E Na’o Tusiga Faatekinolosi: Talavou Matutua
O La’u Fautuaga mo le Sailiga Galuega i le Mae’a ai o le Kolisi
O le olaga pe a maea le faauuga e le faigofie i taimi uma, ae a i ai lo tatou faatuatua, e mafai ona fesoasoani le Tama Faalelagi ia i tatou ia iloa avanoa o siomia ai i tatou.
Sa ou papatiso i Le Ekalesia a Iesu Keriso o le Au Paia o Aso e Gata Ai i Nigeria, faatasi ai ma ou matua ina ua 10 ou tausaga. A o faasolo ina ou matua, sa amata ona ou fesoasoani i faifeautalai o le lotoifale i la latou galuega. Sa faateia au i le tele o taimi ona e leai ni tikeri i le kolisi, ae na mafai e nei faifeautalai ona tautatala atu i ituaiga tagata uma, ma sa latou faia lena mea i le mana, pule, ma le talitonuga, ma e aunoa ma le fefe.
O la laua faataitaiga na fesoasoani ou te iloa ai sa ou manao e auauna atu i se misiona, ae sa ou manao foi ia maua se aoaoga maualuga atu. Sa faigata ona taliaina au i le kolisi, o lea sa ou faaaogaina ai ma auina atu au pepa o le misiona i le taimi lava lea e tasi. Na taunuu atu lau tusi ua taliaina au i le kolisi faapea foi ma le valaauga o le misiona i le aso lava lea. Sa ou iloa sa ou fia alu i le kolisi, ae sa ou filifili e auauna i le Alii e ala i le alu muamua i se misiona.
E ui lava sa o se osigataulaga, o le auauna atu i se misiona sa taua atu ma tuu ai le kolisi. Sa ou aoaoina le tele o tomai taua — o mea e pei o le loto pulea, taulai atu, fesootaiga, taitaiga, ma le faalagolago i le Alii. Ma o mea uma sa ou aoaoina na fesoasoani ia te au i lau aoga i se taimi mulimuli ane. O le a ou le salamo lava i le faamuamua o le Alii.
O lau Malaga pe a uma le Faauuga
Ia te au lava ia, o le aoga e pei o se ki lea e matala ai faitotoa i avanoa. Ma le aoga e ala i le BYU – auala e Fesootai ai polokalama i le lalolagi atoa i Ghana ua tuuina mai ai ia te au le avanoa e faaleleia ai lou malamalama. O le malamalama o le mana e faaleleia ai olaga o tagata o lou lava aiga ma i latou o siomia au.
Ina ua uma ona faauu mai se polokalama o se matuaofaiva i le initoneti i le BYU-Idaho, sa ou maua se avanoa utiuti i se kamupani tautupe i Ghana ma amata ona faigaluega mo i latou i se tulaga tumau. Sa ou fiafia i le mea sa ou faia, ma sa latou fiafia i au auaunaga. Ae i se taimi mulimuli ane, sa tapunia loa le kamupani, ma sa leai sau galuega.
Sa o se mea faavaivai loto, ae sa faaauau pea ona ou faaaogaina mea sa ou aoaoina mai le aoga ma mai lau misiona. Sa ou filifili e faaaoga ia tomai sa ou aoaoina i lau galuega muamua ma amata lau lava pisinisi i le tuuina atu o auaunaga tautupe.
O lau malaga i le maea ai o le faauuga ua faatumulia i mea lelei ma mea faalelelei, ae ou te le o faanoanoa i le avea o aoaoga o se mea e faamuamua. A aunoa ma lena, e le mafai ona ou pulea lau lava pisinisi i le taimi lava lenei.
Pe A Oo Ina Faigata le Mauaina o se Galuega
O le toatele o le au talavou matutua sa ou talanoa i ai e taulai o latou mafaufau faapea o le tikeri mai le kolisi e otometi lava ona e maua ai se galuega. Ae o la’u lui sili lava o le mauaina lea o se falefaigaluega e faatauaina lau tikeri e pei ona ou faatauaina foi. Afai o loo e tauivi e saili se galuega pe sue lou auala pe a maea le kolisi, e le o tuua na o oe. O nisi nei o mea na ou faia i lau sailiga galuega e mafai foi ona e faia:
-
Mauaina o mea sili atu mai le aoga. E i ai se faaupuga i Aferika e tatau ona e pasi i le aoga ma aua nei faatagaina le aoga e pasi ia te oe. A e alu i le aoga ma se faamoemoega (ae le na o na e pasi atu ai), o le a e maua le malamalama moni ma tomai o le a matauina e pule o falefaigaluega — ma a uma ona maua se galuega, o le a mafai ona lelei lau faatinoga o lau galuega.
-
Talanoa i tagata uma. I lau sailiga galuega, alu atu i ai, talanoa i tagata uma, ma faateleina lau upega fesootai.
-
Ia mautinoa. Ia i ai le talitonuga ua i ai lou agavaa e galue ai. Taulai atu ia outou miti ma sini ma talitonu ia te oe lava. E faigofie lava ona aluese le mautinoa pe a uma se teenaga faalotovaivai, ae ia i aipea le faamoemoe. O le a e maua le galuega sao poo se avanoa faapisinisi lava.
-
Ia faaaoga avanoa uma. O avanoa o loo siomia ai i tatou. A tatala o tatou mafaufau ma faafetai mo avanoa ua tuuina mai e le Alii ia i tatou, o le a mafai ona tatou vaaia ma faatino avanoa ua Ia tuu mai i o tatou ala.
-
Ia siosiomia oe lava i tagata o e tutusa o outou tulaga faatauaina ma uunaia oe i au sini. E faigofie atu le agai i luma pe afai o e i ai i tagata sao — o tagata e tutusa o latou taulaiga ma oe. E tumu le sosaiete i le lotovaivai, ae o tagata e tutusa o outou tulaga faatauaina ma miti o le a siitia oe i luga ma uunaia oe e ausia au sini.
-
Ia faatuatua. O nisi taimi e te ala ae ai i le taeao ma le iloaina e leai lava sau galuega ma e leai se auala e maua mai ai ni meaai i luga o le laulau. Ae peitai, o le faatuatua i le Alii o Iesu Keriso e mafai ona faamama ai lau avega ma faaitiitia ai le lotovaivai a o e faia laasaga agai i au sini.
I le faaiuga, ia manatua pea o loo i ai se fuafuaga e faavavau a le Tama Faalelagi mo oe. E tusa lava pe le lelei mea uma i le taimi nei, e le faapea la o le a le toe lelei ai. Na sili ona lelei le saunoaga a Elder Dieter F. Uchtdorf o le Korama a Aposetolo e Toasefululua: “ou te uunaia outou ia talitonu o le a sili atu le lelei o le olaga o le tagata pe afai e te faalagolago i le Atua e taialaina au laasaga. Na te silafia mea e le mafai ona e iloaina, ma ua ia te Ia se lumanai ua saunia mo oe e le o mafai ona e mafaufauina.”1
E susulu le lumanai, ma o le a le faamaumauina ia te oe le sailiga o le poto ma aoaoga. Ia faatuatua ma fetaomi pea i luma. O le a taitai atu oe i nofoaga e mafai ona sili ona faamanuiaina ai oe e le Alii ma faaaoga ai oe ma au taleni e faamanuia ai isi.