Pagpangalagad uban sa mga Chicken Pot Pie
Ang akong mga higala mitabang nako nga mobati sa gugma sa akong Langitnong Amahan sa dihang nagkinahanglan kaayo ko nga mobati niini.
Paghulagway pinaagi ni Allen Garns
Sa dihang wala damha nga ang akong inahan namatay sa edad nga 61, hingpit akong nakugang. Siya mao ang akong tinubdan sa gugma, kalumo, suporta, kalig-on, ug katawa. Gibati nako nga dili makiangayon ang pagkuha sa akong inahan ug nga ang akong tulo ka mga anak dili makiangayon nga gikuhaan sa ilang lola. Gani mibati ko og kasuko ngadto sa Langitnong Amahan. Nganong nahimo man Niya kini kanamo?
Sa mubo nga panahon, makamata ko sa tungang gabii nga dili na makatulog og balik. Usa ka buntag, nakamata ko sa alas 3:00 sa buntag. Nanghinaut nga molinga sa akong kaugalingon gikan sa kinabuhi nga wala ang akong inahan, mitan-aw ko sa akong phone ug nakakita og usa ka video sa pagluto diha sa akong newsfeed. Hingpit kini nga ehemplo sa makapahupay nga pagkaon: chicken pot pie. Naghunahuna ko kon unsa kanindot unta nga magka anaa og chicken pot pie, apan wala koy gana sa pag-andam og pagkaon alang sa akong pamilya gawas sa pag-ipis og gatas ngadto sa usa ka panaksan nga adunay cereal. Sa pagkakaron, palabyon lang usa nako nga walay makapahupay nga pagkaon, o sa ingon mao kana ang akong gihunahuna.
Sulod sa usa ka adlaw sa usag usa, duha ka mga higala ang midala kanako og mga chicken pot pie. Mihilak gayud ko human sa usa ka panahon nga gipugngan nako ang paghilak. Natandog gayud ko sa ilang pagkamabination. Nasayud ko nga dili kini sulagma. Kini mipamatuod pag-usab kanako nga ang Dios naghunahuna kanako, nga Siya nahigugma kanako, ug nga Siya nagpakabana mahitungod sa akong tinguha nga daw dili mahinungdanon alang sa usa ka chicken pot pie bisan kon nasuko ko Kaniya. Gikinahanglan kaayo nako kini nga pahinumdom.
Mapasalamaton ko alang niadtong mga higala kinsa midala kanako og mga chicken pot pie. Nangalagad sila ngari kanako sa mga paagi nga wala nila damha. Mitabang sila nga mabati nako ang gugma sa akong Langitnong Amahan sa dihang gikinahanglan kaayo nako kini.
Kini nga kasinatian mitudlo kanako sa importansya sa pag-ila ug pagsunod sa mga pag-aghat gikan sa Espiritu Santo. Lagmit kini ang tubag ngadto sa usa ka pag-ampo sa usa ka tawo nga naglisud.
Kinahanglang dili nato tugutan ang atong mga kahadlok o mga pagduha-duha nga mopugong kanato sa pagpangalagad ngadto sa uban. Nanghinaut ko nga kita maningkamot kanunay nga mahimong instrumento sa kamot sa Ginoo ug mopakigbahin sa Iyang gugma ngadto sa uban.