Nagtubo uban sa Maayong mga Tumong
Ang kabataan sa tibuok kalibutan naggamit sa Giya nga Basahon sa Kabataan aron sa pagsulay og bag-ong mga butang ug motubo sama ni Jesus!
Jessica B., 10 anyos, nagpuyo sa Greater Accra, Ghana. Nagtakda siya og tumong nga mohimo og bag-ong mga higala ug mopaambit sa ebanghelyo kanila. Nagbutang siya og usa ka kopya sa Higala sa iyang bag ug mobasa sa magasin didto sa eskwelahan. Magpaambit siya niini uban sa iyang mga kauban sa klase ug makig-istorya ngadto kanila mahitungod sa ebanghelyo. “Makapalipay kini kanako,” miingon si Jessica.
Peter G., 9 anyos, gikan sa Ohio, USA, adunay problema sa pagbasa. Gikinahanglan niya nga makapasar og importante nga eksamin sa pagbasa aron makapadayon sa sunod nga grado sa eskwelahan. Busa nagtakda siya og tumong nga mobasa uban sa iyang inahan ug mga igsoon nga babaye matag adlaw sulod sa 20 ka minutos. “Gihangyo nako ang Langitnong Amahan sa pagtabang kanako,” miingon si Peter. Sa wala madugay, sa dihang kinahanglan na siya mokuha sa eksamin, nakapasar siya!
Danielle P., 8 anyos, gikan sa Cebu, Philippines, gusto nga mohatag og pagkaon sa mga tawo nga walay mga panimalay. “Gusto nako nga mopakaon kanila aron magmalipayon sila ug matulog nga busog,” miingon siya. Kon ang iyang pamilya adunay sobra nga pagkaon gikan sa ilang negosyo, modrayb sila sa palibut ug ihatag kini ngadto sa mga tawo nga gigutom.
Prophet M., 12 anyos, nagpuyo sa Greater Accra, Ghana. Human makat-on sa pagpatukar sa piano, nagtakda siya og tumong sa pagtudlo sa uban nga makatukar usab! Midapit siya sa iyang mga kaila nga mokuha og mga klase sa piano nga gitudlo niya ug sa iyang mga higala. “Karon kami adunay sobra sa 50 ka mga estudyante kinsa nagkuha sa mga leksyon,” miingon si Prophet. Walo niadto nga mga estudyante ang nabunyagan!