Dili Ako Hingpit … Sa Pagkakaron
Ang tagsulat nagpuyo sa Netherlands.
Ang pagpanlimbasug sa pagkaperpeksyonista [gusto nga mahimong hingpit ang tanan] nakatabang nako nga mas makasabut mahitungod sa Pag-ula sa Manluluwas.
Sa 3 Nephi 12:48, si Jesus nagtudlo, “Busa Ako manghinaut nga kamo mahimo nga hingpit sama nga Ako ingon, o ang inyong Amahan kinsa anaa sa langit hingpit.” Kini nga kasulatan kanunay nga makapahunahuna kanako tungod kay nanlimbasug ako sa pagkaperpeksyonista sa tibuok nakong kinabuhi. Ug bisan nindot kaayo nga mobuhat sa akong pinakamaayo sa tanang butang, ang pagkaperpeksyonista mahimong makadaot kaayo. Sulod sa dugayng panahon, kon makahimo ko og sayop, o bisan kon magmalampuson ko, mibati ko nga dili pa gayud igo ang akong kamaayo.
Dako Kaayo og Ekspektasyon sa Akong Kaugalingon
Kanunay nga dako ko og ekspektasyon sa akong kaugalingon, ilabi na sa high school. Ug kasagaran nga napakyas ko tungod kay misulay ko sa pagbuhat og dungan sa daghan kaayong butang aron mapamatud-an nga igo ang akong kamaayo. Usa ka tuig nakahukom ko nga magkat-on og ballroom nga sayaw, mokuha og mga leksyon sa musika, ug moapil og grupo sa musika. Nagtuo ko nga kinahanglan kong mobuhat kutob sa akong mahimo sa pagpalambo ug paghingpit sa akong mga talento. Apan sa usa ka piho nga punto, kinahanglan nakong undangon ang tanan tungod kay sobra ra kaayo alang kanako ang pagdumala niining tanan. Istrikto kaayo ko sa akong kaugalingon. Akong gibati nga daw pakyas ako, ug ang pagkapakyas maoy usa sa akong labing dako nga mga kahadlok.
Nasayud ko nga dili lamang ako ang bugtong tawo nga nanlimbasug sa pagkaperpeksyonista. Daghan kaayo kanato ang naningkamot sa atong labing maayo matag adlaw ug masagmuyo kon dili nato matuman ang tanan sa hingpit nga paagi. Apan bisan pa sa atong mga paningkamot, wala gayuy usa kanato nga mahimong hingpit dinhi sa yuta. Busa unsaon nato sa pagpaningkamot sa pagkahingpit kon ang tanang paningkamot daw ingon og walay pulos? Si Elder Jeffrey R. Holland sa Korum sa Napulog Duha ka mga Apostoles mipaambit og tubag, “Kamo kinahanglan magmahingpit—sa katapusan.”1
Ang pagpaningkamot alang sa pagkahingpit usa ka maayo nga butang, apan mahimo kining dili maayo kon tugutan nato kini nga mosanap kanato. Tungod sa tanan nga gikinahanglan sa kinabuhi gikan kanato sa pisikal, mental, emosyonal, ug bisan sa espiritwal nga paagi, importante nga dili madaut ang atong kaugalingon sa nanghinobrang buluhaton tungod lang kay gusto nato nga ang tanan perpekto [hingpit]. Ug mas importante gani ang paghunahuna kon unsay gipangayo sa Langitnong Amahan kanato. Dili Niya gusto nga madaut ang atong kaugalingon tungod sa pagpaningkamot nga mobuhat og daghan kaayo.
Ang Ginoo mitudlo diha sa Doktrina ug mga Pakigsaad 10:4, “Ayaw pagdagan og labaw ka tulin ug pagbuhat og labaw ka daghan kay sa imong kusog ug lihok nga gihatag nganha kanimo aron sa paghubad; apan pagmakugihon ngadto sa katapusan.” Magamit nato kana sa atong mga kinabuhi. Gusto sa Langitnong Amahan nga magmalipayon kita, ug magmalipayon kita kon mobuhat kita sa unsay gisulti Niya nga atong buhaton sa labing maayo natong mahimo. Bisan kon ang atong mga paningkamot dili pa gayud hingpit.
Ang Pagkahingpit Nagpasabut nga “Kompleto”
Ang pulong nga perpekto [hingpit] orihinal nga naggikan sa Latin nga pulong nga perficere, nga mabahin ngadto sa per- (“sa kompletong paagi”) ug facere (“buhaton”). Busa ang pagkahingpit sa tinuod nagpasabut nga “kompleto.” Ug dili kita mahimong kompleto kon wala si Jesukristo (tan-awa sa Moroni 10:30). Nagtuo ko nga daghan kanato kanunay nga naghunahuna nga dili igo ang atong kamaayo. Ug, dili gayud kita ingon niana! Nagpasabut nga, kon wala si Kristo dili igo ang atong kamaayo. Sama sa gisulti ni Ammon: “Ako nasayud nga ako walay bili; ingon sa akong kusog ako mahuyang; busa ako dili manghambog sa akong kaugalingon, apan ako manghambog sa akong Dios, kay diha sa iyang kusog ako makahimo sa tanan nga mga butang” (Alma 26:12).
Uban ni Jesukristo, makapaningkamot kita kanunay nga mahimong mas maayo, gani hilabihan nga kita mahimong hingpit ug kompleto usa ka adlaw tungod kay hulipan Niya ang atong mga kakulangan [imperfection]. “Oo, duol ngadto kang Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).
Paglabay sa panahon akong naamguhan nga wala nako masabti ug makuha sa hingpit ang kahulugan sa Pag-ula sa Manluluwas alang ug ngari kanako. Abi nako nga nagkinahanglan ko og walay sipyat nga binuhatan dinhi sa yuta ug nga gipasagdan ko nga mag-inusara sa paghunahuna unsaon sa pagtuman niini nga tahas. Apan karon nasayud ko nga wala gayud kita mag-inusara. Kon maningkamot kita nga nakatutok ngadto kang Jesukristo ug magtipig Kaniya diha sa atong kasingkasing ug sa atong hunahuna, ang atong mga kahuyang mamahimong mga kalig-on—sama sa paagi nga ang akong panglimbasug sa pagkaperpeksyonista nagkausab. Nasayud ako nga dili ako hingpit. Apan makatabang si Kristo kanato sa pagbuntog sa bisan unsang mga kahuyang, mga sala, mga hagit, o mga kahadlok. Nakasabut Siya kanato ug nasayud unsaon sa pagtabang kanato. Hinaut nga kitang tanan makatagamtam sa Iyang mahangturong gugma. Ug hibaloi nga bisan og dili kita hingpit karon, kon kita maningkamot sa pagsunod Kaniya, moabut ang adlaw nga kita mamahimong hingpit.