1 Thiab tom qab ntawd tus Tswv hais tias: Cia peb nqis mus. Ces lawv txawm nqis mus thaum chiv keeb, thiab lawv, uas yog cov Vajtswv, tau tsim thiab ua lub ntuj thiab lub ntiaj teb.

2 Thiab tom qab tsim tau lub ntiaj teb lawm, tsis tau muaj dab tsi thiab tsis muaj neeg nyob haud, vim lawv tsis tau tsim ib yam dab tsi li tsuas yog lub ntiaj teb xwb; thiab kev tsaus ntuj nti muaj thoob plaws saum nplaim dej hiav txwv, thiab cov Vajtswv tus Ntsuj Plig tau yuj mus yuj los rau saum tej nplaim dej.

3 Thiab lawv (cov Vajtswv) hais tias: Cia li muaj qhov kaj; ces txawm cia li kaj.

4 Thiab lawv (cov Vajtswv) to taub qhov kaj, vim qhov kaj ci ntsa iab; thiab lawv muab qhov kaj cais, los yog ua kom qhov kaj sib cais, tawm ntawm qhov tsaus ntuj.

5 Thiab cov Vajtswv hu qhov kaj ua Nruab Hnub, thiab qhov tsaus ntuj lawv muab hu ua Hmo Ntuj. Thiab tau muaj tias txij thaum yav tsaus ntuj mus txog thaum sawv ntxov ces lawv hu ua hmo ntuj; thiab txij thaum sawv ntxov mus txog thaum yav tsaus ntuj ces lawv hu ua nruab hnub; thiab qhov no yog qhov pib, los yog qhov chiv keeb, ntawm qhov uas lawv hu ua nruab hnub thiab hmo ntuj.

6 Thiab cov Vajtswv kuj hais tias: Cia kom muaj lub ntuj nyob hauv cov dej, thiab lub ntuj ntawd yuav muab cov dej cais nyias nyob nyias.

7 Thiab cov Vajtswv txib lub ntuj ntawd, xwv kom cais cov dej uas nyob sab hauv lub ntuj tawm ntawm cov dej uas nyob sab saum lub ntuj; ces txawm muaj li ntawd, raws nraim li lawv txib.

8 Ces cov Vajtswv hu qhov nruab ntug ua Ntuj. Thiab tau muaj tias yog thaum yav tsaus ntuj mus txog thaum sawv ntxov uas lawv hu ua hmo ntuj; thiab tau muaj tias yog thaum sawv ntxov mus txog thaum yav tsaus ntuj uas lawv hu ua nruab hnub; thiab qhov no yog zaum ob uas lawv hu ua hmo ntuj thiab nruab hnub.

9 Thiab cov Vajtswv txib, hais tias: Cia cov dej nyob sab hauv qab ntuj sib sau ua ke mus rau ib qho chaw, thiab cia lub ntiaj teb qhuav tawm tuaj; ces txawm muaj raws li lawv txib.

10 Thiab cov Vajtswv tis npe hu tej av qhuav ua Teb; thiab qhov uas cov dej los sib sau ua ke, lawv tis npe hu ua Dej Hiav Txwv; thiab cov Vajtswv pom tias tej ntawd mloog lawv lus.

11 Thiab cov Vajtswv hais tias: Cia peb npaj lub ntiaj teb kom tuaj nyom tuaj nqeeb, qoob loo muaj noob, cov txiv ntoo txi txiv, nyias raws nyias hom, thiab cov ntoo txi txiv, nyias cov noob tuaj nyias yam rau hauv lub ntiaj teb, ces txawm muaj raws li ntawd, twb raws nraim li lawv txib.

12 Thiab cov Vajtswv tau tsim lub ntiaj teb kom tuaj nyom tuaj nqeeb nyias los ntawm nyias cov noob, thiab kom tej qoob loo tuaj qoob loo nyias los ntawm nyias cov noob, raws nyias hom; thiab kom lub ntiaj teb tuaj ntoo nyias los ntawm nyias cov noob, kom txi txiv, nyias muaj cov noob uas txi tau nyias txiv xwb, raws nyias hom; thiab cov Vajtswv pom tias tej ntawd mloog lawv lus.

13 Thiab tau muaj tias lawv suav hnub; txij thaum yav tsaus ntuj mus txog thaum sawv ntxov los lawv hu ua hmo ntuj; thiab tau muaj tias, txij thaum sawv ntxov mus txog thaum yav tsaus ntuj los lawv hu ua nruab hnub; thiab yog zaum thib peb.

14 Thiab cov Vajtswv tau tsim tej teeb ci nyob saum nruab ntug, thiab ua kom tej teeb ci quas nruab hnub thiab hmo ntuj; thiab tsim tej ntawd ua tej cim ntuj thiab quas caij nyoog, thiab hnub, hli thiab xyoo;

15 Thiab tau tsim tej ntawd ua teeb ci nyob saum nruab ntug tuaj rau hauv lub ntiaj teb no kom pom kev; ces txawm muaj li ntawd.

16 Thiab cov Vajtswv tau tsim ob lub teeb uas ci heev, qhov uas ci tshaj cia kav nruab hnub, thiab qhov uas ci tsawg cia kav hmo ntuj; lawv kuj tau tso cov hnub qub nrog lub teeb ci tsawg;

17 Thiab cov Vajtswv muab tej ntawd tso rau saum nruab ntug, kom pom kev tuaj rau hauv lub ntiaj teb, thiab kom kav nruab hnub thiab hmo ntuj, thiab kom muab qhov kaj cais tawm ntawm qhov tsaus ntuj.

18 Thiab cov Vajtswv saib tej uas lawv tau txib ntawd mus txog thaum tej ntawd mloog lus.

19 Thiab tau muaj tias yog thaum yav tsaus ntuj mus txog thaum sawv ntxov es yog hmo ntuj; thiab tau muaj tias yog txij thaum sawv ntxov mus txog thaum yav tsaus ntuj es yog nruab hnub; thiab yog zaum thib plaub.

20 Thiab cov Vajtswv hais tias: Cia peb npaj cov dej kom muaj tej tsiaj ntau ntau uas muaj sia; thiab tej noog, kom lawv yuav ya saum lub ntiaj teb puag saum nruab ntug.

21 Ces cov Vajtswv txawm npaj cov dej kom muaj tej ntses loj loj, thiab txhua yam tsiaj uas muaj sia txav mus txav los, uas cov dej yuav tsum muaj ntau ntau nyias raws nyias hom; thiab txhua yam noog muaj tis nyias raws nyias hom. Thiab cov Vajtswv pom tias tej ntawd yuav mloog lawv lus, thiab pom tias lawv tej kev npaj yeej zoo.

22 Thiab cov Vajtswv hais tias: Peb yuav foom koob hmoov rau lawv, thiab ua kom lawv muaj tub muaj ki thiab huaj vam, thiab puv cov dej hauv hiav txwv los yog cov dej loj loj; thiab ua kom tej noog huaj vam nyob hauv lub ntiaj teb.

23 Thiab tau muaj tias yog thaum yav tsaus ntuj mus txog thaum sawv ntxov uas lawv hu ua hmo ntuj; thiab tau muaj tias yog thaum sawv ntxov mus txog thaum yav tsaus ntuj uas lawv hu ua nruab hnub; thiab yog zaum thib tsib.

24 Thiab cov Vajtswv tau npaj lub ntiaj teb kom muaj tej tsiaj txhu nyias muaj raws nyias hom, tej tsiaj nyeg thiab tej tsiaj uas nkag, thiab tej tsiaj qus nyias raws nyias hom; ces txawm muaj li ntawd, raws li lawv tau hais.

25 Thiab cov Vajtswv tau tsim lub ntiaj teb kom muaj tej tsiaj qus nyias raws nyias hom, thiab tej tsiaj nyeg raws lawv hom, thiab txhua yam uas nkag hauv lub ntiaj teb nyias raws nyias hom; thiab cov Vajtswv pom tias tej ntawd yuav mloog lawv lus.

26 Thiab cov Vajtswv lawv sib sab laj ua ke thiab hais tias: Cia peb nqis mus thiab tsim neeg kom muaj tus yam ntxwv zoo li peb, kom muaj lub cev zoo li peb; thiab peb yuav cia lawv kav tej ntses hauv dej hiav txwv, thiab kav tej noog saum nruab ntug, thiab kav tej tsiaj txhu, thiab kav lub ntiaj teb, thiab kav txhua yam tsiaj nkag uas nkag hauv lub ntiaj teb.

27 Ces cov Vajtswv tau nqis mus tsim neeg muaj tus yam ntxwv zoo li lawv, muaj tus yam ntxwv zoo li cov Vajtswv lawv thiaj tsim nws, txiv neej thiab poj niam lawv tsim nkawd.

28 Thiab cov Vajtswv hais tias: Peb yuav foom koob hmoov rau nkawd. Thiab cov Vajtswv hais tias: Peb yuav ua kom nkawd muaj tub muaj ki thiab huaj vam, mus puv nkaus lub ntiaj teb, thiab tswj lub ntiaj teb, thiab kav tej ntses hauv dej hiav txwv, thiab kav tej noog ya saum nruab ntug, thiab kav txhua yam muaj sia uas txav mus txav los hauv lub ntiaj teb.

29 Thiab cov Vajtswv hais tias: Saib seb, peb yuav muab txhua yam qoob loo muaj noob uas yuav muaj nyob qhov txhia chaw hauv lub ntiaj teb rau nkawd, thiab txhua tsob ntoo uas muaj txiv; muaj tseeb tiag, thiab tej txiv uas muaj noob peb yuav muab rau nkawd; tej ntawd yuav yog nkawd tej khoom noj.

30 Thiab rau txhua yam tsiaj qus nyob hauv lub ntiaj teb, thiab rau txhua yam noog ya saum nruab ntug, thiab rau txhua yam tsiaj nkag hauv lub ntiaj teb, saib seb, peb yuav muab sia rau lawv, thiab peb kuj yuav muab txhua yam zaub ntsuab rau lawv noj, thiab yuav muab txhua yam no tsim zoo li ntawd.

31 Thiab cov Vajtswv hais tias: Peb yuav ua txhua yam uas peb tau hais, thiab muab tej ntawd tsim; thiab saib seb, tej ntawd yuav mloog lus heev. Thiab tau muaj tias yog thaum yav tsaus ntuj mus txog thaum sawv ntxov uas lawv hu ua hmo ntuj; thiab tau muaj tias yog thaum sawv ntxov mus txog thaum yav tsaus ntuj uas lawv hu ua nruab hnub; thiab lawv suav yog zaum thib rau.