Agai Atu i Le Aualofa

O le tausaga na te‘a nei na tuuina ai e Sister Bonnie L. Oscarson, le peresitene aoao o Tamaitai Talavou, ma Sister Linda K. Burton, le peresitene aoao o le Aualofa, ni talosaga i luga o a laua itulau o le Facebook a le Ekalesia. Sa laua talosaga atu i tamaitai talavou ma uso o Le Aualofa, faapea foi ma matua, taitai, ma faiaoga e aofia ai i le fesoasoani atu i tamaitai talavou, e faasoa mai o latou aafiaga e uiga i le agai atu mai Tamaitai Talavou i le Aualofa. Na maua e peresitene e toalua faamatalaga mai i le salafa o le lalolagi.

Na faaalia e le toatele o tamaitai talavou le fiafia tele e uiga i le siomia e ni tamaitai malolosi, a o isi na le mautinoa.

O nisi nei o faamatalaga e uiga i le faafaigofieina o le agai mai Tamaitai Talavou i le Aualofa. Ua faatulagaina i latou i ni vaega se lua: (1) O a mea e mafai ona tatou faia i Tamaitai Talavou? ma le (2) o a mea e mafai ona tatou faia i le Aualofa?

I Tamaitai Talavou

1. Auai i le Aualofa i le sauniga amata.

O le tele o taitai o Aualofa sa valaaulia tamaitai talavou i sauniga amata e faatasi i le masina ma le Lora i se lesona i nisi taimi.

O Jill, o se taitai o le Aualofa, na faasoa mai mea na fai e lana uarota. Sa ia tusia: “Matou te tuuina atu se lu‘i i tamaitai talavou ia nofo i autafa o se uso o le Aualofa a o lei amataina le sauniga, ma fesili i ai e uiga i lona olaga. E fesoasoani i tamaitai talavou le iloaina o tamaitai o le Aualofa e leai se eseesega mai ia i latou.”

2. Ia iloa e le tasi le isi i faatulagaga o aga fesootai.

“Ou te manatuaina lelei lava le fesoasoani e fufulu ipu i se taumafataga i le aoauli o se sauniga o le maliu,” na tusia e Rasela, o se tamaitai talavou. “Sa ou maua ai le avanoa e talanoa ma talie ai ma isi uso o e sa i ai i le umukuka, ma sa ou lagona le pei o se tasi o le vaega. Sa latou faaalia lo latou talitonuina o au. O se taimi taua tele lava mo au.”

O Bekah, o se uso o le Aualofa, sa faia se taumafaiga ina ia faamasani atu i tamaitai talavou. Sa ia tusia: “Sa ou faaaogaina ala o faasalalauga faaagafesootai e faauo ai i le autalavou ma ia iloa mea latou te fiafia i ai. O se taunuuga la, na avea i matou ma uo.”

3. Aoao mai i tamaitai o e fiafia i le Aualofa.

“Sa ou ola ae i se taulaga i fafo atu o Stockholm, Suetena. O lo‘u tina sa nofofua,“na tusia e Britt-Marie. “Toeitiiti atoa lou 13 tausaga ae ma papatiso ma lo‘u tina. A auai atu Tina i fonotaga a le Aualofa, sa ia aveina au ina ia aua nei tuuatoatasi na o au i le fale. Ina ua atoa lo‘u 18, sa ou masani ma alofa i uso uma.”

Na tusia e Paula, “Ona o se tagata liliu mai i le 14, sa ou faia se taumafaiga e auauna atu i e ua maliliu a latou tane, o tina nofofua, ma uso ua le toaaga mai. E lei umi ae latou valaaulia au i totonu o o latou aiga mo gaoioiga faaleaiga. O se taunuuga, i lo‘u aso Sa muamua i le Aualofa, sa ou lagonaina sa ou i ai i se potu e tumu i tina.”

“O lo‘u tina, tinamatua, ma uso o tina sa faasoa mai a latou molimau e ala i a latou faataitaiga,” na tusia e Lindsey. “Sa latou faaaofia au i galuega faatino. Sa le mafai ona ou faatali e auai aloaia i le Aualofa. E lei faafuasei le suiga. O le Aualofa lea sa ou lagonaina ou te alu lava i ai.”

4. Avea ma faataitaiga.

“Sa ou matuai fiafia lava e alu i Le Aualofa,” o le tala lea a Emily. “Ou te manatu ona o le mea moni o taimi uma lava sa ou lagona ai le latalata atu i o‘u taitai o Tamaitai Talavou. Sa latou faaalia ia te au le tele o le faaaloalo. Ou te lei maua se faalotolotolua e auai i le usoga o le Aualofa aua sa ou faapea o le a faapena foi ia i latou, ma na faapena lava.”

“Ou te moomoo na talanoa soo mai taitai o Tamaitai Talavou ia te au e uiga i Le Aualofa ma le alofa ma le usoga a tamaitai e maua ai,” na tusia e Marisa.

“O taitai e i ai se aafiaga tele i le ala e vaai ai tamaitai talavou i le Aualofa o se vaega atoa,” na tusia e Tessa. “Ou te manatu e taua mo taitai o Tamaitai Talavou le uunaia o tamaitai talavou i le Aualofa ma le usoga a le Aualofa ina ia faafeiloaia lelei i latou.”

“Ou te moomoo maimau pe ana le faia e o‘u taitai o Tamaitai Talavou le Aualofa e foliga mai o se nofoaga le manaia,” na tusia e Amanda. “O le taunuuga, o le lagona lena na ou alu ma au i le Aualofa.”

I Le Aualofa

5. Ia faia le suiga o se mea e sili atu nai lo le faa-tasi i le taimi.

E ui o le tele o peresitene o Aualofa e faia se mea faapitoa e faailoa atu ai se tamaitai talavou i lona aso muamua i le Aualofa, o manatu faaalia na faaalia ai o taitai na iloaina foi o le agai atu i le Aualofa o se mea e faifai pea.

O Raquel, o se taitai o le Aualofa i Pasila, e faasoa mai mea na faia e lana au peresitene: “(1) Na matou tuuina atu i tamaitai talavou taitoatasi se pusa faafeiloai i lona aso Sa muamua. O se taimi fiafia tele lenei. (2) I le avea ai ma se au peresitene sa matou faia ni aoaoga faamasani ma i latou ina ia latou iloa e mafai ona latou o mai ia i matou. (3) Sa matou fautua atu e le tatau ona valaaulia loa lava tamaitai talavou i le Peraimeri po o Tamaitai Talavou.”

6. Ia faatatau lesona i uso uma.

“Sa ou ola ae ma ni talanoaga loloto o le talalelei ma lo‘u tina,” na tusia e Christy, “ma sa ou iloa o le Aualofa sa masani ona sili atu le latalata i na ituaiga o talanoaga.”

Na tusia e Jillian: “Sa ou faananau lava mo se vaaiga manino faaleagaga ma sa talisapaia le mauaina.”

“Sa ou tauivi e faatatau lesona ia te au ma uso o ē sa foliga mai e matua tele atu ia te au,” na tusia e Marisa.

“Sa ou fiafia lava e faalogo i manatu o tamaitai e mafai ona faasoa mai ia te au se vaaiga o lo matou faamoemoega ou te lei vaaia muamua i ai,” na tusia e Emily.

7. Nofo i talaane o se uo i le aso Sa.

“E leai se tagata o lou aiga ma te nonofo faatasi,” na tusia e Lacey, o se tamaitai talavou. “O le i ai o ni uso e fai mai ‘Talofa’ ia te au pe matou te nonofo faatasi e faia se eseesega tele.”

O Kelly, o se uso o le Aualofa, na faia mai se faaupuga faigofie lava. Sa ia tusia: “Afai o se tagata e le lagonaina le taliaina, e faigata ona auai mai pea lava pea.”

O le mea e faanoanoa ai, o Nikki o se tasi o uso na lagonaina le le toafimalie lelei. O le mea sa ia tusi e faamanatu mai ai ia i tatou o loo i ai isi mea e mafai ona tatou faia i taimi uma. “I tulaga e pei o aʼu, o nisi e leiloloa i le le toaaga mai. O le Aualofa e manaomia e avea ma se nofoaga lea e mafai ona tatou opogi ai tamaitai o vaitausaga uma, e tusa lava po o ai i latou po o le a se mea ua latou faia.”

Sa tagi Crystal i lona aso muamua. Sa ia tusia: “Na opo atu au e lou taitai o Tamaitai Talavou talu ai ma valaaulia au ma te nonofo faatasi ma ia. Sa ou faatasi ai ma ava, tina, ma tina matutua. Sa ou faasoa atu o‘u lagona, ma sa latou faalogologo. Mo le taimi muamua sa ou lagonaina le malosi o le avea ma se vaega o tamaitai e taumafai ia avea atili e faapei o Keriso. Sa ou lagona le faamanuiaina tele i le avea ai ma se vaega o lenei faalapotopotoga i le lalolagi atoa.”

8. Tuu atu i tamaitai talavou avanoa e auauna atu ai.

“Sa talosagaina au e ta le piano mo sauniga i aso Sa,” na tusia e Amy. “O le iloaina sa manaomia au na fesoasoani mai ia te au e atiina ae se sootaga ma isi uso. E pei lava o le saunoaga a Peresitene Gordon B. Hinckley (1910–2008) e uiga i tagata fou i le Ekalesia e manaomia se uo, o se tofiga, ma le faafaileleina e ala i le afioga lelei a le Atua [tagai i le ‘Saili Tamai Mamoe, Fafaga Mamoe,’ Liahona, Iulai 1999, 118]. Sa ou manaomia na lava mea.”

Na tusia e se uso fou o le Aualofa, o Cate: “Na oo ina ou iloa sa i ai sau matafaioi taua i le Aualofa ina ua valaauina au e avea ma se faiaoga. Sa ou aoaoina ni mea se tele. Ou te lei faaipoipo lava, ae ou te lagona ua ou saunia mo se faaipoipoga ma le tulaga faatina e faafetai ai i le Aualofa.”

O Salote, o se tamaitai talavou, sa faia se taumafaiga. Sa ia tusia: “Sa ou vaai mo ni avanoa e auauna atu ai aua e seasea lava ona ou maua le avanoa e auai i sauniga a le Aualofa i aso Sa. Ae ui i lea, sa tele avanoa e auauna atu ai ma aoaoina au i le uiga o le Aualofa.”

9. Ia iloa e taliaina oe ma e manaomia.

Na tusia e Brooke, “O le manao faigofie o tamaitai i la‘u uarota e fai mai ni fesili e uiga i le mea sa taua ia i matou sa avea o se mea tele. Sa ou iloaina e ui lava o nei tamaitai na eseese aafiaga o o latou olaga nai lo au, sa tutusa lava o matou faamoemoega autu, miti, ma mea e fefe ai.”

O Robyn, e ui i lea, sa faigata lava. “Sa ou fou ma na o au lau tupulaga sa i ai i le Aualofa,” na ia tusia. “I le taimi muamua sa ou lagona e le tatau ona ou i ai iina.” Ae sa faaauau pea ona o Robyn ma lona tina. “Na faifaimalie lava ona iu ina ou masani i tamaitai ma amata ona fiafia i le Aualofa ma faiaoga asiasi.”

Na tusia e Tepora: “Na ou iloaina o au o se uso o le Aualofa ina ua fai mai ia te au sister Bonnie, lou peresitene o le Aualofa e fesoasoani ia te ia i le faamamaina o le fale mautotogi o se uso. O le uso lea na ola mativa ma na maliu faafuasei. A o ma iloiloina ma le faaaloalo ni mea na i ai i le faaiuga o lona olaga faigata, na ma tau atu i le ata faaipoipo o le uso. Sa i ai iina, ma ataata mai ia i maua, se tamaitai mataina, mata fiafia ma enaena lona tino i lona ofu faaipoipo satini paepae. Na fai mai ma le filemu Bonnie, ‘O le ala lenei o le a ta manatua ai o ia.’ Sa ou lagonaina se alofa mo se uso ou te lei feiloai i ai i le olaga nei. O i matou o ni uso i le Aualofa. Sa faaiu lo ma aso ma Bonnie i loimata ma se opo.”

Ia avea moni lava i tatou ma se “li‘o o tuafafine,” e pei ona saunoa ai Peresitene Boyd K. Packer (1924–2015), Peresitene o le Korama a Aposetolo e Toasefululua, ma le agamalu e faatatau ia i tatou o uso o le Aualofa. Ia tatou atiina ae i luga o mea tatou te tutusa ai. O lo tatou agai atu mai Tamaitai Talavou i le Aualofa o le ala a le Atua mo i tatou i le avea ai ma Ona afafine ina ia tuputupu ae ma atiina ae. E moni lava, e pei ona fai mai ai le mautauave a le Aualofa: “E Le Uma Le Alofa” (tagai 1 Korinito 13:8).