Ang Umaabut sa Simbahan: Pag-andam sa Kalibutan alang sa Ikaduhang Pag-anhi sa Manluluwas

Ni Presidente Russell M. Nelson

Ang Simbahan ni Jesukristo sa mga Santos sa Ulahing mga Adlaw nag-andam sa kalibutan alang sa adlaw nga “ang yuta mapuno sa kahibalo sa Ginoo” (Isaias 11:9).

Kamo ug ako makaapil sa nagpadayon nga Pagpahiuli sa ebanghelyo ni Jesukristo. Nindot kini kaayo! Kini dili hinimo sa tawo! Gikan kini sa Ginoo, kinsa miingon, “Ako modali sa akong buluhaton diha sa iyang angay nga panahon” (Doktrina ug mga Pakigsaad 88:73). Kini nga buhat gitugutan pinaagi sa balaang pahibalo 200 ka tuig na ang milabay. May pito lamang kini ka mga pulong: “Kini ang Akong Hinigugmang Anak. Paminaw Kaniya!” (tan-awa sa Joseph Smith—Kasaysayan 1:17).

Gipamulong sa Makagagahum nga Dios, kana nga pahibalo midala sa batan-ong si Joseph Smith ngadto ni Ginoong Jesukristo. Kadtong pito ka pulong maoy nagsugod sa Pagpahiuli sa Iyang ebanghelyo. Ngano? Tungod kay ang buhi natong Dios mapinanggaon nga Dios! Gusto Niya nga ang Iyang mga anak makaangkon ug imortalidad ug kinabuhing dayon! Ang dakong buhat sa ulahing mga adlaw nga kita kabahin giestablisar, sumala sa iskedyul, sa pagpanalangin sa kalibutan nga naghulat ug naghilak.

Dili ko makasulti bahin sa Pagpahiuli nga wala ang kahinam. Kining tinuod nga kasaysayan makahinuklog gayud! Talagsaon kini! Kulba-hinam kini! Katingalahan ba nga ang mga mensahero gikan sa langit mianhi aron sa paghatag og awtoridad ug gahum niini nga buhat?

Karon, ang buhat sa Ginoo sa Ang Simbahan ni Jesukristo sa mga Santos sa Ulahing mga Adlaw paspas nga nagpadayon. Ang Simbahan adunay talagsaon, walay sama nga umaabot. “Wala makita sa mata, ni madungog sa dalunggan, … ang gikatagana sa Dios alang kanila nga nahigugma kaniya” (1 Mga Taga-Corinto 2:9; tan-awa usab sa Doktrina ug mga Pakigsaad 76:10).

Hinumdumi nga ang kahingpitan sa pagpangalagad ni Kristo anaa sa umaabut. Ang mga panagna kabahin sa Iyang Ikaduhang Pag-anhi tumanon pa. Nagpadulong pa lang kita sa gikahinaman niining katapusang dispensasyon—sa diha nga ang Ikaduhang Pag-anhi sa Manluluwas mahimong reyalidad.

Pagpundok sa Israel sa Duha ka Habig sa Tabil

Ang gikinahanglan nga pasiuna sa Ikaduhang Pag-anhi mao ang dugay nang gihulat nga pagpundok sa nagkatibulaag nga Israel (tan-awa sa 1 Nephi 15:18; tan-awa usab ang ulohang pahina sa Basahon ni Mormon). Kini nga doktrina sa pagpundok mao ang usa sa mga importanting pagtulun-an sa Ang Simbahan ni Jesukristo sa mga Santos sa Ulahing mga Adlaw. Ang Ginoo mipahayag: “Ako mohatag nganha kaninyo sa usa ka timailhan … nga Ako mopundok, gikan sa ilang dugay nga pagkatibulaag, sa akong mga katawhan, O balay ni Israel, ug motukod pag-usab taliwala kanila sa akong Zion” (3 Nephi 21:1).

Wala lamang nato gitudlo kini nga doktrina, misalmot pa kita niini. Ato kining gibuhat samtang nagtabang kita sa pagpundok sa pinili sa Ginoo sa duha ka habig sa tabil. Isip kabahin sa giplano nga dangatan sa yuta ug sa mga lumulupyo niini, ang atong patay nga mga kaliwat kinahanglang matubos (tan-awa sa Doktrina ug mga Pakigsaad 128:15). Sa maloloy-ong paagi, ang pagdapit sa “pagduol ngadto kang Kristo” (Jacob 1:7; Moroni 10:32; Doktrina ug mga Pakigsaad 20:59) matanyag usab ngadto sa mga nangamatay nga walay kasayuran sa ebanghelyo (tan-awa sa Doktrina ug mga Pakigsaad 137:6–8). Hinoon, usa ka parte sa ilang pagpangandam nagkinahanglan sa yutan-on nga mga paningkamot sa uban. Magpundok kita og mga pedigree tsart, mohimo og mga family group sheet, ug mopahigayon og puli nga buhat sa templo aron sa pagpundok sa mga indibidwal ngadto sa Ginoo ug ngadto sa ilang mga pamilya (tan-awa sa 1 Mga Taga-Corinto 15:29; 1 Pedro 4:6).

Ang mga pamilya kinahanglang hiusahon pagsilyo alang sa kahangturan (tan-awa sa Doktrina ug mga Pakigsaad 2:2–3; 49:17; 138:48; Joseph Smith—Kasaysayan 1:39). Usa ka lig-ong koneksyon ang kinahanglang himoon tali sa mga amahan ug mga anak. Sa atong panahon, usa ka tibuok, kompleto, ug hingpit nga panaghiusa sa tanang dispensasyon, mga yawe, ug mga gahum kinahanglang lig-ong ikonektar (tan-awa sa Doktrina ug mga Pakigsaad 128:18). Alang niining sagrado nga mga katuyoan, ang balaang mga templo karon anaa sa tibuok kalibutan. Akong panghimug-atan pag-usab nga ang pagtukod niini nga mga templo tingali dili makausab sa inyong kinabuhi, apan ang inyong pagserbisyo sulod sa templo seguradong makausab.

Ang panahon moabut nga kadtong dili mosunod sa Ginoo ibulag gikan niadtong mosunod (tan-awa sa Doktrina ug mga Pakigsaad 86:1–7). Ang atong pinakaluwas nga paniguro mao ang pagpadayon nga mahimong takus nga makasulod sa Iyang balaan nga balay. Ang labing mahinungdanong gasa nga imong ikahatag sa Ginoo mao ang paghimo sa imong kaugalingon nga walay buling sa kalibutan, takus nga motambong sa Iyang balaan nga balay. Ang iyang gasa kaninyo mao ang kalinaw ug kasiguroan sa pagkasayud nga kamo takus sa pagsugat Kaniya, kon moabut na ang panahon.

Agig dugang sa buhat sa templo, ang pagtungha sa Basahon ni Mormon maoy usa ka timailhan sa tibuok kalibutan nga ang Ginoo misugod na sa pagpundok sa Israel ug sa pagtuman sa mga pakigsaad nga Iyang gihimo ngadto ni Abraham, Isaac, ug Jacob (tan-awa sa Genesis 12:2–3; 3 Nephi 21; 29). Ang Basahon ni Mormon nagdeklarar sa doktrina sa pagpundok (tan-awa, pananglitan, ang 1 Nephi 10:14). Nakapahimo kini sa mga tawo nga magkat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala ang Basahon ni Mormon, ang gisaad nga pagpundok sa Israel dili mahitabo.

Ang misyonaryo nga buhat importante usab niana nga pagpundok. Ang mga sulugoon sa Ginoo manglakaw aron sa pagsangyaw sa Pagpahiuli. Sa daghang mga nasud ang mga miyembro ug mga misyonaryo nangita sa nagkatibulaag nga Israel; nangayam sila kanila “gikan sa mga lungag sa mga pangpang” (Jeremias 16:16); ug nangisda sila kanila, sama sa karaang panahon.

Ang misyonaryo nga buhat mokonektar sa katawhan ngadto sa pakigsaad nga gihimo sa Ginoo uban ni Abraham sa karaan:

“Ikaw mahimo nga panalangin ngadto sa imong binhi nga mosunod kanimo, nga sa ilang mga kamot sila modala niini nga pagpangalagad ug Pagkapari ngadto sa tanan nga mga nasud;

Ug Ako mopanalangin kanila pinaagi sa imong ngalan; kay kutob sa modawat niini nga Ebanghelyo pagatawgon sunod sa imong ngalan, ug pagaiphon nga imong binhi, ug mobarug ug mopanalangin kanimo, ingon nga ilang amahan” (Abraham 2:9–10).

Ang misyonaryo nga buhat mao lang ang sinugdanan sa panalangin. Ang katumanan, ang pagkompleto, niadto nga mga panalangin moabut kon kadtong misulod na sa tubig sa bunyag mohingpit sa ilang kinabuhi ngadto sa punto nga sila makasulod sa balaan nga templo. Ang pagdawat sa tuga [endowment] didto mosilyo sa mga miyembro sa Simbahan ngadto sa pakigsaad kang Abraham.

Ang pagpili sa pagduol ngadto kang Kristo wala magdepende kon asa ka nagpuyo; nagdepende kini sa indibidwal nga pasalig. Ang tanang miyembro sa Simbahan makapahimulos sa doktrina, mga ordinansa, mga yawe sa pagkapari, ug mga panalangin sa ebanghelyo, bisan asa pa ang ilang nahimutangan. Ang mga tawo mahimong “pagadad-on sa kasayuran sa Ginoo” (3 Nephi 20:13) nga dili mobiya sa ilang mga yutang natawhan.

Tinuod, sa unang mga adlaw sa Simbahan, ang pagkakabig sa kasagaran nangahulugan usab og pagbalhin. Pero karon, ang pagpundok nahitabo diha sa kada nasud. Ang Ginoo mimando sa pag-establisar sa Zion (tan-awa sa Doktrina ug mga Pakigsaad 6:6; 11:6) sa matag kayutaan diin Iyang gihatag sa Iyang mga Santos ang ilang natawhan ug nasyonalidad. Ang dapit sa pagpundok alang sa Brazilian nga mga Santos mao ang Brazil; ang dapit sa pagpundok alang sa Nigerian nga mga Santos mao ang Nigeria; ang dapit sa pagpundok alang sa Korean nga mga Santos mao ang Korea. Ang Zion mao “ang putli og kasingkasing” (Doktrina ug mga Pakigsaad 97:21). Kana ang dapit diin anaa ang matarung nga mga Santos.

Ang espirituhanong seguridad kanunay nga magdepende kon giunsa sa pagpakabuhi sa usa ka tawo, dili kon asa ang usa ka tawo nagpuyo. Mosaad ko nga kon atong himoon ang atong labing maayo sa pagpakita og pagtuo diha ni Jesukristo ug mopahimulos sa gahum sa Iyang Pag-ula pinaagi sa paghinulsol, makabaton kita sa kahibalo ug gahum sa Dios aron matabangan kita sa pagdala sa mga panalangin sa gipahiuli nga ebanghelyo ni Jesukristo ngadto sa matag nasud, kaliwatan, pinulongan, ug katawhan ug sa pag-andam sa kalibutan alang sa Ikaduhang Pag-anhi sa Ginoo.

Ang Ikaduha nga Pag-anhi

Ang Ginoo mobalik sa yuta nga Iyang gihimong balaan pinaagi sa Iyang misyon didto sa mortalidad. Sa kadaugan, moadto Siya pag-usab sa Jerusalem. Magsul-ob og harianong kupo nga pula nga nagsimbolo sa Iyang dugo, nga miagas gikan sa matag lungag sa panit, Siya mobalik sa Balaang Siyudad (tan-awa sa Doktrina ug mga Pakigsaad 133:46–48). Didto ug bisan asa, “ang himaya sa Ginoo igapadayag, ug ang tanan nga unod sa tingub makakita niini” (Isaias 40:5; tan-awa usab sa Doktrina ug mga Pakigsaad 101:23). Ang Iyang “ngalan pagatawgon Kahibulongan, Magtatambag, Dios nga Makagagahum, Amahan nga walay Katapusan, Prinsipe sa Pakigdait” (Isaias 9:6).

Siya modumala gikan sa duha ka kaulohan sa kalibutan: ang usa sa karaang Jerusalem (tan-awa sa Zacarias 14) ug ang lain didto sa Bag-ong Jerusalem “pagatukuron diha sa Kayutaan sa America” (Mga Artikulo sa Hugot nga Pagtuo 1:10). Gikan niini nga mga sentro Siya mogiya sa mga kalihokan sa Iyang Simbahan ug gingharian. Usa ka laing templo pagatukuron sa Jerusalem. Gikan niana nga templo Siya magahari sa kahangturan isip Ginoo sa mga Ginoo. Adunay mogawas nga tubig gikan sa ilawom sa templo. Ang katubigan sa Patay nga Dagat mamaayo. (Tan-awa sa Ezequiel 47:1–8.)

Nianang panahona Siya adunay bag-ong mga ngalan ug palibutan sa espesyal nga mga Santos. Pagailhon Siya isip “Ginoo sa kaginoohan, ug ang Hari sa kaharian: ug sila nga [magauban] kaniya [mao kadtong mga] tinawag, ug mga pinili, ug mga kasaligan” (Pinadayag 17:14) sa ilang responsibilidad dinhi sa mortalidad. Dayon Siya “magahari sa kahangturan” (Pinadayag 11:15).

Ang yuta ibalik ngadto sa paraisohanong kahimtang niini ug mahimo nga bag-o. Adunay mahimong bag-o nga langit ug bag-o nga yuta (tan-awa sa Pinadayag 21:1; Ether 13:9; Doktrina ug mga Pakigsaad 29:23–24).

Atong responsibilidad—atong kahigayunan—nga motabang sa pag-andam sa kalibutan alang nianang adlawa.

Atubanga ang Umaabut uban sa Hugot nga Pagtuo

Sa kasamtangan, dinhi ug karon, nagpuyo kita sa panahon sa kasamok. Mga linog ug mga tsunami naghimo og kadaot, mga gobyerno napukan, grabeng problema sa ekonomiya, ang pamilya giataki, ug ang diborsyo nagkadaghan. Aduna kitay angay nga kabalak-an. Apan dili nato angayang tugutan ang atong mga kahadlok nga mowagtang sa atong hugot nga pagtuo. Atong masuklan kanang mga kahadlok pinaagi sa paglig-on sa atong pagtuo.

Nganong magkinahanglan man kita nianang malahutayon nga hugot nga pagtuo? Tungod kay ang malisud nga mga adlaw anaa sa unahan. Panagsa ra unya sa umaabut nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. Si Apostol Pablo mipahimangno nga sa ulahing mga adlaw, kadtong matinguhaon nga nagsunod sa Ginoo “pagalutoson gayud” (2 Timoteo 3:12). Kana nga paglutos mahimong mobitad kaninyo ngadto sa pagkahuyang o modasig kaninyo nga mas sulundon ug maisugon sa inyong inadlaw-adlaw nga kinabuhi.

Kon giunsa ninyo sa pag-atubang ang mga pagsulay sa kinabuhi maoy kabahin sa pagpalambo sa inyong pagtuo. Ang kalig-on moabut kon kamo makahinumdom nga kamo adunay balaanon nga kinaiya, usa ka panulundon nga labing bililhon. Ang Ginoo mipahinumdom kaninyo, sa inyong mga anak, ug sa inyong mga apo nga kamo ang tinuod nga mga manununod, nga kamo gitagana sa langit nga matawo sa inyong pihong panahon ug lugar, motubo ug mamahimong Iyang mga tiggunit sa bandila ug katawhan sa pakigsaad. Sa inyong paglakaw diha sa dalan sa Ginoo sa pagkamatarung, kamo mapanalanginan nga mopadayon diha sa Iyang pagkamaayo ug mahimong kahayag ug manluluwas ngadto sa Iyang katawhan (tan-awa sa Doktrina ug mga Pakigsaad 86:8–11).

Buhata ang bisan unsa nga gikinahanglan sa paglig-on sa inyong pagtuo kang Jesukristo pinaagi sa pagpalambo sa inyong pagsabut sa doktrina nga gitudlo sa Iyang gipahiuli nga Simbahan ug pinaagi sa walay puas nga pagtinguha sa kamatuoran. Nakabase sa lunsay nga doktrina, makahimo kamo sa pagpadayon uban ang pagtuo ug lig-on nga kamakanunayon ug malipayong mobuhat sa tanan nga anaa sa inyong gahum sa pagtuman sa katuyoan sa Ginoo.

Aduna kamoy mga adlaw nga mawad-an gayud sa kadasig. Busa pag-ampo alang sa kaisug nga dili moundang! Subo lang, pipila sa inyong giisip nga mga higala mobudhi kaninyo. Ug ang ubang butang daw dili lang gayud makiangayon.

Hinoon, ako mosaad kaninyo nga samtang kamo mosunod ni Jesukristo, inyong makaplagan ang malungtarong kalinaw ug tinuod nga kalipay. Samtang tumanon ninyo ang inyong mga pakigsaad uban sa nagkadugang nga katukma, ug samtang kamo manalipod sa Simbahan ug gingharian sa Dios dinhi sa yuta karon, ang Ginoo mopanalangin ninyo sa kalig-on ug kaalam sa pagbuhat sa unsay mabuhat lamang sa mga miyembro sa Ang Simbahan ni Jesukristo sa mga Santos sa Ulahing mga Adlaw.

Kita kinahanglang mahimong mga tigpalig-on sa indibidwal nga hugot nga pagtuo sa Dios, hugot nga pagtuo kang Ginoong Jesukristo ug hugot nga pagtuo sa Iyang Simbahan. Kinahanglan kitang mag-ugmad og mga pamilya ug masilyo sa balaang mga templo. Kinahanglang kitang motukod sa Simbahan ug gingharian sa Dios dinhi sa yuta (tan-awa sa Mateo 6:33). Kinahanglan kitang mangandam alang sa atong kaugalingong kapalaran: himaya, pagka-imortal, ug mga kinabuhing dayon (tan-awa sa Mga Taga-Roma 2:7; Doktrina ug mga Pakigsaad 75:5).

Mapaubsanon akong mopamatuod kaninyo nga—sama sa gipahayag ni Propeta Joseph Smith—ang gipahiuli nga ebanghelyo ni Jesukristo “magpadayon nga maisugon, halangdon, ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na” (History of the Church, 4:540).

Miapil kita sa buhat sa Labaw’ng Makagagahum nga Dios. Nag-ampo ko nga ang Iyang mga panalangin maanaa sa matag usa kaninyo.