Na’o Tusiga Faatekinolosi
E Mafai e Tatou Uma ona Maua le Olioli i totonu o o Tatou Falepuipui Patino
Ona o Keriso, o o tatou taimi sili ona pogisa e mafai ona avea ma mataupu aupito fiafia i tala o o tatou olaga.
“Ua aoaoina au, ia toafilemu lou loto, i mea ua ia te au” (Philippians 4:11). O upu nei a Paulo i se tusi i le nuu o Filipi. Ae ina ia faamalieina e tusa lava po o fea o tatou i ai po o le mea o loo tatou feagai ai e faigofie ona ta’u ae faigata ona faia.
E faapitoa lava le ofoofogia ona ua mafai e Paulo, mai tagata uma, ona faamalieina i le tulaga sa i ai o ia. Sa ia tusia nei upu ao lokaina i le falepuipui — ma e le pei foi o falepuipui tatou te mafaufau i ai i aso nei. I le taimi nei, o falepuipui e masani lava o se potu e i ai ni piliki sima, se faleui, meaai, ma ni lavalava mama ma ofoina atu ai se avanoa e galulue ai ma fegalegaleai ma isi, e tusa lava po o le a le tele. Ae sa i ai Paulo i se falepuipui lea sa faamatalaina e i latou e tusia talafaasolopito o le “sefululua futu [3.6 m] le loloto ifo i le eleele” ma le “inosia ma le tulaga palapala, o le pouliuli, ma le manogi leaga.” O le potu lea, lea e 6 1/2 futu (2 m) le maualuga, e 30 futu (9 m) le umi, ma e 22 futu (7 m) le lautele, o iina “o pagota o e na faasalaina e oti a le o le faaoolima i ai poo le tuua ai e fiaaai.”1
O iina na i ai Paulo.
Ae peitai, i se isi itu, i le tulaga pagatia tele, sa ia tusia ai mea e toatele Kerisiano sa latou taua o le tusi aupito sili ona fiafia i le Tusi Paia. Na ia faailoa mai le agaga faafetai (tagai i le Filipi 1:3), faamoemoe (tagai i le Filipi 1:20), ma faalagolago i le alii (tagai Filipi 2:19). Sa ia ta’ua le fiafia ma olioli i le silia ma le 15 taimi i le na o le tusi lava lea.
E le pei o Paulo, o le toatele o i tatou e le faaaluina o tatou aso e loka ai totonu o puipui o le falepuipui. Ae e mafai ona lokaina le toatele o i tatou i se tulaga faalemafaufau—ua pueina i totonu o se tofotofoga lea e foliga mai o le a tapunia i o tatou luga. O o tatou falepuipui e mafai ona avea o se galuega ua le toeiai, o le maliu o se e pele, tuuatoatasi, fefe, faafitauli tautupe, vaisu, tiga, po o le popole. Pe a tatou lagonaina le lokaina i o tatou lava falepuipui patino, pe o tatou, avea e pei o Paulo, e faatumulia o tatou loto ma a tatou upu i le faafetai, faamoemoe, faatuatua, talitonu, ma le olioli? Mata e mafai ona tatou toe tepa i tua i o tatou taimi i le falepuipui ma tagai atu i ai o ni mataupu e sili ona fiafia i o tatou olaga? E mafai faapefea ona faia lenei mea?
E mafai ona tatou maua lenei mea pe a tatou talitonu i le mea na talitonu i ai Paulo ina ua ia fetalai, “ou te mafaia mea uma lava i le faamalosi mai o Keriso ia te au” (Filipi 4:13). E auala mai ia Iesu Keriso e mafai ai ona tatou matua faatumulia i le olioli e oo lava i o tatou nofoaga sili ona pogisa, “i soo se mea ou te i ai” (Filipi 4:11).
Sa aioi atu Paulo i tagata o Filipi, “Aua nei popole outou i se mea e tasi” — i se isi faaupuga, aua le popole i le soona fai fua o soo se mea, “ae o mea uma e ala i le tatalo ma le faatoga atoa ma le faafetai, ae ia faailoa atu o outou manao i mea uma lava i le Atua” (Filipi 4:6). Sa faaauau pea Paulo, “O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu” [Filipi 4:7). Ao tatou i ai i o tatou falepuipui ma tatalo i mea uma ua i ai tatou, faafetai i le Tama Faalelagi mo mea uma ua ia faia, e mafai ona faamautinoa moni lava o le a lelei mea uma ona o Iesu Keriso.
Tau ina ia manatua, ona o Keriso lea, a o i ai Paulo i le falepuipui, na ia tusia ai le tusi aupito sili ona fiafia o le Tusi Paia. O o tatou lava falepuipui e mafai ona avea ma mataupu e sili ona tatou fiafia i ai. Na aoao mai Russell M. Nelson, “Afai o taulaiga o o tatou olaga e i fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea e tutupu—pe le o tutupu foi—i o tatou olaga.”2 E mafai ona tatou fiafia ma faamalolosia e ala ia Iesu Keriso, i soo se tulaga o tatou i ai.