Pagpangita og Kalinaw bisan sa Imperpeksyon
Ang pagdahum nga ang pagka-perpekto karon lamang nagpasabut nga gilimdan nato ang atong kaugalingon sa oportunidad para sa kalamboan.
Mga Paghulagway pinaagi ni Alisha Johnson; imahe sa usa ka pati © Photomaster/Shutterstock
Ang usa ka sayop nga pagsabut sa unsay atong sagubangon dinhi sa kinabuhi sa kalibutan adunay labut sa konsepto sa pagka-perpekto. Daghan ang nasayop sa ilang pagtuo nga kita kinahanglang ma-perpekto dinhi sa kinabuhi aron maluwas o mahimaya.
Isip usa ka therapist, kausa nakigkita ko og usa ka babaye dihang mikalit siya og hilak. Miingon siya, “Unsaon nako nga paigo na ang akong pagkamaayo?” Gisulti niya ang pagkadili niya takus. Dihang gisuhid namo ang iyang mga pagbati, siya walay grabing sala nga nahimo sa nangagi o sa karon. Gibati lamang niya nga dili pa igo ang iyang kamaayo. Gikumpara niya ang iyang kaugalingon ngadto sa iyang mga silingan, higala, ug mga paryente, ug ang tanan nga iyang mahinumduman sa iyang hunahuna, “mas maayo” sila kay kaniya.
Ang mga Hunahuna Mamahimo nga Atong Reyalidad
Nasayud ko nga dunay daghan nga dunay pagbati sa imperpeksyon ug kawalay siguridad, sa iyang calling, isip ginikanan, o sa kinatibuk-an. Kini nga mga pagbati magdala kanato sa pagtago sa atong mga talento ug modala kanato palayo sa uban og mobati nga nawad-an sa paglaum, kabalaka, o depresyon. Ang atong paghunahuna sa kaugalingon sa dakong bahin makaimpluwensya sa atong mga kinaiya ug pagbati. Daghan kanato makasulti sa atong kaugalingon apan dili makasulti ngadto sa ubang tawo. Kini isip resulta, mopugong sa atong tinuod nga potensyal ug mopaminos sa atong mga abilidad ug mga talento. Si Presidente Ezra Taft Benson (1899–1994) miingon, “Si Satanas maningkamot gayud sa pagbuntog sa mga Santos pinaagi sa kasagmuyo, kawala sa paglaum, kasubo ug depresyon.”1“Maayo kay, ang bugtong opinyon kanato nga ang importante unsa ang hunahuna sa Langitnong Amahan ngari kanato. Siya mohigugma ug mokorehir apan dili gayud mopasagmuyo kanato; kana ang lipat-lipat ni Satanas.”2
Ang Imperpeksyon Usa ka Oportunidad
Ania kita sa kalibutan aron malipay, ug ang kabahin niana nga kalipay mao ang butang nga atong gimugna, gituohan, ug gidawat. Kon modawat kita nga kita masalaypong mga anak sa Dios kinsa nagkat-on samtang nagpadayon, atong madawat ang atong mga imperpeksyon. Ang paglaum nga diha dayon ang pagka-perpekto nagpasabut sa paglimud sa oportunidad alang sa paglambo. Atong gilimud ang gasa sa paghinulsol ug ang gahum ni Jesukristo ug sa Iyang Pag-ula sa atong kinabuhi. Si Elder Bruce R. McConkie (1915–85) sa Korum sa Napulog Duha ka mga Apostoles miingon: “Adunay usa lamang ka perpekto nga linalang, ang Ginoong Jesus. Kon ang mga tawo kinahanglan nga mahimong perpekto ug mopuyo sa tanang mga balaod sa bug-os sa tanan, adunay usa lamang ka maluwas nga tawo sa kahangturan. Ang propeta [Joseph Smith] mitudlo nga adunay daghang mga butang nga pagahimoon, bisan lapas pa sa lubnganan, sa pagbuhat sa atong kaluwasan.”3 Ang atong mga imperpeksyon mahimo nga usa ka paagi nga giandam sa Dios aron kita makabalik Kaniya.
Ang mga Kahuyang Mamahimo nga mga Kalig-on
Ang pagpaduol ngadto sa Langitnong Amahan uban sa imperpeksyon nagkinahanglan og pagpaubos. Kini nga proseso gihulagway ni Ether: “Kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:27). Kon mapaubsanon kita, ibukhad sa atong Langitnong Amahan ang Iyang mga bukton ngari kanato ug tabangan kita sa pagkat-on gikan sa atong mga kahuyang. Ang usa ka ehemplo niini anaa sa Bag-ong Tugon. Samtang nanglimbasug si Pablo sa “tunok [sa iyang] lawas,” iyang nahibaloan nga ang mga kahuyang naghimo niyang mapaubsanon ug nagdala kaniya paduol sa Dios (tan-awa sa 2 Mga Taga-Corinto 12:7). Kini nga pagpaubos ug kaandam sa pagkat-on mao gayud ang atong gamiton sa kaugalingon natong mga imperpeksyon. Kinahanglan nga makakat-on kita gikan niini nga mga kahuyang aron mamahimo kini nga mga kalig-on.
May kalainan usab tali sa nahimong mapaubsanon ug sa pagbati nga gamay ra og bili o kapuslan. Ang pagpaubos magdala kanato paduol sa Ginoo, samtang ang kaulaw ug pagbati nga sad-an makapalayo kanato gikan sa Ginoo. Ang Dios dili gusto nga ipakaubos nato ang atong kaugalingon ug mobati nga kita gamay ra og bili sa Iyang panan-aw. Sakit kini alang Kaniya ug kanato. Importante ang pag-ila nga naa kitay bili sa atong panahon ug ang paningkamot sa paghimo og kausaban. Ang usa ka bahin niining kinabuhia mao ang pagpangita og mga paagi nga mausab ang atong mga kahuyang. Ang ubang mga kahuyang tingali tibuok kinabuhi nga pakiglimbasug, samtang ang uban dali ra nga latason.
Pipila ka tuig ang milabay mitabang ko sa usa ka kliyente nga si Rachel (ang ngalan giusab), kinsa dunay problema sa ilimnong makahubog. Nahimo kining usa ka tinubdan ug paagi aron mawagtang ang kaluya sa lisud niyang kinabuhi. Iyang gitino nga mabuntog niya ang iyang pagkaadik, ug pinaagi sa ubang tabang ug pagdasig, mihunong siya sa pag-inom. Sa wala pa mahingpit ang iyang paghunong sa problema sa pag-inom, wala niya ikapaubos ang iyang kaugalingon tungod sa iyang mga kahuyang. Iya kining gidawat. Dayon, uban sa determinasyon ug tabang sa maayo nga bishop, sa Ginoo ug sa pipila ka importanting mga tawo, gitino ni Rachel nga hunungon niya ang pag-inom. Sa milabayng panahon nakigsulti ko niya, mireport siya nga wala na siyay gana sa pag-inom.
Aron mouswag gikan sa atong mga kahuyang, kinahanglan nga moduol kita sa Ginoo uban sa pagtuo, paglaum, ug panabut nga Siya mogunit kanato sa mga palad sa Iyang kamot. Si Presidente Russell M. Nelson, Presidente sa Korum sa Napulog Duha ka mga Apostoles mitambag: “Ngadto sa tawo kinsa mibati nga huyang ug mahadlukon, pagmapainubsanon sa inyong kaugalingon. Ang pagka-perpekto dili pa mahitabo niining kinabuhia apan sa sunod nga kinabuhi. Ayaw tinguhaa ang mga butang nga dili makatarunganon. Apan tinguhaa sa imong kaugalingon ang paglambo. Kon tugutan nimo ang Ginoo sa pagtabang kanimo nga makahimo niana, himoon Niya ang kalainan.”4
Pilia ang Kalipay Karon
Taliwala sa pagkahimong mas maayo, makapili kita og kalinaw ug kalipay karon. Bisan taliwala sa pinakalisud nga mga kahimtang makapili kita sa atong kinaiya. Si Viktor Frankl, usa ka inila nga psychiatrist ug usa nga nakalingkawas sa Holocaust, miingon, “Ang tanan mahimong kuhaon gikan sa usa ka tawo gawas sa usa ka butang: ang hingpit nga tawhanong kagawasan—ang pagpili og kinaiya sa usa ka tawo sa bisan unsang hut-ong sa mga kahimtang, ang pagpili sa kaugalingong paagi sa tawo.”5
Gisultihan kita nga “Ang mga tawo naingon, nga unta sila makabaton og hingpit nga kalipay” (2 Nephi 2:25). Wala kini magpasabut nga ang Dios daw madyik nga mopuno sa atong kinabuhi og kalipay. Ang kalipay usa ka pagpili alang sa kadaghanan kanato. Nagkinahanglan kini og paningkamot ug pagkamapasalamaton, pagsalig, ug hugot nga pagtuo. Ang pagkanegatibo makasulod sa tanang kwarto sa atong kinabuhi kon kini atong tugutan. Tingali dili nato mausab ang mga kahimtang sa atong kinabuhi, apan makapili kita kon unsaon nato kini sa pag-atubang. Si Presidente Thomas S. Monson miingon, “Dili nato makontrol ang hangin, apan atong mapahiangay ang mga layag. Alang sa tumang kalipay, kalinaw, ug katagbawan, kita unta mopili og usa ka positibo nga kinaiya.”6
Kon pilion nato ang pagtutok sa maayo, ang pagsalig sa Ginoo sa Iyang Pag-ula, ug pagdawat ug pagkat-on gikan sa atong mga imperpeksyon, atong matangtang ang dili makatarunganong mga ekpektasyon sa atong kaugalingon ug mapaningkamutan ang pagkamaayo ug kalipay sa atong kinabuhi. Magmalinawon ra kita uban sa atong mga imperpeksyon ug makakita og kahupayan diha sa matubsanong gugma sa Dios. Makaplagan nato ang kalipay sa atong kasingkasing sa kahibalo nga ang plano sa kaluwasan makadala nato og balik sa atong Langitnong Amahan samtang himoon nato ang atong pinakamaayong paningkamot, bisan sa pagkadili-perpekto niini, aron mahimong takus nga mopuyo og balik uban Kaniya.