Ang Labing Maayong Tirador sa Jamaica
Si Donovan mitumong sa iyang tirador sa walay sulod nga lata sa sabaw diha sa tuod sa kahoy.
Gibira niya ang goma sa tirador.
“Unsay imong gibuhat?” nangutana ang iyang manghud nga babaye, si Dana.
“Tan-awa kini!” miingon siya.
Twak!
Mipitik ang goma sa dihang gibuhian ni Donovan, nga mipalagpot sa gamay nga bato. Mikasikas ang pipila ka dahon sa usa ka duol nga kahoy. Apan wala molihok ang lata. Gisulod ni Donovan ang tirador sa iyang luyo nga bulsa. Wala siya kaigo. Pag-usab!
Gitakilid ni Dana ang iyang ulo. “Unsa man ang kinahanglan nakong makit-an?”
“Wala,” miingon si Donovan. “Dali na. Mamauli na ta.” Nagsugod sila sa pagpauli sa balay.
Gipatiran ni Donovan ang usa ka sanga pahawa sa iyang agianan. Bisan unsaon niya, ingon og dili niya magamit sa husto nga paagi ang tirador ni Papa. Ug ganahan siya niini nga butang! Ganahan siya mogamit niini kanunay kon si Papa tua sa laing lugar nagtrabaho, sama karon. Nakatabang kini kaniya nga mobati nga duol ni Papa kon dili siya makakita niya.
Gikuha niya ang tirador gikan sa iyang bulsa ug hinay-hinay kining gipatuyok sa iyang kamot. Ang sapnot nga panit sa kahoy nahimong hamis sa dugay nang panahon. Gihimo ni Papa ang tirador gikan sa usa ka lig-on nga sanga sa kahoy ug gigamit kini sulod sa pipila ka tuig sa wala pa gihatag ngadto kang Donovan.
Mitudlo si Papa sa lata sa sabaw nianang adlawa. “Kon ikaw mopokus, talagsaong mga butang ang mahitabo.” Nakahinumdom pa gihapon si Donovan kon unsay sunod nga nahitabo. Gipunting ni Papa ang tirador ug naigo ang lata sa sabaw. Sa usa ka pagsulay! Gihimo niya kini nga daw sayon ra. Gimingaw gayud si Donovan kaniya.
Naghunahuna pa gihapon siya mahitungod kang Papa dihang nakatulog siya nianang gabhiona.
Pagkasunod buntag, gidala ni Donovan ang iyang tirador sa iyang paborito nga luna sa kakahoyan aron mosulay pag-usab.
“Pokus …” miingon si Donovan samtang gitutokan niya ang lata diha sa tuod sa kahoy. Gibutangan niya og laing gamay nga bato ang tirador ug mibira.
Si Papa kanunayng mosulay, bisan kon ang mga butang dili kanunay molampus, gihunahuna ni Donovan.
Naningkamot si Donovan nga mohunong sa paghunahuna mahitungod sa tanan nga mga panahon nga wala siya makaigo. Gipiyong niya ang usa ka mata, sama sa paagi nga gitudlo ni Papa kaniya. Nakapokus gayud siya. Walay laing gitan-aw si Donovan apan ang pula nga lata sa sabaw lang.
Miginhawa og lawon, iyang gibuhian.
Twak!
KLANK!
Namilok si Donovan sa katingala samtang ang lata nalagpot gikan sa tuod sa kahoy. “Nahimo nako!” miingon siya. “Yey!”
Nianang pagkagabii, milingkod si Donovan tupad ni Mama pagkahuman sa panihapon. Iyang gipataas ang tirador.
“Naigo na gayud nako ang lata karong adlawa,” miingon siya, nga nagngisi.
“Maayo!” Miingon si Mama.
“Kahibalo ka, nagtuo ko nga kini nga tirador mao ang akong paborito nga butang sa tibuok kalibutan,” miingon si Donovan.
“Mao ba?” Nangutana si Mama.
“Oo. Tungod kay kini makatabang nako nga makahunahuna ni Papa ug mobati nga duol kaniya.”
Mipahiyum si Mama. “Nagtuo ko nga mahimo siyang malipayon nga makahibalo sa imong gibati. Ug tag-ana unsa? Tulo ka adlaw na lang og mauli na si Papa. Makapakita ka niya sa imong bag-ong mga kahanas.”
Dili na makahulat si Donovan! “Nakahatag kana nako og ideya,” miingon siya.
Midagan siya aron pangitaon si Dana. Mahimo niyang tudloan si Dana sa paggamit sa tirador sa samang paagi nga gitudloan siya ni Papa!
“Hoy, Dana,” miingon siya. “Gusto ka makat-on unsaon sa paggamit ang labing maayong tirador sa Jamaica?” ●
Kon kamo mopokus, mahimong mahitabo ang talagsaon nga mga butang.