lub suab, tiam sis lawv sim muab kuv tua pov tseg los ntawm Elakenas tus pov thawj txhais tes. Elakenas tus pov thawj kuj yog Falaus tus pov thawj thiab.

8 Nim no, lub sij hawm no Falaus tus pov thawj, tus Falaus ua vaj ntxwv hauv Iyiv teb chaws, nws kab lis kev cai yog muab tej txiv neej, poj niam, thiab me nyuam tua txi pub rau cov vaj tswv pej kum teb no, rau saum lub thaj uas ua nyob hauv teb chaws Khadees.

9 Thiab tau muaj tias tus pov thawj ua ib txoj kev txi mus rau Falaus tus vaj tswv, thiab kuj rau Sankis tus vaj tswv thiab, uas raws li cov Neeg Iyiv kab lis kev cai. Nim no Sankis tus vaj tswv yog lub hnub.

10 Txawm yog txoj kev muab ib tug me nyuam txi ua tsaug los Falaus tus pov thawj tseem muab tua rau saum lub thaj uas nyob ntawm lub roob hu ua Pautifas lub Pov Roob, nyob pem lub hau pov roob Olises.

11 Nim no, muaj ib lub sij hawm tus pov thawj no tau muab peb tug ntxhais nkauj xwb ua tib zaug tua txi rau saum lub thaj no, uas yog Onithas cov ntxhais, uas yog ib tug xeeb ntxwv tseeb ncaj nraim ntawm Has cov tub ki los. Tau muab cov ntxhais nkauj xwb no tua txi vim yog lawv txoj kev tsim txiaj; vim lawv tsis kam txhos caug teev tiam tej vaj tswv uas yog ntoo los yog pob zeb, yog li ntawd lawv thiaj li raug muab tua rau saum lub thaj no; thiab tau muab ua raws cov Neeg Iyiv kab lis kev cai.

12 Thiab tau muaj tias cov pov thawj ua nruj ua tsiv rau kuv, kom lawv yuav muab kuv tua thiab, ib yam li lawv tua cov ntxhais nkauj xwb rau saum lub thaj; thiab kom nej yuav muaj kev paub txog lub thaj no, kuv yuav hais kom nej mus saib daim duab nyob qhov pib ntawm cov ceev xwm txheej no.

13 Lub thaj muaj yam ntxwv zoo li lub txaj, zoo ib yam tej uas cov Neeg Khadees tau muaj, thiab lub thaj no nyob ntawm Elakenas, Linpenas, Mamakalas, thiab Kolas cov vaj tswv xub ntiag, thiab ib tug vaj tswv uas zoo li Falaus, vaj ntxwv hauv Iyiv teb chaws.

14 Xwv kom nej yuav muaj kev to taub txog tej vaj tswv no, kuv tau muab tej daim duab txog cov vaj tswv no tso rau qhov pib, uas yog tej daim duab uas cov Neeg Khadees hu ua Lalinos, uas txhais hais tias cov duab piv txwv.

15 Thiab thaum lawv cev tes tuaj txhom kuv, kom lawv yuav muab kuv txi thiab txo kuv txoj sia, saib seb, kuv tsa suab rau tus Tswv kuv tus Vajtswv, thiab tus Tswv mloog thiab hnov, thiab nws cia kuv ua yog toog pom tus Muaj Hwj Chim Tag Nrho, thiab tus tim tswv ntawm nws xub ntiag sawv ntawm kuv ib sab, thiab cia li daws kiag tej hlua khi kuv;

16 Thiab nws lub suab hais rau kuv tias: Anplaham, Anplaham, saib seb, kuv lub npe yog Yehauvas, thiab kuv tau hnov koj, thiab tau nqis los tso koj dim, thiab los coj koj khiav ntawm koj txiv tsev neeg mus, thiab ntawm koj tej txheeb ze, mus rau pej kum teb uas koj tsis paub txog;

17 Thiab li no los vim lawv tau muab lawv lub siab tig ntawm kuv mus lawm, mus teev tiam Elakenas tus vaj tswv, thiab Linpenas tus vaj tswv, thiab Mamakalas tus vaj tswv, thiab Kolas tus vaj tswv, thiab tus vaj tswv ntawm Falaus, uas ua vaj ntxwv hauv Iyiv teb chaws; yog li ntawd kuv tau nqis los xyuas lawv, thiab los ua kom tus uas tsa nws txhais tes tawm tsam koj, los txo koj txoj sia, kom puas tsuaj mus, kuv tus tub Anplaham.

18 Saib seb, kuv yuav muab kuv txhais tes coj koj, thiab kuv yuav roos koj, yuav muab kuv lub npe rau koj, twb yuav muab koj txiv lub Pov Thawj Hwj rau koj, thiab kuv lub hwj chim yuav nyob saum koj.

19 Ib yam li tau muaj rau Nau-as ces yuav muaj rau koj thiab; tiam sis los ntawm koj txoj kev ua hauj lwm qhuab qhia ces neeg yuav paub kuv lub npe nyob hauv ntiaj teb mus ib txhis, vim kuv yog Vajtswv.

20 Saib seb, Pautifas lub Pov Roob yog nyob hauv thaj av Ules, hauv teb chaws Khadees. Thiab tus Tswv muab Elakenas lub thaj tsoo tawg tag, thiab cov vaj tswv ntawm thaj av tej thaj, thiab muab tej thaj ua puas tsuaj tag nrho, thiab tua tus pov thawj ua rau nws tuag kiag; thiab tau muaj kev quaj ntsuag heev nyob hauv Khadees, thiab nyob hauv Falaus lub vaj loog; tus Falaus uas txhais hais tias yog vaj ntxwv los ntawm roj ntshav.

21 Nim no tus vaj ntxwv Iyiv no twb yog ib tug xeeb ntxwv los ntawm Has caj ceg, thiab yog ib tug los ntawm cov Neeg Kana-as raws li kev yug.

22 Los ntawm tus xeeb ntxwv no ces tau vam ua tag nrho cov Neeg Iyiv, thiab tau tshwj caj ceg ntawm cov Neeg Kana-as tseg rau hauv thaj av zoo li ntawd.

23 Thaj av Iyiv yog xub nrhiav tau los ntawm ib tug poj niam, uas yog Has tus ntxhais, thiab Iyitas tus ntxhais, uas ntawm Lus Khadees ces txhais hais tias Iyiv, uas txhais hais tias yog qhov uas txwv;

24 Thaum tus poj niam no nrhiav tau thaj av, thaj av no tseem nyob hauv qab deg, tom qab ntawd nws tau coj nws cov tub los nyob hauv thaj av; thiab los ntawm Has, haiv neeg ntawd tau coob tuaj uas muaj txoj kev foom tsis zoo nyob hauv thaj av.

25 Nim no thawj cov tsoom fwv ntawm Iyiv yog Falaus tsim, uas yog tus tub hlob ntawm Iyitas, uas yog Has tus ntxhais, thiab yog raws li kab lis kev cai tswj hwm ntawm Has, uas yog raws li cov yawg suab.

26 Falaus, vim nws yog ib tug neeg ncaj ncees, tau tsim nws lub nceeg vaj thiab tau txiav txim rau nws cov neeg raws li laj lim tswv yim thiab kev ncaj ncees tag nws sim neej, nws nrhiav kev ua raws li tus txheej txheem ntawd uas tsim los ntawm cov yawg koob hauv thawj tiam neeg, thaum lub sij hawm uas thawj tus yawg suab kav, uas twb yog thaum Adas kav, thiab ntawm Nau-as, nws yawg koob, tus uas tau foom tej koob hmoov hauv ntiaj teb no rau nws, thiab nrog rau tej koob hmoov ntawm kev muaj tswv yim, tiam sis tau foom tsis zoo rau nws ntsig txog lub Pov Thawj Hwj.

27 Nim no, vim Falaus yog caj ceg ntawd uas nws tsis muaj txoj cai tau lub Pov Thawj Hwj, txawm li los cov Falaus txhob txwm hais tias lawv yeej muaj los ntawm Nau-as, los ntawm Has, yog li ntawd kuv txiv thiaj raug ntxias mus lawm los ntawm lawv tej kev pe mlom;

28 Tiam sis kuv yuav sim, txij no mus, piav tej uas tau muaj tshwm sim txij ntawm kuv tus kheej rov qab mus rau tom chiv keeb ntawm txoj kev tsim, vim cov ceev xwm txheej tau los rau hauv kuv txhais tes, uas kuv tuav los txog lub sij hawm ziag no.

29 Nim no, tom qab tus pov thawj ntawm Elakenas raug tua kom nws tuag, tau muaj raws li tej yam uas tau hais rau kuv ntsig txog thaj av Khadees, hais tias yuav muaj ib txoj kev tshaib nqhis nyob hauv thaj av.

30 Tau muaj ib txoj kev tshaib nqhis thoob plaws txhua qhov chaw hauv thaj av Khadees raws nraim li tau hais lawm, thiab kuv txiv raug tsim txom mob heev vim txoj kev tshaib nqhis, thiab nws hloov siab lees txim rau tej kev phem uas nws tau npaj tawm tsam kuv, los txo kuv txoj sia.

31 Tiam sis tej ceev xwm txheej ntawm cov yawg koob, uas yog cov yawg suab, ntsig txog txoj cai muaj lub Pov Thawj Hwj, uas tus Tswv uas yog Vajtswv muab tshwj tseg rau hauv kuv tus kheej txhais tes; yog li ntawd ib txoj kev paub txog qhov chiv keeb ntawm txoj kev tsim, thiab txog cov ntiaj teb, thiab txog cov hnub qub, ib yam li tau muab qhia rau cov yawg koob, los kuv tau ceev los txog hnub no, thiab kuv yuav sim muab tej yam no ib txhia sau rau hauv cov ceev xwm txheej no, rau txoj kev pab kuv cov xeeb leej xeeb ntxwv uas yuav los tom qab kuv.