Ib Daim Duab Theej Los ntawm Phau Ntawv Anplaham

Duab 1. Kaulaus, txhais hais tias yog qhov thib ib uas Vajtswv tsim, ze tshaj plaws rau ntawm lub ntuj xilethi-aus, los yog Vajtswv qhov chaw nyob. Yog thawj qhov uas tswj hwm, yog qhov kawg hais txog kev ntsuas caij nyoog. Txoj kev ntsuas raws li caij nyoog xilethi-aus, caij nyoog xilethi-aus txhais hais tias yog ib hnub rau ib tshim. Ib hnub hauv Kaulaus sib npaug li ib txhiab xyoo raws li txoj kev ntsuas ntawm lub ntiaj teb no, lub uas cov Neeg Iyiv hu ua Ya-o-es.

Duab 2. Sawv ntawm Kaulaus ib sab, cov Neeg Iyiv muab hu ua Olinpis, uas yog qhov loj thib ob uas Vajtswv tsim kom tswj hwm nyob ze rau lub ntuj xilethi-aus los yog qhov chaw uas Vajtswv nyob; kuj muaj cai muaj hwj chim thiab, hais txog lwm cov ntiaj teb; ib yam li Vajtswv muab qhia tshwm sim los rau Anplaham, thaum nws ua kev cai txi rau saum ib lub thaj, uas nws tau txhim tsa rau tus Tswv.

Duab 3. Ua kom piv txog Vajtswv, uas zaum saum nws lub rooj theej kiab, muaj hwj chim thiab txoj cai; nrog ib lub meej mom ntawm qhov kaj uas ci nyob mus ib txhis rau saum nws taub hau; thiab piv txog cov thawj Lus Yawm Sij ntawm lub Pov Thawj Hwj Dawb Huv, ib yam li tau muab qhia tshwm sim los rau Adas nyob hauv lub Vaj Edees, kuj ib yam li los rau Xej, Nau-as, Mekhixedes, Anplaham, thiab rau sawv daws cov uas tau muab lub Pov Thawj Hwj qhia tshwm sim los rau lawv.

Duab 4. Ib yam li cov Neeg Henplais lo lus Laukiyaj, uas txhais hais tias lub ntuj, los yog lub ntuj ntsuab; thiab ib tug cim zauv, nyob hauv ntawv Iyiv txhais tias yog ib txhiab; uas zoo ib yam li txoj kev ntsuas sij hawm ntawm Olinpis, uas sib npaug rau Kaulaus txoj kev tig thiab txoj kev ntsuas sij hawm.

Duab 5. Lus Iyiv muab hu ua Enikau-oodos; lub no kuj yog ib lub ntawm cov ntiaj teb tswj hwm thiab, thiab cov Neeg Iyiv hais tias nws yog lub Hnub, thiab qiv nws qhov kaj los ntawm Kaulaus los ntawm lub Ke-evalas los, uas yog qhov thawj Yawm Sij, los yog hais tias, lub hwj chim tswj hwm, uas kav kaum tsib lub ntiaj teb los yog hnub qub, thiab kuj rau Fo-is los yog lub Hli, lub Ntiaj Teb thiab lub Hnub nyob hauv lawv txoj kev tig thawm xyoo. Lub ntiaj teb no txais nws lub hwj chim los ntawm lub Khifo-i-es, los yog Hakokaunpis los, ob lub hnub qub sawv cev los ntawm zauv 22 thiab 23, tau txais qhov kaj los ntawm Kaulaus txoj kev tig.

Duab 6. Piv txwv txog lub ntiaj teb no plaub ceg kaum ntuj.

Duab 7. Piv txwv txog Vajtswv uas zaum saum nws lub rooj theej kiab, muab cov thawj Lus Yawm Sij ntawm lub Pov Thawj Hwj qhia tshwm sim puag saum ntuj los; thiab ib yam li, lub cim qhia tias tus Vaj Ntsuj Plig Dawb Huv los rau Anplaham, lub cim ntawd yog tus nquab.

Duab 8. Muaj tej lus sau uas muab qhia tsis tau tshwm sim los rau neeg ntiaj teb; tiam sis txais tau nyob hauv Vajtswv tej Tuam Tsev Dawb Huv.

Duab 9. Yuav tsum tsis txhob muab qhia tshwm sim lub sij hawm no.

Duab 10. Ib yam thiab.

Duab 11. Ib yam thiab. Yog hais tias neeg ntiaj teb nrhiav tau tej zauv no, ces cia li ntawd. Amees.