Mga Young Adult
Pag-ugmad og usa ka Positibo nga Panglantaw sa Sekswalidad
Ang Dios mipanalangin kanato og balaanon, tukma nga sekswal nga mga pagbati alang sa usa ka rason. Samtang mas masabtan nato kadtong mga pagbati isip dili minyo nga mga sakop sa Simbahan, kita makakaplag og mas dakong kalinaw ug paglaum.
Hilabihan ka daghan sa kalibutan karon ingon og naglibog kaayo kabahin sa usa ka himsog, positibo nga pagsabut sa sekswalidad.1 Ug magpakatinuod kita, nga sa ubang mga paagi, ang pipila kanato nga mga young adult nga mga miyembro sa Simbahan mao usab. Busa atong hatagan og katin-awan ang mga butang.
Una, kinahanglan nga makahibalo kita isip mga Santos sa Ulahing mga Adlaw unsay atong panglantaw sa sekswalidad. Daghang katuigan ang milabay, si Elder Parley P. Pratt (1807–57) mitudlo: “Ang atong natural nga mga pagbati gitisok sulod kanato pinaagi sa Espiritu sa Dios, alang sa usa ka maalamon nga katuyoan; ug sila mao gayud ang sukaranan nga tinubdan sa kinabuhi ug sa kalipay—sila mga semento sa tanang mahiyason ug langitnong katilingban—sila mao ang diwa sa gugma nga putli, o gugma; …
“Walay usa nga mas putli ug balaan nga baruganan diha sa yuta. …
“Ang tinuod mao nga, ang Dios … mitisok diha sa [atong] mga dughan kadtong mga pagbati nga gibana-bana nga motuboy sa [atong] kalipay ug panaghiusa.”2
Ug si Presidente John Taylor (1808–87) mipasabut usab nga: “Ato kining gidala [usa ka natural nga tinguha] nganhi sa kalibutan uban kanato, apan kana, sama sa tanang butang, kinahanglan nga mabalaan. … Usa ka tukma nga paggamit sa atong buluhaton modala sa kinabuhi, kalipay, ug kaluwasan niining kalibutan ug sa kalibutan nga moabut.”3
Simple lang nga: ang Dios milalang kanato aron makahimo sa pagbaton og sekswal nga mga pagbati. Kabahin kini kon si kinsa kita. Ug kini mahimong maayo, maanindot, makalipay nga bahin sa kinabuhi—hangtud nga makat-on kita sa paggamit ug paggiya niini sa paagi nga Iyang gitugot. Samtang atong gidumala kadto nga mga pagbati diha sa tukma nga mga paagi sa tibuok natong kinabuhi, ang mga panalangin nga atong madawat talagsaon.
Pinaagi niini nga gasa, makabaton kita og potensyal aron makatabang sa pagtuman sa plano sa Langitnong Amahan ug mahimong sama sa atong langitnong mga ginikanan.4 Subo lang, nga sa atong kalibutan karon, si Satanas nakadala og daghan kaayo ngadto sa pag-angkon og sayop nga panglantaw sa tukma, hinatag sa Dios nga sekswalidad—gusto Niya atong saypon ang paggamit o pagsabut ug ang sagradong kinaiyahan niini. Usahay iya kitang libugon mahitungod sa kalainan tali sa sagrado ug sekreto, makapahimo kanato nga mobati og kaulaw sa pagbaton og tukma nga mga pagbati nga sekswal, aron ang kakuryoso modala ngadto sa mga butang sama sa pornograpiya, o sa paggamit sa atong kaugalingon o sa mga lawas sa uban sa mga paagi nga lapas na sa utlanan nga Iyang gitakda. Apan sa pagkatinuod, ang sekswalidad—nga gigamit sa mga pamaagi nga gitumong sa Dios—maoy usa ka balaang gasa. Kon kita adunay negatibong mga pagbati mahitungod sa atong sekswalidad, tingali kinahanglan lang gyud nga mas masabtan nato kini.
Unsaon nako sa pag-ugmad og positibong pagtan-aw sa sekswalidad?
Mao nga kon natuis ang atong panglantaw sa sekswalidad, unsaon man hinoon nato sa paglantaw sa atong hinatag sa Dios nga sekswalidad sa positibo nga paagi ug makat-on sa pagsabut ug paggiya sa atong mga pagbati sa tukma nga paagi, samtang kita naningkamot aron mamahimong sama sa Manluluwas? Unsaon nato nga mahimong komportable kon si kinsa kita ug modawat sa hinatag sa Dios nga mga sekswal nga pagbati nga kabahin na sa paglalang nato? Ania ang pipila ka sugyot nga mahimong makatabang:
1. Mosabut nga ang tanan espirituwal ug pisikal nga binuhat
Kamo lagmit maghunahuna sa sekswalidad isip usa ka lunsay nga pisikal nga butang, apan aduna usab kini kalabutan sa mga panghunahuna ug pangisip. Ang atong mga hunahuna makaapekto sa atong mga lihok, ug sa paagi nga kita mogamit sa atong lawas makaapekto usab sa atong espiritwal nga kaugalingon. Si Presidente Boyd K. Packer (1924–2015) mitudlo, “Ang atong espiritu ug ang atong lawas gihiusa sa usa ka paagi nga ang atong lawas nahimong instrumento sa atong hunahuna ug pundasyon sa atong kinaiya.”5
Kon inyo kining ipadayag nga sulod sa utlanan sa balaod sa kaputli, ang atong tawhanon nga sekswalidad dili usa ka babag ngadto sa pagka-espirituhanon/espirituwalidad. Kon ikaw adunay natuis nga ideya sa sekswalidad isip usa ka negatibo nga butang, kana lagmit madala ngadto sa imong kaminyoon. Apan si Elder Jeffrey R. Holland sa Korum sa Napulog Duha ka mga Apostoles mitudlo: “Ang sekswal nga panaghiusa [sulod sa kaminyoon] mao ang … usa ka panaghiusa dili lamang sa usa ka lalaki ug babaye apan ang panaghiusa gayud niana nga lalaki ug babaye uban sa Dios. … Dili gayud kamo mahimong mas mahisama sa Dios sa bisan unsang panahona niining kinabuhi inyong gipadayag kanang partikular nga gahum.”6 Sa unsang paagi ang pagsabut niana makapausab sa imong kasamtangang mga panglantaw kabahin sa sekswalidad o sekswal nga kasuod—bisan kon ikaw dili minyo?
2. Magkat-on mahitungod sa inyong lawas
Kon wala pa ninyo buhata, pagkat-on mahitungod sa anatomiya sa tawo. Kon magkadako ang inyong pagsabut sa natural nga proseso sa kalamboan sa inyong lawas, mas masabtan ninyo nga ang tukma nga mga sekswal nga pagbati normal nga kabahin sa kinabuhi. Ang pagkat-on kabahin sa anatomiya sa tawo, mosulti sa ngalan sa parte sa lawas, ug sabton ang sekswal ug pisikal nga mga gamit niini makatabang sa pagkunhod sa gidili nga kinaiyahan niining mga parte. Sa samang higayon, usab kinahanglan atong “tangtangon ang makapahiubos, bulgar, ug hilas nga mga sinultihan, mga komedya, ug tema sa [atong] mga pagpakighinabi.”7 Kon ang mga parte sa lawas ug ang mga katuyoan niini masabtan, kita mahimong mas makuhaan ang kalagmitan sa pagtan-aw niini isip pang-sekswal lamang nga konteksto.
Si Presidente Russell M. Nelson mitudlo: “Ang matag organ sa inyong lawas talagsaon nga gasa gikan sa Dios.”8—ug klaro nga naglakip sa sekswal nga mga organ. Kini gilalang alang sa maalamon nga katuyoan, ug anaa ra kini kanato sa pagkat-on sa paggamit niini diha sa pamaagi nga gusto sa Ginoo.
3. Ayaw og kahadlok o kaulaw
Ang pagkat-on og dugang mahitungod sa inyong lawas makatabang kaninyo nga masabtan kon sa unsang paagi ang mga sekswal nga pagbati normal lang nga aspeto sa atong mga lawas. Ug samtang kitang tanan maningkamot sa pagbuntog sa “kinaiyanhon nga tawo” niini nga kinabuhi (tan-awa sa Mosiah 3:19), ang pagbaton og tukma nga mga sekswal nga pagbati dili usa ka butang nga ikaulaw. Sala lang kini kon ikaw magbuhat og dili tukma o abi-abihon ang dili tukma o maulagon nga mga hunahuna. Dili kita mobati og kaulaw o sad-an tungod kay gibati og kagutom! Ikaulaw lang tingali kon atong ipanghamong ang atong paborito nga pagkaon agig pagtubag sa atong kagutom o magsige og hunahuna og kagutom. Tuguti ang inyong kaugalingon aron makaila nga ang tukma nga sekswal nga mga pagbati ug mga hunahuna kabahin sa hinatag sa Dios nga kinaiyahan ngari kanato ug magsilbi nga usa ka mapuslanon nga katuyoan diha sa hustong dapit ug panahon.
Kon kamo makasinati og kaibog sa sama og sekso, lagmit mobati kamo og kahadlok o kaulaw sa inyong mga pagbati, apan ang Dios dili gusto nga kamo mobati niining paagiha. Mahimo kita nga magpakabuhi og matagbawon nga kinabuhi sulod sa utlanan nga Iyang gitakda alang sa atong kaayohan. Matag usa kanato adunay talagsaon nga panaw sa mortalidad, ug kon kita mohigugma Kaniya ug motuman sa Iyang mga sugo, walay kahimtang nga dili mahimo sa atong Langitnong Amahan alang sa atong kaayohan (tan-awa sa mga Taga-Roma 8:28; Juan 14:15; Doktrina ug mga Pakigsaad 90:24). Uban sa Iyang tabang, makakat-on kita ug molambo ug mahimong sama Kaniya.
4. Maghimo og makahuluganon nga mga koneksyon
Ang pisikal nga mga pagbati kabahin lang sa sekswalidad. Usa sa tinuod nga mga panginahanglan sa tukma nga mga sekswal nga pagbati mao ang koneksyon. Isip mga tawo, mangandoy kita og kasuod. Ang pakigsuod sa uban pinaagi sa lawom nga pakighigala, pakigdait, tukma nga paghikap, gugma, ug pagbati makatabang ninyo nga makita ang uban sa ilang pagkatinuod ug mopadayag sa sekswalidad sa tukma nga paagi samtang nagsunod gihapon sa balaod sa kaputli.
Si Elder Marlin K. Jensen, emeritus General Authority Seventy, miingon: “Ang Propeta Joseph Smith mitudlo nga ‘ang panaghigala usa sa labing sukaranan nga mga baruganan sa [atong relihiyon].’ Kana nga hunahuna angay nga modasig ug moawhag kanatong tanan tungod kay gibati nako nga ang pagpakighigala usa ka nag-unang mga panginahanglan sa atong kalibutan. Naghunahuna ko nga kitang tanan adunay talagsaong pangindahay sa pakighigala, usa ka lawom nga tinguha alang sa pagtagbaw ug seguridad nianang mahatag sa suod ug malungtaron nga relasyon.”9
5. Hunahunaa ang kaugalingon ninyong lawas isip balaan (tungod kay tinuod!)
Ang atong mga lawas mga maanindot kaayo nga panalangin gikan sa Dios. Ug bisan pa niana daghan kaayo nato kasagaran malit-ag sa pagpanaway sa atong mga lawas. Kon atong mahinumduman kon unsa ka makahuluganon ngari kanato ang mga lawas sa wala pa kita nakaangkon niini (ug unsa kini ka makahuluganon ngari kanato kon kita mamatay [tan-awa sa Doktrina ug mga Pakigsaad 138:17, 50]), unya kita lagmit mobati og dugang nga kamapasalamaton ug minus ang pagtamay niining talagsaong mga gasa.
Si Presidente Nelson nagtudlo: “Ang inyong pisikal nga lawas talagsaong nilalang sa Dios. Kini Iyang templo ingon man usab inyoha ug kinahanglan nga tagdon uban sa balaan nga pagtahud. … Usa ka pagtuon sa inyong lawas nagpamatuod sa balaan nga plano niini.”10 Ug ang pagkahibalo kon unsa ka balaan ang atong mga lawas tinuoray nga makaimpluwensya sa atong mga lihok alang sa mas maayo. Si Presidente Nelson mipahibalo usab: “Kon kita sa pagkatinuod nakahibalo sa atong balaan nga kinaiyahan, … Ug atong ipunting ang atong mga mata diha sa mga panan-awon, ang atong mga dalunggan diha sa mga tingog, ug ang atong mga pangisip diha sa mga hunahuna nga tinubdan sa dungog sa atong pisikal nga pagkalalang isip usa ka templo sa Dios. Sa inadlaw-adlaw nga pag-ampo, kita mapasalamaton nga moila Kaniya isip atong Tiglalang ug magpasalamat Kaniya alang sa katalagsaon sa atong kaugalingong pisikal nga templo. Atimanon nato kini ug mahalon ingon nga kini ang atong kaugalingong personal nga gasa gikan sa Dios.”11
6. Mogamit sa media nga nagpakita sa piskay nga relasyon
Ang piskay nga pakigrelasyon naglakip og pagkigkonektar, pagpaminaw, pagserbisyo, pagbalido, pagpasalig, ug dungan nga paglambo. Ang usa ka himsog nga relasyon moganti, ug ang duha ka tawo magtinguha alang sa kahupay ug kaayohan sa usag usa. Ang paggamit sa media nga nagpakita og piskay nga relasyon ug sa gikinahanglan nga proseso aron mapalig-on ang usa ka relasyon makatabang ninyo sa pagpalambo og usa ka mas positibo nga panglantaw sa sekswalidad.
Kabahin sa rason nganong ang pornograpiya makadaot sa usa ka himsog, positibo nga panglantaw sa sekswalidad mao nga kini makababag sa makahuluganon nga koneksyon ug nagtinguha nga mopalayo sa usa ka relasyon ngadto sa nag-inusara nga aspeto. Likayi ang bisan unsang sinulat, biswal, o madungog nga media nga hilabihan nga mopagana sa imong sekswal nga tinguha. Ang maayong mga musika, makapadasig nga media, ug maayong paggamit sa internet ug mga filter makatabang. Ang AddressingPornography.ChurchofJesusChrist.org makahatag kaninyo og dugang nga mga himan nga makatabang sa pagkat-on kabahin sa sekswalidad sa himsog nga paagi.
Kon nanlimbasug kamo sa pornograpiya, kinahanglang makigtambag ka sa inyong bishop o branch president, ug mahimo usab nga makig-istorya sa ubang mga lider sa Simbahan, pamilya, o mga higala alang sa suporta. Ug sa ubang sitwasyon, ang usa ka propesyonal sa pangisip makatabang.
7. Motratar sa tanan isip mga anak sa Dios
Kabahin sa sekswal nga mga kalamboan naglakip sa pagkat-on unsaon sa pagrespeto ug pagsabut sa uban. Naglakip kini sa pagkat-on nga mahimong kasaligan, dili hakog, pagkamatinuoron, ug masinabtanon sa ubang mga tawo nga mga pagbati—sa pagtan-aw kanila sama nga balaan nga mga anak sa Dios. Tanan kini nga mga kinaiya mao ang mga butang nga kita makahimo—ug kinahanglan—nga buhaton sa tibuok natong kinabuhi, ug butang kini nga mahimong mahinungdanon kaayo kon kabahin na kini sa sekswal nga kasuod uban sa imong umaabut nga mahangturon nga kompanyon.
Pangutan-a ang inyong kaugalingon: Unsaon ninyo pagtratar ang mga tawo? Mabination ba kamo? Morespeto ba kamo sa emosyonal nga mga panginahanglan ug pisikal nga mga utlanan sa ubang mga tawo? Kini nga mga hiyas makatabang ninyo sa pagpalambo sa tanang mga aspeto sa kinabuhi, lakip ang piskay nga tukma nga sekswalidad.
8. Hinumdumi ang inyong tinuod nga pagkatawo
Ang langitnong Amahan mihatag kaninyo og daghan nga mga pagbati aron mahimong tinugyanan niini. Ang pagsunod sa balaod sa kaputli makapahimo ninyo sa pagtahud ug paghigugma sa Dios, sa inyong kaugalingon, ug sa uban.
Hinumdumi nga kamo usa ka mahangturon nga binuhat nga nagpakabuhi og mortal nga kasinatian. Ang inyong personal nga kasinatian sa sekswalidad diha sa mortalidad lahi ug adunay espesyal nga papel diha sa inyong kalamboan dinhi sa yuta. Ang kalamboan dili kanunayng sayon, apan kini mosangpot ngadto sa kalipay ug kalinaw sa pagkahimong sama sa inyong Langitnong Amahan. Ug kon kamo mosunod sa Iyang mga sugo, Siya makagiya kaninyo ug matabang kaninyo sa pag-ugmad og kalig-on ug kahibalo gikan sa inyong indibidwal nga mga kasinatian uban sa sekswalidad ka makatuman sa inyong balaan nga padulngan ug potensyal.
Ayaw pasubrahi ang paghulagway sa inyong kaugalingon pinaagi sa inyong sekswalidad. Ang inyong labing importanting marka mao ang inyong pagkatawo isip usa ka hinigugma nga anak sa Langitnong mga Ginikanan. Si Presidente Dallin H. Oaks, Unang Magtatambag sa Unang Kapangulohan, mitudlo: “Ang labing mahinungdanon nga pagpasabut sa kamatuoran alang kanatong tanan mao nga kita mga anak sa Langitnong mga Ginikanan, natawo dinhi sa yuta alang sa katuyoan, ug natawo sa usa ka balaan nga padulngan. Sa matag higayon nga ang bisan hain niadtong mga ideya, bisan unsa pa man kini, mobabag nianang mahinungdanon nga kamatuoran, nan kini makadaut ug kini modala kanato ngadto sa sayop nga dalan”(sa “Interbyu Uban ni Elder Dallin H. Oaks ug Elder Lance B. Wickman: ‘Same-gender Attraction,’” newsroom.ChurchofJesusChrist.org).
Adunay katuyoan sa atong nagkadaiyang mga kasinatian ug ang mga kinaiya nga kita gipanalanginan dinhi niining mortalidad. Ang Langitnong Amahan gusto nga kamo modawat, morespeto, ug mohigugma sa inyong kaugalingon alang sa inyong pagkabalaan nga binuhat. Agig balos, Siya mogiya kaninyo sa inyong indibidwal nga panaw ug mopanalangin kaninyo diha sa mas daghang pamaagi kay sa inyong mahunahuna.
Ayaw kalimot nga kini usa ka tibuok kinabuhi nga panaw
Ang pagsabut ug pag-ugmad og usa ka positibo, piskay nga mga pagbati sa tukma nga sekswalidad dili usa ka butang nga inyong sugdan human sa kaminyoon o butang nga inyong masteron sa usa ka gabii. Kini usa ka tibuok kinabuhi nga panaw—usa nga mopanalangin ninyo sa daghang mga paagi diha sa inyong mortal ug mahangturon nga kinabuhi. Ug kon ang inyong panaw naglakip og mga maayo ug mga dautan, hibaloi nga ang makaalim ug makapatunhay nga gahum sa Pag-ula ni Jesukristo magamit sa tanan kinsa modangop Kaniya (tan-awa sa Mosiah 4:1–3, 10–13).
Sa katapusan, bisan unsa pa ang atong mga kahimtang o mga kasinatian, kon kita mosunod sa ehemplo sa atong Manluluwas, ang Dios motuman sa Iyang gisaad nga panalangin ngari kanato, ug kita makaamgo nga kita adunay usa ka bahin sa Iyang plano (tan-awa sa Doktrina ug mga Pakigsaad 59:23). Uban sa Iyang tabang, kita molampus sa atong mga paningkamot sa pagkab-ot og positibong pagtan-aw kabahin sa sekswalidad.