Mga Pangutana ug mga Tubag
Unsaon ninyo pagkahibalo nga ang Langitnong Amahan mipasaylo kaninyo?
Pagbati sa Espiritu
Nasayud ko nga napasaylo ko sa matag higayon nga mabati nako ang Espiritu. Ilabi na isip usa ka misyonaryo, importante nga sa kanunay makabaton sa Espiritu diha sa atong mga kinabuhi. Kon nagpakabuhi kita sa pagkamatarung, kita kanunayng makabaton sa Espiritu uban kanato, ug Siya motabang kanato nga masayran ang atong kahimtang uban sa Dios.
Elder Bakker, edad 23, Misyon sa Brazil Vitória
Kasiguroan Nga si Kristo nag-uban Kanako
Didto sa Tanaman sa Getsemani, si Jesukristo milahutay sa tanang mga kasakit ug mga sala sa kalibutan aron kita mapasaylo sa atong mga sala ug usa ka adlaw mahimong takus sa pagsulod sa celestial nga gingharian. Mobati ko nga napasaylo kon mobati ko og kasiguroan nga si Kristo nag-uban kanako ug nakatandog kanako sa espirituhanon nga paagi.
Alex H., edad 15, Idaho, USA
Gugma ug Kalipay
Ganahan ko sa gasa sa paghinulsol tungod kay gibati nako pirme ang hilabihan nga kahasol sa tanlag ug kasakit sa matag higayon nga ako makahimo og sayop. Kon ako mogahin og panahon sa pagluhod ug pagpangayo sa Langitnong Amahan alang sa kapasayloan inubanan sa sinsero nga tinguha, mabuntog ko sa usa ka kusog nga pagbati sa gugma, kalinaw ug kalipay! Dili na ko mobati nga nag-inusara, ug tungod niana nasayod ko nga ang Langitnong Amahan mipasaylo kanako.
Brynlee H., edad 17, Utah, USA
Kalinaw sa Akong Kasingkasing
Ang pagbati og kalinaw sa akong kasingkasing mao ang akong paagi sa pag-ila nga ako napasaylo. Kanunay nakong mahinumduman nga ako nakabuhat og sayop, apan nakatabang kini nako nga makat-on nga dili kini buhaton pag-usab. Ang Ginoo mihimo kanato og usa ka maanindot nga saad: “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom [niini]” (Doktrina ug mga Pakigsaad 58:42).
David E., age 19, Chihuahua, Mexico