Bisan pa sa Imong Pagkadili-hingpit, Mahimo Ikaw nga usa ka Tinuod nga Tawo sa Dios
Uban sa tanan nakong mga kasaypanan, wala ako masayud unsaon nga mahimong tinuoray nga hingpit nga tawo sa Dios.
Ang tagsulat nagpuyo sa Utah, USA.
Sa katapusang katunga sa akong senior nga tuig sa high school, pipila na lang gyud ka bulan mag-18 nako, opisyal nga mahimong hamtong, modawat sa Melchizedek nga Pagkapari, ug ma-ordinahan nga usa ka elder. Migahin ako og igong panahon sa pagtuon sa kasulatan niadto nga mga panahon nangita og ehemplo kon unsa ang usa ka “tawo sa Dios” ug unsaon nako nga mamahimo sa ingon.
Usa sa labing maayo nga mga ehemplo nga akong nakita mao ang usa ka tawo nga gitawag sa pagpangulo sa kasundalohan sa Nephite atol sa pipila ka mga makalilisang nga mga gubat sa istorya sa iyang nasud uban ang pamahayag nga nakipag-away ang iyang katawhan “agi og paghinumdom sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak” (Alma 46: 12). Siya ang labaw nga si Kapitan Moroni. Ang lider kinsa si Mormon misulat nga “kon ang tanan nga mga tawo maingon, ug naingon, ug maingon bisan kanus-a, sama ngadto kang Moroni, tan-awa, ang mga gahum gayud sa impyerno nauyog na unta sa kahangturan” (Alma 48: 17).
Ang ehemplo nga gipakita ni Kapitan Moroni mao ang “usa ka hingpit nga panabut.” Siya “wala mahimuot sa [paghimo og dautan sa uban] …” apan hinoon ang iyang “kalag hingpit ang kalipay sa kalingkawasan ug sa kagawasan sa iyang … mga kaigsoonan gikan sa pagkaulipon.” Ug ang iyang “kasingkasing modako uban ang pagpasalamat ngadto sa iyang Dios.” Siya “naghago sa hilabihan alang sa kaayohan ug kahilwasan sa iyang mga katawhan” ug “nalig-on diha sa hugot nga pagtuo kang Kristo” (Alma 48: 11–13). Kining tanan nga mga kinaiya ni Kapitan Moroni nga gihulagway dinhi mao gayud ang mga hiyas sa usa ka tinuod nga pagkadisipulo nga magamit natong tanan, lalaki man ug babaye.
Naningkamot ko pag-ayo sa pagsunod sa ehemplo ni Moroni pinaagi sa pagserbisyo sa uban kon adunay mga oportunidad nga motunga, bisan pa og malisud kini. Naningkamot ko nga dili lang kay motabang sa uban apan sa paglikay nga mohimo og dautan magagmay man o madagko ngadto sa uban kon mahimo. Mas nagtuon usab ako sa mga pulong sa atong mga modernong propeta. Ug naningkamot ako sa pagtrabaho og maayo kon adunay moabut nga mga oportunidad.
Si Kapitan Moroni mipakita og taas nga sumbanan alang sa unsa ang usa ka tawo sa Dios. Isip batan-on nga naghupot sa Melchizedek nga Pagkapari, usahay maghunahuna ko unsaon nako nga mahimong usa ka tawo sa Dios nga pareha ka lig-on ug matinuoron ni Kapitan Moroni. Ang pagbuhat sa unsa nay akong nahimo usa ka lisud nga panlimbasug.
Atol sa Wali sa Bukid ug usab ngadto sa mga Nephite human sa Iyang Pagkabanhaw, ang atong Manluluwas nga si Jesukristo mihatag kanato ug mga panudlo unsaon sa pagbuhat niini. Human sa pagtudlo sa Kabulahanan ug ubang aspeto sa pagkadisipulo, Siya miingon, “Busa kamo kinahanglan nga magmahingpit, ingon nga hingpit ang inyong Amahan nga langitnon” (Mateo 5:48).
Ang matag lalaki ug babaye sa Dios gilauman nga mahimong hingpit—sa katapusan. Apan kitang tanan mga tawhanon ug adunay puruhan nga makasala. Mao nga aron lig-ong matukod ang paglaum diha kanato, si propeta Moroni mitudlo nga kon kita “[mo]duol ngadto kang Kristo, ug [mag]hingpit diha kaniya, ug ilimud ang [atong] kaugalingon sa tanan nga dili diosnon, ug mohigugma sa Dios uban sa tibuok [nato] nga gahum, hunahuna ug kusog, niana ang iyang grasya igo alang [kanato], nga pinaagi sa iyang grasya [kita] mahimo nga hingpit diha kang Kristo” (Moroni 10:32). Ang atong Langitnong Amahan nagplano alang kanato isip usa ka tawo, apan kana wala magpasabut nga kita dili mahimong mga kalalakin-an ug mga kababayen-an sa Dios bisan sa atong mga pagkadili hingpit. Ug usa ako sa mapasalamaton alang niana.
Mahimo kitang mga kalalakin-an ug mga kababayen-an sa Dios bisan kon mapandol ug madagma kita usahay. Ang kinahanglan lang natong buhaton mao ang paghimo sa atong pinakamaayo nga pagkinabuhi sumala sa ebanghelyo, ug ang atong Manluluwas motabang kanato sa uban pang paagi sa kahingpitan.