Sa Unsang Paagi ang mga Young Adult Naghimo og Kalainan sa Nagpadayon nga Pagpahiuli

Ang mga young adult kanunay nga adunay importanting tahas sa buhat sa kaluwasan.

Kon makadungog kamo og imbitasyon sa usa ka lider sa Simbahan nga moapil sa nagpadayon nga Pagpahiuli o motabang sa pagpundok sa Israel, maghunahuna ba kamo, “Unsay akong mabuhat? Usa lang ko ka tawo,” “Bata pa ko kaayo,” “Dili pa ko minyo,” o “Wala koy igong nahibaloan. Unsa nga kalainan ang akong mahimo?”

Ang matag usa kanato adunay sama niana nga mga hunahuna nga mosulod sa atong utok matag karon ug unya. Apan paningkamot nga mawagtang kana nga pagduha-duha sa kaugalingon samtang mobasa ka sa mosunod nga pipila ka mga kapahayag:

Si Joseph Smith 22 anyos pa lang sa dihang misugod siya sa paghubad sa Basahon ni Mormon.
Si Oliver Cowdery 22 anyos usab ug si John Whitmer 26 anyos (ug pareho sila nga mga ulitawo!) sa dihang misugod sila sa pagtrabaho isip tigsulat ni Joseph.
Niadtong 1835, sa dihang gitawag ang unang Korum sa Napulog Duha ka mga Apostoles, ang ilang mga edad anaa sa 23 ngadto sa 35.
Daghan sa unang mga Santos kinsa mipasakop sa Simbahan ug mipakatap sa ebanghelyo mga young adult.

Sa kinatibuk-an, ang Dios milihok pinaagi sa mga young adult sa nag-unang mga adlaw sa Pagpahiuli sa ebanghelyo ni Jesukristo. Mga tawo nga sama nimo.

Pamalandungi kana.

Ang Simbahan wala mokatap sa tibuok yuta karon kon ang tanan nagtuo nga sila walay mahimong kalainan. Ug ikaw—oo, ikaw!—kabahin sa usa ka pinili nga kaliwatan nga mopadayon sa pagpahiuli ug pagpangulo sa Simbahan ni Jesukristo karon.

Gipadala Ka Dinhi. Karon. Alang sa usa ka Rason.

Kon maghisgot mahitungod sa atong henerasyon, si Presidente Russell M. Nelson mitudlo, “Nagpuyo kamo sa ‘ikanapulo ug usa nga takna.’ Ang Ginoo mipahayag nga kini mao ang katapusan nga panahon nga Siya motawag og mga mamumuo ngadto sa Iyang ubasan sa pagpundok sa mga pinili gikan sa upat ka mga suok sa kalibutan. (Tan-awa sa D&P 33:3–6.) Ug kamo gipadala sa pag-apil niini nga panagpundok.”¹

Hunahunaa ang pundok sa 65,000 ka full-time nga misyonaryo nga nagpaambit sa ebanghelyo sa tibuok adlaw, kada adlaw, sa tibuok kalibutan. Hunahunaa ang tanang young adult nga naghimo og mga pakigsaad sa templo, nagpahimulos sa gipahiuli nga pagkapari ug mga panalangin sa templo ug nakigsaad nga magmatinud-anon, molig-on sa ilang mga pamilya, ug mopalig-on sa gingharian sa Dios dinhi sa yuta. Hunahunaa ang mga young adult nga nagserbisyo isip mga lider sa Simbahan sa tibuok kalibutan. Hunahunaa kadtong padayon nga naningkamot sa pagsunod ni Jesukristo bisan pa sa tanang pagsulay nga ilang nasinati. Ang mga young adult importante na nga bahin sa Pagpahiuli sukad pa sa sinugdanan. Ug ang nagpadayon nga Pagpahiuli importante nga bahin sa kinabuhi sa daghang young adult nga mga miyembro sa Simbahan.

Unsay Kahulugan sa Pagpahiuli ngari Kanato

Alang sa kadaghanan kanato, ang atong pag-apil sa Pagpahiuli naggikan sa unsay gitudlo niini kanato. Alang ni Vennela Vakapalli, usa ka young adult nga kinabig gikan sa Andhra Pradesh, India, “ang Pagpahiuli mao ang mahitungod sa pagtinguha og pagpadayag. Si Joseph Smith nagtinguha og pagpadayag diha sa kakahoyan. Nagpakitambag siya sa Ginoo, mihulat siya sa tubag, nagmapailubon siya. Mao kana ang akong giganahan.” Si Vennela mipasabut, “Sa wala pa ako makadungog mahitungod sa Pagpahiuli, wala kaayo akoy nasayran mahitungod sa pagtinguha og pagpadayag. Usa sa labing importanting mga butang nga nakapahingangha nako mao ang kadako sa panahon nga iyang gigahin sa pag-angkon og pagpadayag gikan sa Dios. Mao kana ang akong nakat-unan gikan sa Pagpahiuli.”

Si Emma ug Jacob Roberts, batan-ong magtiayon gikan sa Utah, USA, miuyon nga ang Pagpahiuli mao ang mahitungod sa “nagpadayon nga pagpadayag”—alang sa atong kaugalingon ug alang sa kalibutan—”nga makaangkon kita og propeta, usa ka tigpamaba dinhi sa kalibutan gikan sa Dios, nagsiguro nga bisan unsa pa ang mga hagit nga masinati nato sa kalibutan, aduna kitay tawo nga nagtrabaho ug nag-ampo ug nakigsulti sa Dios sa pagsiguro nga andam kita ug makahimo sa pag-atubang sa bisan unsang mga hagit nga dala sa kalibutan samtang nausab kini.”

“Ang daghan kaayong kahibalo nga miabut tungod sa Pagpahiuli nakapahimo sa akong kinabuhi nga mas sayon ug dili kaayo makahasol,” miingon si Jacob. Miabut kini uban sa kasiguroan “nga adunay Dios nga nagmahal kanato ug nagbantay kanato,” miingon si Emma. “Ang iyang tuyo mao ang atong kalipay. Isip mga young adult, hingpit kita nga makasalig ug makasunod Kaniya tungod kay nasayud kita nga ang Iyang tumong mao ang atong kalipay. Nasayud kita nga kita mahangturong mga binuhat, ug naghatag kana kanako og dakong paglaum ug pagtuo, nga bisan unsay akong buhaton karon ug bisan unsa ang mga sayop nga akong mahimo karon, makahimo gihapon ako sa paghinulsol ug aduna ako niini nga panahon sa paglambo ug pagkat-on.”

Kana nga matang sa kasiguroan nakatabang usab ni Ramona Morris, usa ka young adult gikan sa Barbados, sa una niyang pagkat-on mahitungod sa Pagpahiuli. Apil sa ubang butang, nakaangkon siya og pagpamatuod nga ang “Langitnong Amahan anaa alang kanato. Ang Pagpahiuli makahatag gayud og kalinaw ngadto niadtong nagpangutana sa katuyoan sa ilang kinabuhi ug nagpangutana sa plano sa Dios alang kanila.”

Apan bisan kon ang pagsabut sa Pagpahiuli nakahatag og katin-awan sa iyang kinabuhi, miangkon usab siya nga “tungod sa pagkalayo kaayo sa punoang buhatan sa Simbahan, lisud nga makonektar sa ebanghelyo, apan tungod kay duna akoy lig-ong pagpamatuod sa gipahiuli nga ebanghelyo, nasayud ko nga bisan og layo ko, mabati gihapon nako nga kabahin sa Pagpahiuli, nga wala ako mag-inusara.”

Ug wala gayud siya mag-inusara. Ang mga young adult sa tibuok kalibutan miapil sa Pagpahiuli pinaagi sa pagserbisyo sa templo, family history, ug misyonaryo nga buhat. Tungod sa pagsabut sa personal nga pagpadayag nga atong naangkon gikan sa pagkat-on mahitungod sa Unang Panan-awon ni Joseph Smith ug sa Pagpahiuli, makahimo kitang tanan nga magpadayon sa pagtinguha nga masayud sa kabubut-on sa Dios ug unsa nga tahas ang atong mahimo sa nagpadayon nga Pagpahiuli.

Mga Young Adult nga Nangulo sa Simbahan

Bisan kon mga young adult kita, pwede kitang mahimong mga lider sa Simbahan karon. Bisan og siya lang ang bugtong miyembro sa Simbahan sa iyang pamilya, si Janka Toronyi sa Győr, Hungary, nalig-on sa pag-apil sa iyang mga kaubang young adult diha sa ubang mga aspeto sa Pagpahiuli: “Daghan sa akong mga higala ang nagmisyon, ug nindot kaayo nga makita ang ilang pag-uswag ug unya mibalik sila ug hilabihan ang ilang pagkahingkod tungod sa tanan nilang kasinatian. Usa kini ka talagsaon nga kasinatian alang kanamong tanan. Ug kanunay nga nindot makita ang akong mga higala nga young single adult nga nagserbisyo sa ilang mga calling ug usahay bisan sa mga oportunidad nga sila mismo ang naghimo, sama sa pagboluntaryo nga mahimong magtatambag sa mga komperensya sa AKK (Alang sa Kalig-on sa Kabatan-onan). Gibati nako nga ang Pagpahiuli dili kanunay nga mahitungod sa pagtudlo sa katawhan mahitungod sa ebanghelyo—mahitungod kini sa paglig-on sa atong mga miyembro.”

Ang mga young adult sa Hungary nakasabut nga sila ang umaabut nga mga lider sa Simbahan. “Gikinahanglan kami ug kinahanglang makahimo kami sa buluhaton, nga usahay lisud,” miangkon si Janka. “Gipadali sa Ginoo ang buhat ug kami kabahin niini. Usahay maghunahuna kami, ‘Unsaon kaha nako kini pagbuhat?’ Apan nindot nga makita nga ang atong mga lider misalig pag-ayo kanamo. Makapadasig kini niadtong nagmahal sa Simbahan ug adunay lig-on nga pagpamatuod, tungod kay nasayud kami nga usa ka adlaw kami ang himoong responsable. Kinahanglan kaming modawat sa responsibilidad alang sa among kaugalingong espirituhanong pag-uswag.”

Si Sean ug Stefany Joseph gikan sa Western Australia miapil sa Pagpahiuli pinaagi sa pagtudlo sa kabatan-onan sa ilang ward. “Alang kanako, ang pag-apil sa Pagpahiuli mao ang pagtabang sa umaabut nga mga henerasyon nga makasabut unsa ang ebanghelyo ug sa unsang paagi kini makatabang kanila ug sa uban diha sa ilang kinabuhi,” miingon si Stefany. “Makatabang kami sa pagmugna og mas lig-on nga pundasyon alang sa Simbahan diha sa among nasud sa umaabut.”

“Gusto namo nga motabang sa kabatan-onan nga makabaton og pagpamatuod sa Basahon ni Mormon ug ni Joseph Smith ug makaamgo sa ilang kaugalingon nga tinuod sila nga mga anak sa Dios,” mipasabut si Sean. “Dili namo gusto nga usa kini ka butang nga kantahon lang nila sa Primary— gusto namo nga mahibaloan gayud nila nga tinuod kini.”

Alang kang Vennela, ang pagsunod sa ebanghelyo didto sa India dili kanunay sayon, apan nasayud siya nga ang kalig-on sa mga miyembro nga young adult didto makadasig sa uban ug makatabang sa paglambo sa Pagpahiuli. “Dinhi, ang mga young adult matinud-anon kaayo. Mangita sila og mga oportunidad sa pagpaambit sa ilang mga pagpamatuod,” miingon siya. “Mora kami og mga pioneer sa India. Magbalhin-balhin kami gikan sa lain-laing mga dapit ug gani ang pipila kanamo mobiya sa among mga pamilya. Ang kinabuhi posibling lisud dinhi, apan mipili gihapon kami sa pagsunod sa ebanghelyo. Ang mga kasulatan naghatag kanako og dakong paglaum, kalig-on, ug kaisug.”

Bisan asa pa kita, isip mga young adult, makapadayon kita nga adunay kusganong impluwensya sa nagpadayon nga Pagpahiuli pinaagi sa atong pagtuo ug pasalig sa ebanghelyo.

Ang Umaabut sa Simbahan: Depende ra Kanato

Kita ang umaabut sa Simbahan. Anaa kita sa katapusang pakiggubat. Ang Langitnong Amahan misalig kanato nga motabang Kaniya sa Iyang buhat—ang Iyang buhat nga makapausab og kinabuhi sa kahangturan. Nasayud Siya nga igo ang atong kalig-on nga mopadayon sa unahan ug makigbatok sa tanang paagi sa kaaway. Ug si Satanas nag-anam na ka desperado. Nasayud siya nga dili siya makadaug niini nga gubat tungod kay ang buhat sa Ginoo mopatigbabaw.

“Nasayud kita nga gipadali sa Ginoo ang buhat ug walay makapugong niana,” miingon si Janka. “Nasayud kita nga mahitabo gayud kana bisan og magkinaunsa pa. Apan kinahanglan kitang mohukom kon mahimo ba kitang kabahin niini ug motabang niini sa pag-uswag o motan-aw lang diha sa daplin. Aduna kitay kabubut-on aron mahimong kabahin niini, ug aduna kitay pagpamatuod aron makahimo sa pagpili sa husto ug mopili sa pagsunod ni Kristo. Kinahanglan kitang mahimong kabahin niini.”

Busa depende ra kanato ang pagpili kinsa ang atong dapigan.

Depende ra kanato ang pagbaton og kaisug aron mobarug sa unsay atong gituohan.

Depende ra kanato ang pagtinguha og personal nga pagpadayag alang sa atong kinabuhi.

Depende ra kanato ang pagtugot sa lisud nga mga hagit nga atong giatubang nga mopalig-on sa atong pagtuo sa Manluluwas.

Depende ra kanato ang pagsunod Kaniya ug pagbuhat sa tanan natong mahimo aron madala ang uban ngadto Kaniya.

Depende ra kanato ang paglahutay hangtud sa katapusan sa pinakamaayong paagi nga atong mahimo.

Anaa na gayud kita sa katapusang mga adlaw. Ug ang pagpangulo sa Simbahan sa unsay gitawag ni Presidente Nelson nga “labing mahinungdanong dispensasyon sa kasaysayan sa kalibutan”² morag bug-at ra kaayo nga responsibilidad. Apan hunahunaa kini—ang Langitnong Amahan igo nga misalig kanato ug mitagana kanato nga maanaa sa kalibutan niining piho nga punto sa panahon, niining panahon diin mag-atubang kita og dili maihap nga mga tintasyon ug mga makabalda ug daghang nagkasumpaki nga mga opinyon.

Pinaagi sa pagpadala kanato dinhi sa labing mahinungdanong dispensasyon, wala giplano sa Langitnong Amahan nga mapakyas kita. Nasayud Siya sa atong potensyal, sa atong kalig-on, sa atong kaisug, ug sa katapusan, nasayud Siya nga makahimo kita og kalainan diha sa Pagpahiuli sa Simbahan, bisan unsa pa ang atong edad o kahimtang sa kaminyoon. Bisan unsa pa ka lisud ang atong mga pagsulay, o unsa ka lisud ang pagpangulo ug pagpaambit sa ebanghelyo sa tibuok kalibutan, kon anaa Siya nga nagsuporta kanato, kinsa man ang makahimo sa pagpakig-away batok kanato? Motabang Siya kanato sa paghimo sa imposible.