Nganong Ania Kita Dinhi?
Miundang kami sa among mga trabaho, gibaligya ang tanan, ug nanamilit sa pamilya ug mga higala aron mobalhin ngadto sa usa ka dapit nga wala pa kami sukad nakaadto.
Paghulagway pinaagi ni Shauna Mooney Kawasaki
Nagtrabaho ko sa adlawan, ug ang akong asawa, si Elen, nagtrabaho sa gabii. Dili na kaayo kami magkita sa usag usa. Wala kami nagpahigayon og home evening o pag-ampo sa pamilya. Nagtambong kami sa sakrament miting, apan kulang ang among pasalig sa ebanghelyo.
Misugod kami sa pagbati sa espiritwal nga kahaw-ang nga miabut gikan sa pagpokus sa mga butang sa kalibutan imbis sa mga butang sa Ginoo. Gibati namo nga gusto sa Langitnong Amahan nga kami mahimong mas mapasaligon.
Busa miadto kami sa Santiago Chile Temple alang sa giya kon unsaon namo nga molambo. Kaming duha nakadawat og pag-aghat nga kinahanglan kami mobalhin uban sa among gagmay nga anak nga mga babaye gikan sa Santiago ngadto sa amihanang baybayon nga dapit sa Coquimbo.
Wala pa kami sukad nakaadto didto, ug kami walay nahibaloan mahitungod sa dapit. Apan miundang kami sa among mga trabaho, gibaligya ang tanan, ug nanamilit sa pamilya ug mga higala, ug sa akong pag-eskwela sa unibersidad.
Sa Coquimbo, wala mi kaila, ug kami walay kwarta. Nakakita ko og trabaho, apan dili kini halos makabayad sa abangan. Nangutana kami, “Nganong ania kita dinhi?”
Si Elen naghunahuna kon siya ba adunay butang nga mahimo aron makatabang sa pagbayad sa mga bayranan. Usa ka adlaw nanahi siya og bag-ong hapin alang sa usa sa among karaan nga mga lingkuranan. “Ako kining ibaligya ug tan-awon kon adunay tawo nga mopalit niini,” miingon siya. Adunay tawo nga mipalit gayud niini. Nadasig, si Elen nagkat-on pa og dugang mahitungod sa pagbag-o pag-usab og muwebles. Misugod siya sa pagpahibalo ug nagsugod sa pagdawat og trabahoon.
Niadtong 2016, gitawag ko isip bishop sa among bag-o nga ward. Uban sa akong trabaho, sa akong pag-eskwela pag-usab sa unibersidad, ug sa akong calling, dili na kaayo nako makauban pag-usab ang akong pamilya.
“Dili kini maayo,” miingon si Elen. “Unsa kaha kon motrabaho ka uban kanako? Tudloan tika unsaon. Anaa ka sa balay, ug ikaw adunay dugang nga pagpailin-ilin alang sa imong calling.”
Nabalaka ko nga mohunong sa akong trabaho, apan si Elen misugyot nga mag-ampo kami sa Langitnong Amahan ug moingon: “Ania ang among negosyo. Magtinabangay kami niini. Palihug tabangi kami sa pagsabut kon sa unsang paagi namo mahimo kini samtang si Gregorio nagserbisyo isip bishop.”
Mitubag ang Langitnong Amahan. Karon, human sa katuigan nga dili kaayo magkita sa usag usa, kami nag-adjust sa kanunay nga pagkauban. Usahay si Elen mopasiaw og ingon, “Wala ba kay bishopric nga mga interbyu nga buhaton? Balik human sa upat ka oras!”
Dinhi sa Coquimbo, nakat-unan namo nga magbaton og hugot nga pagtuo ug magsunod sa ebanghelyo isip usa ka pamilya, ug napanalanginan kami. Mibalhin kami sa usa ka siyudad nga wala namo mahibaloi aron sa pagserbisyo sa mga tawo nga wala namo mahimamat, ug nakakita kami og mga milagro nga wala namo damha.