Ang Ginoo Miabag Kanako
Wala ko magdahum nga ang pagkadestino sa militar sa akong bana molungtad sa tibuok tuig, apan kini nga kasinatian nakatabang kanamo nga molambo sa espirituhanon nga paagi isip pamilya.
Paghulagway pinaagi ni Colby A. Sanford
Ang akong pamilya ug ako nakapuyo na sa Texas, USA, sulod sa mga tulo ka bulan sa dihang usa ka adlaw mitawag ang akong mama gikan sa iyang panimalay didto sa England.
“Wala ko kahibalo, Ma,” miingon ko niya, “apan gibati nako nga adunay mahitabo karon, ug wala ko kahibalo kon ganahan ba ko niini.”
Sa dihang ang akong bana, si Matthias, miuli sa panimalay nianang gabhiona, miingon siya, “Aduna koy isulti nimo.” Diha-diha dayon nakahibalo na ko nga molakaw siya sa layo, apan wala ko magdahum nga ang iyang pagkadestino sa militar molungtad sa tibuok tuig. Aduna kami duha ka semana sa pagpangandam alang sa iyang pagbiya. Mihilak ko og maayo nianang higayuna.
Lisud kaayo kadto nga tuig. Ang dili makauban ang akong bana o ang akong pamilya didto sa England hapit makapahadlok ug nakapabalaka kanako, apan talagsaon usab kadto nga kasinatian alang nako isip usa ka bag-ong inahan nga dunay usa ka batang masuso ug alang kanamo nga makat-on kon unsaon nga makapadayon sa paglambo sa espirituhanon nga paagi isip usa ka pamilya.
Nabatasan na namo ang inadlaw-adlaw nga pag-ampo sa pamilya ug pagtuon sa kasulatan. Mao nga sa dihang si Matthias ug ako adunay oportunidad sa pagpakig-istorya sa usag usa, sa kasagaran pinaagi sa Skype, makaampo kami ug magbasa og dungan sa kasulatan.
Samtang nagbasa ko sa mga kasulatan sa akong kaugalingon ug uban sa akong bana, usa ka bersikulo kanunayng mosantop sa akong hunahuna: “Busa, paglipay, ug ayaw kahadlok, kay ako ang Ginoo anaa uban kaninyo” (Doktrina ug mga Pakigsaad 68:6). Dayon nakaamgo ko nga makasalig ko kanunay sa Langitnong Amahan.
Ang akong calling isip direktor sa choir sa ward nakapahimo sa akong hunahuna nga matutukan ang mga pulong sa mga himno ug sa mga kasulatan ug sa mga saad nga gitanyag niini. Ang pagkanta ug pagpaminaw sa mga himno naghatag kanako og kalinaw.
Sa dihang ang among masuso nga anak, si Noah, nagka-pulmonya, ang mga naghupot sa pagkapari mihatag kaniya og panalangin sa panglawas ug kanako og panalangin sa kalig-on ug kahupayan. Aduna koy talagsaong mga tigpangalagad nga mga sister kinsa mitabang usab kanako. Makauban usab nako ang ubang mga asawa kansang mga bana nadestino usab. Mitabang sila kanako labaw pa kay sa ako nakatabang kanila. Ang among silingan mitabang pa gani sa pagtupi sa balili sa among nataran.
Mapasalamaton ko alang sa gagmay ug yano nga mga butang nga mipanalangin sa among pamilya. Ang Langitnong Amahan daw kanunay nga mopanalangin kanamo pinaagi sa usa ka tawo nga motabang kanamo kon nagkinahanglan mi kaayo og tabang.