Pagkat-on nga Masabtan ang Sekswalidad isip usa ka Sagrado nga Gasa

Isip mga miyembro sa Simbahan, kita gitudloan nga ang sekswal nga kasuod sulod sa kaminyoon usa ka talagsaon nga bahin sa plano sa ebanghelyo. Kini mahimong usa ka sagrado, maanindot, malipayon nga bahin sa atong kinabuhi nga mosangpot ngadto sa mas dakong panaghiusa sa atong kapikas ug sa Dios. Apan unsa man ang mahitungod sa sekswal nga mga pagbati sa wala pa ang kaminyoon? Ang atong sekswal nga mga kinaiyahan wala magsugod sa kaminyoon—ang Dios mihatag kanato og sekswal nga mga pagbati nga himsog ug importante nga aspeto sa pagkahimong usa ka tawo. Apan usahay ang atong sayop nga pagsabut mahitungod niadtong sekswal nga mga pagbati ug kinaiyahan makapahimo kanato nga mobati og dili maayo, maulaw, o makasasala.

Pipila kanato wala natudloi mahitungod sa positibo nga bahin sa sekswalidad—ang negatibo lang nga mga sangputanan sa pagsupak sa balaod sa kaputli. O tingali wala kita matudloi og bisan unsang butang mahitungod sa sekswal nga kaputli. Ug sa kadaghanan sa unsay atong nakat-unan mahitungod sa sekswalidad naggikan sa media, kadtong natuis nga mga mensahe, inubanan sa kakulang sa panabut mahitungod sa panglantaw sa Dios sa sekswalidad, makatampo sa dili maayo nga relasyon, paggamit og pornograpiya, ug pag-abuso sa kabubut-on sa uban, sama sa sekswal nga pag-atake. Busa sa unsang paagi atong makat-unan nga ang sekswalidad usa ka sagrado nga gasa, usa ka mahinungdanong bahin nga hinatag sa Dios nga kinaiyahan ngari kanato? Ug unsaon nato pagdumala sa atong sekswalidad pinasikad sa hingpit nga katuyoan sa mahangturong plano sa Dios?

Uban niini nga mga pangutana sa hunahuna, among gibutang og dungan kini nga seksyon karong bulana aron sa pagtabang ninyo sa pagpalambo sa inyong pagsabut sa panglantaw sa Dios sa tukmang sekswalidad. Kami nanghinaut nga uban sa positibo nga panglantaw, kamo mobati nga mas determinado sa pagsunod sa balaod sa kaputli, makakita og katuyoan ug paglaum diha sa inyong indibidwal nga mga kahimtang, mahimong andam nga makaangkon og usa ka lig-on, maanindot nga kaminyoon, ug dapiton ang kalinaw sa Manluluwas diha sa inyong kinabuhi. Pinaagi sa inyong mga paningkamot sa pagtuman sa mga sugo sa Dios kalabut sa sekswalidad, ang inyong “pagsalig [ang] mosamot pagkalig-on diha sa atubangan sa Dios” (Doktrina ug mga Pakigsaad 121:45).

Tanan sa among pinakamaayo,

Liahona kawani sa seksyon sa young adult