Sa Digital Lamang

Kinahanglan Diay Ko nga Mangandam alang sa Sakramento?

Ni Zoe Campbell

Ang paggahin og panahon aron makaamgo sa dakong mga panalangin sa sakramento matag semana makahatag kaninyo og espirituhanong gahum ug talagsaong mga kasinatian.

Tataw nakong nahinumduman ang akong unang kasinatian sa sakramento. Bag-o pa lang ko atong gidapit sa mga misyonaryo nga mosimba sa unang higayon. Subo lang kay wala ko masayud og bisan unsa mahitungod sa pamaagi sa sakramento o kon unsay mga gisimboluhan niini, mao nga ang mga babaye nga tupad nako sa paglingkod kinahanglan pang mopasabut sa tibuok proseso samtang nahitabo kini.

Ang paghandum niini nga kasinatian nakapaamgo kanako nga nakatabang unta kon naningkamot pa ko sa akong kaugalingon nga makakat-on pa bisan og gamay mahitungod sa sakramento sa wala pa kadtong higayuna, apan bulahan ko nga kadtong mga babaye nga akong tupad niadtong una nga adlaw andam sa pagpasabut sa tanan ngari kanako nianang higayuna. Sukad niadto, daghang nausab sa akong kinabuhi—lakip na ang akong kahibalo sa ebanghelyo ug sa kahulugan sa sakramento.

Daghan usab ang mga kausaban atol sa mga miaging kinatibuk-ang komperensya. Sa dihang si Presidente Russell M. Nelson mitapos sa kinatibuk-ang komperensya sa Oktubre 2019, iyang gipadayag ang pipila ka mga kausaban sa mga pangutana diha sa interbyu alang sa rekomend sa templo, ug sa iyang pagsubli sa ika-8 nga pangutana, “Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pagpangandam ug sa takus nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?”.

Nakugang ko sa pulong nga pagpangandam.

Akong nasayran nga ang sakramento dili usa ka butang nga kamo makapangandam sa mubo nga panahon lamang sa wala pa ang pagpasa sa pan ug tubig. Makapangandam kamo alang sa sakramento sa tibuok semana aron sa pagtabang kaninyo nga kusog nga makabati sa Espiritu ug pagbati sa pagkabag-o matag Dominggo.

Sukad niadto, nagsugod ko sa pagpangandam sa pag-ambit sa sakramento sa tibuok semana pinaagi sa:

1. Pagtuon sa kasulatan pinaagi sa Dali, Sunod Kanako ug naghunahuna og mga ideya nga akong mapakigbahin sa uban ug sa sunod nga miting sa Sunday School.

2. Ang pag-andam sa akong gikinahanglan alang sa simbahan sa Sabado sa gabii alang sa mga miting sa buntag (ang mga kalipay sa pang-gabii nga trabaho!). Akong siguruon nga maandam ang akong mga kasulatan ug usa ka kwaderno [notebook] aron sa pagsulat atol sa miting sa sakramento, ug ako nag-ampo nga makakita og mga tubag atol sa pagsimba mahitungod sa unsaon nako pagpalambo sa akong kaugalingon sa tibuok sunod semana.

3. Ang pagpaminaw sa espiritwal nga musika sa Dominggo sa buntag sa dili pa ako motambong sa miting sa sakramento makatabang usab kanako nga mobati sa Espiritu ug pagbaton sa sakto nga panghunahuna.

4. Ang pagbasa sa mga himno nga kantahon namo sa miting sa sakramento ug mangita sa mga kasulatan nga ilang gitudlo. Nakatabang kini kanako nga makaamgo sa mensahe ug sa kahulugan luyo sa mga himno ug nakatabang kanako sa pagpamalandong niini nga mga butang sa tibuok miting.

5. Sa katapusan, maghunahuna mahitungod sa rason alang sa sakramento sa dili pa kini ipasa. Akong pahinumduman ang akong kaugalingon nga ako kinahanglan nga kanunay mohinumdom sa “ngano” sa sakramento ug ang kaimportante niini sa tibuok semana—ang Manluluwas.

Ang katuyoan sa sakramento mao ang paghinumdom ni Jesukristo ug sa Iyang maulaong sakripisyo alang kanato (tan-awa sa Mateo 26: 26–28). Ang sakramento midapit usab kanato sa pagbag-o sa atong pakigsaad sa bunyag ug sa pagpalawom pa sa atong pasalig nga mahimong mas mahisama Kaniya, sa paghinumdom Kaniya, ug mahimong mas maayo nga mga disipulo. Makatugot usab kini kanato sa pagsugod sa sunod semana nga nabag-o sa espiritwal nga paagi.

Nakakat-on ko og mas daghan pa mahitungod sa sakramento sukad niadtong una nakong adlaw sa simbahan. Ug karon ako mobati og tumang kalipay matag semana samtang mosulod ko sa miting sa sakramento, adunay kasayuran nga ako padulong sa paghinumdom sa sakripisyo sa Manluluwas alang kanako ug mahimong mas makugihon sa paghupot sa akong mga pakigsaad. Ang pagpangandam makahimo og positibo nga kalainan sa Espiritu nga inyong mabati sa tibuok miting. Sa wala pa ang sakramento sa akong kinabuhi, ako kanunay mobati nga haw-ang—sama sa adunay usa ka butang nga kulang. Wala gayud ako masayud nga ang kulang nga tipik sa akong kinabuhi mao ang usa ka ordinansa nga yano kaayo, apan sa samang higayon gamhanan kaayo. Usa ka ordinansa nga nakatabang nako nga mapalawom pa ang akong gugma alang sa Manluluwas ug makadayeg sa tanan nga Iyang gihimo alang kanako.

Si Zoe Campbell gikan sa Scotland. Siya usa ka kinabig sa Simbahan ug usa ka estudyante sa culinary arts. Siya nakakaplag og hingpit nga kalipay sa pagkakita sa gugma sa Langitnong Amahan alang sa tanan Niyang mga anak ug pinaagi sa mga panalangin nga iyang nadawat isip usa ka miyembro sa Ang Simbahan ni Jesukristo sa mga Santos sa Ulahing mga Adlaw.

Unsa Ang Akong Mahimo?

Paghimo og lista sa unsay imong mahimo karong semanaha aron sa paghinumdom sa Manluluwas ug pagpangandam sa pag-ambit sa sakramento.

Pagdiskobre pa og Dugang

Kamo makakat-on pa og dugang mahitungod sa kaimportante sa sakramento diha sa artikulo ni Elder Ulisses Soares, “Kanunay nga Mohinumdom Kaniya,” sa Agosto 2020 nga Liahona.

Mahimo kang mosumiter sa imong kaugalingon nga mga istorya, mga ideya, ug feedback diha sa liahona.ChurchofJesusChrist.org. Naghinam-hinam kami nga makadungog gikan kaninyo!