Mahimo Kitang Mopakatap sa Kahayag sa Ebanghelyo
Litrato pinaagi ni Weston C. Colton
Ang batan-on nga pagkahingkod mao ang panahon alang sa pagtubo, mga oportunidad, ug usa ka kahigayunan nga mosugod sa pagtukod sa imong kinabuhi. Ug kana posibleng lisud, makahinam, ug makahadlok sa samang higayon (ingon ana gayud kadto alang kanamo).
Apan samtang wala kita masayud sa mga tubag sa tanang labing dinalian nga mga pangutana sa kinabuhi, adunay usa ka butang nga hingpit kitang sigurado—nga ang mga young adult sa kanunay usa ka mahinungdanon kaayo nga pwersa sa nagpadayon nga Pagpahiuli sa Simbahan ni Jesukristo.
Sa pagplano sa seksyon niining bulana, nakigsulti kami sa daghang mga young adult mahitungod sa ilang pag-apil sa pagpundok sa Israel. Ug nahimo kaming mapaubsanon tungod sa ilang sinsero nga gugma ug pagkamaunungon sa ebanghelyo ni Jesukristo. Bisan pa sa ilang mga kahimtang, kining batan-ong mga Santos nakasabut sa ilang mahinungdanong tahas niining katapusang dispensasyon. Diha sa “Sa Unsang Paagi ang mga Young Adult Naghimo og Kalainan sa Nagpadayon nga Pagpahiuli” sa pahina 44, imong mabasa kon sa unsang paagi ang mga young adult sa India, Hungary, Barbados, Australia, ug sa Estados Unidos miandam sa kalibutan alang sa Ikaduhang Pag-anhi sa Manluluwas.
Sa pang-digital lamang nga mga artikulo, si Cesar mihatag og mga panabut kon sa unsang paagi nato makita ang atong katuyoan ug mahimong mas maayo nga mga lider. Si Lauri naghisgot mahitungod sa mga panalangin nga atong madawat kon kita mosunod sa tambag sa propeta. Ang ubang mga young adult mipaambit sa ilang mga kasinatian sa pagserbisyo sa templo, pagpangalagad, family history, ug misyonaryo nga buhat. Ug mipaambit kami og ehemplo gikan sa usa ka young adult sa New Caledonia nga naghulagway kon sa unsang paagi ang batan-ong mga miyembro naghimo sa buhat sa Ginoo diha sa gagmay nga mga dapit sa Simbahan.
Bisan asa ka ug bisan unsa ang imong kahimtang, makahimo ka og mas dakong kalainan diha sa pagpundok sa Israel kay sa imong mahunahunaan. Isip mga young adult, kita ang umaabut nga mga lider niini nga Simbahan. Ug ang aligato sa atong mga paningkamot karon moduslit ug mopakatap sa kahayag sa ebanghelyo sa tibuok kalibutan sa umaabut.
Matinuoron,
Chakell Wardleigh ug Mindy Selu
Mga editor sa mga Magasin sa Simbahan sa seksyon sa young adult