Pagpugong sa Inyong mga Mainit nga Pagbati: Unsaon Pagpahiangay ang Sekswal nga mga Hunahuna ug mga Pagbati ngadto sa mga Gilauman sa Ginoo

Agosto 2020

Sa Digital Lamang: Mga Young Adult

Pagpugong sa Inyong mga Mainit nga Pagbati: Unsaon Pagpahiangay ang Sekswal nga mga Hunahuna ug mga Pagbati ngadto sa mga Gilauman sa Ginoo

Pinaagi sa mga kawani sa Liahona ug sa Family Services

Ang pagwagtang sa tukmang sekswal nga mga pagbati dili mao ang gusto sa Langitnong Amahan alang kanato. Gusto Siya nga kita magkat-on sa pagdumala niini aron kini modala kanato og kalipay imbis kasakit.

Tingali dili kaayo mo makahinumdom mahitungod sa pagkat-on sa paglakaw. Sa sinugdanan, kadaghan tingali kamo madagma. Apan sa dihang nadagma mo, wala kamo gikasab-an. Labing siguro, ang usa ka tawo kinsa nahigugma kaninyo mipabarug kaninyo ug balik-balik nga miabiba kaninyo aron padayon nga mosulay! Paglabay sa panahon, ang pagbutang sa usa ka tiil atubangan sa pikas nahimong mas natural. Karon kamo makalikay na sa kadaghanang mga sitwasyon nga makapandol kaninyo.

Kon kita unta magtratar sa atong kaugalingon sama kamapailubon kon kita nagkat-on kon unsaon sa pag-atubang sa ubang mga aspeto sa atong pisikal nga lawas, lakip na kon unsaon sa pagdumala sa sekswal nga mga pagbati.

Sa Unsang Paagi Nga Kita “Makapugong sa Atong mga Mainit nga Pagbati”?

Kadaghanan nato makasinati og sekswal nga mga pagbati isip kabahin sa atong mortal nga kasinatian. Samtang kining hinatag sa Dios nga mga pagbati importante nga bahin sa Iyang laraw alang sa atong kalipay, daghan kanato ang mibati sa tinguha sa pagbuhat niini sa paagi nga wala mahiuyon sa Iyang mga sugo.

Latas sa atong tin-edyer nga katuigan ug ngadto sa pagkabatan-ong hamtong, kadaghanan kanato nakasinati sa mga hagit nga moabut gikan sa pagkat-on unsaon sa pagpahaum sa sekswal nga pagbati nga moabut sa mortal nga lawas uban sa gilauman sa Ginoo kon unsaon nato paggamit niini nga gasa.

Pipila kanato mogahin og dako sa atong espirituhanong kalagsik sa pagpaningkamot sa pagwagtang bisan gani ang tukma nga sekswal nga mga pagbati. Apan ang pagwagtang kanila dili mao ang gusto sa atong Langitnong Amahan alang kanato! Hinoon, gusto Siya nga motabang kanato nga makakat-on sa pag-ila ug pagpugong sa atong sekswal nga mga hunahuna ug mga kinaiya. Ang pagpalambo niini nga mga abilidad makatabang kanato sa dili pa ug human sa kaminyoon.

Si Alma mitudlo, “[Pug-ngi] … ang [imong] mga mainit nga pagbati, nga ikaw mapuno uban sa paghigugma” (Alma 38: 12). Si Alma wala gayud miingon sa pagwagtang sa inyong mga mainit nga pagbati—tungod kay ang mga mainit nga pagbati dili gayud kinahanglan nga dautan. Hinoon, siya miawhag kanato sa pagpugong o pagkontrol niini aron kita mapuno sa gugma.¹

Busa unsaon man nato pagpugong sa atong mga mainit nga pagbati? Ania ang pipila ka mga butang nga makatabang kaninyo samtang kamo nagkat-on sa “paglakaw” niining importante nga panaw.

Pagsabut sa mga Impluwensya

Una, makatabang nga masabtan ang pipila ka mga hinungdan nga makaimpluwensya sa inyong abilidad sa pagpugong sa sekswal nga mga tinguha. Ang pagsabut niini nga mga hinungdan makatabang ninyo sa pagsubay sa inyong sekswal nga mga pagbati:

Biology: Ang matag lawas makahimo og lain-laing gidaghanun sa pipila ka mga kemikal nga makaapekto sa sekswal nga mga tinguha. Isip resulta, ang gidak-on sa panlimbasug sa matag tawo managlahi.
Kinaiya: Kon kamo anaa sa kinaiya sa pagsunod sa sekswal nga mga hunahuna ug mga tinguha, kini mahimong mas lisud usbon. Ang pagpuli niini nga kinaiya og positibo nga mga butang usa ka taas og tagal nga paningkamot. Kinahanglang mopasalig kamo sa pagpadayon bisan mapakyas—ug sa pagpasaylo sa inyong kaugalingon—samtang nagpadayon kamo niini nga proseso. Sa ubang sitwasyon, usa ka lider sa Simbahan o propesyonal sa kahimsog sa pangisip makatabang ninyo sa pagbuntog sa negatibo nga mga kinaiya.
Lisud nga mga emosyon: Ang ubang mga tawo mahilambigit sa sekswal nga mga hunahuna ug mga kinaiya aron sa pagdumala sa mga pagbati sama sa stress, kamingaw, o depresyon. Pagkat-on sa pag-ila niadto nga mga emosyon. Hinoon ikonsiderar ang pag-ehersisyo, pagsulat sa journal, pagpa-therapy, o ubang positibo nga paagi sa pag-atubang niini nga mga pagbati.
Kulang ang pagsalig sa kaugalingon: Mga pagbati nga ubos ang kaugalingong bili kasagaran nga makahuyang sa inyong tinguha. Ikonsiderar ang pag-apil sa pagserbisyo ug ubang mga kalihokan nga makatabang nga kamo mobati og maayo bahin sa inyong kaugalingon.
Naa sa hunahuna lang nga mga relasyon: Ang usa ka naa sa hunahuna lang nga relasyon dili gayud igo nga mohulip sa inyong panginahanglan alang sa usa ka tinuod nga koneksyon. Hinoon, palamboa ang inyong kahanas sa pagpakigsulti ug pag-ugmad og maayong mga panaghigalaay. Pangita og positibong sosyal nga mga oportunidad ug kalingawan. Ang pagkonektar sa uban usa ka yawe sa kalampusan.

Pagkat-on gikan sa Ehemplo sa Manluluwas

Human Siya magpuasa sulod sa 40 ka adlaw, si Jesus gitintal ni Satanas sa paghimo sa mga bato ngadto sa pan. Yano Siyang mitubag: “Nahisulat nga, Ang tawo mabuhi dili sa tinapay lamang, kondili sa matag-pulong nga magagula sa baba sa Dios” (Mateo 4:4).

Ang Manluluwas wala makigbatok sa tintasyon ni Satanas pinaagi sa pagpangangkon nga wala Siya gigutom o dili Siya ganahan sa pagkaon. Hinoon, Siya miatubang niini nga tintasyon pinaagi sa pagsulti sa usa ka mas taas, mas halangdon nga rason sa dili pagkaon: nagtinguha sa pagpuyo sa matag pulong sa Dios. Siya nakasabut nga ang Iyang misyon mas labaw pa sa pagtagbaw sa pisikal nga mga tinguha.

Kon kamo maningkamot sa pagkumbinser sa inyong utok nga kamo walay sekswal nga mga pagbati, ang inyong lawas magpahinumdom kaninyo nga kamo anaa, nga mosangput na hinoon nga kamo mobati nga mabug-atan, dili mahimutang, ug magluya.

Apan kon atubangon ninyo ang inyong sekswal nga mga tinguha sama sa pag-atubang sa Manluluwas sa tinguha alang sa pagkaon, makabaton kamo og mas daghang kalampusan sa pagpugong sa inyong mga pagbati. Ang Manluluwas adunay mas dakong gamhanan nga rason sa pagdumili kaysa magpadala sa tintasyon, ug kamo mao usab! Gisaaran kita og daghan kaayong mga panalangin niining kinabuhia ug sa kahangturan kon kita motuman sa mga sugo ug nga ang “pagsunod sa balaod sa kaputli nagdapit sa dagkong mga panalangin nga madawat sa mga tawo [lalaki ug babaye] sa mortalidad: angay nga espirituhanong pagsalig sa presensya sa pamilya, mga higala, kaubanan sa Simbahan, ug sa katapusan, ang Manluluwas.”²

Hibaloi nga Kamo Makalampus

Ang mga sugo sa Ginoo makapanalangin sa inyong kinabuhi kon kamo mosunod niini. Ang sugo sa pagdumala sa inyong mga mainit nga pagbati apil niini: ang inyong mga paningkamot sa pagsunod magdala og walay katapusan nga kalipay. Ang pagdumala sa inyong sekswal nga mga pagbati mahimo nga usa ka tibuok kinabuhi nga pagkat-on, apan ang Langitnong Amahan anaa aron matabangan kamo nga molampus! Kon ikaw masayop, paghinulsol ug sulayi pag-usab. Ayaw paghunong. Kabahin kini sa proseso sa paghashas dinhi sa mortalidad.

Ang Langitnong Amahan usa ka mahigugmaong Amahan kinsa nagpakabana ug andam nga motabang kanato, ilabi na niining sagrado nga bahin sa mortalidad. Ayaw gayud kalimot nga misilsil Siya og tukma nga sekswal nga mga pagbati dinha kaninyo, ug Siya makatabang kaninyo sa pagkat-on kon sa unsang paagi nga kini mahimong usa ka pwersa alang sa kaayohan diha sa inyong kinabuhi bisan unsa pa ang kasamtangan ninyong sitwasyon pinaagi sa pagtabang nga makakonektar kamo sa uban sa maayo nga mga paagi, maghatag kaninyo og determinasyon ug mga kalig-on, naggiya kaninyo sa pagmatngon sa kaugalingon, paghigugma ug pagdawat sa kaugalingon, ug pagdala kaninyo nga mas maduol ngadto sa Manluluwas matag adlaw.

Hinumdumi, gusto sa Dios ang inyong kalipay. Si Satanas maoy gusto nga kamo mahimo nga mauyamot ug kinsa naggamit sa pagkawala sa kadasig ug panglingla aron sa pagpalayo kaninyo gikan sa Dios. Ang pagpadala sa mga tintasyon nga sekswal gawas sa kaminyoon makapalayo kaninyo gikan sa mga panalangin sa mahangturong kalipay ug padulong ngadto sa kauyamot. Apan ang inyong mga paningkamot sa pagsabut, pagdala, ug pagdumala sa inyong sekswalidad, bisan kon kini usa ka tibuok kinabuhi nga paningkamot, modala kaninyo ngadto sa kalipay, kamapainubsanon, ug gugmang putli ngadto sa tanan, lakip sa inyong kaugalingon.

Unsaon Pagpalig-on sa Inyong Kaugalingon sa Pamatasan, Espiritwal, ug Mental nga paagi

Espiritwal nga paagi:

Pagtukod sa inyong relasyon tali sa Langitnong Amahan ug sa Manluluwas. Sila makagiya kaninyo ug mohatag kaninyo og kaalam, kaisug, ug gahum aron molampus.
“Pun-a ang inyong kinabuhi sa positibong mga tinubdan sa gahum. Dili paigo ang yano lang nga pagbuntog sa dautan o maglikay nga makasala. Kinahanglan sab natong pun-on ang atong kinabuhi sa pagkamatarung. Kinahanglang moapil ta sa mga kalihokan nga makahatag og espirituhanong gahum”. (Mga Pagtulun-an sa mga Presidente sa Simbahan: Ezra Taft Benson [2014], 270).
Tun-i ang plano sa kaluwasan ug ang balaod sa kaputli. Pagkat-on bahin sa mga panalangin nga gisaad kanato gikan sa matarung nga paggamit niini nga gahum.
Isubsob ang inyong kaugalingon diha sa mga kasulatan matag adlaw, pag-ampo alang sa kalig-on ug giya, pagpuasa, buhata ang inyong calling, pagserbisyo, motambong sa templo, tun-i ang inyong patriyarkal nga panalangin, ug pangayo og mga panalangin sa pagkapari. Kining gagmay nga espirituhanong mga binuhatan mahimong tinubdan sa dakong kalig-on (tan-awa sa Alma 37: 6). Si Presidente Russell M. Nelson misaad nga “kon mainampuon kamo nga magtuon sa Basahon ni Mormon matag adlaw, makahimo kamo og mas maayong mga desisyon —kada adlaw” (“Ang Basahon ni Mormon: Unsa Kaha ang Imong Kinabuhi Kon wala Kini?” Liahona, Nob. 2017, 62).
Kon kamo makahimo og desisyon nga wala mahisubay sa mga sugo, hibaloi nga dili mawala ang tanang pag-uswag nga inyong nahimo. Kon kamo sinserong nagtinguha sa paghinulsol, mahimo kamong maghinulsol og usab (tan-awa sa Mosiah 26: 29–30). Ayaw itugot nga ang inyong mga panlimbasug makapahimo ninyong mobati nga layo sa Dios. Siya nahigugma kaninyo. Dili kamo kinahanglan nga makaabut og usa ka gitas-on sa katakus aron sa pag-ampo ug pagkadawat og gugma gikan Kaniya.

Mental nga paagi:

Kon ang sekswal nga mga hunahuna mosulod sa inyong salabutan, baldaha dayon kini. Pagkat-on unsaon ang maayo nga pagdumala sa inyong mga hunahuna pinaagi sa paggamit niini nga modelo: atubangon, suklan, ug usbon. Kon ang dili maayo nga mga hunahuna moabut, inyo kining atubangon pinaagi sa pag-ila niini. Inyo kining suklan pinaagi sa pagkonsiderar kon asa kamo mosangput kon kamo magpadayon sa paghunahuna niini. Ug dayon inyong usbon ang inyong hunahuna ngadto sa usa ka butang nga positibo.
Ayaw pagpalupig sa unsay inyong gitinguha nga usbon. Tutuki ang unsay inyong mahimo karon (tan-awa sa 2 Nephi 28: 30; Mosiah 4:27).
Pagmalaumon. Hunahunaa unsa ang inyong mahimong bation ug unsa ang inyong mahimong kinabuhi kon duna kamoy mas dakong kontrol.
Pag-angkon og mas maayong panabut mahitungod sa inyong emosyonal nga mga tinubdan sa tintasyon. Mas huyang ba kamo kon mobati mo nga gisalikway, nag-inusara, naguol, nabalaka, nasagmuyo, na-stress, gikapoy, o gigutom? Unsaon ninyo nga mas madumala pag-ayo kini nga mga pagbati?
Ayaw mo og tuo nga ang usa ka kapakyasan nagpasabut nga kamo kinahanglan mohunong na sa pagpaningkamot og usab. Kamo adunay mas daghang kalampusan pinaagi sa pagpangutana, “Unsay akong mabuhat nga lahi aron nga molambo sa sunod higayon?” Bahin-bahina ang inyong tumong ug mouswag sa gagmay nga mga bahin nga dili kaayo lisud kay sa katapusang tumong.

Sa Pamatasan:

Gikan sa kasaligang mga tinubdan, magkat-on pa og dugang kon sa unsang mga paagi ang inyong lawas naglihok.
Ayaw tuguti nga ang inyong mga sayop maghulagway kon kinsa kamo o kinsa ang mahimong sentro sa inyong kinabuhi. Hinumdumi nga kamo mga anak sa Dios ug wala gibuhat aron magbalik-balik og himo sa samang mga sayop. Kon kamo makahimo og sayop, sutaa kon unsa ang nakaingon niini ug paghimo og mga plano nga makatabang kaninyo pagbuntog sa mga hagit nga inyong giatubang.
Pagmatinuoron ug mahimong may tulubagon sa inyong kaugalingon.
Ipakigbahin ang inyong mga panlimbasug ngadto sa tawo nga inyong gisaligan kinsa makahimo ninyo nga manubag sa inyong plano. Pakigkita kanila kanunay kon kumusta na kamo.
Ayaw ibutang ang inyong kaugalingon sa mga sitwasyon diin kamo mas daling makahimo og sayop. Likayi ang media, mga tawo, o ang mga palibut nga makapahimong lisud nga makabaton og pagbati sa tukmang sekswalidad o kanang makapaukyab sa dili tukma nga sekswal nga mga hunahuna ug mga kinaiya.
Sutaa ang inyong sekswal nga mga pagbati kon motumaw kini ug dayon pilia nga mobuhat og lahi nga mga butang. Pag-ehersisyo, pakigsulti sa usa ka higala, o pag-ugmad og maayo nga kalingawan.
Pagtinguha sa paghinulsol ug sa pagtubo ug paglambo sa tanang aspeto sa inyong kinabuhi samtang maningkamot kamo sa pagbuntog niini nga hagit. Hinumdumi ang mga pulong ni Elder Ulisses Soares sa Korum sa Napulog Duha Ka mga Apostoles: “Samtang kita mopadayon nga maningkamot sa pagbuntog sa atong mga hagit, ang Dios mopanalangin nato sa mga gasa sa hugot nga pagtuo nga mamaayo ug sa pagbuhat og mga milagro. Iyang gihimo alang kanato kon unsay dili nato mahimo sa atong kaugalingon” (“Magpas-an sa Atong Krus,” Liahona, Nob. 2019, 114).