1 Thiab peb yuav ua kom tiav lub ntuj thiab lub ntiaj teb zoo li ntawd, thiab tag nrho txhua tsav yam.

2 Thiab cov Vajtswv lawv sib tham lawv tias: Nyob rau zaum thib xya peb yuav ua peb tej hauj lwm tiav, uas peb tau sib sab laj txog; thiab peb yuav so rau zaum thib xya ntawm tag nrho peb tej hauj lwm uas peb tau sib sib sab laj txog.

3 Thiab cov Vajtswv xaus zaum thib xya, vim hais tias nyob rau zaum thib xya lawv yuav so ntawm tag nrho lawv tej hauj lwm uas lawv (cov Vajtswv) tau sib sab laj hais tias yuav ua; thiab muab zaum thib xya hloov ua dawb huv. Thiab li ntawd yog lawv tej kev txiav txim siab nyob rau lub sij hawm lawv tau sib sab laj tias yuav ua lub ntuj thiab lub ntiaj teb.

4 Thiab cov Vajtswv tau nqis los thiab tau tsim muaj tej caij ntawm lub ntuj thiab lub ntiaj teb, thaum tau tsim tej ntawd nyob rau hnub uas cov Vajtswv ua lub ntiaj teb thiab lub ntuj;

5 Raws li txhua yam uas lawv tau hais txog ntawm txhua tsob nroj tsuag xyoob ntoo nruab nrag ua ntej muaj hauv lub ntiaj teb, thiab txhua yam qoob loo nruab nrag ua ntej loj tuaj; vim cov Vajtswv tsis tau ua kom los nag rau hauv lub ntiaj teb thaum lawv sib sab laj tias yuav tsim tej ntawd, thiab tsis tau tsim ib tug tib neeg mus ncaws teb.

6 Tiam sis muaj muaj dej cia li txia hauv nruab tiv txwv tuaj, ntxaum daim av ntiaj teb noo zaws thoob plaws.

7 Thiab cov Vajtswv muab av los puab tau ib tug txiv neej, muab nws tus ntsuj plig (uas yog, tus txiv neej tus ntsuj plig), thiab muab tso rau hauv nws; thiab tshuab txoj pa ntawm txoj sia rau tus txiv neej ntawd lub qhov ntswg, ces tus txiv neej ntawd txawm muaj txoj sia.

8 Thiab cov Vajtswv tau tsim ib lub vaj, nyob rau sab hnub tuaj hauv Edees, thiab lawv txawm muab tus txiv neej uas lawv puab tso rau haud, tus uas lawv tau muab tus ntsuj plig tso rau hauv lub cev uas lawv tau puab.

9 Thiab tawm hauv av tuaj, cov Vajtswv ua kom txhua tsob ntoo uas pom hais tias zoo nkauj thiab zoo noj hlob tuaj; thiab tsob ntoo uas cawm neeg txoj sia, nyob hauv plawv vaj, thiab tsob ntoo ntawm kev paub qhov zoo thiab qhov phem.

10 Muaj ib tug dej txhawv hauv Edees ntws mus ntxooj lub vaj, thiab nyob ntawd tus dej ncau ua plaub tug dej ntws mus.

11 Thiab cov Vajtswv coj tus txiv neej mus thiab muab nws tso rau hauv lub Vaj Edees, kom tu lub vaj, thiab saib xyuas lub vaj.

12 Thiab cov Vajtswv txib tus txiv neej, hais tias: Ntawm txhua yam txiv ntoo hauv lub vaj no koj noj tau tsis txwv hlo li,

13 Tiam sis ntawm tsob ntoo ntawm kev paub qhov zoo thiab qhov phem, koj yuav tsum tsis txhob noj; vim lub sij hawm uas koj noj, ces koj yeej yuav tuag. Nim no kuv, Anplaham, tau pom hais tias yog raws li tus Tswv txoj kev suav caij suav nyoog, uas yog raws li kev suav caij suav nyoog ntawm Kaulaus; vim cov Vajtswv tseem tsis tau muab txoj kev suav caij suav nyoog rau Adas.

14 Thiab cov Vajtswv hais tias: Cia peb tsim ib tug pab uas phim txiv neej, vim twb tsis zoo uas tus txiv neej nyob nws ib leeg xwb, yog li ntawd peb yuav tsim ib tug pab zoo rau nws.

15 Thiab cov Vajtswv ua kom Adas tsaug zog heev; thiab thaum nws tsaug zog lawm, ces lawv thiaj muab nws ib tug tav, thiab muab lub qhov nqaij foob nqawm rov zoo li qub;

16 Ces cov Vajtswv muab tus tav uas lawv muab ntawm tus txiv neej los, tsim ua ib tug poj niam, thiab coj tus poj niam mus rau tus txiv neej.

17 Thiab Adas hais tias: Tus no txha yog kuv txha, thiab nqaij yog kuv nqaij; nim no yuav hu nws ua Poj Niam, vim yog rho nws tawm ntawm txiv neej los;

18 Yog li ntawd tus txiv neej thiaj tso nws txiv thiab nws niam tseg, thiab muab siab npuab nws tus poj niam, thiab nkawd yuav koom ib lub cev.

19 Thiab nkawd ob leeg liab qab, tus txiv neej thiab nws tus poj niam, thiab tsis paub txaj muag.

20 Thiab cov Vajtswv muab av los puab ua txhua yam tsiaj nruab nrag thiab txhua yam noog saum nruab ntug, thiab txib kom lawv los rau Adas saib nws yuav muab lawv hu li cas; thiab txawm Adas hu txhua tus tsiaj li cas, lawv lub npe yuav yog li ntawd.

21 Ces Adas tis npe rau tag nrho tej tsiaj nyeg, thiab rau tej noog saum nruab ntug, rau txhua tus tsiaj qus nyob nruab nrag; thiab rau Adas, twb pom muaj ib tug pab uas phim nws.