Pagpakig-istorya sa Inyong mga Ginikanan mahitungod sa Pakighilawas

Ni Derek Willis Hagey, PhD

Family Services

ug Denya Palmer

Welfare and Self-Reliance Services

Oo, kini mahimong dili komportable. Apan ang inyong mga ginikanan mas maayo nga mga tinubdan kay sa internet o sa inyong mga higala.

OK ra nga adunay mga pangutana kabahin sa sekswalidad. Ug OK ra nga makig-istorya sa inyong mga ginikanan mahitungod niana nga mga pangutana. Mahimong matingala kamo sa unsang paagi sila makasabut gayud kaninyo ug sa inyong mga pangutana ug mga kasinatian.

Kabahin sa pakighilawas, unsa ang inyong masugatan sa internet, sa media, ug gikan sa mga higala ug mga kauban sa klase mahimong makapalibug—kalabut sa impormasyon ug sa moralidad. Ang inyong mga ginikanan ang mahimong labing maayong tinubdan sa kasaligan nga mga tubag kabahin sa sekswalidad. Gusto nila ang labing maayo alang kaninyo. Lagmit, mahimo silang malipayon nga gusto ninyo nga makigsulti kanila mahitungod niini.¹

Kon kamo ug ang inyong mga ginikanan wala pa makaistorya kabahin sa pakighilawas, aniay pipila ka mga sugyot:

conceptual image of brain

Mga paghulagway pinaagi ni Andrew Robert

Espiritwal ug Mental nga Pagpangandam

• Pag-ampo. Hangyoa ang Langitnong Amahan sa pagtabang kaninyo nga makahibalo unsay isulti sa paghisgut sa hilisgutan uban sa inyong mga ginikanan.

• Pagmaisugon. Kon nakahimo kamo og sayop o wala, ayaw pagduha-duha sa paghangyo sa inyong mga ginikanan sa pagtabang kaninyo. Nagpakabana sila kaninyo ug gusto ang labing maayo alang kaninyo.

• Hinumdumi nga ang inyong mga ginikanan niagi usab sa inyong edad. Giatubang usab nila ang mga pagsulay samtang nagtubo. Makasabut sila sa inyong kasinatian.

• Positibong paghunahuna mahitungod sa unsa nga paagi mahimong moresponde ang inyong mga ginikanan. Paghunahuna og higayon sa nangagi dihang mitabang sila kanimo. Hunahunaa nga maayo ang panag-istoryahanay.

checklist and clock

Praktikal nga Pagpangandam

• Desisyuni kinsa nga ginikanan ang gusto nimong istoryahon. Samtang ang ubang kabatan-onan sayonan ra nga makig-istorya nga magkuyog ang duha ka ginikanan, ang uban mas komportable nga makig-istorya sa usa ka ginikanan lang una. Normal kini, ilabi na sa usa ka hilisgutan sama sa sekswalidad.

• Pag-iskedyul og panahon nga makig-istorya. Hangyoa ang inyong mga ginikanan sa paggahin og panahon aron mag-istoryahanay. Kini maghatag kaninyo og panahon sa pagpangandam.

• Paghimo og lista sa mga butang nga gusto ninyo nga mahibaloan sa inyong mga ginikanan ug mga pangutana nga aduna kamo. Ang pagbaton og lista sa mga hunahuna o mga kabalaka makatabang kaninyo sa paghinumdom unsay gusto ninyo nga hisgutan. Ug kon adunay butang nga wala ninyo mahisguti sa unang pag-istoryahanay, hangyoa sila sa laing pag-istoryahanay.

• Pagbansay sa pagsugod sa pag-istoryahanay. Tingali gusto ninyong sugdan pinaagi sa usa ka pagpangutana. O tingali gusto ninyong sugdan pinaagi sa paghangyo sa inyong mga ginikanan sa pagmaminaw lang hangtud nga andam kamo nga sila motubag. (Tan-awa ang “Mga Makasugod og Pag-istoryahanay” nga sidebar.)

• Pakig-istorya sa inyong mga ginikanan mahitungod sa ubang mga hilisgutan sa ordinaryo nga mga sitwasyon. Pagbansay nga moistorya nga mas bukas ug matinuoron mahitungod sa inyong normal nga inadlaw-adlaw nga kinabuhi ug mga kalihokan. Mahimo ninyo kining buhaton sa mga panahon nga magkauban kamo, sama kon tingkaon o tingkatulog.

conversation

Human nga Nakasugod na Kamo sa Pag-istorya

• Paghisgut mahitungod sa balaod sa kaputli. Mahimong makatabang ang pagpangutana sa inyong mga ginikanan mahitungod sa ilang pagsabut sa balaod sa kaputli. Kon kamo nakalapas sa balaod sa kaputli, ang inyong mga ginikanan mahimong usa ka tinubdan sa suporta samtang kamo maghinulsol ug mopaduol sa Manluluwas. Pangutan-a ang inyong mga ginikanan mahitungod sa ilang kasinatian sa pagpangita og kalipay pinaagi sa paghinulsol.

• Pagmapailubon kanila. Ang inyong mga ginikanan usab tingali mobati og gamay nga dili komportable sa pakig-istorya kaninyo kabahin sa sekswalidad sa sinugdanan. Apan gusto sila nga motabang kaninyo, ug mahimo kining mas sayon kon kamo mopadayon sa pag-istorya.

• Ayaw kahadlok nga makig-storya kanunay sa inyong mga ginikanan. Sa paglabay sa panahon, tingali magkadaghan ang inyong mga pangutana. Dili kini kausa lang buhaton.

Mahimo Ninyo Kini

Sa sinugdanan tingali dili komportable nga makig-istorya sa inyong mga ginikanan o sa laing sinaligan nga hamtong. Hinumdumi, ang imong Langitnong Amahan nahigugma kanimo ug gusto nga mangandam ka sa pagpalambo og maayo nga relasyon isip usa ka ham- tong. Kabahin sa inyong pagpangandam naglakip sa pagsabut sa maayo, angay nga sekswalidad ug pagkat-on unsaon sa pagsulti mahitungod niini karon. Ang Langitnong Amahan makatabang ninyo nga makig-istorya sa inyong mga ginikanan mahitungod sa pakighilawas ug sa ubang lisud nga mga hilisgutan samtang magpatabang kamo Kaniya.

Mubo nga sulat

1. Tingali adunay balido nga mga rason nganong gibati ninyo nga kamo dili maka-istorya sa bisan hain sa inyong mga ginikanan. Niini nga sitwasyon, sulayi nga makig-istorya sa laing masaligan nga hamtong sama sa usa ka lider sa Simbahan.

Mga Makasugod og Pag-istoryahanay

Aniay pipila ka mga butang nga inyong masulti aron sa pagsugod og pag-istoryahanay:

• “Duna koy pipila ka mga pangutana. Tingali dili kini komportable hisgutan, apan mahimo ba kitang mag-istorya kabahin sa pakighilawas?”

• “Sa unsang paagi nakat-unan nimo ang mahitungod sa pakighilawas niadtong ikaw pareho nako og edad?”

• “Nakadungog/nakakita ko og butang sa miaging adlaw nga nakapalibog kanako. Mahimo ba kitang mag-istorya kabahin niini?”

• “Mahimo ba kitang mag-iskedyul og panahon nga mag-istorya?”

• “Mahimo ba nga makig-istorya ko nimo mahitungod sa usa ka butang? Tingali nakahimo ko og sayop, ug gusto ko og tabang sa pagsulbad niini.”

Alang sa dugang pa kabahin sa sekswalidad ug sa unsang paagi kini mihaum sa plano sa Dios, tan-awa sa pahina 42.