Usa ka Pundasyon alang sa Inyong Kaugmaon
Gikuha gikan sa usa ka pakigpulong sa Oktubre 1997 nga kinatibuk-ang komperensya.
Mga paghulagway pinaagi ni Dean MacAdam
Atol sa inyong mga katuigan sa pagkatin-edyer, nagpalambo kamo og daghan nga mga tumong nga gusto ninyong matuman sa inyong kinabuhi. Tingali kini nga mga tumong naglakip sa usa ka misyon, edukasyon, kaminyoon sa templo, malampuson nga panarbaho, ug, siyempre, ang inyong luwas nga pagbalik sa presensya sa Langitnong Amahan sa celestial nga gingharian.
Usa sa dakong mga hagit nga inyong atubangon sa pagkab-ut niini nga mga tumong mao ang malampusong pagkonektar niini ngadto sa inyong inadlaw-adlaw nga kinabuhi. Kini mahimong lisud tungod kay ang inyong panahon napuno gayud sa kalibutanon nga mga tinguha. Mahimong nalambigit kamo sa eskwelahan ug mga kalihokan sama sa musika, sayaw, mga dula, o lain-lain nga mga organisasyon. Mahimong daghan kaninyo ang nagtrabaho usab. Gisagol niini nga puno kaayo nga iskedyul mao ang katapusan sa semana nga mga kalihokan sama sa mga dula, mga sayaw, mga kalihokan sa ward, ug mga party. Dili lang kana, apan bisan asa kamo moadto kanunay kamong nag-atubang sa tintasyon gikan sa mga kaedad, social media, mga sine, mga video game, ug musika. Wow! Unsa ka mahinungdanon nga panaw!
Ang labing importante nga butang nga hinumduman sa pagbalanse niining tanan nga mga butang mao ang paghunahuna kanunay sa kinatibuk-ang panglantaw. Sama pananglit: Sa unsang paagi ang inyong kalihokan karong Biyernes sa gabii makaapekto sa unsay mahitabo inig ka 2, 5, o 10 ka tuig gikan karon? Tingali kamo maghunahuna nga ang Biyernes sa gabii walay kalabutan kaayo inig ka 2 ka tuig gikan karon, apan mahimong aduna kini, depende kon asa kamo ug kon unsay inyong gibuhat. Kon gusto ninyong makab-ot ang inyong potensyal sa umaabot ug mahimong ang tawo nga gusto sa Ginoo nga kamo mamahimo, kinahanglan ninyong hinumduman ang mahangturon nga mga tumong ug buhaton kini karon.
Inyong Pundasyon sa usa ka Nabaliktad nga Kalibutan
Ang propeta Isaias nakakita sa atong panahon ug mipasidaan nga kini mahimong usa ka panahon nga nabaliktad. Gipanagna niya: “Alaut kanila nga nagangalan sa dautan nga maayo, ug sa maayo nga dautan; nga nagabutang sa kangitngit nga ilis sa kahayag, ug sa kahayag nga ilis sa kangingit; ug nagabutang sa mapait nga ilis sa matam-is, ug sa matam-is nga ilis sa mapait!
“Alaut niadtong mga maalam diha sa ilang kaugalingong mga mata, ug mga buotan diha sa ilang kaugalingong pagtan-aw!” (Isaias 5:20–21).
Samtang magtubo kamo niini nga nabaliktad nga kalibutan, kamo adunay hagit sa pag-atubang sa nagkalain-laing mga pagpamugos sa moderno nga kinabuhi. Sa unsang paagi makalahutay kamo sa inyong mga katuigan sa pagkatin-edyer nga mahimong andam sa espirituhanong paagi alang sa umaabut?
Importante alang kaninyo nga inyong mailhan nga ang pundasyon sa inyong kaugmaon, sa temporal ug espirituhanon nga paagi, kay gitukod karon. Kon ang inyong pundasyon nahuyang tungod sa sala ug wala maayo, nan ang estraktura sa inyong kinabuhi matukod diha sa nahuyang nga pundasyon. Ang inyong kaugmaon mahimong mas walay kasiguroan ug siguradong mas maka-stress.
Usa sa mahinungdanong mga katuyoan sa ebanghelyo ni Jesukristo mao ang pagtudlo kanato sa atong mahangturong potensyal. Usa sa katuyoan sa organisasyon sa Simbahan ni Jesukristo mao ang pagtabang kanato sa pagkab-ot niana nga potensyal. Gitudloan kita, “Diha sa lig-on nga sukaranan sa atong Manunubos, kinsa mao si Kristo, ang Anak sa Dios, nga kamo kinahanglan gayud nga motukod sa inyong tukuranan.” Ang atong Manluluwas, si Jesukristo, “ang tinuod nga tukuranan, usa ka tukuranan diin kon ang mga tawo magtukod dili sila mapukan” (Helaman 5:12).
Ang Kada Adlaw nga Ginagmay nga mga Buhat Makahimo og Dakong Kalainan
Wala pa ko makahimamat og usa ka negosyante, magtutudlo, artist, o atleta kinsa nakakab-ot og taas nga lebel sa pagkamaayo kinsa wala nagmalampuson sa pagkonektar sa panglantaw sa ilang kaugmaon ngadto sa ilang inadlaw-adlaw nga kinabuhi. Ang usa ka tumong o panglantaw nga dili konektado ngadto sa inadlaw-adlaw nga kinabuhi pinaagi sa inadlaw-adlaw nga buhat labing siguro mahimong damgo nga dili matuman.
Sama pananglit: Kunohay kamo adunay usa ka umaabut nga midterm nga eksamin sa geometry. Usa sa inyong mga tumong mao ang makakuha og maayong grado niana nga klase, busa unsa man ang inyong buhaton aron sa pagkab-ot niana nga tumong? Maghulat ba kamo hangtud sa katapusang higayon ug magdali-dali sa pagtuon sa gabii sa dili pa ang eksamin? Kini nga pamaagi puno sa risgo. Imbis nga tinuoray nga makasabut sa materyal ug mahimong hingpit nga andam ug masaligon mahitungod sa hilisgutan, mosulod kamo sa lawak klasehanan nga gikulbaan og gamay, naglaum nga ang magtutudlo mangutana lamang sa mga pangutana nga nahibaloan ninyo ang tubag. (Sigurado ko dili lang ako ang nakasinati niining wala mahimutang nga pagbati!)
O mogahin ba kamo og gamayng panahon matag adlaw nga komprehensibong tun-an ang hilisgutan sa kalma nga paagi? Kini nga pamaagi makahatag kaninyo sa gikinahanglan nga panahon aron masabtan ang materyal sa husto nga paagi, ug kamo adunay daghang panahon sa paghangyo og tabang sa magtutudlo kon maglibog. Kini moresulta sa mas lawom nga pagsabut sa materyal ug dugang nga pagsalig sa dihang motubag na sa eksamin.
Aron makab-ot ang bisan unsa nga tumong—ilabi na sa celestial nga mga tumong—ang nagpadayon nga pagpahinungod matag adlaw mao ang tubag. Makapanalipod ba kamo sa inyong kaugalingon batok sa mga pagpamugos ug mga kadautan sa kalibutan pinaagi lamang sa paggahin og duha ka oras sa simbahan sa Dominggo? Lagmit dili. Lisud kaayo ang magdali-dali og pagpangandam sa katapusang higayon alang sa usa ka misyon, ug sama ka lisud ang magdali-dali og pagpangandam sa katapusang higayon alang sa usa ka kaminyoon sa templo. Ayaw pagrisgo. Pagmaalamon. Sama sa inyong mga pagtuon, ang nakapokus nga paningkamot sa matag adlaw mao ang bugtong nga sigurado nga paagi aron magmalampuson. Andama ang inyong kaugalingon matag adlaw. Pagtuon sa mga kasulatan. Pakigsulti sa inyong Langitnong Amahan pinaagi sa pag-ampo. Tambong sa seminary. Ipabilin ang inyong kaugalingon nga limpyo sa moral nga paagi ug andam. Samtang inyo kining buhaton, magmalinawon kamo, limpyo ang konsensya, taas ang pagsalig sa kaugalingon, ug masayud sa inyong kasingkasing nga ang inyong kaugmaon mahimong hayag ug nindot.
Padayon uban sa Tabang sa Ginoo
Gusto sa Ginoo nga molampos kamo, ug mag-uban Siya kaninyo. Motabang Siya kaninyo ug mosuporta ug mopaluyo kaninyo sa panahon sa inyong panginahanglan kon kamo matinuoron sa Iyang plano. Kon kamo magpaduol Kaniya sa matag adlaw, Siya magpaduol kaninyo, ug kamo makadawat og mga panalangin sa matag aspeto sa inyong kinabuhi, ilabi na sa labing importante—ang espiritwal.
Sa katapusan, ang inyong gugma sa Ginoo mao ang makatabang kaninyo sa pagpasalig ug dayon magpabiling matinud-anon sa inyong celestial nga mga tumong. Nasayud ko nga ang Ginoo buhi ug nga ang Iyang tinguha ug paglaum alang kanatong tanan mao ang usa ka celestial nga kaugmaon.