Bantugan [Elite] nga mga Atleta ug ang Ebanghelyo

Upat ka bantugan nga mga atleta kinsa mga miyembro sa Simbahan naghisgot kon sa unsang paagi ang ebanghelyo nakatabang kanila dili lamang sa ilang dula apan usab sa ilang mga kinabuhi.

Casey Patterson: Beach Volleyball

Wala gayud ako makalimot niining linya gikan sa usa ka pakigpulong sa komperensya: “Ang kakugi … naglakip sa pagpaningkamot ‘sa tibuok ninyo nga kasingkasing, gahum, hunahuna ug kusog’ (Doktrina ug mga Pakigsaad 4:2). Kana lamang ang kalainan tali sa kasarangan ug sa maayo kaayo” (F. David Stanley, “The Principle of Work,” Abril 1993 nga kinatibuk-ang komperensya).

Sa akong dula nagpokus ko nga mahimong lig-on ug magbaton og positibo nga kinaiya. Sayon ra ang pagtan-aw sa batan-on nga mas taas og lukso kay sa nimo o mas maayo modula, apan ang pagkontrolar sa imong kinaiya mao gayud ang importante. Ang pagkugi mao ang labing importante nga butang nga nagkontrolar sa imong mga resulta. Importante nga itandi ang imong kaugalingon ngadto sa imong kaugalingon—wala nay lain.

Kabahin ni Casey:

Nagdula og volleyball dul-an na sa 25 ka tuig.
Adunay tulo ka manghud nga babaye.
Nagrepresentar sa USA.
Makapainteres nga kamatuoran: Ang iyang inahan wala motugot kaniya nga magpatupi og mohawk hangtud nga siya nakaserbisyo og misyon ug naminyo.

Jason Smyth: Track and Field

Na-diagnose ko nga adunay sakit sa mata sa dihang otso anyos ko, ug sa paglabay sa mga katuigan ang akong panan-aw mikunhod ngadto sa minus pa sa 10 porsyento. Apan ako adunay daghang mga panalangin pinaagi sa dula sa pagdagan ug sa pakigsangka sa Paralympics. Sa miaging pipila ka tuig, usa ka kadaot miresulta sa operasyon, ug dili ko sigurado nga makasangka pa ako pag-usab. Apan napanalanginan ko sa Langitnong Amahan nga naalim gayud ug mahimong makapadayon sa pagpakigsangka.

Nasayud ko nga ang Langitnong Amahan nahigugma kanako ug gusto unsay labing maayo alang kanako, ug kana naghatag kanako og kahupayan ug kasiguroan nga unsa ang mahitabo mao ang unsay labing maayo alang kanako.

Kabahin ni Jason:

Nagdagan [dula sa pagdagan] sulod sa 15 ka tuig.
Adunay usa ka igsoon nga lalaki ug tulo ka igsoon nga babaye.
Nagrepresentar sa Ireland.
Makapainteres nga kamatuoran: Ang pag-apil sa bantugan nga mga dula [elite sports] naghatag kaniya og talagsaong oportunidad sa pagpaambit sa ebanghelyo.

Mary Lake: Volleyball

Sa akong pagdako, daghang bata nga mga babaye ang nanlimbasug sa kaaway nga naningkamot sa pagpaubos sa ilang pagbati sa kaugalingong bili. Ang kalibutan naghatag og gibug-aton sa unsay atong hitsura, ug kon ikaw usa ka atleta, kanunay kang gitan-aw. Mibati ko og dakong kabalaka sa pagdula og volleyball sa Brigham Young University. Daghang mga tawo ang nagtan-aw nako, ug kini mimugna og mga kakulang sa pagsalig. Nag-ampo ko nga mabuntog ang mga pagduha-duha nga miabut uban niadto nga mga kakulang sa pagsalig. Dili diha-diha dayon ang tubag, apan nasayud ko nga kadto nga mga pag-ampo ug kadto nga panahon uban sa Langitnong Amahan ang nakatabang nako sa pagbuntog niadto nga mga pagduha-duha.

Ang Espiritu nagpahinumdom kanako nga ako karon usa na ka lahi nga tawo kay sa kinsa ako upat ka tuig kaniadto. Samtang naghunahuna sa nangagi, makakita ko og mga panahon diin ang tabang sa Langitnong Amahan mihatag kanako og mga kasinatian ug mga impresyon nga ako mas dako gayud og bili kay sa akong gihunahuna.

Mas labaw pa gayud ako kay sa mga paugnat sa kusog. Ang akong inahan nag-ingon nga ako mahimong mohunong sa tanan nga gitawag sa mga tawo kanako, apan ako mahimo gihapon nga usa ka talagsaon nga tawo ug usa ka talagsaon nga anak nga babaye. Ang akong pamilya nagtratar kanako sama nga ako usa ka tawo ug nahigugma kanako sa mga butang nga dili mga paugnat sa kusog. Nakapahimo kana kanako nga malingaw sa akong dula tungod kay ang akong kaugalingong bili dili gayud konektado sa kon unsa ko ka maayo modula. Ang volleyball pipila lang ka tuig sa akong kinabuhi, apan kinsa ako mao ang walay kinutuban.

Ang mas bata nga mga babaye kanunay makig-istorya nako kabahin sa volleyball. Makabaton ko og gamay nga panabut kon kinsa sila ug unsa ang gibati sa Langitnong Amahan mahitungod kanila. Gusto lang nako nga makasabut sila nga dili sila kinahanglan mahimong usa ka atleta sa kolehiyo o mobuhat og bisan unsa nga dili ordinaryo aron makabaton og dakong bili ug higugmaon. Ang akong nag-unang mensahe ngadto kanila mao ang pagpangutana sa Langitnong Amahan mahitungod sa ilang bili ug makaamgo nga kini dili konektado sa bisan unsa nga butang nga ilang buhaton.

Kabahin ni Mary:

Nagdula og volleyball sukad 7 anyos.
Kinamanghuran sa unom ka igsoon—tulo ka igsoon nga babaye ug duha ka igsoon nga lalaki.
Nagrepresentar sa USA.
Makapainteres nga kamatuoran: Ganahan motrabaho uban ang mga numero ug nagtuon og accounting sa Brigham Young University.

Jackson Payne: Gymnastics

Ako adunay dakong kahigayunan nga makasarang sa Olympics sa London niadtong 2012, apan diha sa labing importante nga kompetisyon, natagak ko sa aparato. Nawala ang akong kahigayunan sa Olympics. Anaa ko sa pikas bahin sa kalibutan, ug ang akong mga damgo nahugno.

Sa wala madugay human niana nga kapakyasan, mihukom ko nga gusto ko magmisyon. Wala unta ko moadto sa misyon kon nadayon pa ko sa Olympics, apan ang akong misyon napuno sa daghang mga milagro. Mapasalamaton kaayo ko alang niana nga oportunidad.

Ang ebanghelyo nakatabang kanako sa paghimo og husto nga mga desisyon, ilabi na sa mga panahon nga lisud ang pagsunod sa akong mga sumbanan. Kini naghulma kon kinsa ako ug sa tanan nga mga mithi nga akong nabatonan.

Kabahin ni Jackson:

Nag-gymnastics siya sulod sa 22 ka tuig.
Ika-lima sa unom ka managsoon—tulo ka magulang nga lalaki, usa ka magulang nga babaye, ug usa ka manghud nga babaye.
Nagrepresentar sa Canada.
Makapainteres nga kamatuoran: Nakalamano ni Presidente Gordon B. Hinckley (1910–2008) didto sa pagpahinungod sa Templo sa Edmonton Alberta.