Autalavou Matutua
O Metotia e 3 mo le Faatautaiga o Suiga o le Olaga
O suiga o le olaga e mafai ona aumaia ai le tele o le popole vale ma le atuatuvale, ae ua ou iloa e mafai ona fesoasoani auala nei e 3.
O se tasi lea o meafaigaluega aupito mata’ina ua fatufatuina. E vave ma sili atu ona lelei nai lo soo se komepiuta, ma e fesuisuiai e tusa ai ma mea na te a’oa’oa e uiga i le lalolagi. O se mea e mafai ona maua e tagata uma, e tusa lava po o le a le tamaoaiga po o tulaga, ma e le mafai ona e faatauina mai i se faleoloa po o le Initoneti. E sili atu ona faigata nai lo le mea tatou te iloa, ma ua ia te au se tala fiafia tele mo outou:
Ua ia te oe. Sa tuu atu e le Tama Faalelagi ia te oe. O lou fai’ai.
E ofoofogia le faiai o le tagata. Mo se faataitaiga, mafaufau i taimi e fufulu ai ou oloa. E i ai lau fanau laiti o loo ou taumafai pea e a’oa’o e fufulu o latou nifo i taimi uma, ae o au ua ou poto tele ai. Ou te faia e aunoa ma se tasi e tau faamanatu mai ia te au ona ua faapolokalamaina i totonu e lo’u faiai e avea o se vaega o la’u masani. Pe a pulumu [o’u nifo], ou te le tau su’eina i le Google po o le fea le pito o le pulumu e tuu ai le kulimi fufulunifo—e otometi lava ona tuu e lo’u faiai i luga o le pito felefele. E mafai ona ou fufulua ou nifo a o faalogologo i se faasalalauga, feutagaiga ma la’u fanau, po o le faitauina o se tusi ona e otometi lava le iloa e lo’u faiai o le mea e fai.
O lenei tomai e galue e aunoa ma se isi e faatautaia, e matuai lelei lava ona tautuaina i tatou i le tele o taimi, ae e faapefea pe a tatou feagai ma suiga e avea o se vaega o lenei olaga? O nisi taimi tatou te oo ai i suiga tatou te lei fuafuaina, e pei o le tatalaga o faaipoipoga po o le maliu faafuasei o se e pele, ae tusa lava foi pe sa’o le olaga, tatou te feagai pea ma suiga i le olaga e pei o nuu fou, galuega fou, faauu i le kolisi, faaipoipoina, fanauina o ni pepe, ma isi mea.
O le mea moni, e le fiafia le faiai i suiga. E manaomia ai le tele o le malosi e taulimaina ai suiga aua e le mafai ona tatou faagaoioia ma le lei mafaufauina e pei ona sa tatou masani ai. A tuufaatasi lenei mea ma lagona ia e masani ona oo mai faatasi ma se suiga, ma e mafai i nisi o taimi ona lagona ai le mamafatu.
O le mea e laki ai, e mafai ona tatou avea mea ua tatou iloa e uiga i le faiai ma galulue ai ina ia faaitiitia le popolevale ma lagona o le lofituina. I le aluga o tausaga, ua ou iloa ai ni auala se tolu e fesoasoani i tagata e faatautaia ai le popolevale ma suiga, o lea ou te fia faasoa atu ai ia te outou.
Fuafuaga 1: Faaitiitia lau vaai.
O suiga, o lona uiga o le lemailoa. O nisi taimi e le mautonu ai le faiai pe a tele ni suiga e lemailoa. E fefe i le lemailoa aua e talitonu atonu o loo i ai ni tulaga matautia i luma atu.
Faafetai, faiai, mo le faatumauina o lo tatou ola.
O le auala sili e faatautai ai se suiga, ua ou iloa, o le faaitiitia lea o lau vaai i mea ua e iloa. O le atili faalelagona ma le ogaoga o suiga, o le vaiti fo’i lena o lau vaai e tatau ona i ai. Afai e faafuasei ona leai sau galuega, atonu o le a mana’o lou faiai e fuafua soo se ituaiga o mea. O le a faapefea ona totogi au pili? O le a faapefea ona e maua se isi galuega? O afea o le a e maua ai se [galuega]? O le a le tiga o le a i ai lena faagasologa? O le a se manatu o tagata?
O le tele o nei fesili e le o iai ni tatou tali i le taimi nei, ae tatou te le manaomia tele. O le a le mea e sosoo ai? Faamata o le a e aulia le faaiuga o le vaiaso? Na o le pau lena o le mea e manaomia ona e iloa i le taimi nei.
O nisi taimi pe a tatou oo i se tiga loloto faalelagona, na pau lava le mea tatou te manaomia o le taulai atu i le tasi le aso i le taimi. O le a lau mea o le a fai mo le ti o le taeao? Tau o le tatou amata iina.
Ia faaitiitia lau vaai ia maua le filemu, ma mai iina o le a e maua ai tali. O le a taiala oe e le Alii pe a e saili atu ia te Ia ma faalagolago ia te Ia. “Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10).
Fuafuaga 2: Taulai atu i le lumanai, ae le o le taimi ua tuanai.
E fiafia le faiai e alu i le taimi ua tuanai ona e i ai mea e manatua e toso mai ai, ae o lou lumanai o le a ese mai lou taimi ua tuanai, ma o se mea lelei lena. O le nofonofo ai e mafaufau i mea na sese po o le talanoa e uiga i “aso ua mavae” o se itu e afaina ai le asō, e faigofie ona fai, ae e le aoga.
Ina ua maua la’u pepe muamua, sa matuai ou fiafia i le i ai o lenei tagata laitiiti i lo’u fale ma sa ou le talitonu i lo’u alofa tele ia te ia. Ae sa ou lagonaina foi le lofituina i le tele o le tausiga sa ia manaomia ma lo’u le mafaia ona ola i lou olaga i le saoloto sa ou i ai muamua. Sa ou mafaufau pea i le faigofie atu sa i ai le olaga. Sa ou mafaufau i mea sa masani ona ou faia o le taele ma fai lou ulu i taeao taitasi. Sa ou mafaufau i mea sa masani ona ou fiafia ai i lo’u tino. Sa ou mafaufau i taimi sa masani ona lelei ai lau malologa ma faapea ona maua ai le fiafia tele. Sa ou lagona le faanoanoa ina ua ou taulai atu faapenei i taimi ua tuanai.
Na iu lava ina ou iloaina e le mafai ona ou maua ni tali i le taimi ua tuanai. Sa tatau ona ou taulai atu i le lumanai. Sa tatau ona ou amata vaai faalemafaufau i lo’u faia o mea na ou mana’o i ai i lo’u olaga, ae faatasi ai ma se pepe. Sa tatau ona ou a’apa atu i le tagata sa ou manao e avea ai a’u, ae le o le tagata lea sa masani ona ou i ai. E le faigofie i taimi uma lenei mea, ae o lo’o avanoa pe afai ua e naunau e faaaoga le avanoa.
Ua fetalai mai le Alii ia i tatou:
“O outou o ni fanau iti, ma tou te le’i malamalama lava i le tetele o faamanuiaga o i ai i le Tamā i ona lava aao ma ua saunia mo outou;
“Ma e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala. O le malo ua ia outou ma o ona faamanuiaga ua ia outou, ma o ʼoa o le faavavau ua ia outou ia” (Mataupu Faavae ma Feagaiga 78:17–18).
Fuafuaga 3: Ia agaalofa ia te oe lava ia.
O suiga e mafai ona tuu ai o tatou tulaga sili ona lelei i se tulaga o le popole ma le le mautonu. Atonu o le a e lagonaina le tele o lagona. O nisi o mea sili ona oona e mafai ona tatou ta’uina ia i tatou lava o mafaufauga e faapea, “Maimau pe ana ou le lagona le ootia tele; E tatau ona lelei atu lo’u taulimaina o lenei mea,” po o le, “Ou te faanoanoa lava ona ou te le malosi tele.”
O le mo’omo’o maimau pe ana itiiti lou ootia, e le faigofie ai se suiga. E na o le faaopoopo ai o le maasiasi po o le tausalaina i luga o isi luitau o loo feagai ma oe. O le alofa mo oe lava ia o le ki lea.
E fai mai le agaalofa, “Ioe e faigata le mea lenei! E le afaina le tauivi,” ma, “Ou te alofa pea ia te oe.” Faamolemole ia tau atu nei mea ia te oe lava. Aua nei faaopoopo i ou tiga e ala i le mafaufau e le tatau ona e tiga.
Na auina mai i tatou e le Tama Faalelagi iinei i le lalolagi e fesoasoani ia i tatou ia avea atili e faapei o Ia, lea e mafai ona ou mafaufau i ai o lona uiga tatou te manaomia se vaega tele o le tuputupu ae. Afai ou te manao e faatetele o’u maso, e tatau ona ou si’isi’i u’amea mamafa. O le tetee atu i na mea mamafa e mafua ai ona gaui o’u maso i le mea e gata ai, a oo i le taimi e toe tulioso ai, latou te foi mai ma le malosi atu.
E faapena foi o tatou agaga. Tatou te manaomia se vaega faapitoa o le tetee atu ina ia mafai ai ona tatou toe foi mai ma le malosi atu nai lo le taimi na tatou i ai muamua.
Na faamalamalama mai e le Alii i le ala lenei: “E ao ina tofotofoina lo’u nuu i mea uma, ina ia sauniuni i latou e talia le mamalu o ia te au mo i latou, o le mamalu lava o Siona; o lē foi e le onosai i le aoaiga e le aoga i lo’u malo” (Mataupu Faavae ma Feagaiga 136:31).
O le suiga o se tasi lea o auala e mamanu ai i tatou e lenei olaga ina ia mafai ona tatou avea atili e faapei o lo tatou Tama oi le Lagi. Ia agalelei ia te oe lava i taimi o suiga. E faigata ona faia lenei mea faaletagata i nisi o taimi.