Ang Pagluwas Kaninyo Mao ang Plano

Illustrations by Jen Tolman

Sa wala pa kita matawo, ang Langitnong Amahan mipresentar og usa ka plano alang kanato nga mamahimong sama Kaniya. Sulod niana nga plano, ang mga papel ni Jesukristo mao ang nakapahimong posible sa atong mahangturon nga kalamboan. Siya mao “ang dalan, ang kamatuoran, ug ang kinabuhi” (Juan 14:6).

Pinili

Si Jesukristo mao ang unang espiritu nga natawo sa pamilya sa Langitnong Amahan. Si Jesus mao ang pinili “sukad sa sinugdanan” (Moises 4:2) aron mahimo natong Manluluwas. Sa dihang ang Amahan mipresentar sa Iyang plano alang sa atong kahimayaan, si Satanas ug ang iyang mga sumusunod mirebelde, apan si Jesus nagpabilin nga matinud-anon. Pinaagi sa gahum ni Jesukristo si Satanas gisalikway.

Tan-awa usab sa Juan 17:5, 24; Mosiah 18:13; Ether 3:14; Moises 4:3; Abraham 3:24–27.

Tiglalang

Ubos sa direksyon sa Iyang Amahan, si Jesukristo milalang niini nga yuta alang kanato. “Ang tanang mga butang nangahimo pinaagi kaniya; ug niadtong mga nangahimo na, walay bisan usa nga nahimo nga dili pinaagi kaniya” (Juan 1:3).

Tan-awa usab sa Mga Taga-Colosas 1:16–18; Mosiah 4:2; 3 Nephi 9:15; Doktrina ug mga Pakigsaad 14:9; Moises 2:26–27.

Ehemplo

Isip kabahin sa plano sa Langitnong Amahan, si Jesukristo natawo dinhi sa yuta ug nakadawat og mortal nga lawas. Siya “midala diha kaniya sa porma sa usa ka sulugoon” ug “nagpaubos sa iyang kaugalingon” (Mga Taga-Filipos 2:7–8) aron makasabut Siya kon unsaon sa pagtabang kanato sa atong kaugalingong mortal nga panaw. Ang Iyang kinabuhi ug mga pagtulun-an naghatag kanato og hingpit nga ehemplo kon unsaon sa pagpakabuhi. Pinaagi sa pagsunod Kaniya, kita mahimong sama sa Dios ug makabalik ngadto Kaniya sa usa ka adlaw.

Tan-awa usab sa 1 Pedro 2:21; 2 Nephi 31:16; 3 Nephi 18:16.