Pagtudlo Unsaon nga Mahimong Putli ug Maandam sa Sekswal nga Paagi
Isip usa ka propesor sa Brigham Young University, misiksik ug mitudlo ko mahitungod sa pagkaginikanan sulod sa milabay nga 15 ka tuig. Kon mamulong ko sa mga ginikanan, usa sa labing komon nga mga pangutana nga akong makuha mao ang kon kanus-a ug unsaon sa pakig-istorya sa mga bata kabahin sa sekswalidad. Kon makig-istorya ko sa mga estudyante sa kolehiyo, kanunay kong makadungog mahitungod kon unsa sila kahadlok o dili sigurado mahitungod sa sekswalidad o unsa ka gamay ang ilang nahibaloan ug nasabtan.
Kanunay na kitang makadungog gikan sa mga lider sa Simbahan ug sa maanindot nga bag-ong mga kapanguhaan sa Simbahan kon sa unsang paagi ang mga ginikanan ug ang mga batan-on mas maayong magkaistorya kabahin sa sekswal nga kasuod aron ang mga batan-on adunay positibo ug tukma nga mga pagtan-aw sa sekswalidad ug sa balaod sa kaputli. Miingon si Presidente M. Russell Ballard, “Pagpaka positibo kabahin sa unsa kanindot ug katahum ang pisikal nga kasuod kon kini mahitabo sulod sa mga lagda nga gihatag sa Ginoo, lakip na sa mga pakigsaad sa templo ug sa mga pasalig sa mahangturon nga kaminyoon” (“Mga Amahan ug mga Anak nga Lalaki: Usa ka Talagsaon nga Relasyon,” Liahona, Nob. 2009, 49).
-
Uban sa kaubang tigsulat nga si Meg Jankovich, mopaambit kami sa mga ginikanan og pipila ka mga ideya mahitungod sa kon unsaon, kanus-a, ug sa rason sa pagpakigsulti sa ilang mga anak kabahin sa sekswalidad (tan-awa sa pahina 18).
-
Si Elder ug Sister Renlund mohisgot sa kaimportante sa pagsunod sa balaod sa kaputli. (tan-awa sa pahina 12).
-
Ang mga artikulo alang sa mga young adult mohisgot kon unsaon sa pagpalambo og positibo nga panglantaw sa sekswalidad ug sa unsang paagi ang balaod sa kaputli nagpanalangin kanato (tan-awa sa pahina 42).
-
Ang mga batan-on makakita og pipila ka mga sugyot alang sa malampuson nga pag-istoryahanay sa ginikanan ug batan-on kabahin sa sekswalidad diha sa pahina 52.
Akong pag-ampo nga, pinaagi niini nga mga artikulo, ang mga batan-on ug mga ginikanan magtinguha nga bukas nga mag-istorya sa usag usa ug mas maduol ngadto sa Ginoo samtang sila makigbatok sa sayop nga impormasyon nga gipadangat sa kalibutan karon mahitungod sa sekswal nga kasuod ug hinoon mamalandong sa gahum sa pagkahimong putli ug andam sa sekswal nga paagi.
Matinuoron,
Laura M. Padilla-Walker, PhD