Siya Mao ang Dalan

Ang kinabuhi, ehemplo, ug sakripisyo ni Jesukristo mao ang sentro sa atong kaluwasan. Pinaagi sa pagsunod Kaniya, kita mahimong sama sa Langitnong Amahan ug makabalik sa Iyang presensya.

Manunubos

Si Kristo miluwas sa matag usa kanato gikan sa kamatayon ug sala. Siya andam nga misakripisyo alang sa atong mga sala didto sa Getsemani ug didto sa Kalbaryo. Human namatay sa krus, nabanhaw Siya. Ang Iyang Pag-ula mibuntog sa espiritwal ug pisikal nga kamatayon. Pinaagi sa Iyang Pag-ula, si Jesus motubos sa tanan kinsa motuo ug “kinsa adunay usa ka masulub-on nga kasingkasing ug mahinulsulon nga espiritu” (2 Nephi 2:7).

Tan-awa usab sa Isaias 26: 19; 2 Nephi 9:5–7, 10–12; Moises 5:14–15.

Maghuhukom

Tungod sa Iyang Pag-ula, si Jesukristo hingpit nga nakasabut kanato ug moserbisyo isip atong maghuhukom. “Kay kitang tanan kinahanglan magapangatubang sa hukmanan ni Kristo” (2 Mga Taga-Corinto 5:10). Kita pagahukman pinaagi sa atong gihimo ug sa unsa nga pagkatawo nga kita nahimo.

Tan-awa usab sa Juan 5:22; Pinadayag 22:11–12; 2 Nephi 9:15–16.

Manlalaban

Ang usa ka manlalaban mao ang usa ka tawo nga nagrepresentar og laing tawo panahon sa paghusay. Si Jesukristo mao ang atong Manlalaban. Siya mitabang kanato sukad sa sinugdanan ug mohangyo para kanato atubangan sa Amahan. Si Jesus motagbaw “sa mga gipangayo sa kaangayan” (Mosiah 15:9) alang sa tanan kinsa maghinulsol ug motuo diha Kaniya. Tungod kay si Jesus mao ang tigpataliwala tali kanato ug sa Dios, kita adunay kahigayunan nga makadawat og kinabuhing dayon.

Tan-awa usab sa 1 Timoteo 2:5; Mga Hebreohanon 9:15; 1 Juan 2:1; Doktrina ug mga Pakigsaad 45: 3–5; Moises 7:39.