Sa Digital Lamang: Mga Young Adult

Sa Unsang Paagi nga ang Makaayo nga Gahum sa Manluluwas Magamit ngadto sa Paghinulsol gikan sa Sekswal nga Sala

Ni Richard Ostler

Isip bishop sa usa ka young single adult nga ward, nagserbisyo ko uban sa mga young adult sa pagtabang kanila nga maghinulsol ug mahimong lunsay pinaagi sa Pag-ula ni Jesukristo.

Mubo nga sulat gikan sa editor: Kini nga artikulo kabahin sa sunod-sunod nga artikulo diha sa Agosto 2020 nga Liahona mahitungod sa pagbaton og positibong panglantaw bahin sa sekswalidad, sekswal nga kasuod, ug sa balaod sa kaputli. Ang termino nga sekswalidad nagpasabut og lain-laing mga butang sa lain-laing mga tawo, apan dinhi niini nga konteksto, kita piho nga naghisgut kabahin sa atong sekswal nga mga pagbati ug pagkatawo.

Sa dihang nagserbisyo ko isip bishop sa usa ka young single adult nga ward, nagserbisyo ko uban sa daghang mga young adult aron sa pagtabang kanila nga maghinulsol ug mahimong limpyo gikan sa sekswal nga sala. Kon kamo nahiagum niini nga panaw, kini nga artikulo dili mahitungod sa mga lakang sa paghinulsol—kini mahitungod sa unsaon paggamit nganha kaninyo sa makaayo nga gahum ni Jesukristo ug sa mga panalangin sa Iyang Pag-ula. Ako nag-ampo nga kamo mobati og paglaum sa kasayuran nga Siya ug ang inyong Langitnong Amahan nahigugma kaninyo.

Daghan sa mga young adult nga akong gikauban adunay dili maayo nga panglantaw bahin sa paghinulsol gikan sa sekswal nga sala. Sila mosulti og mga butang nga sama sa, “Wala na gayuy gusto nga makig-date o makigminyo kanako tungod kay ako kaniadto aktibo sa sekswal nga paagi,” “Ako mibati nga ako dili takus ni bisan kinsa tungod kay nag-antus ko sa pornograpiya,” “Ang akong kahigayunan alang sa kaminyoon sa templo nagun-ob tungod sa akong mga sayop,” o, “Ako dili gayud mahimo nga motudlo sa balaod sa kaputli sa ubang mga miyembro o sa umaabut nakong mga anak tungod kay ako kining nalapas.”

Maingon ta nga, sila wala motuo nga ang Manluluwas mahimo gayud nga mokuha sa ilang “sala nga mapula” ug mohimo niini nga “puti ingon sa nieve” (tan-awa sa Isaias 1:18). Sila sayop nga mitapos: “Uban sa daghang paghinulsol sa akong bahin ug sa daghang pagpasaylo sa bahin sa Manluluwas, Siya makausab sa akong mga sala gikan sa lubos mapula ngadto sa usa ka hayag nga lubok sa rosa [pink].”¹

Kining matang sa mga hunahuna dili gikan sa Langitnong Amahan. Kini gikan ni Satanas, kinsa gusto nga kamo maghunahuna nga kamo wala nay kaugmaon tungod sa inyong mga sayop. Sa laing bahin, ang Langitnong Amahan gusto nga kamo mobati og paglaum pinaagi sa Manluluwas. Gusto niya nga makasabut kamo sa doktrina sa insakto gayud: “ang inyong mga sala pagapution ingon sa nieve [snow]” —dili rosa [pink].

Mga leksyon mahitungod sa Gugma sa Dios

Ang kamatuoran kon unsay gibati sa Langitnong Amahan bahin kaninyo kon kamo maghinulsol sa sekswal nga sala mahimong makita diha sa sambingay sa anak nga nawala (tan-awa sa Lucas 15:11–32). Ang anak nga nawala usa ka mahinuklugong ehemplo sa daghang mga sala, apan ang Manluluwas nagtudlo niini nga sambingay isip usa ka labing grabe nga sitwasyon aron kitang tanan makahibalo nga ang Langitnong Amahan nahigugma kanato bisan unsa pa ug nga ang Pag-ula ni Jesukristo magamit sa matag usa kanato.

Ania ang tulo ka mga leksyon nga atong makat-unan gikan sa anak nga nawala:

1. Hibaloi Nga ang Pagkaamgo nga Kamo Kinahanglan nga Maghinulsol Mao ang Unang Lakang

Sama sa nawala nga anak, kamo mahimong adunay panahon sa matinud-anon nga kaugalingong pagpamalandong sa dihang kamo “nahiulian na sa [inyong] pamuot” (tan-awa sa Lucas 15:17) nga may pagkaamgo nga kamo kinahanglan nga mag-usab o maghinulsol. Kini nga mga higayon dili makauulaw; hinatag kini sa Dios nga mga higayon nga makahatag kaninyo og paglaum nga kamo mapasaylo. Kini mao ang inyong unang lakang padulong ngadto sa Manluluwas.

2. Sabta Nga ang Inyong Bili Wala Mausab

Akong gihunahuna nga ang anak nga nawala, wala makasabut sa gahum sa Manluluwas ug sa mga panalangin sa Iyang Pag-ula, naghunahuna nang daan nga ang iyang potensyal, bili, ug kaugmaon nausab tungod sa iyang mga sala. Nagtuo siya nga mobalik siya isip usa lang ka “binayran nga sulugoon.” Apan sa pagkatinuod, siya usa gihapon ka hinigugmang anak, ingon sa kamo kanunay nga usa ka balaan ug hinigugma nga anak nga babaye o anak nga lalaki sa Dios.

3. Hibaloi Nga ang Langitnong Amahan ug ang Manluluwas Naghulat nga Mopasaylo Kaninyo

Ang atong Manluluwas naghulagway sa reaksyon sa amahan sa dihang ang anak nga nawala mibalik aron sa pagtudlo kon sa unsang paagi ang Langitnong Amahan mobati kaninyo kon kamo modangop Kaniya: “Apan samtang didto pa siya sa halayo, nakita siya sa iyang amahan ug kini giabut og kalooy, ug midagan, ug migakos kaniya ug gihagkan siya” (Lucas 15:20).

Nagtuo ko nga ang tubag sa amahan nakapakugang sa anak nga nawala. Naghunahuna ko niya nga nagbakho, nga nagtan-aw sa mga mata sa iyang amahan, ug miingon, “Nakasala ako batok sa langit ug sa imong atubangan: ug dili na ako takus pagatawgon pa nga imong anak” (Lucas 15:21). Apan dayon ang amahan mibutang og kupo sa mga abaga sa iyang anak nga lalaki ug singsing sa iyang tudlo. Wala siya mopakaulaw sa iyang anak nga lalaki, wala siya maglagut, wala niya pugsa nga magpakilooy, ug wala gani ni niya yawyawi—nagmaya lang siya nga ang iyang anak nga lalaki nakasinati og kausaban sa kasingkasing ug mibalik ngadto kaniya.

Kini usa ka gamhanang higayon nga makatabang sa pagpakita kon sa unsang paagi ang Langitnong Amahan motubag kon kamo mohimo sa unang lakang padulong sa paghinulsol. Siya naghulat kaninyo ug gusto nga mopasaylo kaninyo. Siya ug ang Manluluwas parehong hilabihan ka malipayon kon modangop kamo Kanila aron sa pagtabang kaninyo sa pagbuntog sa inyong mga sala.

Ang Panalangin sa Paghinulsol

Ang akong tahas isip bishop mao ang pagtabang sa mga batan-ong hamtong [young adult] nga mosalig sa gahum sa Manluluwas ug sa mga panalangin sa Iyang Pag-ula. Ako naningkamot sa pagsunod sa ehemplo sa Langitnong Amahan sa gugma alang sa maisug nga mga batan-ong hamtong (ang uban akong gikonsiderar nga akong mga bayani) kinsa andam nga matinud-anong mosulti ngari kanako sa ilang mga sala, gustong mahimong lunsay pinaagi sa Manluluwas. Ug ako nakakita nianang kalunsay nga nahitabo.

Apan ako usab nakakita og daghan niining mga batan-ong hamtong nga nakig-away ni Satanas, kinsa misulti kanila og mga bakak aron sila magpabilin sa pagkaulipon. Si Satanas dili lamang modaug kon kamo makasala—makadaug usab siya kon siya makapahimo kaninyo sa pagtuo nga kamo walay bili, nga kamo walay labut sa gugma sa Dios, ug nga ang inyong sitwasyon wala nay paglaum nga ang Pag-ula sa Manluluwas dili magamit nganha kaninyo. Siya makadaug kon siya makahimo kaninyo nga motuo nga kamo dili gayud hingpit nga mapasaylo sa inyong mga sala.

Apan kini dili gayud tinuod.

Si Presidente Russell M. Nelson mipasabut nga “daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansya. Apan kining pagbati nga gisilutan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarug nga andam mogakus, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.”²

Ang paghinulsol usa ka indibidwal nga proseso nga magsugod sa Diosnon nga kasubo ug motapos sa usa ka kausaban sa kasingkasing—ug pamatasan. Dili kini mao ang usa ka mekanikal nga proseso o usa ka listahan nga proseso, ug kini maangkon natong tanan.

Kon kamo kinahanglan nga maghinulsol sa sekswal nga sala, dapiton ko kamo sa pagsugod pinaagi sa pag-ampo ngadto sa Langitnong Amahan ug sa pakigtambayayong sa inyong bishop o presidente sa branch. Himoa ang paghinulsol nga adunay usa ka positibo nga kinaiya. Ang Pag-ula ni Jesukristo mao ang labing mahinungdanong gasa nga sukad gihatag. Uban Kaniya, mahimo ninyong kalimtan ang inyong mga sala ug mahimo na usab nga sama “kaputi sa nieve.” Uban Kaniya, kamo mahimong mas maayo kay sa unsa kamo kaniadto. Uban Kaniya, kamo makapadayon nga adunay paglaum ug pagsalig alang sa nindot kaayo nga kinabuhi sa umaabut.

Mubo nga mga Sulat

1. Kini nga ideya nga “rosa [pink]” nga mga Santos sa Ulahing mga Adlaw naggikan sa magtutudlo sa institute sa Santos sa Ulahing mga Adlaw nga si S. Michael Wilcox.

2. Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67.

Pagdiskobre pa og Dugang

Makakita ka og mas daghang mga artikulo mahitungod sa balaod sa kaputli ug ang panglantaw sa Dios sa sekswalidad diha sa young adult nga seksyon sa Agosto 2020 nga Liahona.

Susiha ang YA Matag Semana, nga makita diha sa seksyon sa mga Young Adult sa Gospel Library nga app, alang sa bag-o, makapadasig nga sulod alang sa mga young adult matag semana.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kaninyo!