Ikaw: Usa ka Nag-uswag nga Buhat
Gibati ba nimo nga dili ka maayo? Panahon na nga morelaks ang imong kaugalingon.
Mobati ka ba kanunay nga dili makahimo sa unsay gilauman? Mogahin ka ba og mga oras sa pagpaningkamot nga masakto ang usa ka butang o, mas grabe pa, mogahin og mga oras nga maghulat aron makasugod tungod kay nagtuo ka nga ang imong mga paningkamot dili makasarang? Mahimong ikaw nakigbisog sa kinaiya sa pagkaperpeksyonista.
Usa pa ka dinalian nga pangutana: ang imong espiritu anaa ba mahimutang sa imong nabanhaw nga lawas? Kon mao, ibaliwala lang kini. Walay importante nga mabasa dinhi kon ang imong espiritu nahimutang sa imong nabanhaw nga lawas. Apan kon wala, nan kini nga mensahe alang kanimo. Tungod kay bisan unsa ka matarung ang imong adlaw-adlaw nga mga buhat (o dili), bisag unsa pa ang average sa imong grado, kinabuhi sa pamilya, o trabaho, kon ikaw anaa pa sa mortalidad, nan ikaw padayon nga usa ka nag-uswag nga buhat.
Walay Sala batok sa Hingpit
Si Presidente Russell M. Nelson sa makausa mitudlo sa usa ka butang nga iyang nakat-unan samtang nagtuon sa orihinal nga teksto sa Griyego sa Bag-ong Tugon uban sa Iningles nga hubad. Nangita siya sa mga kahigayunan nga anaa ang pulong nga hingpit.
Usa ka kasulatan nga daw nagpaluya sa kadaghanan mao ang Mateo 5:48: “Busa, kamo kinahanglan nga magmahingpit, ingon nga hingpit ang inyong Amahan nga langitnon.” Ug bisan pa niana, importante kaayo, ang orihinal nga teksto sa Griyego wala nagpasabut nga walay sala o walay sayop.
Si Presidente Nelson mitudlo, “Diha sa Mateo 5:48, ang pulong nga hingpit gihubad gikan sa Griyego nga teleios, nga nagpasabut ‘kompleto.’”1
Si Presidente Nelson dayon mihatag og talagsaong ehemplo niini nga kamatuoran: “Sa wala pa ang iyang paglansang, si [Jesukristo] misulti nga sa ‘ikatulong adlaw Ako mahimo nga hingpit.’ Hunahunaa kana! Ang walay sala, walay sayop nga Ginoo—hingpit na sa atong mortal nga mga sumbanan—nagpahayag sa iyang kaugalingong kahimtang sa pagkahingpit nga mahitabo pa sa umaabut. Ang Iyang mahangturon nga pagkahingpit mosunod human sa iyang pagkabanhaw.’”2
Ang mga Kakuyaw sa Pagkaperpeksyonista
Bisan pa, usa kini ka nga kalagmitan sa pagbaliwala sa atong panginahanglan alang sa balaanong tabang ug mosulay og buhat sa mga butang nga nag-inusara ug sa pagpuyo nga walay sayop. Kon buhaton nato kini, dili malikayan nga dili kita makahimo sa gilauman.
Ang mga siyentipiko nga nagtuon sa mga kinaiya [Behavioral scientists] naghulagway sa pagkaperpeksyonista isip “usa ka paspas ug malungtarong dalan ngadto sa walay kalipay.” Ug tinuod kana! Ang pagkaperpeksyonista usa ka kawatan sa pagkab-ot sa kalipay ug katagbawan. Mokawat kini sa imong pagsalig sa kaugalingon, maghimo sa imong pinakamaayo nga mga paningkamot nga bation nga dako kaayo og kulang, ug maghimo kanimo nga kanunay nga maningkamot nga mosulay pa labaw sa unsa ang posible.
Si Elder Jeffrey R. Holland sa Korum sa Napulog Duha ka mga Apostoles mitudlo: “Ang atong bugtong paglaum alang sa tinuod nga kahingpitan mao ang pagdawat niini isip gasa gikan sa langit—dili nato kini ‘mapaningkamutan’. Busa, ang grasya ni Kristo nagtanyag kanato dili lamang sa kaluwasan gikan sa kasubo ug sala ug kamatayon apan sa kaluwasan usab gikan sa atong kaugalingong makanunayon nga pagpanaway sa kaugalingon.”3
Mahimong Mas Mabination sa Imong Kaugalingon
Mas hinawayon ka ba sa imong kaugalingon kay ni bisan kinsa? Kahibalo ka ba unsaon sa paghimo og kinutuban sa imong paglambo ug pag-uswag kay ni bisan kinsa? Nan, hunonga kini! Hinoon, pagsugod sa pagdapit sa “grasya ni Kristo” diha sa imong kinabuhi aron makaplagan ang tabang nga imong gikinahanglan.
Niining napukan nga kalibutan, daghan gyud ang mga tingog sa katawhan nga andam mosulti kanimo nga dili ka maayo o lahi ra. Dili na kinahanglan nga imong idugang ang imong kaugalingon nianang listahan sa mga hinawayon.
Panahon na nga mas mabination sa imong kaugalingon. Paningkamot alang sa paglambo, oo, apan palihug hinumdumi ang mosunod nga tambag gikan ni Elder Holland: “manghinaut ko nga atong mapadayon ang personal nga paglambo sa paagi nga dili maglakip og negatibong mga sangputanan sa pisikal ug emosyonal, kaguol o pagkunhod sa atong pagsalig sa kaugalingon.”4
Kon alang kanimo mas sayon kini nga isulti kay sa buhaton, hunahunaa ang pagsugod uban ang pipila ka buluhaton.
Matag Lakang
Sa kaulahian, kini nga kinabuhi mubo ra kaayo nga mobati ka kanunay nga sayop. Nindot kaayo ang gisulti ni Presidente Nelson: “Kinahanglan natong tanan hinumduman: ang mga tawo naingon nga unta sila makabaton og hingpit nga kalipay—dili ang pagbati nga sad-an!”5
Isip usa ka nag-uswag nga buhat, ang imong kompleto nga pagkahingpit dili moabut hangtud sa sunod nga kinabuhi. Sa kasamtangan, padayon pagbuhat sa labing maayo kutob sa imong mahimo. Makab-ut ra na nimo uban sa tabang sa Ginoo ug sumala sa pagbuot sa Ginoo.