Ang Nagpadayon nga Pagpahiuli
Ang Pagpahiuli nagsugod sa Sagradong Kakahoyan 200 ka tuig na ang milabay ug nagpadayon karon—ug kamo ug ako pwede nga mahimong kabahin niini.
Ang mga Tinguha sa Akong Kasingkasing (Unang Panan-awon), ni Walter Rane
Talagsaon ug makahinam karon nga panahon nga maanaa sa yuta. Panalangin nato nga moapil sa dagkong mga panghitabo sa dispensasyon sa kahingpitan sa panahon, pagpangandam sa Ikaduhang Pag-anhi sa Ginoo.1 Dili lamang nga makakita kita niining talagsaon nga mga panghitabo apan mahimo usab nga parte niini.2
Usahay maghisgot kita sa Pagpahiuli sa ebanghelyo nga daw nahitabo kining tanan sa usa lang ka higayon. Duha ka gatus ka tuig ang milabay, ang Unang Panan-awon misugod sa proseso, apan, siyempre, ang Pagpahiuli wala matapos didto. Ang buhat sa Ginoo pinaagi ni Joseph Smith ug sa iyang mga kauban mipadayon diha sa paghubad sa Basahon ni Mormon, pagpahiuli sa pagkapari, pag-organisar sa Simbahan, pagpadala og mga misyonaryo, pagtukod og mga templo, pag-organisar sa Relief Society, ug uban pa. Kini nga mga panghitabo sa Pagpahiuli misugod niadtong 1820 ug mipadayon sa tibuok kinabuhi ni Joseph Smith.
Bisan nindot kaayo ang mga butang nga gipadayag sa Dios pinaagi ni Joseph Smith, ang Pagpahiuli wala makompleto sa panahon ni Joseph. Pinaagi sa mga propeta pagkahuman niya atong nadawat ang mga butang nga sama sa nagpadayon nga paglambo sa buhat sa templo; dugang nga mga kasulatan; paghubad sa mga kasulatan ngadto sa daghang pinulongan; pagdala sa ebanghelyo ngadto sa tibuok kalibutan; ang pag-organisar sa Sunday School, Young Women, Primary, ug mga korum sa pagkapari; ug daghang kausaban sa organisasyon ug pamaagi sa Simbahan.
“Mga saksi kita sa proseso sa pagpahiuli,” miingon si Presidente Russell M. Nelson. “Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita. Daghan pa kaayo ang moabut. … Hulata ang sunod tuig. Ug dayon ang sunod pa nga tuig. Tumara ang inyong bitamina. Pahulay. Makahinam kaayo kini.”3
Nahisubay sa pamahayag ni Presidente Nelson nga nagpadayon ang Pagpahiuli, atong nakita ang daghang mahinungdanong kausaban sa Simbahan sukad siya nahimong Presidente niini. Lakip niini mao ang pag-usab sa mga korum sa pagkapari, ang pagpangalagad nga mipuli sa home ug visiting teaching, ug ang pagpasiugda sa nakasentro sa panimalay, gisuportahan sa Simbahan nga paagi sa pagtuon sa ebanghelyo.4 Dugang nga mga kausaban ang nahitabo sukad niadto, ug daghan pa ang moabut.
Usa ka Ehemplo sa West Africa
Ang akong pagpamatuod kalabut sa nagpadayon nga kinaiya sa Pagpahiuli naimpluwensyahan sa lima ka tuig nga akong gigahin sa pagserbisyo diha sa Africa West Area Presidency. Sukad sa akong kabatan-on, aduna akoy pagpamatuod sa ebanghelyo. Apan sa akong pagpuyo sa Africa, nakauban nako ang pipila sa unang mga taga-West Africa nga midawat sa ebanghelyo. Nakita usab nako ang Simbahan nga paspas nga mikatap sa tibuok kontinente, diin gatusan ka mga ward ug mga stake ang naporma, ang mga templo ug mga meetinghouse napuno sa matinud-anong mga miyembro, ug ang maayo nga mga babaye ug mga lalaki midawat, sa tibuok nilang kasingkasing, sa gipahiuli nga ebanghelyo. Nakita sa kaugalingon nakong mga mata ang katumanan sa panagna ni Joseph Smith nga ang Simbahan “mopuno sa yuta.”5
Duha sa ingon nga matinud-anong mga miyembro, si James Ewudzie ug Frederick Antwi, miabag nako usa ka adlaw sa Accra Ghana Temple. Pipila ka tuig sa wala pa moabut ang mga misyonaryo nga Santos sa Ulahing mga Adlaw didto sa Ghana, si James kabahin sa usa ka grupo sa mga 1,000 ka tawo kinsa migamit sa Basahon ni Mormon ug ubang mga materyal sa Simbahan sa ilang mga tulumanon sa simbahan. Nag-ampo sila alang sa adlaw nga ang Simbahan moabut sa Ghana. Miapil siya sa ubang batan-ong lalaki nga mibiyahe libut sa Ghana ug mitudlo sa ebanghelyo sumala sa makita diha sa atong mga materyal. Sa dihang ang mga misyonaryo miabut niadtong 1978, gibunyagan siya sa unang adlaw nga ang mga bunyag sa Santos sa Ulahing mga Adlaw gipahigayon didto sa Ghana.
Si Fred Antwi, usa ka pioneer nga miyembro sa Simbahan sa Ghana
Sa sayong bahin sa pagka-miyembro ni Fred, mitambong siya og haya sa usa ka paryente kinsa usa ka pangulo sa tribo. Didto iyang nasayran nga ang plano sa pamilya mao ang paghimo kaniya nga bag-ong pangulo. Nasayud nga ang ingon nga katungdanan makapahimo niya sa pagbuhat og mga butang nga sukwahi sa iyang mga tinuohan sa ebanghelyo, nagdali siyang mibiya human sa lubong ug mibalibad sa usa ka posisyon nga makahatag unta niya og kabantug ug bahandi.
Sa dihang gipahinungod na ang Templo sa Accra, si James ug Fred mibiyahe og sobra sa upat ka oras, sa usa ka direksyon, matag semana aron mahimo sila nga mga temple worker. Samtang mipahigayon ko og mga ordinansa uban kanila, napuno ako sa pagbati sa kasaysayan nga naglibut kanako. Nakaamgo sa kasaysayan sa Simbahan sa Africa nga girepresentar nilang duha, akong gibati nga susama kini nga si John Taylor o Wilford Woodruff o ubang nag-unang mga miyembro sa Simbahan kauban nako nga nagbuhat niadto nga mga ordinansa.
Ang akong nakita, nasinati, ug gibati sa West Africa maoy kabahin sa unsay gisulti sa Ginoo ngadto ni Enoch nga mahitabo: “Ug pagkamatarung ako mopakanaog gikan sa langit; ug kamatuoran Ako mopadala gikan sa yuta, aron sa pagpamatuod sa akong Bugtong Anak; … ug pagkamatarung ug kamatuoran Ako mosugo nga mosilhig sa yuta ingon sa usa ka lunop, aron pagpundok sa akong pinili gikan sa upat ka mga suok sa yuta” (Moises 7:62).
Akong nakita ang pagkamatarung ug kamatuoran nga mikatap sa tibuok kontinente sa Africa ug ang mga pinili gipundok gikan niana nga bahin sa kalibutan. Ang akong pagpamatuod sa Pagpahiuli miusbaw tungod kay akong nakita kana nga importanting bahin sa Pagpahiuli nga nahitabo sa akong atubangan.
Aduna pa usab akoy laing nakita kabahin sa nagpadayon nga Pagpahiuli: usa ka lig-ong pagtuo ug espirituhanong kalagsik taliwala sa mga miyembro sa Africa. Nakadungog ko ni Elder David A. Bednar sa Korum sa Napulog Duha ka mga Apostoles nga miingon, “Ang Kirtland [diin nagpuyo ang mga Santos sa Ulahing mga Adlaw niadtong mga 1830] dili lang diha sa Ohio. Anaa usab kini sa Africa.” Daghang tawo ang mipasakop sa Simbahan didto sa Africa base sa ilang gamhanang personal nga espirituhanong mga kasinatian. Kadtong bag-o nga mga miyembro nagdala og espirituhanong kalagsik ug panginahanglan alang sa dugang nga pagkat-on sa ebanghelyo. Alang kanila ang Pagpahiuli nagpadayon sa personal nga pagsabut. Samtang padayon silang dugang nga nagkat-on mahitungod sa Simbahan, ang mga kamatuoran sa ebanghelyo padayon nga nabuksan sa ilang panan-aw. Mao usab kini kanatong tanan samtang mopadayon kita sa pagpalambo sa atong kahibalo sa ebanghelyo.
Tulo ka Paagi sa Pagtabang sa Nagpadayon nga Pagpahiuli
Ang Dios mihatag kanato og talagsaong oportunidad sa paghimo og importanting mga tahas niini nga buhat. Ang Ginoo miingon nga ang “lawas [sa Simbahan] nagkinahanglan sa matag sakop” (Doktrina ug mga Pakigsaad 84:110). Ang tanang miyembro sa Simbahan adunay panalangin sa pag-apil niining nagpadayon nga Pagpahiuli. Unsaon nato paghimo niini?
Usa ka paagi nga makaapil kita mao ang paghimo ug pagtuman og sagradong mga pakigsaad. Ang mga ordinansa, lakip ang mga ordinansa sa templo, walay tumong gawas kon ang mga tawo mohimo gayud ug dayon motuman sa mga pakigsaad nga konektado niana nga mga ordinansa. Si Sister Bonnie Parkin, kanhi Kinatibuk-ang Presidente sa Relief Society, mitudlo, “Ang paghimo og mga pakigsaad mao ang pagpahayag sa andam nga kasingkasing; ang pagtuman sa mga pakigsaad, mao ang pagpahayag sa matinud-anong kasingkasing.”6
Pinaagi sa paghimo ug pagtuman sa mga pakigsaad, wala lang nato giandam ang atong kinabuhi alang sa kinabuhing dayon, apan nagtabang ug naglig-on usab kita sa unsay gitawag sa Ginoo nga “akong mga katawhan sa pakigsaad” (Doktrina ug mga Pakigsaad 42:36). Mohimo kita og mga pakigsaad uban sa Dios ug mahimong kabahin sa Iyang katawhan sa pakigsaad pinaagi sa bunyag, kumpirmasyon, sa sakramento, sa Melchizedek nga Pagkapari, ug mga ordinansa sa templo.
Ang ikaduhang paagi nga makaapil kita sa nagpadayon nga Pagpahiuli mao ang pagtuman sa mga katungdanan ug buluhaton nga atong madawat. Mao kana ang paagi nga mouswag ang Simbahan. Ang mahalaron nga mga magtutudlo motudlo sa ebanghelyo ngadto sa kabataan, kabatan-onan, ug mga hamtong. Ang tigpangalagad nga kaigsoonan moatiman sa indibidwal nga mga miyembro sa Simbahan. Ang mga kapangulohan ug mga bishopric mohatag og giya sa mga stake, mga district, mga ward, mga branch, mga korum, mga organisasyon, mga klase, ug mga grupo. Ang mga lider sa kabatan-onan moatiman sa batan-ong mga babaye ug batan-ong mga lalaki. Ang mga clerk ug mga sekretarya morekord sa mahinungdanong impormasyon nga marekord dayon sa langit, ug daghan pang uban ang mopahigayon og mahinungdanong mga tahas sa pag-andam sa katawhan alang sa kinabuhing dayon ug sa Ikaduhang Pag-anhi sa Manluluwas.
Kabatan-onan nga naglinya aron mosulod sa Accra Ghana Temple
Ang ikatulong paagi nga makaapil kita sa Pagpahiuli mao ang pagtabang sa pagpundok sa Israel. Gikan sa labing unang mga adlaw sa Pagpahiuli, usa kini ka mahinungdanong bahin sa buhat. Sama sa gitudlo ni Presidente Nelson, aduna kitay kahigayunan ug katungdanan nga motabang sa pagpundok nga mahitabo sa duha ka habig sa tabil. Sa iyang panapos nga mensahe sa iyang unang kinatibuk-ang komperensya isip Presidente sa Simbahan, si Presidente Nelson direktang misulti, “Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, modawat sa mga panalangin sa balaan nga templo, magbaton og molahutay nga kalipay, ug mahimong angayan sa kinabuhing dayon.”7
Ang pagpundok sa Israel dinhi nga habig sa tabil nagpasabut sa misyonaryo nga buhat. Kitang tanan kinsa makaserbisyo og full-time nga misyon kinahanglang ikonsiderar pag-ayo kana nga oportunidad. Giisip nako nga usa ka dakong panalangin nga nakahimo ko sa pagserbisyo og misyon sa Italy sa dihang bag-o pa ang Simbahan didto. Ang among mga branch nag-abut sa inabangan nga mga hawanan, ug naglaum kami nga sa umaabut aduna nay mga stake ug mga ward didto. Mitan-aw ko sa maisugong mga pioneer nga mipasakop sa simbahan ug mipahimutang sa pundasyon alang sa pagpundok sa Israel nianang maanindot nga yuta.
Usa niini mao si Agnese Galdiolo. Kaming tanan kusganong mibati sa Espiritu samtang gitudloan siya sa mga leksyon sa misyonaryo. Apan, bisan mibati niana nga Espiritu, nasayud siya nga mosupak pag-ayo ang iyang pamilya nga magpabunyag siya. Hinoon, sa usa ka punto, nga puno sa Espiritu, miuyon siya nga magpabunyag. Apan nausab ang iyang hunahuna sa buntag sa iyang iskedyul sa bunyag. Sayo siyang miabut sa inabangan nga hawanan diin didto siya bunyagan aron sa pagsulti namo nga tungod sa pagpamugos sa pamilya, dili siya makapabunyag.
Sa wala pa mobiya, miuyon siya nga mag-istorya mi og pipila ka minuto. Miadto kami sa usa ka lawak klasehanan diin gisugyot namo nga mag-ampo kami. Human kami makaluhod, gihangyo namo siya nga maoy mag-ampo. Human sa pag-ampo mibarug siya nga naghilak ug miingon, “Sige, magpabunyag ko.” Ug human sa pipila ka minuto nabunyagan siya. Pagkasunod tuig naminyo siya kang Sebastiano Caruso, ug mipadako sila og upat ka anak, diin ang tanan nakaserbisyo og misyon ug mipadayon sukad sa pagserbisyo sa Simbahan.
Si Elder ug Sister Curtis uban sa pipila ka sakop sa pamilyang Caruso
Si Agnese ug Sebastiano miserbisyo usab og misyon, diin si Sebastiano maoy presidente sa misyon. Sa dihang miserbisyo ko og ikaduha nga misyon sa Italy, 25 ka tuig human sa primero, akong nakita kon unsay nahimo sa mga Caruso ug sa ubang mga pioneer sa pagpalapad sa gingharian sa Dios didto. Ang akong mga misyonaryo ug ako mitrabaho sa pagpalig-on sa Simbahan, nagdamgo nga usa ka adlaw adunay templo nga tukuron sa Italy. Hunahunaa ang akong kalipay sa nahitabo nga kami karon aduna nay Rome Italy Temple.
Adunay pipila lang ka kalipay nga makatandi sa misyonaryong kalipay. Pagkadakong panalangin nga matawo sa panahon nga malipayon kitang makaapil sa nagpadayon nga Pagpahiuli pinaagi sa pagtabang sa pagpundok sa Israel!
Siyempre, ang misyonaryong kalipay dili lamang mabati sa full-time nga mga misyonaryo. Ang matag usa kanato makatabang sa pagkakabig o pagpaaktibo sa atong mga kaigsoonan pinaagi sa pakigtambayayong sa full-time nga mga misyonaryo. Aduna kitay oportunidad sa pagpundok sa Israel pinaagi sa pagdapit sa uban sa pagduol ug pagtan-aw ug pinaagi sa pagpakigdait niadtong gitudloan.
Pinaagi sa buhat sa templo ug family history nga kita makatabang sa pagpundok sa Israel sa pikas habig sa tabil. Daghan na nga katuigan nga atong sagradong responsibilidad ang paghimo niini nga buhat. Sa wala pa mamatay si Joseph Smith, ang mga Santos mipahigayon og mga bunyag alang sa mga patay, ug ang pipila nakadawat sa ilang mga tuga [endowment] ug mga pagsilyo. Sa pagkakompleto sa Templo sa Nauvoo, ang mga tuga alang sa buhi kadaghan na nga gipahigayon. Ang mga tuga ug pagsilyo alang sa katigulangan gisugdan usab sa mga templo sa Utah.
Si Eliza R. Snow, usa ka aktibong partisipante niana nga proseso sa pagpahiuli, nakasabut sa importansya niana nga bahin sa Pagpahiuli. Migahin siya og daghang panahon sa endowment house, mitabang sa mga ordinansa didto.8 Panahon sa usa ka pagbisita sa Relief Society niadtong 1869, mitudlo siya sa iyang mga sister, “Namalandong ko sa mahinungdanong buhat nga kinahanglan natong buhaton, gani sa pagtabang sa kaluwasan sa mga buhi ug mga patay. Gusto nato nga mahimong … takus nga mga kauban sa mga Dios ug mga Balaan.”9
Ug, siyempre, ang pagkaanaa sa mga ordinansa sa templo hilabihan nga napadak-an tungod sa pagtukod sa daghang mga templo sa tibuok kalibutan, nga dugangan pa.
Tungod sa mga himan nga mahimo natong magamit karon, ang buhat sa templo ug family history mahimong regular nga bahin sa atong pag-apil sa nagpadayon nga Pagpahiuli. Interesado ko ug miapil sa buhat sa family history sulod sa daghang katuigan, apan ang online nga mga himan hilabihan nga nakatabang sa akong kalampusan sa pagdala og mga ngalan sa pamilya ngadto sa templo. Aduna akoy sagradong mga panumduman nga naglingkod sa lamesa didto sa among apartment sa Ghana ug nangita og mga ngalan sa akong katigulangan nga taga-Europa nga madala nako ug sa akong asawa ngadto sa Accra Ghana Temple. Kana nga malipayong oportunidad misunod kanamo ngadto sa ubang mga dapit diin kami gipadala.
Pinaagi ni Propeta Joseph Smith, ang Dios misugod sa proseso sa “pagpahinabo sa pagpahiuli sa tanan nga mga butang nga gipamulong pinaagi sa ba-ba sa tanan nga balaan nga mga propeta sukad sa sinugdanan sa kalibutan” (Doktrina ug mga Pakigsaad 27:6). Kana nga pagpahiuli nagpadayon hangtud karon tungod kay ang Dios “[nag]padayag … karon” ug “mopadayag pa og daghan nga dagko ug mahinungdanon nga mga butang kalabut sa Gingharian sa Dios” (Mga Artikulo sa Hugot nga Pagtuo 1:9). Mapasalamaton kaayo ko nga makahimo kita sa pag-apil niining nagpadayon nga Pagpahiuli.