Pagkaperpeksyonista Usa ka Makadaot nga Dula sa “Pangitaa-ang-Kalainan”
Ang tagsulat nagpuyo sa Tasmania, Australia.
Adunay mga panahon nga kitang tanan mobati nga dili igo ang atong kamaayo. Apan kinahanglang siguruon nato nga husto nato nga pagkasukod ang atong kaugalingon.
Mga paghulagway pinaagi ni Kelsey Garrity Riley
Sa batan-on pa ko, malingaw ko nga magdula og “Pangitaa-ang-Kalainan” sa among lokal nga pamantalaan. Duha ka hapit pareho nga imahe, nagtupad, nagpresentar og hagit sa pagpangita sa gagmay nga kalainan tali sa mga hulagway. Kon tutukan nimo pag-ayo ang indibidwal nga mga elemento sa imahe, malampuson ka nga makakita sa kadaghanan, kon dili man gani sa tanan, sa mga kalainan. Ang katuyoan niini nga kalihokan dili mao ang pagdayeg sa mga imahe ni pagkompleto sa ikaduhang hulagway; ang katuyoan mao ang pagtino sa matag imperpeksyon sa dili kompleto nga kopya sa unang hulagway.
Usa ka komon nga hagit alang sa batan-ong mga hamtong mao ang pagbati nga napakyas kita sa pagkab-ut sa sumbanan nga atong gilantaw nga kinahanglan nga anaa kita. Nagkadaghan, atong gitandi ang atong kaugalingon sa usag usa ug makakita og tawo nga nagsugod og malampusong panarbaho, laing tawo nga nakaangkon og perpekto nga mga grado sa ilang mga pagtuon, laing tawo nga mas daghan og higala, ug laing tawo nga atong nakita nga mas mabination, mas maalamon, mas manggihatagon ug matinahuron kay kanato. Ug tingali mas bata pa usab sila kay kanato! Siguradong sayon ra ang pagdula og “Pangitaa-ang-Kalainan” tali kanato ug sa mga tawo nga naglibut kanato ug kanunay nga makahimo kita og taas nga lista sa mga rason nga ang ubang mga tawo “mas maayo” kay kanato.
Kini nga paagi sa paghunahuna labing makuyaw kon motuo kita nga ang atong kaugalingong bili matino pinaagi sa atong mga nakab-ut, atong mga hiyas, o atong natigum nga kalibutanong bahandi. Dugang pa, ang atong dula nga “Pangitaa-ang-Kalainan” panagsa ra nga moila sa mga kalig-on ug Kristohanong mga hiyas nga atong napalambo sa atong kinabuhi ug nagwagtang sa sukaranang kamatuoran nga kitang tanan adunay potensyal nga mahimong perpekto sama kang Kristo … sa umaabut. Sa dihang ang Manluluwas misulti, “[Pag]mahimo nga hingpit [perpekto] sama nga Ako ingon, o ang inyong Amahan kinsa anaa sa langit hingpit” (3 Nephi 12:48), nagtuo ko nga Siya nagtinguha nga mapataas ang atong panglantaw ug mohatag kanato og paglaum—tutal, ang Iyang pagdapit pareho nga usa ka tawag sa paghinulsol ug usa ka pagpahayag sa Iyang pagsalig kanato nga atong matuman ang unsay Iyang gisugo nato nga buhaton. Ang dakong hagit alang kanato mao ang pagbuntog sa mga kalagmitan sa kinaiyanhon nga tawo nga masinahon, masuk-anon, magul-anon, ug maduhaduhaon, ug mopili sa pagpakaubos, paghinulsol, pagtuo, ug paglaum.
Matarung Karon, Perpekto sa Umaabut
Usa ka parte sa pagbuntog sa negatibo nga “pagkaperpeksyonista” nga giawhag sa kaaway mao ang pagsabut kon unsa gayud ang pagkaperpekto [pagkahingpit]. Sa pakigpulong ni Presidente Russell M. Nelson kabahin sa pagkahingpit, mipasabut siya nga ang orihinal nga Gresyanhon nga pulong alang sa hingpit sa Mateo 5:48 nagpasabut nga “kompleto.”1 Walay usa kanato nga mahimong “kompleto” niining mortal nga kinabuhi; ang pagkakompleto moabut sa kahangturan.
Kon makita nato nga lisud ang pagkaperpekto, makahimo kita og mga lakang diha sa dalan sa pagkaperpekto: sama pananglit, kon mobayad kita og hingpit nga ikapulo, makahimo kita sa pagsunod sa sugo sa ikapulo sa kompleto nga paagi. Samtang mag-ampo kita kada adlaw, atong makita nga kita perpekto sa pagpili nga mag-ampo matag adlaw. Ang matag lakang diha sa dalan sa pagkaperpekto (nailhan usab isip dalan sa pakigsaad) gituyo aron sa paghatag kanato og kalipay. Ang kanunay nga personal nga pagtimbang-timbang sa kaugalingon momatuod pag-usab kanato nga naglambo kita ug nga ang atong Amahan nahimuot sa espirituhanong pag-uswag sa atong kinabuhi.
Ang pagkamatarung ug pagkaperpekto dili sama og kahulugan. Samtang ang pagkaperpekto usa ka resulta, ang pagkamatarung usa ka han-ay sa hugot nga pagtuo ug paghinulsol nga atong pilion kada adlaw. Kon ang pagkaperpekto usa ka destinasyon, niana ang atong mga pakigsaad mao ang atong pasaporte ug ang pagkamatarung mao ang mga lakang diha sa panaw. Kon mao kini ang atong panglantaw sa pagkaperpekto, makalaum kita sa maayong mga butang nga moabut kon mapailubon ug makanunayon kitang mopalambo og matarung nga mga sumbanan.
Pagdahum og Kapakyasan, Higugmaa ang Paghinulsol
Bag-ohay lang, namalandong ko sa pamahayag ni Elder Lynn G. Robbins sa Seventy: “Ang paghinulsol dili alternatibo nga plano sa [Dios] sa higayon nga kita mapakyas. Ang paghinulsol mao ang Iyang plano, nakahibalo nga kita makasala.”2 Kini nga kinabuhi maoy usa ka panahon sa pagsulay nga gihatag kanato aron mangandam alang sa kahangturan. Ang paghinulsol nag-andam kanato pinaagi sa pag-usab sa paagi sa atong pagtan-aw sa atong kaugalingon ug magdala kanato paduol sa Dios ug sa Manluluwas. Kinahanglang magdahum kita nga mapakyas o masayop, tingali kada adlaw; dili kana angay nga dili dahumon, ni makapawala sa atong paglaum. Sa pagkatinuod, kinahanglan kitang magmalipayon kon atong mabantayan ang atong mga kahuyang o kasaypanan tungod kay aduna kitay oportunidad nga makapares si Kristo sa pag-usab sa atong mga kahuyang ngadto sa mga kalig-on.
Busa, samtang ang pagkaperpekto mao ang tumong, ang dalan nga atong subayon naglakip sa paghinulsol ug pagpadayon kada adlaw nga adunay pahiyom sa atong nawong ug pasalamat sa atong kasingkasing.
Hangad ngadto ni Kristo
Si Elder Neal A. Maxwell (1926–2004) sa Korum sa Napulog Duha ka mga Apostoles miingon, “Unsa ang kusganon natong gitinguha, paglabay sa panahon, mamahimo kita sa katapusan ug maoy atong madawat sa kahangturan.”3 Ang inadlaw-adlaw natong mga pagpili motino kon mahimo kitang kinsa sa umaabut. Kon ang atong kinasingkasing nga tinguha mao ang mahisama sa Manluluwas ug ang nagdasig kanato mao ang gugma alang Kaniya, ang atong mga pagpili mopakita niana nga tinguha ug mausab kita.
Kon makasugat kita og mga babag, kon masayop kita, ug kon madala kita sa tintasyon, mahimo kitang moresponde pinaagi sa pagpalayo kang Kristo, o mahimo kitang mohangad ngadto ni Kristo uban sa pagtuo, paglaum, pailub, masulub-on nga kasingkasing, ug mahinulsulon nga espiritu. Ang solusyon o tubag sa atong lisud nga mga kahimtang kanunay nga makita diha kang Kristo ug sa Iyang ebanghelyo. Samtang mohangad kita ngadto ni Kristo, motudlo Siya kanato ug mousab kanato nga mahimong mas maayo.
Daghan sa mga hagit sa kinabuhi mabutang ngadto sa duha ka kategoriya: kadtong atong mabuntog niini nga kinabuhi ug kadtong atong mabuntog sa sunod nga kinabuhi, tingali kakulian sa panglawas, depresyon ug kabalaka, o makanunayon nga pagtintal. Si Kristo adunay gahum sa pag-ayo kanato. Siya adunay gahum sa pag-usab kanato. Samtang mopili kita nga magpaubos, atong gidawat ang panahon sa Ginoo ug ang Iyang kabubut-on ug kon aktibo kitang magtinguha sa Iyang tabang ug giya, makakaplag kita og kalig-on, balaanong pagdasig, ug kalinaw.
Maglikay sa Garbo
Ang kaaway dili gayud motanyag og maayong mga solusyon sa atong mga hagit. Kon atong madiskubrihan ang atong kapakyasan ug mga kahuyang, siya moawhag kanato sa pagtago niini gikan sa uban tungod kay gusto natong makita nga walay pagkasayop kutob sa mahimo. Usa kini ka matang sa garbo. Si Kristo kanunay nga nagtanyag og maayong mga solusyon sa atong mga hagit, hinoon, wala kana maghimo sa Iyang mga solusyon nga sayon. Sama pananglit, ang Ginoo nagdapit kanato sa pagsalig Kaniya samtang mopaambit kita sa ebanghelyo samtang si Satanas moingon kanato nga kinahanglang dili kita mopaambit sa ebanghelyo tungod kay dili kita maayo mosulti. Apan misaad ang Ginoo nga Iyang ihatag kanato kon unsay isulti “diha gayud nga higayon” (Doktrina ug mga Pakigsaad 100:6). Sa pagkatinuod, ang kaaway moawhag sa atong mga pagduha-duha samtang ang Ginoo moawhag sa atong pagtuo.
Imbis nga himoong okupado ang atong kaugalingon sa pagdula og “Pangitaa-ang-Kalainan” ug “Tagui-ang-Kahuyang”, gusto ni Kristo nga motan-aw kita kaniya ug moapil sa “Usba-ang-Kahuyang.” Ang garbo makigkompetensiya gayud; hinoon, ang kinabuhi wala gihimo isip usa ka kompetisyon. Samtang mopili kita ni Kristo isip atong ehemplo, higala, ug tigsuporta, mahiklin nato ang atong makadaut nga mga pagkumpara ug makakaplag og kalinaw diha sa dalan padulong sa pagkaperpekto.
Hinumdumi, sa kinabuhi kitang tanan mag-atubang sa hagit sa pagkadili perpekto ug sa kauban niini nga mga kahuyang. Kon atong makita ang uban nga nanlimbasug, pwede kitang mahimong positibo nga impluwensya nga mobira kanila pataas. Kon makita nato ang uban nga nagmalampuson, makatanyag kita sa atong tinuoray nga pagdayeg. Apan dili gayud kita makabenepisyo sa pagsulay sa pagtino kon ang atong pagkamatarung o kalampusan mas maayo ba o dili kon itandi ngadto sa laing tawo. Ang uban mahimong dili makakita sa atong bili, apan ang Dios makakita: ngadto Kaniya ang atong bili walay kinutuban. Kita kanunay nga Iyang mga anak. Nahigugma siya kanato nga walay kondisyon, ug malipay Siya sa atong matarung nga mga paningkamot nga mahimong sama Kaniya.
Si Jesukristo dili usa ka wala motambong nga tumatan-aw sa atong kinabuhi. Siya anaa, nahibalo, ug nagtrabaho aron sa pagluwas kanato ug paggiya kanato balik ngadto sa celestial nga panimalay. Diha sa Iyang kalig-on nga makahimo kita sa tanang butang ug pinaagi Kaniya nga walay imposible. Niini nga kinabuhi nga naila sa pagkadili perpekto, ang Ginoo mao ang atong paglaum ug ehemplo ug dili mohukom kanato pinaagi sa pagtandi kanato ngadto sa atong kaigsoonan. Makita Niya ang atong tinuod nga mga tinguha ug modasig ug mogiya kanato sa atong nagpadayon nga panaw padulong sa pagkakompleto. Molihok kita uban sa pagtuo, maghinulsol ug motan-aw kang Kristo uban sa paglaum sa Iyang saad nga sa katapusan, kita mahimong “[ma]hingpit diha kaniya” (Moroni 10:32).