Berglind Guðnason
Árnessýsla, Iceland
Si Berglind (wala) uban sa iyang igsoong babaye nga si Elín (tuo). Sa dihang si Berglind anaa sa pinakagrabeng depresyon nga iyang nasinati sukad, iyang gibati nga dili na siya makapadayon pa. Pinaagi sa paghisgot mahitungod sa iyang mga panlimbasug ngadto sa pamilya ug mga higala, nakakaplag siya og espiritwal ug emosyonal nga pagkaayo pinaagi sa mga himan nga gihatag sa Langitnong Amahan.
Mindy Selu, Photographer
Nagsagubang ko sa depresyon sukad niadtong 13 pa ko. Sa usa ka punto, hilabihan ka grabe ang sitwasyon nga misulay ko sa paghunos sa akong kaugalingong kinabuhi. Gibati nako nga wala gayuy paglaum nianang higayuna. Naghunahuna ko, “Dili gayud ako mahimong magmalipayon. Wala gayud akoy makab-ot nga bisan unsa.”
Dihay higayon nga naghunahuna ko nga ang pagbiya sa Simbahan maoy tubag sa akong mga problema tungod kay gibati gayud nako ang ka walay paglaum sa tanang butang. Sayon ra kaayo buhaton ang unsay dili nimo angay nga buhaton sa Iceland. Diyutay ra ang mga miyembro sa Simbahan dinhi. Ako ra ug ang akong mga igsoon ang anaa sa among mga klase sa Simbahan sa among pagdako. Gibati nako nga nag-inusara ug sa makadiyot dili ko ganahang moadto sa simbahan.
Kadaghanan sa mga tawo sa Iceland dili ganahan og relihiyon. Ang mga tawo magsugod sa pag-inom sa sayo nga edad. Nagumon ako niana, ug dunay panahon sa akong kinabuhi nga dili ko aktibo. Dili ako mapasigarbuhon niana, apan usa kana ka bahin sa akong kasinatian ug nakat-on ako gikan niana. Akong gitun-an ang usa ka pakigpulong ni Elder Jeffrey R. Holland ug giganahan sa iyang gisulti: “Ang nangagi angay nga makat-unan apan dili puy-an. … Kon kita makakat-on kon unsa ang kinahanglan nga makat-unan … , dayon kita molantaw sa unahan ug mohinumdom nga ang hugot nga pagtuo kanunay nagtumong ngadto sa umaabut.”1
Usa ka adlaw sa dihang naglisud ko pag-ayo, akong gibasa ang akong patriyarkal nga panalangin. Samtang nagbasa ko niini, nakaamgo ko nga ako adunay umaabut. Ang Dios adunay plano alang kanako, ug Siya nahigugma gayud kanako. Ang pag-adto sa simbahan, pag-ambit sa sakramento, pagbasa sa mga kasulatan, ug pag-ampo nakadala og dakong kahayag ug kalipay sa akong kinabuhi. Nakaamgo ko wala madugay, “Nakatabang gayud kini kanako.” Diha nako nahibaloan nga gusto nako ang ebanghelyo sa akong kinabuhi kanunay. Human sa tanan nakong naagian, nasayud ko nga ang ebanghelyo miluwas sa akong kinabuhi, ug malipayon kaayo ako niana.
Ang paghisgot mahitungod sa akong depresyon ngadto sa pamilya ug mga higala nakatabang pag-ayo. Miresulta usab kini sa dugang nga tabang. Dili ko gustong motumar og mga tambal o moadto sa therapy. Nagsige ko og sulti sa akong kaugalingon, “Aduna akoy Dios.” Apan ang Dios mihatag og daghan pa nga mga himan, sama sa tambal ug therapy, aron atong gamiton agig dugang sa espirituhanong mga butang.
Samtang misugod ko sa pagbasa sa akong mga kasulatan nga mas kadaghan matag adlaw ug nagkaduol ngadto sa Dios pinaagi sa pag-ampo, nakadawat ko og daghang mga panalangin ug mga pagpadayag nga ang akong katuyoan mao ang pagtabang sa uban. Gibati nako nga daw daghan kanato nag-atubang og problema sa kahimsog sa pangisip ug naningkamot kita sa pagtago niini. Ang akong depresyon ug mga panlimbasug nagtudlo kanako nga mas maayo nga makig-istorya ug mokonektar sa uban. Ang akong higala bag-ohay lang nga mihisgot kanako mahitungod sa iyang panlimbasug sa depresyon. Nag-istorya kami kabahin niini ug nakasabut gayud kami sa usag usa.
Dili nato kanunay mabantayan kon unsay gipanlimbasugan sa uban, apan maglakaw-lakaw ra ko usahay ug motan-aw sa ubang tawo ug makaamgo nga ang Dios nakaila sa matag usa kanato. Siya nahigugma kanato ug nahibalo gayud unsay nasinati natong tanan. Ug makatabang kita sa usag usa.
Pinaagi sa akong mga panlimbasug sa depresyon, nakakat-on ko sa pagpangutana, “Unsay akong makat-unan gikan niini nga pagsulay?” imbis nga “Nganong aduna man ko niini nga pagsulay?” Ganahan ko sa Ether 12:27, diin nag-ingon kini nga ang mahuyang nga mga butang pwedeng mahimong lig-on kon aduna kitay pagtuo diha ni Jesukristo. Kanunay kini nga makahupay kanako.
Kitang tanan mipili nga moanhi dinhi sa yuta. Nasayud kita nga mag-antus kita og mga pagsulay. Ug sa tinuod lang kana ang nakapahimo sa kinabuhi nga nindot. Tungod kay nasayud kita nga adunay maayong mga butang nga moabut. Nasayud kita nga kon mosunod kita sa Manluluwas sa matag lisud nga panahon, makaangkon kita og kinabuhing dayon ug kining tanan nga mga panalangin nga naghulat kanato.
Klaro nakong nabantayan kon sa unsang paagi ako nausab tungod sa akong depresyon. Ang Pag-ula sa Manluluwas tinuod, nausab ang akong kasingkasing, ug mas nalig-on ko. Gibati nako nga daw lahi ako nga tawo kay sa unsa ako kaniadto. Ang mga tawo nakamatikod ug moingon, “Nausab ka.” Usa ka babaye sa eskwelahan miingon pa gani, “Nakakita ko og kalainan ug kahayag diha kanimo.” Salikwaut kini tungod kay dili gani siya miyembro sa Simbahan, ug wala pa gayud kami magkaistorya sukad.
Dihang anaa ko sa akong labing grabe nga depresyon, ang mga tawo moingon kanako, “Mamaayo ra ni.” Kapuyon kaayo ko nga maminaw niana apan, bisan salikwaut kining paminawon, tinuod kana.
Apan kinahanglang gustuhon nimo nga mamaayo. Akong nakat-unan nga dili ka magdahum nga mamaayo kon walay buhaton. Kinahanglang gustuhon nimo nga magmalipayon ug motuo nga ikaw adunay potensyal ug kaugmaon. Importante nga hinumduman nga gihigugma ka sa daghan kaayong mga tawo, lakip sa imong Langitnong Amahan. Anaa silang tanan aron sa pagtabang kanimo.
Wala gayud ako magtuo nga maingon ako niini ka malipayon karon. Adunay mga adlaw nga manglimbasug gihapon ko, apan uban sa mga himan nga gihatag sa Langitnong Amahan kanako, makahimo ako niini. Karon kon mobati ko sa akong kaugalingon nga nagpadulong sa depresyon, akong sultihan ang akong kaugalingon nga gimahal ako, aduna akoy mga tawo nga makaistorya, ug mamaayo ra ang sitwasyon.
Ang pagsagubang og depresyon nakahimo kang Berglind nga mas nakamatngon kon sa unsang paagi kita makatabang sa usag usa tadlas sa mga hagit. “Ang Dios nakaila sa matag usa kanato, nahigugma Siya kanato, ug nasayud gayud Siya unsay nasinati natong tanan. Ug makatabang kita sa usag usa.”
Si Berglind nakakita og kausaban sa iyang kaugalingon tungod sa iyang mga hagit. “Ang Pag-ula sa Manluluwas tinuod,” miingon siya. “Nausab ang akong kasingkasing, ug mas nalig-on ko. Gibati nako nga daw lahi ako nga tawo kay sa unsa ako kaniadto.”
Samtang misugod ko sa pagbasa sa akong mga kasulatan nga mas kadaghan matag adlaw,” miingon si Berglind, “nakadawat ko og daghang mga panalangin ug mga pagpadayag nga ang akong katuyoan mao ang pagtabang sa uban. Ganahan ko sa Ether 12:27, diin nag-ingon kini nga ang mahuyang nga mga butang pwedeng mahimong lig-on kon aduna kitay pagtuo diha ni Jesukristo. Kanunay kini nga makahupay kanako.”