Ang Balaanong mga Katuyoan sa Sekswal nga Kasuod

Ni Elder Dale G. Renlund

Sa Korum sa Napulog Duha ka mga Apostoles

ug Ruth Lybbert Renlund

Ang pagsabut sa hinatag sa Dios nga gasa sa sekswalidad sulod sa plano sa kalipay makatabang kanato nga makasabut sa kaimportante sa balaod sa kaputli.

Ang atong katuyoan dinhi sa mortalidad mao ang mahimong sama sa atong langitnong mga ginikanan. Ang atong balaan nga pagsabut ug paggamit sa sekswal nga kasuod mahinungdanon niana nga proseso sa pagkahimong sama sa atong langitnong mga ginikanan

Ang balaod sa kaputli usa ka mahangturong balaod, nga gihatag sa atong Langitnong Amahan sa tanan Niyang mga anak sa tanang kapanahunan. Nagpabilin kini nga ipatuman ug magamit karon sama sa unang mga panahon sa kasaysayan. Sama sa ubang mga sugo, ang balaod gihatag sa Langitnong Amahan sa pagpanalangin ug pagtabang sa Iyang mga anak nga makab-ot ang ilang balaanong potensyal. Ang pagsunod sa balaod sa kaputli naglakip sa paglikay sa tanang sekswal nga relasyon sa dili pa ang kaminyoon ug sa pagpabiling hingpit nga matinud-anon ug maunungon human sa kaminyoon. Ang sekswal nga mga relasyon kinahanglang limitado lang ngadto sa kaminyoon tali sa lalaki ug babaye.¹

Tinguha sa Langitnong Amahan nga ang sekswal nga mga relasyon sa kaminyoon gamiton sa paglalang og mga anak, ug sa pagpahayag og gugma ug paglig-on sa emosyonal, espiritwal ug pisikal nga mga koneksyon tali sa bana ug asawa. Sa kaminyoon, ang sekswal nga kasuod kinahanglan mohiusa sa asawa ug bana sa pagsalig, debosyon, ug sa konsiderasyon sa usag usa.² Ang sekswal nga mga relasyon sulod sa kaminyoon kinahanglan nga motahud sa kabubut-on sa managpares ug kinahanglang dili gamiton aron sa pagkontrolar o pagdominar.

Tingali maghunahuna kita, bisan pa, “Nganong kinahanglan ko motuman sa balaod sa kaputli? Nganong ang Dios nagpakabana mahitungod sa akong moral nga kinaiya?” Sa pagtubag niini nga mga pangutana, ang Dios mipadayag og doktrina nga, kon masabtan sa husto nga paagi, makadasig kanato sa pagtuman sa balaod sa kaputli ug sa pagpili sa pagpahayag sa atong sekswalidad sulod sa mga utlanan nga Iyang gitakda.³ Sama sa tanang mga sugo sa Dios, ang balaod sa kaputli kay labing maayong masabtan sulod sa konteksto sa plano sa kaluwasan ug kahimayaan sa Langitnong Amahan (tan-awa sa Alma 12:32). Ang pagsunod sa balaod sa kaputli makahatag og talagsaon nga mga panalangin.

couple with child in front of the temple

Talagsaon nga mga Saad

Tanan nga mga tawo minahal nga mga anak sa langitnong mga ginikanan nga adunay kinaiya sa pagkadios ug walay katapusan nga kapalaran. Ang rason nga kita adunay mga lawas mao ang pagpalambo diha nianang kinaiya sa pagkadios aron sa katapusan atong makab-ot ang atong walay katapusan nga kapalaran.⁴ Gusto sa Langitnong Amahan nga kita makaangkon og yutan-on nga kasinatian, mouswag ngadto sa pagkahingpit, ug sa katapusan makatagamtam sa kahingpitan sa kalipay nga Iyang gitagamtam. Nasayud siya nga aron kita makabaton niini nga matang sa malahutayon nga kalipay, kinahanglan kita mouswag subay sa dalan nga Iyang giestablisar, nagsunod sa mga sugo nga Iyang gihatag.

Ang pagsabut nga ang mga relasyon sa pamilya magpadayon hangtud sa kahangturan human niining kinabuhia importante. Human sa mortalidad, ang mga matinud-anon gisaaran nga “sila moagi sa mga anghel … sa ilang pagkahimaya ug himaya … diin nga himaya mao ang kahingpitan ug pagpadayon sa mga binhi hangtud sa hangtud.

“Niana sila mga dios, tungod kay sila walay katapusan” (Doktrina ug mga Pakigsaad 132:19–20).

Ang doktrina sa mahangturong mga pamilya sa Ang Simbahan ni Jesukristo sa mga Santos sa Ulahing mga Adlaw talagsaon taliwala sa mga tradisyon sa Kristiyano. Wala kita gilalang sa pagdayeg, pagsimba, ug pagserbisyo lamang sa dili masabtan nga Dios.⁵ Gilalang kita sa langitnong mga ginikanan aron motubo nga mahimong sama kanila.⁶ Gilalang ang mga espiritu sa lalaki ug babaye aron mokompleto sa usag usa. Mao kana nganong ang sekso dili mag-usab-usab diha sa kahangturan—tungod kay kini naghatag sa kapasikaran alang sa hingpit nga gasa nga mahatag sa Langitnong Amahan, ang Iyang matang sa kinabuhi.⁷

Aron kita makaamgo niini nga panalangin, misugo ang Langitnong Amahan nga ang sekswal nga kasuod itagana alang sa kaminyoon tali sa lalaki ug babaye.⁸ Ang kaminyoon gituyo sa Dios “nga nagpasabut sa hingpit nga panaghiusa sa usa ka lalaki ug usa ka babaye—ilang mga kasingkasing, paglaum, kinabuhi, gugma, pamilya, kaugmaon, tanan … aron mahimong ‘usa ka unod’ sa ilang panag-uban sa kinabuhi.”⁹ Dili nato makab-ot ang matang sa kinabuhi nga gitagamtam sa atong Langitnong Amahan pinaagi sa atong kaugalingon o kon wala ang usa ka hingpit nga pasalig sa pagkamaunongon sulod sa kaminyoon sa atong bana o asawa sumala sa plano sa Diyos.

Ang Dios motugot kanato sa pagpili unsaon nato pagpuyo ang atong mga kinabuhi. Dili siya mopugos kanato sa pagsunod sa dalan nga Iyang giestablisar bisan og nasayud Siya nga kini modala kanato ngadto sa atong labing dako nga kalipay. Ang mga sugo ug pakigsaad sa Dios naglangkob sa dalan nga makapahimo kanato nga mahimong usa ka hingpit nga manununod sa Iyang gingharian, usa ka isig ka manununod uban kang Jesukristo (tan-awa sa Mga Taga-Roma 8:17). Pinaagi sa paghimo og matarung nga mga pagpili, makapalambo kita sa kinaiya sa pagkadios nga anaa sa sulod kanato. Ang sekswal nga mga relasyon mao ang “usa sa dakong pagpahayag sa atong balaanong kinaiya.”¹⁰ Ang atong husto nga pagpahayag sa sekswalidad naghimong posible nga matuman ang plano sa Dios sa yuta ug sa kahangturan,¹¹ sa pagpasarang kanato nga mahimong sama sa atong Langitnong Amahan.¹² Ang Dios nagsaad og kinabuhing dayon alang sa mga matinud-anon nga naglakip sa mahangturon nga kaminyoon, mga anak, ug sa tanang ubang mga panalangin sa usa ka mahangturon nga pamilya.¹³

Makasamok nga mga Pilosopiya ug mga Panglingla ni Satanas

Ang sayop nga pangatarungan ug mga panglingla ni Satanas nakahimo og makasamok nga mga pilosopiya nga nag-angkon sa pagwagtang sa panginahanglan sa pagsunod sa mga sugo sa Dios, ilabi na sa balaod sa kaputli. Gamhanan ang sukwahi nga impluwensya ni Satanas, ug ang iyang mga pilosopiya kasagaran makapadani. Diha sa Basahon ni Mormon, ang uban nagtudlo ug nagsuporta niini nga mga pilosopiya aron sa paglingla sa uban ug aron makabenepisyo gikan sa pagpanglingla. Sama pananglit, mitudlo si Nehor sa mga Nephite “nga ang tanan nga mga katawhan kinahanglan maluwas sa katapusan nga adlaw, ug nga sila dili kinahanglan nga mahadlok ni mangurog, apan nga sila unta mohangad sa ilang mga ulo ug maglipay; kay ang Ginoo … usab mitubos sa tanan nga mga tawo: ug, sa katapusan, ang tanan nga mga tawo kinahanglan makaangkon og kinabuhi nga dayon” (Alma 1:4).

Kon mosunod kita sa pilosopiya ni Nehor, kita walay rason aron sa pagpugong sa atong sekswal nga mga gana tungod kay walay mahangturon nga mga sangputanan. Ug kon kita mosupak sa balaod sa kaputli? Ayaw’g kabalaka, tungod kadtong kinsa misunod ni Nehor “wala motuo sa paghinulsol sa ilang mga sala” (Alma 15:15). Kining makapadani nga pilosopiya mahimong makatintal, ug daghan ang nakauyon niini; makabuhat kita sa bisan unsa nga gusto nato nga walay mahangturon nga mga sangputanan.

Ang ubang mini nga mga magtutudlo diha sa Basahon ni Mormon nagsangyaw nga ang pagtuo diha ni Jesukristo, sa Iyang Pag-ula, ug pagsunod sa Iyang mga sugo mao ang “nagyugo sa inyong mga kaugalingon” ngadto sa “binuang nga mga butang” ug nagagikan sa kataw-anan nga “mga tradisyon sa inyong mga amahan” (Alma 30:13, 14). Sa pagkatinuod, mipahayag sila, ang paglantaw sa unahan ngadto sa “usa ka kapasayloan sa inyong mga sala” usa lang ka mental ug emosyonal nga problema, ang “sangputanan sa usa ka nagsalimoang nga hunahuna” (Alma 30:16). Ang klaro nga konklusyon niini nga mga pagtulun-an mao nga ang matag lalaki ug babaye molampos niini nga kinabuhi “sumala sa [ilang] kinaadman” ug “kusog” ug nga bisan unsa ang buhaton sa usa ka lalaki o babaye “dili kalapasan” (Alma 30: 17). Kining sayop nga mga pagtulun-an nagpasiugda sa pagsupak sa balaod sa kaputli tungod ang konsepto sa husto ug sayop karaan na.

Dili ikatingala nga kini nga mga pilosopiya inila gihapon! Ang pagkawalay tulubagon alang sa bisan unsang pagpili ingon og hingpit nga kagawasan. Kon kita makalikay sa kadaghanan sa kalibutanon nga mga sangputanan pinaagi sa pagkamabinantayon ug pagkamainampingon, unsa man ang kadaut? Gikan niini nga panglantaw, ang balaod sa kaputli ingon og kinaraan, naghinobra ka tarung/kimian, o wala kinahanglana.

Mahangturon nga mga Balaod

Ang mga balaod sa Dios dili mausab. Motugot Siya kanato sa pagbaliwala niini, apan dili kita gawasnon sa paghimo sa atong kaugalingong mga lagda alang sa kahangturan sama nga ang usa ka tawo dili gawasnon sa paghimo sa iyang personal nga mga balaod sa physics. Gusto sa Dios nga kita mahimong usa ka angayan nga manununod sa Iyang gingharian. Sa pagdahum sa Iyang langitnong panulundon samtang nagsunod og lain nga dalan kay sa Iyang gilatid nagpakita sa kakulang sa kaalam.

Sa wala pa matawag sa full-time nga pagserbisyo sa Simbahan, ako (Elder Renlund) nag-atiman og mga pasyente nga dunay grabe nga heart failure. Sa heart failure ug transplant cardiology, adunay gilatid, giestablisar nga mga paagi sa pagtambal nga sundon aron maangkon ang labing maayo nga sangputanan: mas taas ug mas maayo nga kalidad sa kinabuhi. Ang pagtambal sa usa ka pasyente sa laing paagi dili moresulta sa labing maayo nga mga sangputanan. Makapatingala nga pipila sa mga pasyente misulay sa pagpakigsabut sa paagi sa pagtambal. Ang ubang mga pasyente miingon, “Mas ganahan ko nga dili motumar og bisan unsa nga tambal” o “Dili ko gusto og bisan unsang pag-biopsy sa kasingkasing human sa pag-transplant.” Siyempre, ang mga pasyente gawasnon sa pagsunod sa ilang kaugalingon nga paagi, apan dili sila mahimong mosunod sa mas ubos nga paagi sa paglihok ug magdahum sa labing maayo nga sangputanan.

Tinuod usab kini alang kanato. Gawasnon kita sa pagpili sa atong kaugalingong dalan sa kinabuhi, apan dili kita gawasnon sa pagpili sa sangputanan nga moabut gikan sa pagsunod sa atong kaugalingon nga mga balaod, bisan og kapila pa ang usa ka tawo moingon nga kita mahimong makapili sa sangputanan. Dili mabasol ang Langitnong Amahan kon kita dili makadawat og mga panalangin nga konektado sa balaod sa kaputli tungod sa pagkamasinupakon.

Niini nga dispensasyon, mitudlo ang Manluluwas nga ang mahangturong mga balaod dili mausab ug masabutan. Miingon Siya, “Ug usab, sa pagkatinuod Ako moingon nganha kaninyo, kana nga gidumala pinaagi sa balaod mao usab ang gitipigan pinaagi sa balaod ug gihingpit ug gibalaan pinaagi sa mao gihapon.

“Kana nga naglapas sa usa ka balaod, ug wala magsunod pinaagi sa balaod, apan nagtinguha nga mahimo nga usa ka balaod ngadto sa iyang kaugalingon, … dili mabalaan pinaagi sa balaod, ni pinaagi sa kalooy, kaangayan, ni paghukom” (Doktrina ug mga Pakigsaad 88:34–35). Dili nato mapuli ang atong kaugalingong mga lagda alang sa mahangturong mga balaod sama nga ang usa ka tawo kinsa mohikap sa init nga uling dili makahukom nga dili mapaso.

Kon kita dili masulundon, kita makatagamtam lamang “niana diin [kita] mouyon sa pagdawat, tungod kay [kita] wala mouyon sa paglipay niana nga [kita] unta makadawat” (Doktrina ug mga Pakigsaad 88:32). Ang pagsunod sa balaod sa kaputli usa ka paagi nga atong gipakita nga kita andam sa pagbuhat sa bisan unsa nga gikinahanglan sa pagdawat sa talagsaong mga panalangin nga may kalabutan sa mahangturong mga pamilya.

Ang Mga Balaod sa Dios Kanunay, sa Katapusan, Makiangayon

Dili tanang mga anak sa Langitnong Amahan adunay oportunidad nga makasinati sa sekswal nga kasuod diha sa mga relasyon sa kaminyoon sumala sa balaod sa Dios. Ang uban walay oportunidad nga maminyo. Ang uban nakumbinsir nga ang ilang talagsaon nga mga kahimtang nakapahimo sa pagsunod sa balaod sa kaputli nga hilabihan ka mahagiton ug dili makiangayon nga sila mahimong mopili sa pagbaliwala niini.

Ang pagkamakiangayon, hinoon, kinahanglan pagahukman gikan sa mahangturong panglantaw, gikan niana sa Langitnong Amahan ug kang Jesukristo.¹⁴ Miawhag ang Manluluwas sa Iyang katawhan sa pagdumili sa paghukom kon unsa ang makiangayon o dili makiangayon hangtud sa kana nga adlaw nga Iyang himoon ang Iyang mga bahandi (tan-awa sa Malaquias 3:17–18). Ang “mga bahandi” nga gipasabut sa Manluluwas mao kadtong kinsa, bisan pa sa gihunahuna o temporaryo nga walay kaangayan o bisan unsa nga babag, motuman sa Iyang mga sugo.

Kon ang atong mga kahimtang mobati nga dili makiangayon kanato, ang pagsunod sa tambag ni Haring Benjamin ang labing maayo. Miingon siya, “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtud sa katapusan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay” (Mosiah 2:41).

Sa katapusan, walay ikatandi sa walay kinutuban nga walay kaangayan nga gilahutay sa Manluluwas. Apan, kon kita matinud-anon, Siya moganti kanato sa bisan unsa nga dili makiangayon nga atong masinati, ug atong makab-ot ang usa ka kahimtang sa walay katapusan nga kalipay.

Samtang mopili kita sa pagsunod sa mga sugo sa Dios, lakip ang balaod sa kaputli, makasinati kita og hingpit nga kalipay ug “kalinaw niini nga kalibutan, ug kinabuhi nga dayon diha sa kalibutan nga umaabut” (Doktrina ug mga Pakigsaad 59:23)¹⁵ tungod kay kita mahimong kabahin sa usa ka mahangturong pamilya, uban sa mga katigulangan ug kaliwatan.¹⁶ Samtang ang bana ug asawa mabugkos sa kahangturan pinaagi sa awtoridad sa pagkapari, mahimaya sila ug makaangkon sa kahingpitan sa himaya ug sa walay katapusan nga kaliwatan.¹⁷

Tintasyon ug Paghinulsol

Gilauman na sa Dios nga matintal kita samtang naningkamot kita sa pagsunod sa balaod sa kaputli. Mao nga Siya mihatag sa Iyang Anak nga mahimong atong Manluluwas ug Manunubos. Pinaagi ni Jesukristo ug sa Iyang Pag-ula, kita malig-on sa pagpakigbatok sa tintasyon. Ang tanang anak sa Dios kinsa makasinati og tintasyon sa bisan unsa nga matang makaduol sa Manluluwas alang sa tabang.¹⁸ Nakasabut si Jesukristo sa unsay atong gisinati tungod kay Siya “sa tanang paagi gitintal ingon kanato,” ug giawhag kita nga “manuol kita sa trono sa grasya, aron makadawat kitag kaluoy ug makakaplag kitag grasya nga makatabang sa panahon sa pagpanginahanglan” (Mga Hebreohanon 4:15, 16).

Kon kita makahimo og kasaypanan, kinahanglan natong hinumduman nga kita mahimong limpyo pinaagi sa hugot nga pagtuo kang Jesukristo ug sinsero nga paghinulsol.¹⁹ Ang paghinulsol malipayon tungod kay, “bisan pa ang [atong] mga sala mapula, sila pagapution ingon sa nieve” (Isaias 1:18). Ang Manluluwas dili lamang mopasaylo; kalimtan Niya ang atong sala.²⁰ Unsa pa ba ang atong pangayoon: Tabang kon gitintal, kapasayloan kon kita maghinulsol. Ang paghinulsol dili kinahanglang kahadlokan bisan kon si Satanas mosulay “sa pagpugong kanato sa paghunahuna kang Jesukristo, kinsa nagbarug nga andam mogakus, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.”²¹

Pagpamatuod

Ang mga balaod sa Dios gituyo alang sa atong hingpit nga kalipay. Gusto Siya nga gamiton nato ang atong mga lawas ug sekswalidad sa mga paagi nga Iyang gisugo aron kita mahimong sama Kaniya. Napanalanginan kami sa among kaminyoon og pagsalig sa usag usa samtang kami nagsunod sa balaod sa kaputli. Ang among pagsalig sa usag usa ug sa among Langitnong Amahan milambo samtang kami nagtuman niini nga sugo. Ang plano sa Dios mao ang bugtong dalan nga makapahimo sa kinatas-ang sukod sa hingpit nga kalipay. Kami mosaad nga kamo usab mahimong masayud nga ang Dios nahigugma kaninyo ug nga kamo mapanalanginan hangtud sa kahangturan samtang kamo magsunod sa Iyang mga sugo.