ការបង្កើតប្រវត្តិរូបសង្ខេបមួយសម្រាប់អ្នកដែលគ្មានបទពិសោធន៍ច្រើន

ដោយ ហ៊ីស្សើ វ៉ាយ ក្លារីដ

ទស្សនាវដ្តីសាសនាចក្រ

តើអ្នកពុំសូវមានបទពិសោធន៍ច្រើនដើម្បីដាក់ក្នុងប្រវត្តិរូបសង្ខេបរបស់អ្នកឬ ? សូមក្រឡេកមើលទៅការហៅបម្រើរបស់អ្នកក្នុងសាសនាចក្រ !

វគ្គសំខាន់មួយចំនួនដែលឃើញមានជារឿយៗនៅលើប្រវត្តិរូបសង្ខេបរបស់អ្នកគឺ « បទពិសោធន៍ការងារ », « បទពិសោធន៍ស្ម័គ្រចិត្ត », « ការអប់រំ » និង « ជំនាញ » ។ ទោះបីវាជាបញ្ជីខ្លីមួយក្តី ការមានអារម្មណ៍ថា អ្នកគ្មានបទពិសោធន៍ច្រើននៅក្នុងចំណុចទាំងនេះអាចជាការភ័យខ្លាចមួយ ។ ប៉ុន្តែចូរកុំអស់សង្ឃឹម ! អ្នកប្រហែលជាមានបទពិសោធន៍ច្រើនជាងអ្នកគិតឃើញទៅទៀត—ជាពិសេសការហៅបម្រើរបស់អ្នកក្នុងសាសនាចក្រអាចផ្តល់ដល់អ្នកនូវបទពិសោធន៍ដ៏មានតម្លៃ ។ យើងបំពេញ និងព្យាយាមតម្កើងការហៅបម្រើរបស់យើងក្នុងសាសនាចក្រ ដោយសារតែសេចក្តីស្រឡាញ់ចំពោះព្រះអម្ចាស់ និងបំណងប្រាថ្នាដើម្បីជួយបុត្រាបុត្រីរបស់ទ្រង់ ប៉ុន្តែជំនាញដែលយើងទទួលបានពីការហៅបម្រើនោះ អាចជួយរៀបចំយើងសម្រាប់ទីផ្សារការងារផងដែរ ។

ការធ្វើបញ្ជីកិច្ចការ និងភាពញឹកញាប់

ទោះការហៅបម្រើក្នុងសាសនាចក្រអ្វីក៏ដោយដែលអ្នកមាន អ្នកប្រហែលជាមានសមិទ្ធិផល និងជំនាញនានាដែលអ្នកបានរៀន ដែលអ្នកអាចដាក់បញ្ចូលទៅក្នុងប្រវត្តិរូបសង្ខេបរបស់អ្នក ។ សូមធ្វើបញ្ជីកិច្ចការនានាដែលអ្នកបានធ្វើនៅក្នុងការហៅបម្រើនីមួយៗ ហើយកត់ត្រាពីភាពញឹកញាប់ដែលអ្នកបានធ្វើកិច្ចការទាំងនោះ និងចំនួនមនុស្សដែលពាក់ព័ន្ធនឹងកិច្ចការទាំងនោះ ។

សេចក្ដីថ្លែងការណ៍អំពីសមិទ្ធិផល

បន្ទាប់មក សូមបង្កើត « សេចក្ដីថ្លែងការណ៍អំពីសមិទ្ធិផល » វាជាសេចក្តីថ្លែងការណ៍ដែលពិពណ៌នាសង្ខេបអំពីអ្វីដែលអ្នកសម្រេចបានអំឡុងពេលនៃការហៅបម្រើរបស់អ្នក ។ វាបង្ហាញឡើងនៅលើប្រវត្តិរូបសង្ខេបរបស់អ្នកជាទម្រង់បញ្ជីចំណុច នៅខាងក្រោមបទពិសោធន៍នីមួយៗ ។

សូមចាប់ផ្តើមសេចក្តីថ្លែងការណ៍របស់អ្នកជាមួយនឹង « កិរិយាសព្ទសកម្មភាព »—ពាក្យកិរិយាសព្ទរឹងប៉ឹងដូចជា បានមើលការខុសត្រូវលើ បានកែលម្អអ្វីមួយឲ្យបានប្រសើរឡើង បានបង្រៀន ជាដើម ។

ឧទាហរណ៍

ទាំងនេះគឺជាសេចក្តីថ្លែងការណ៍អំពីសមិទ្ធិផលដោយផ្អែកលើការហៅបម្រើពីរបីប្រភេទ ហើយដាក់បញ្ចូលកិច្ចការ ភាពញឹកញាប់ និងចំនួនមនុស្សដែលពាក់ព័ន្ធនឹងការហៅបម្រើនោះ ៖

ប្រសិនបើជាគ្រូបង្រៀន ៖
- បានរៀបចំមេរៀនរៀងរាល់សប្តាហ៍ដោយសិក្សាសៀវភៅសិក្សា និងព្រះគម្ពីរ ហើយប្រមូលធនធាននានា ព្រមទាំងបទពិសោធន៍ផ្ទាល់ខ្លួន
  - សម្រាប់ភាពញឹកញាប់វិញ សូមធ្វើបញ្ជីមួយអំពីភាពញឹកញាប់ដ៏ច្រើនបំផុតដែលអ្នកបានបំពេញកិច្ចការនោះ—ប្រចាំសប្តាហ៍ ពីរដងក្នុងមួយខែជាដើម ។
- បានបង្រៀនថ្នាក់មួយដែលមានសិស្សអាយុចាប់ពី ១៤ ដល់ ១៦ ឆ្នាំ រៀងរាល់សប្តាហ៍រយៈពេល ៥០ នាទី ។
  - ចំនួនសិស្ស និងប្រភេទសិស្សគឺអាស្រ័យទៅលើការហៅបម្រើរបស់អ្នក ។
ប្រសិនបើជាគណៈប្រធាន ៖
- បានបង្កើត និងសម្រេចបាននូវគោលដៅប្រចាំខែ និងគោលដៅរយៈពេលយូរសម្រាប់ក្រុម ។
- មើលថែទាំសុខុមាលភាពសម្រាប់សមាជិក ៣០ នាក់នៅក្នុងអង្គភាព ។
- បណ្តុះបណ្តាលអ្នកដឹកនាំ និងគ្រូបង្រៀនក្នុងកាតព្វកិច្ចរបស់ពួកគេ ។
- បានដាក់ផែនការ និងរៀបចំសកម្មភាពប្រចាំខែសម្រាប់មនុស្ស ២៦ នាក់ ។
- បានបង្កើត និងចាយតាមថវិកាប្រចាំខែ ។
ប្រសិនបើជាអ្នកដឹកនាំតន្ត្រី ៖
- បានរៀបចំកម្មវិធីតន្ត្រីប្រចាំសប្តាហ៍ ។
- បានរៀបចំចម្រៀងពិសេសដែលច្រៀងដោយសមាជិកនៃក្រុមជំនុំ ។
- បានដាក់ផែនការកម្មវិធីតន្ត្រីសម្រាប់ថ្ងៃបុណ្យឈប់សម្រាក និងព្រឹត្តិការណ៍នានា ។
ប្រសិនបើអ្នកបានបម្រើបេសកកម្ម ៖
- បង្កើត និងសម្រេចបានគោលដៅនៃការបង្រៀន និងគោលដៅកែលម្អខ្លួនប្រចាំសប្តាហ៍ និងរយៈពេលយូរ ។
- បានបង្រៀនជាមធ្យមសិស្ស ១៦ នាក់ និងមនុស្សជាច្រើនក្រុមរៀងរាល់សប្តាហ៍ ស្តីពីរបៀបធ្វើឲ្យជីវិតពួកគេបានប្រសើរឡើង តាមរយៈការអនុវត្ត និងការសិក្សាផ្ទាល់ខ្លួន ។
- ប្រសិនបើជាអ្នកបណ្តុះបណ្តាល ៖ បានបណ្តុះបណ្តាល និងផ្តល់ប្រឹក្សាដល់ពួកអ្នកផ្សព្វផ្សាយសាសនាថ្មី ក្នុងការបង្រៀន និងសម្របសម្រួលទៅតាមកាលវិភាគយ៉ាងម៉ត់ចត់ ។
- ប្រសិនបើជាស៊ីស្ទើរដែលបានបណ្តុះបណ្តាលគេ ជាអ្នកដឹកនាំមណ្ឌល ឬអ្នកដឹកនាំស្ស៊ូន ៖ ទទួលខុសត្រូវក្នុងការជំរុញចិត្ត លើកកម្ពស់ រាយការណ៍ពីភាពរីកចម្រើន និងមើលថែទាំដល់ពួកអ្នកផ្សព្វផ្សាយសាសនា ១៤ នាក់ ។
- ប្រសិនបើផ្សព្វផ្សាយនៅក្រៅប្រទេស ៖ បានរស់នៅ [ ឈ្មោះប្រទេសក្រៅ ] អស់រយៈពេល [ រយៈពេលរស់នៅ ] ហើយបានពង្រីកការយល់ដឹងរបស់ខ្ញុំអំពីវប្បធម៌របស់ពួកគេ ។
- ប្រសិនបើអ្នកបាននិយាយភាសាមួយផ្សេងទៀត សូមបង្ហាញថា អ្នកបានចេះភាសានោះ និងរយៈពេលនៃការនិយាយភាសានោះ ។
- ឧទាហរណ៍ទាំងនេះគឺមានភាពសាមញ្ញណាស់ ប៉ុន្តែកាលណា អ្នក កាន់តែមានភាពជាក់លាក់លើអ្វីដែលអ្នកសម្រេចបាន និងកាន់តែទាក់ទងនឹងការងាររបស់អ្នកចង់ធ្វើ នោះវាកាន់តែប្រសើរ ។

ការបង្កើតប្រវត្តិរូបសង្ខេបរបស់អ្នក

សូមដាក់បញ្ជូលបញ្ជីនៃការហៅបម្រើរបស់អ្នក និងសេចក្តីថ្លែងការណ៍អំពីសមិទ្ធិផលដែលត្រូវនឹងការងារដែលអ្នកចង់ធ្វើទៅក្នុងប្រវត្តិរូបសង្ខេបរបស់អ្នក ។ ដើម្បីជួយឲ្យការហៅបម្រើរបស់អ្នកទាក់ទងនឹងប្រវត្តិរូបសង្ខេបរបស់អ្នក អ្នកត្រូវតែភ្ជាប់ប្រវត្តិរូបសង្ខេបរបស់អ្នកទៅនឹងការបរិយាយការងារដែលអ្នកកំពុងដាក់ពាក្យសុំធ្វើការនោះ ។

បរិយាយការងារស្ទើរតែទាំងអស់មានពាក្យគន្លឹះនៅក្នុងវាជានិច្ច ។ ពាក្យគន្លឹះទាំងនេះគឺជាអ្វីជាក់លាក់ ដែលក្រុមហ៊ុនកំពុងស្វែងរកនៅក្នុងបុគ្គលដែលពួកគេជួល ហើយអ្នកត្រូវប្រាកដថា អ្នកប្រើពាក្យគន្លឹះទាំងនេះនៅក្នុងប្រវត្តិរូបសង្ខេបរបស់អ្នក ។ អ្នកក៏អាចបង្ហាញលក្ខណៈពិសេសនៃការហៅបម្រើរបស់អ្នកដែលត្រូវគ្នាខ្លាំងបំផុតទៅនឹងការបរិយាយការងារនោះ ។ ប្រសិនបើអ្នកកំពុងដាក់ពាក្យសុំធ្វើការជាជំនួយការរបស់នរណាម្នាក់ សូមស្រង់យកចំណុចសំខាន់ៗនៃការហៅបម្រើដែលទាក់ទងនឹងជំនាញនៃការរៀបចំ ឬប្រសិនបើអ្នកកំពុងដាក់ពាក្យសុំធ្វើជាគ្រូបង្រៀនជំនួស សូមធ្វើបញ្ជីការហៅបម្រើដែលទាក់ទងនឹងការបង្រៀន ។

ចំណុចគន្លឹះបន្ថែម

សូមធ្វើបញ្ជីនៃការហៅបម្រើរបស់អ្នកនៅក្រោមវគ្គ « បទពិសោធន៍ស្ម័គ្រចិត្ត » របស់អ្នក ។
សូមដាក់ឈ្មោះអង្គការថា « សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ » ។
សូមដាក់ឈ្មោះការហៅបម្រើរបស់អ្នកថាជាមុខងារការងាររបស់អ្នក ។
សូមប្រើពាក្យ និងឃ្លាជាសាកលឲ្យបានច្រើន ដូចជា ក្រុមជំនុំ ជំនួសឲ្យពាក្យ វួដ ឬ សាខា និងពាក្យ សកម្មភាពយុវវ័យប្រចាំសប្តាហ៍ ជំនួសឲ្យពាក្យ កម្មវិធីម៉្ញូតឆល ។
សូមពិពណ៌នាអង្គការដែលមនុស្សពុំអាចស្គាល់ ។
- ឧទាហរណ៍ សូមពិពណ៌នាអំពីសមាគមសង្គ្រោះថាជា អង្គការស្ត្រីអន្តរជាតិ ។ អ្នកអាចហៅសមាគមសង្គ្រោះនៅក្នុងវួដ ឬសាខារបស់អ្នកថាជា ក្រុមក្នុងមូលដ្ឋាន ឬជាផ្នែកមួយនៃអង្គការ ។

អ្នកក៏អាចអនុវត្តគោលការណ៍ខាងលើ ដើម្បីរកមើលជំនាញ និងបទពិសោធន៍នានាមកពីកិច្ចការការងារស្ម័គ្រចិត្តផ្សេងទៀត និងសកម្មភាពផ្សេងៗដែលអ្នកបានធ្វើ ។ វាសំខាន់ដើម្បីបង្ហាញបទពិសោធន៍ផ្សេងៗ ដែលអនុវត្តចំពោះមុខងារដែលអ្នកប្រាថ្នានឹងទទួលបាន ។ ដូច្នេះ ជាមួយនឹងការហៅបម្រើរបស់អ្នកក្នុងសាសនាចក្រ សូមព្យាយាមដាក់បញ្ចូលឲ្យបានច្រើននូវបទពិសោធន៍ដែលទាក់ទង នៅក្នុងប្រវត្តិរូបសង្ខេបរបស់អ្នក ។ ទោះបីអ្នកពុំទាន់អាចឃើញវាភ្លាមៗក្តី អ្នកមានបទពិសោធន៍ជាច្រើន ដូច្នេះកុំបង្អាប់ខ្លួនឯងអី !