Mga Panalangin sa Pagbarug sa Kinaugalingong Paningkamot
Maayong Pagkagamit sa Oras
Tungod kay si Pele Mika Ah Lam migahin sa iyang oras sa labing maayo, nakakaplag siya og inadlaw-adlaw nga kalipay, nanag-iya siya og gamay nga negosyo, ug makahandum siya nga walay pagmahay.
Paghulagway pinaagi ni Emily Lui
Ang oras sa isla sa Pasipiko medyo lahi og dagan kay sa kadaghanang bahin sa kalibutan. Ang buluhaton sa kada-adlaw nakompleto pinaagi sa kahimtang sa adlaw, dili sa orasan. Makamata ka sa mga huni sa mga langgam ug sa paghampas sa mga balud, dili alingugngog nga alarma.
Para ni Pele Mika Aw Lam sa Samoa, adunay laing importante nga konsiderasyon mahitungod sa oras nga iyang gisunod: “Ako mohimo sa labing maayo sa bisan asa man ako.”
Pagkat-on sa sulod ug gawas sa Klase
Si Pele nagtubo sa usa ka balangay diin ang mga pamilya—lakip sa iyang kaugalingon—nagpakabuhi sa unsay anaa sa yuta. Walay tubig ug kuryente, ug ang mga panimalay yano ug maanindot. Ang edukasyon dili sayon bayaran. “Ang among tibuok pamilya nagtinabangay sa pagsuporta sa usag usa sa galastuhan sa edukasyon” miingon si Pele. “Mao kini ang paagi sa mga taga Samoa.”
Human magtrabaho og maayo ug makuha ang labing taas nga grado sa eskwelahan, si Pele nadawat nga moeskwela sa National Universiy of Samoa. Mipili siya sa pagtuon sa accounting, mathematics, ug computing. Migahin usab siya og higayon sa iyang eskedyul alang sa mga klase sa institute.
Sa samang higayon, miapil si Pele sa laing kalihokan nga makapausab sa iyang kinabuhi sa umaabut, bisan og wala pa niya kini naamguhi nianang higayuna. Alang sa kalingawan, matag Biyernes sa gabii siya nakighimamat sa ubang mga miyembro sa Simbahan nga nanambong sa unibersidad aron sa paghisgut sa ebanghelyo ug magkat-on og bag-ong mga kahanas. Kini nga mga kalihokan managlahi sa matag semana gawas lang sa: katapusang Biyernes sa bulan, aduna silay nagpadayon permaninte nga tradisyon sa pagkat-on og luto sa laing putahi sa pagkaon.
“Naminaw gyud ko og maayo,” miingon si Pele. “Dili ko gusto nga mausik ang kahigayunan sa pagkat-on og usa ka butang nga bag-o.”
Kana nga desisyon moresulta og dakong kaayohan sa umaabut.
Usa ka Pultahan nga Mosira, usa ka Bintana ang Moabli
Ang kantidad sa edukasyon sa unibersidad mahimong usa ka dakong babag sa hapit kada usa. Alang ni Pele, sa dihang ang iyang pundo nahurot na, kinahanglan na siyang mobiya sa eskwelahan. Mitrabaho siya hinoon og maayo, ug nagkat-on kutob sa iyang mahimo samtang anaa pa didto—lakip na sa unsaon sa pagluto og daghang lain-laing mga pagkaon.
Isip asawa ug inahan sa gagmayng mga bata, naghunahuna siya og maayo kon unsaon kaha niya sa paggamit ang iyang nakat-unan aron makatabang sa pagsuporta sa iyang pamilya. Sa tibuok niyang kinabuhi, si Pele gitudloan sa pagtuo diha sa Dios ug sa pagtrabaho og maayo.
“Nakahukom ko nga magsugod og akong kaugalingong negosyo,” miingon siya. “Ako karon aduna nay tindahan sa barbecue ug salad, nagluto og pagkaon nga akong nakat-unan unsaon sa paghimo samtang nag-eskwela!”
Tungod sa iyang kalampusan sa negosyo, si Pele mikita og igong kwarta aron sa pag-atiman sa iyang kaugalingong pamilya, ingon man usab sa pagtabang sa pag-atiman sa iyang mga ginikanan ug mga igsoon.
“Ang among pamilya nagtuo nga ‘walay kapuslanan ang pagtuo nga bulag sa binuhatan’ [Santiago 2:20],” miingon siya. “Kami adunay hugot nga pagtuo sa Dios ug motuo nga Siya motabang kanamo sa tanang paagi. Apan kinahanglan nga kami mobuhat sa among bahin.”
Oras sa Isla
Si Pele nagpakabuhi gihapon sa kinabuhi diha sa “oras sa Isla.” Mobangon ug mopahulay dungan sa adlaw ug gihangop ang yano, malinawon nga kinabuhi sa usa ka Samoanon. Ug siya nakasabut ug nagpakabuhi sa mosunod nga kamatuoran: “Ang panahong manglabay; di ta kapabalik .”1
Si Elder Ian S. Ardern sa Seventy nagtudlo: “Ang oras dili gayud ikabaligya; ang oras usa ka kinahanglanon nga dili mahimong, bisan unsaon pa, dili mapalit sa bisan asang tindahan sa bisan pila nga kantidad. Apan kon ang oras maalamong gigamit, ang bili niini dili masukod.”2
Tungod kay si Pele naningkamot aron mapahimuslan ang iyang oras, ang Dios mipauswag kaniya ug sa iyang pamilya, ug ilang naangkon ang kalipay bisan diha taliwala sa mga hagit. Siya adunay lig-on nga pagpamatuod, usa ka malampuson nga negosyo, ug usa ka hayag nga kaugmaon.
“Kami nabulahan kaayo,” miingon siya.