Mga Young Adult
Giunsa Nako sa Pagkat-on sa Pagsabut ang Panglantaw sa Dios kabahin sa Sekswalidad
Sulat sa editor: Kini nga artikulo kabahin sa usa ka serye mahitungod sa pagbaton og usa ka positibo nga panglantaw sa sekswalidad, sekswal nga kasuod, ug sa balaod sa kaputli sa Agosto 2020 nga Liahona. Ang termino nga sekswalidad nagpasabut sa lain-laing mga butang ngadto sa lain-laing mga tawo, apan niini nga konteksto, atong piho nga hisgutan ang mahitungod sa atong sekswal nga mga pagbati ug pagkatawo.
Sa pagdako, wala ko makahibalo kon unsaon sa pagdala ang sekswal nga mga pagbati, nga misangput sa akong mga sayop nga pagpili, apan ang pagkat-on sa mga kamatuoran kabahin sa sekswalidad ug kaputli nakapausab sa akong kinabuhi alang sa mas maayo.
Litrato nga gihimo sa model
Ako miok-ok sa akong lingkuranan sa kaulaw samtang ang magtutudlo mipaila sa leksyon kabahin sa kaputli. “Karon, nasayud ko nga kamo walay problema sa balaod sa kaputli … ,” misugod siya. Wala kaayo siya—o si bisan kinsa—nasayud nga usa kini ka butang nga akong nalisuran/gipakigbisugan isip usa ka batan-ong babaye.
Ang mga leksyon sa simbahan nakahimo nako nga mobati nga ang sekswal nga mga pagbati angay lang sulod sa kaminyoon ug nga ang sekswal nga mga pagbati gawas sa kaminyoon dili maayo. Gibati nako ang kaulaw, kahuyang, ug pag-inusara, nga nakapahimo nako nga maglagot sa tibuok hilisgutan.
Nagdako diha sa Simbahan, kanunay ko nga naghunahuna nga ang paghisgot kabahin sa pakighilawas—bisan sa tukma nga pamaagi—o ang pag-ila sa sekswal nga mga hunahuna ug mga pagbati gidili o sayop gawas lang kon ikaw minyo. Ang akong hunahuna natuis sa paghunahuna nga ang bisan unsa nga kakuryuso o pangutana mahitungod sa sekswalidad o gani sa kaputli kinahanglan nga pugngan tungod kay kini wala masunod sa plano sa Dios. Ug tungod kay nagtuo ko nga ang akong mga pangutana makauulaw nga hisgutan ngadto ni bisan kinsa, nangita ko og mga tubag gikan sa mga tinubdan nga wala magpakita og sekswalidad sa paagi nga gitumong sa Langitnong Amahan.
Natanggong diha sa Kaulaw
Nanlimbasug ko sa akong mga pagbati ug mga kinaiya sulod sa katuigan. Nasayud ko nga sayop kini, apan wala ko makahibalo kinsa ang akong kadangpan alang sa tabang. Akong gipas-an ang kabug-at sa sala ug kaulaw ngari kanako sa matag adlaw, apan naningkamot gihapon ko sa pagbuhat sa tanang butang nga matarung. Ako ingon og natanggong diha sa usa ka “tunga-tunga nga dapit”—nga ang katunga nako diha sa kalibutan, ug ang laing katunga sa ebanghelyo.
Gusto nako ngalabaw pa sa bisan unsang butang nga ang akong kaugalingon anaa diha sa ebanghelyo. Busa gitun-an nako ang akong mga kasulatan, nag-ampo ko, miapil sa mga kalihokan sa Simbahan, ug mituman sa akong mga calling. Ang ebanghelyo ingon og mao lang ang bugtong butang nga nakahatag kanako og kahupayan.
Samtang hinay-hinay ko nga nakakat-on og dugang ug mas napaduol ngadto sa Manluluwas, ang akong tinguha nga hingpiton ang pagsunod sa balaod sa kaputli mas nalig-on pa. Human sa daghang pamalandong ug pag-ampo, sa katapusan nakahukom ko nga makig-istorya sa akong bishop mahitungod sa akong mga panglimbasog.
Pagbati sa Makaayo nga Gahum sa Manluluwas
Sa akong pagbiya sa opisina sa bishop, ang kabug-at nga akong gipas-an sulod sa daghang katuigan ingon og nahanaw. Nakahilak ko inubanan sa kahupay. Nabati na nako ang makaayo nga gahum sa Manluluwas diha sa akong kinabuhi. Ang mga pakigkita sa akong bishop nakatabang kanako, sa proseso sa paghinulsol, aron masabtan nga ang akong mga gibati normal ug nga wala ako mag-inusara diha sa panglimbasug sa kaputli. Akong nakat-unan nga adunay uban nga—sama nako—kinsa nag-antus nga nagpakahilom tungod sa kaulaw, kahadlok, ug sayop nga pagsabut.
Ang akong bishop mitabang nako sa proseso sa paghinulsol mismo, apan ang usa ka higala nako nakahimo usab og dakong kalainan diha sa unsay akong gibati mahitungod sa akong hagit. Usa siya ka talagsaong ehemplo ngari kanako. Usa ka adlaw mipaambit siya sa iyang kaagi nga panlimbasug sa pornograpiya. Nakalitan ko—wala gayud ko nagdahum nga duna mi susama nga panlimbasug. Gisulatan nako siya mahitungod sa akong kasinatian sa paghinulsol tungod sa samang mga hagit ug unsa ka dako nga tabang kadto nga makahibalo nga wala diay ako nag-inusara. Sa simbahan pagka-Dominggo, iya akong gigakos ug misulti nga mapasigarbuhon siya nako tungod sa pagtambayayong uban sa bishop ug nga wala ko nag-inusara. Mitabang siya nako nga mabati ang gugma sa Manluluwas nga mas lig-on.
Sukad niadto, makahimo na ako sa pagsabut ug pagdasig sa mga higala kinsa adunay susama nga mga panlimbasog aron matabangan sila nga masabtan sa mas hingpit ang balaod sa kaputli.
Sa katapusan, sa pagkahibalo nga ako wala nag-inusara, mibati og gugma ug pagsabut gikan sa akong bishop ug sa Manluluwas, ug nakat-on sa mahangturon nga kaimportante sa kaputli nakatabang nako nga mamaayo.
Nasayud na ako karon nga nasayop kaayo ko. Ang kaputli ug ang tukmang sekswalidad maoy kabahin sa plano sa Dios bahin sa kalipay. Ang sekswal nga mga pagbati normal ra nga bahin sa mortalidad ug mahimong maanindot kon kita makat-on sa paglihok niini sa tukma nga paagi.
Sa paghinumdom, gibati ko og kaguol nga wala gyud ko mibati nga luwas aron hisgutan ang balaod sa kaputli ngadto ni bisan kinsa sa wala pa ko nakig-istorya sa akong bishop. Nasayran unta nako nga dili angay ikaulaw ang dunay pangutana mahitungod sa kaputli o sekswalidad ug nga kini importante kaayo nga hisgutan ang mahitungod niini uban sa tukma nga mga tawo.
Mahangturong mga Kamatuoran Makagiya Kaninyo
Tungod sa akong mga kasinatian, ikapasalig nako ni bisan kinsa nga lagmit nanglimbasug sa balaod sa kaputli nga ang inyong kasingkasing mahimong mausab. Adunay paglaum, pagkaayo, ug mahangturong mga kamatuoran nga makagiya kaninyo. Nakat-unan nako nga ang paagi sa kalibutan panglantaw sa sekswalidad kon itandi ngadto sa unsang paagi ang Langitnong Amahan naglantaw niini lahi ra kaayo.
Mapasalamaton ko sa mga leksyon nga akong nakat-unan. Karon ako adunay mas lig-on nga pagpamatuod sa balaod sa Ginoo sa kaputli, sa kaimportante sa sekswalidad diha sa atong kinabuhi, ug labaw sa tanan, ang gugma ug makaayo nga gahum sa Manluluwas.