1 Ma o le a faapea ona tatou faamae’aina le lagi ma le lalolagi, ma a la’ua ’au uma.

2 Ma sa fai ane Atua ia i latou lava: O le a tatou faauma la tatou galuega i le taimi lona fitu, lea sa tatou taupule i ai; ma o le a tatou malolo i le taimi lona fitu, mai la tatou galuega atoa sa tatou taupuleina.

3 Ma sa faaiuina e Atua la latou galuega i le taimi lona fitu, ona o le taimi lona fitu o le a latou malolo ai mai ia latou galuega uma ia sa latou taupule ai (o Atua) ia i latou lava e fai; ma faapaiaina ai. Ma sa faapea a latou tonu i le taimi na latou taupule ai i latou lava e faia le lagi ma le lalolagi.

4 Ma sa afifio ifo Atua i lalo ma faia tupulaga ia o le lagi ma le lalolagi, i le taimi na faia ai i latou i le aso na faia ai e Atua le lalolagi ma le lagi,

5 E tusa ma mea uma sa latou fetalai i ai e uiga i laau taitasi o le fanua a’o lei i ai i le lalolagi, ma laau afu taitasi o le fanua a’o lei tupu mai; ona sa lei faia e Atua ia timu mai i luga o le lalolagi i le taimi na latou taupule ai e fai i latou, ma a’o lei faia se tagata e galueaiina le eleele.

6 Peitai sa alu a’e i luga se puao mai le lalolagi, ma sa faasūsū ai luga o le eleele atoa.

7 Ma sa fai e Atua le tagata mai le efuefu o le eleele, ma ave lona agaga (o lona uiga, o le agaga o le tagata), ma tuu i totonu ia te ia; ma mānava i totonu o ona pogaiisu le mānava o le ola, ma ua avea ai le tagata ma se tagata ola.

8 Ma sa totō e Atua se faatoaga, i sasa’e i Etena, ma o iina ua latou tuu ai le tagata, o lē o lona agaga na latou tuu i totonu o le tino lea sa latou faia.

9 Ma sa faia e Atua ia tutupu a’e mai le eleele laau taitasi uma e matagofie i le vaai ma lelei mo meaai; o le laau o le ola, foi, i le totonugalemu o le faatoaga, ma le laau e iloa ai lelei ma le leaga.

10 Sa i ai se vaitafe sa tafe atu i fafo mai Etena, e faasūsū ai le faatoaga, ma sa ala eseese atu mai iina ma avea ma ni vaitafe se fa.

11 Ma sa ave e Atua le tagata ma tuu o ia i le Faatoaga o Etena, e teuteu ma tausi i ai.

12 Ma sa poloaiina e Atua le tagata, e faapea: O laau uma o le faatoaga e mafai ona e ’ai saoloto ai,

13 Ae o le laau e iloa ai le lelei ma le leaga, aua e te ’ai ai; aua o le taimi e te ’aia ai, e te oti ai lava. O lenei, o a’u o Aperaamo, sa ou vaai o lea taimi sa tusa ma le taimi a le Alii, lea sa tusa ma le taimi o Kolape; ona e lei tuuina atu e Atua ia Atamu i le taimi lea le faitauga o lana taimi.

14 Ma sa fetalai ane Atua: Inā tatou faia ia o se fesoasoani e tatau ai mo le tane, aua e lē lelei ona nofo toatasi o le tane, o le mea lea o le a tatou faia ai se fesoasoani e tatau mo ia.

15 Ma sa faia e Atua ia oo mai se moegase i luga o Atamu; ma sa moe o ia, ma sa latou toina mai se tasi o ona ivi ’aso’aso, ma so’o le aano i lona tulaga;

16 Ma o le ivi ’aso’aso na to mai e Atua mai le tane, na latou faia ai se fafine, ma aumai o ia i le tane.

17 Ma sa fai mai Atamu: O le ivi lenei sa o se ivi o o’u ivi, ma aano o o’u aano; o lenei o le a ta’ua o ia o le Fafine, aua sa to mai o ia i fafo o le tane;

18 O lea e tuua ai e se tane lona tamā ma lona tinā, ma pipii atu i lana ava, ma avea i la’ua ma tino e tasi.

19 Ma sa lē lavalavā i la’ua uma, le tane ma lana ava, ma sa lē maasiasi.

20 Ma sa faia e Atua mai le eleele manu vaefa tetele taitasi o le fanua, ma manu felelei taitasi o le ea, ma aumai i latou ia Atamu e vaai po o a e ta’ua ai e ia i latou; ma o le a lava na ta’ua ai e Atamu meaola taitasi, o lona igoa lava lena.

21 Ma sa tuu atu e Atamu ni igoa i lafu manu uma, i manu felelei uma o le ea, ma manu vaefa uma o le fanua; ae o Atamu, sa maua se fesoasoani e tatau ai mo ia.