E Na’o Tusiga Faatekinolosi: Talavou Matutua
O Motugaafa e 5 e Ola Manuia ai o se Tagata Aoga i le Iunivesite
E te manao e te faaauau? Pe e te manao e te ola manuia? O nei motugaafa e mafai ona faia ai eseesega uma.
Pe o e i ai i se lotoa o le kolisi pe o sailia se tikeri i luga o le Initoneti, o le aafiaga i le Iunivesite e mafai ona aumai ai se taga o lagona ua fefiloi: fiafia ua e faasimaina lou lava ala i le lalolagi ma atonu o i ai foi se popolega i le faamaeaina o vasega maualuluga tulaga ma le totogi o le pili. Mo au, o le alu i se Iunivesite o se aafiaga e matuai fou a’ia’i. Sa ou filifili e nofo i totonu o le lotoa, o lona uiga o le nofo ese mai le aiga, ma faaaoga faatasi se potu ma se (se isi e masani i le gasu) tagata, ma taumafai e ‘ai se mea e ese mai nai lo le sanuisi—e fai nei mea uma a’o faia ni vasega faigata!
O le kolisi na aofia ai le tele o suiga, ma sa masani ona ou mafaufau pe na ia te au mea uma na manaomia ina ia faamanuiaina ai. E ui lava o le faamasani i le olaga o le Iunivesite na alu ai lava sina taimi, ae na i’u lava ina ou aoaoina ni mausa na fesoasoani ia te au e faamanuiaina ai i lo’u aafiaga i le kolisi. O ni motugaafa nei e lima na fesoasoani ia te au e faatonutonu ai fetuunaiga i le kolisi.
1. Faamuamua le Talalelei ma Saili e Faalogo ia te Ia
Atonu o le motugaafa silisili lea ona taua. A o ou amata i le kolisi, fetuunaiga o meaaoga fai i le fale, vasega, ma galuega—o mea uma a o taumafai e sue se taimi e faaalu i uo—sa lofituina i nisi o taimi. Ae sa ou iloaina e le masani ona ou taulai atu i le suesueina o tusitusiga paia ma le tatalo. Aua ina ua ou faia, sa foliga mai sa sili atu le ausia o isi mea uma. O le taimi nei pe a ou lagona le atuatuvale, ou te faaaluina se taimi e iloilo ai pe faapefea ona ou faamuamua le talalelei i lo’u olaga. Ou te le atoatoa ai, ae ou te taumafai e tatalo ma suesue i tusitusiga paia i aso uma, ina ia tele atu ou avanoa e “faalogo ai ia te Ia,” e pei ona uunaia ai i tatou e Peresitene Russell M. Nelson.1 Ua ou iloa o mea e taua ia te au e taua foi i le Tama Faalelagi, aemaise lava a’u aoaoga. Pe a ou tuu atu a’u taumafaiga aupito sili ma ou fesili ia te Ia mo se fesoasoani, e faatasi o Ia ma au ma faamalosia au e faataunuu isi mea uma e tatau ona ou faia.
2. Faatutu ni Sini ma Iloilo Soo
I le amataga o semesa taitasi, ou te fiafia e faia ni sini mo se taimi umi ma ni sini mo taimi pupuu. O sini mo taimi pupuu, o sini laiti e mafai ona fesoasoani ia te au e ausia ai la’u sini tele o le taimi umi. Mo se faataitaiga, o la’u sini mo se taimi umi o le faauu lea ma se faailoga o le tagata malaga i sootaga faalauaitele, ma o se tasi o a’u sini mo taimi pupuu o le tuuina atu lea o a’u meaaoga uma sa fai i le taimi e tatau ai. Ou te tusia i lalo nei sini ma tuu i se mea e mafai ona ou vaai soo i ai, e pei o la’u telefoni po o le faatautau i la’u pusa aisa. O le taulai atu i sini na faaosofia ai a’u e tulei agai i luma i le tele o taimi faigata i le aoga.
3. Fuafua se Taimi Suesue i Au Faatulagaga Faalevaiaso
Faia o se fuafuaga faalevaiaso poo a taimi o le a ou i ai i le vasega ma pe o afea ou te suesue ai e aoga i taimi uma lava. E masani ona ou fuafuaina le tolu itula o suesuega i le vaiaso mo itula maua taitasi ou te lesitala ai (m.f., tasi le 3-togi o le vasega e tutusa ma le iva itula o suesuega i le vaiaso). Ma pe a ou tumau i la’u fuafuaga, o le a sili atu ona faafiafiaina a’u gaoioiga faaopoopo e aunoa ma le taufaamatau o ni meaaoga e lei mae’a o loo faamalumalu mai i tua o lo’u mafaufau!
4. Taumafa i Taumafataga Paleni ma Faamalositino
O le tausia lelei o lou tino ua i ai mea uma e tatau ona faia i le faamanuiaina i le aoga. O lo’u soifua maloloina faaletino e masani ona aafia uma ai lo’u soifua maloloina faalemafaufau ma le faalelagona. A amata loa ona ou lagona le lofituina, ou te alu e tamoe. O le faamalositino e fesoasoani e faamamaina ai lo’u mafaufau, ma le taumafa i meaai maloloina ou te maua ai le malosi. Pe a ou ola maloloina faaletino, ua ou saunia lelei e taulai atu i a’u suesuega.
5. Ia Lava Le Moe
E tatau ona fitu i le iva itula le moe a tagata matutua i po uma—o se sini lenei ou te taumafai soo i ai (ma e masani ona toilalo ai). E ui lava e i ai le manao e ala umi e faitau se tusi lelei pe talatalanoa ma uo, ae o le moe o se vaega sili atu. O le moe e faaitiitia ai le atuatuvale ma e mafai ona faaleleia ai le gafatia e le tagata ona faatumauina mea sa ia aoaoina. I po a o lei faia suega, ou te faamuamua a’u faatulagaga ina ia mafai ona lava la’u moe ma faia le mea sili i le aso e sosoo ai.
I se tasi taimi sa masani ona ou faia ai nei mea e lima, sa le gata ina ou fetuunai i le olaga o le kolisi— ae sa ou ola manuia! Manatua, o le fefe e le sau mai le Tama Faalelagi. A o e faamuamua o Ia, e mafai ona Ia fesoasoani atu ia te oe e faia soo se mea ma faataunuuina mea uma e manaomia mai ia te oe.