Sa Digital Lamang: Mga Young Adult
Makatuman ba Gayud Ako sa Balaod sa Kaputli?
Sa dihang nahibalo ako mahitungod sa Simbahan ug sa balaod sa kaputli, dili ko sigurado nga kini usa ka butang nga akong mahimo—o gani gustong—tumanon.
Tungod kay nagdako ako sa gawas sa Simbahan, ang balaod sa kaputli dili kanunay usa ka butang nga akong gituman—dili gani kini usa ka butang nga akong nahibaloan. Ang akong mama wala gayud mitudlo sa akong kaluha nga lalaki o kanako mahitungod sa pagtuman sa bisan unsa nga moral nga mga sumbanan. Kami, ingon man ang akong manghud nga lalaki, natawo gawas sa kaminyoon. Ang among papa kasagaran moipon sa usa ka babaye sa dihang sila magsugod na sa pag-date.
Samtang nagkadako ko, ang akong mga panag-istoryahanay uban sa akong mga higala napuno sa dili maayo nga pinulongan. Sa hayskul nagsugod ko sa pagpakig-date sa usa ka lalaki kinsa wala usab magsubay sa mga sumbanan sa Simbahan, ug ang pagbuhat og mga butang nga wala mahisubay sa balaod sa kaputli sama ra sa normal nga “kasinatian nga kinahanglan maagian” padulong sa pagkahingkod.
Apan sa dihang nagsugod na ko sa pagpatudlo sa mga misyonaryo sa dihang nag-edad na ko og 18, gitudloan ko nila mahitungod kon sa unsang paagi ako kinahanglan nga adunay limpyo nga mga panghunahuna, maayo nga pinulongan, ug mga lihok nga nagsubay sa mga pagtulun-an ni Kristo. Sa sinugdanan, naminghoy ko. Nagpuyo ko og kinabuhi nga wala ang balaod sa kaputli, ug akong gibati nga wala na koy paglaum. Gibati nako nga bisan kon ako tinud-anay nga naghinulsol, dili gayud ako hingpit nga mapasaylo sa akong mga sala. Akong giingnan ang akong kaugalingon nga si Kristo padayon nga makahinumdum sa akong mga sayop. Kanunay kong maghunahuna kon giunsa nako Siya pagpakyas—nga wala gani ko mahibalo. Dili lang kana, apan gibati usab nako nga ingon og ang pagsunod sa balaod sa kaputli dili posible.
Mga pangutana gikan sa kaaway mipuno sa akong hunahuna, naghimo kanako nga magduha-duha sa akong nakat-unan kabahin sa kaputli. Samtang nagpadayon ang mga leksyon sa mga misyonaryo, anaa ako sa usa ka relasyon nga wala hatagi og gibug-aton ang pagpabilin nga limpyo sa moral nga aspeto, ug nagtuo ko nga ang pagpamiyembro sa Simbahan makapausab sa among relasyon. Tingali Ang Simbahan ni Jesukristo sa mga Santos sa Ulahing mga Adlaw dili haum alang kanako. Nakahinumdom ko nga naghunahuna, “Daghan na kaayo kong gisakripisyo. Ug karon kini pa gyud?” Kini nakapahimo nako nga mangutana kon ang pagpamiyembro sa Simbahan duna bay igong bili.
Apan dili ko makalimud sa kamatuoran nga akong nakita diha sa sulod sa Simbahan. Kon ako nasayud nga si Joseph Smith usa ka propeta, nan kana nagpasabut nga ang balaod sa kaputli usa gayud ka tinuod nga sugo gikan sa Ginoo. Dili kadto mahimong matuis. Nasayud ko nga ang akong sunod nga hagit mao ang pagpatuman sa balaod ngadto sa akong kinabuhi ug maningkamot matag adlaw nga mahimong mas maayo.
Dili kana usa ka butang nga akong mausab diha-diha dayon. Adunay mga higayon nga wala ko kini matuman. Gibati nako nga kadto murag usa ka walay katapusan nga pagbalik-balik; naningkamot ko og maayo nga mahimong mas maayo ug dayon mobalik na sad ko ngadto sa akong karaang mga paagi. Sa katapusan miabut ko sa punto nga ako misunod na sa balaod sa kaputli ug mibati nga ako makatan-aw na sa mga mata sa akong Magbubuhat ug makaingon, “naningkamot ko; akong gibuhat ang akong pinakamaayo uban sa usa ka andam nga kasingkasing,” ako sa gihapon makahinumdom sa tanang mga higayon nga ako “nasayop.” Kinahanglan nga akong pahinumduman ang akong kaugalingon nga ako nasayud sulod sa akong kasingkasing nga ang Ginoo mopasaylo kon kita tinud-anay nga maghinulsol, butang nga ako nang gibuhat. Apan wala gihapon kini makapahunong kanako nga mobati nga sama sa usa ka pakyas nga pagkatawo.
Sukad niadto ako nakaamgo nga ang Ginoo mopasaylo kanato, apan kinahanglan nga kita makakat-on usab sa pagpasaylo sa atong kaugalingon. Ang Langitnong Amahan gusto nga kita moila sa atong mga sayop, maghinulsol, maningkamot sa pagbuhat og mas maayo, ug mopadayon. Si Satanas, hinoon, gusto nga kita mahigut sa atong mga sala. Kadtong mga pagbati sa kapakyasan mao si Satanas nga nag-ingon kanako, “Dili ka makahimo niini. Nabuang na ka bisan lang gani sa paghunahuna nga makahimo ka.” Apan nasayud ko nga ang Ginoo nahigugma kanako ug gusto nga makakita kanako nga molambo diha sa akong hugot nga pagtuo. Gusto Niya kana sa tanan Niyang mga anak.
Karon, isip usa ka miyembro sa Simbahan sulod pa lang sa sobra sa usa ka tuig, ako nang nakita ang mga panalangin nga miabut gikan sa pagsunod sa balaod sa kaputli. Wala na ko mobati og kawalay paglaum ug pagkalibug. Oo, usahay aduna gihapon koy mga higayon nga si Satanas motintal kanako sa temporaryong katagbawan nga moabut gikan sa imoralidad, apan akong nakat-unan nga ang tinuod nga katagbawan moabut lamang pinaagi kang Kristo. Ako nasayud nga Siya mopanalangin kanato kon kita mosunod sa Iyang mga sugo.
Nakat-unan usab nako nga dili gayud ka mahimo nga sobra ra kalayo aron makadawat sa mga panalangin sa ebanghelyo. Ang Langitnong Amahan malipayong modawat og balik kanato. Kadtong akong mga pagduha-duha dili gikan ni Kristo o sa Langitnong Amahan. Siya mihatag kanato sa balaod sa kaputli aron sa pagpanalipod kanato ug paggiya kanato sa dalan sa pakigsaad. Ang pagkat-on mahitungod niini nga balaod nakapalig-on pag-ayo sa akong pagpamatuod sa Pag-ula sa Manluluwas. Ang Ginoo nahigugma sa matag usa kanato. Kita mahimong makasala, apan anaa usab kitay kahigayunan sa pagkat-on ug pag-uswag gikan sa atong mga sayop—ang paghinulsol. Wala Siya mihatag kanato niini nga sugo aron sa paghimo sa kinabuhi nga lisud; Iya kining gibuhat tungod kay Siya nahigugma kanato.1
Mapasalamaton kaayo ko alang sa balaod sa kaputli ug sa tanan nga gitudlo niini kanako. Akong nakita kon sa unsang paagi kini nakapanalangin sa akong kinabuhi, ug ako nasayud nga kini makapanalangin usab sa uban.