Fausiaina o se Sulufaiga Faaleagaga ma le Faaletino
E alala le tusitala i Iuta, ISA.
O le faama’i ma faaletonu e mafua mai ai, tapunia o le tele o pisinisi, ma le vevesi o le tamaoaiga na mafua ai ona tuufesili le toatele o tatou, E mafai faapefea ona ou saunia lelei mo le lumanai?
Ata na tusia e David Green
Ua uma ona fautuaina i tatou e fausia se sulufaiga mo o tatou aiga i le faaletino ma le faaleagaga. Na aoao mai Elder David A. Bednar o le Korama a Aposetolo e Toasefululua, “I le avea ai ma soo o le Faaola, ua poloaiina i tatou ia ‘saunia mea manaomia uma’ [Mataupu Faavae ma Feagaiga 88:119; faaopoopo le faamamafa].” Na ia toe aoao mai: “Ua folafola mai foi ia i tatou, ‘afai ua outou saunia o le a outou lē matata’u’ [Mataupu Faavae ma Feagaiga 38:30]. … Ae o apoapoaiga faifai pea e sauniuni ua fofogaina mai pea e taitai o le Ekalesia mo le tele o tausaga.”1
Ina ia saunia, e mafai ona tatou liliu atu i le taitaiga mai le Alii. Na saunoa mai Peresitene Russell M. Nelson:
“Mo le tele o tausaga, ua augani mai ai lava perofeta a le Alii ia i tatou e teu ni meaai, vai, ma teuga tupe mo se taimi e manaomia ai. … Ou te uunaia outou ia faia ni laasaga ina ia saunia ai faaletino. Ae e sili atu lo’u popole i a outou sauniuniga faaleagaga ma faalelagona.”2
Ua tatou iloa o aso mulimuli o le a le lelei mo le au loto vaivai. O le a sili atu ona oo le lalolagi i se toatuga, ma o le a tofotofoina foi e faamaoni. Na faapea mai Peresitene Nelson: “Ioe, e mafai ona tatou teuina a tatou lava faaputuga faaleoleo o meaai, vai, ma teugatupe. Ae e tutusa foi le taua tele i lo tatou manaomia ona faatumu o tatou faleteuoloa faaleagaga faaletagata lava ia i le faatuatua, upumoni, ma le molimau.”3
O le a matua taua le saunia o i tatou taitoatasi e le gata i le taimi nei ma faaletino mo le mea o le a oo mai ae faapena foi i le faaleagaga. E i ai i nei mea vaega e tutusa lelei ma a tatou sauniuniga.
Vai ma le Vai o le Ola
I le faaletino, o le tasi o a tatou manaoga autu o le mafai lea ona teu vai inu fou. Mo le toatele o tagata, o lamala, ma punaoa o suavai ua faaleagaina, ma isi faafitauli e faatatau i le suavai na mafua ai ona tupu le matua popole. Pe a talafeagai ai, e lelei le i ai o se sapalai o le vai lea e mafai ona tumau lona lelei i ni nai aso seia mafai ona toe faaleleia pe maua nisi vai mama. (E manaomia e tagata taitoatasi le fa lita i le aso mo le taumafa ma le tumama.)
I le faaleagaga, tatou te manaomia foi se sapalai e le aunoa o le vai o le ola mai lo tatou Faaola, o Iesu Keriso (tagai Ioane 4:10). O le tauina atu e faapea, o le savali autu lava na tuuina mai e lo tatou perofeta, ina ua oo mai le faamai o le faalogo ia te Ia—ia faalogo ia Iesu Keriso e ala i Lona Agaga ma Ana aoaoga. Na faapea mai Peresitene Nelson:
“I nai vaiaso ua tuanai atu, ua oo ai le toatele o i tatou i ni mea faalavefau i o tatou olaga patino. O mafuie, o mu, lologa, mala, ma aafiaga na mulimuli mai ai ua faalavefauina aga masani ma mafua ai le lē lava o meaai, mea e manaomia, ma teugatupe. …
“A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni. …
“Ou te toe faafou atu la’u aioiga mo outou ia fai po o le a lava le mea e faateleina ai lo outou gafatia faaleagaga e maua ai faaaliga faaletagata lava ia.
“O le faia o lea mea o le a fesoasoani ia te oe e iloa ai le auala e agai ai i luma i lou olaga, po o le a le mea e fai i taimi o faalavelave, ma le auala e iloatino ai ma aloese mai faaosoosoga ma le taufaasese o le tiapolo.”4
Ua talosagaina soo i tatou e le perofeta ina ia faateleina lo tatou tomai e maua ai faaaliga. E taua tele mo i tatou taitoatasi le faia o se taumafaiga loloto faaleagaga e maua ai le vai ola i aso uma ina ia mafai ona tatou faalogo, maua, ma faatino e ala i faaaliga faaletagata lava ia.
Meaai ma le Tausiga Faaleagaga
O le i ai o se sapalai o meaai ia lava e taua foi ia mafai ai ona tatou tua atu i ai i se faalavelave faafuasei. Pe o se tulaga o le leai o galuega, mala faalenatura, po o isi faalavelave, e mafai ona fesoasoani le teuina o meaai e fesoasoani ia i tatou i taimi o tofotofoga. Ua uunaia i tatou e perofeta ina ia tatou teuina meaai e pei ona tatou mafaia. O le amataina i ni nai vaiaso, o sapalai e mafai ona avea ma se laasaga taua muamua i le fausia o le lava o meaai e teu ina ia tausia ai o tatou aiga i taimi e manaomia ai.
E tatau foi ona saunia i tatou e ala i le fafagaina faaleagaga o se vaega o lo tatou olaga i aso uma. Na aoao mai Peresitene Nelson: “O le tatou sailiga silisili lava i le olaga o le saunia lea e feiloai ma lo tatou Mataisau. Tatou te faia lenei mea e ala i le tauivi i aso taitasi ia avea atili e pei o lo tatou Faaola, o Iesu Keriso. Ma e tatou te faia lena mea pe a tatou salamo i aso taitasi ma maua Lana faamamāāga, faamalologa, ma le mana faamalosiau. Ona mafai lea ona tatou lagonaina le filemu ma le olioli tumau, e oo lava i taimi faigata.”5
O le faataoto i taupou e toasefulu ua aoao manino mai ai lenei mataupu faavae. Na saunoa mai Peresitene Dallin H. Oaks, Fesoasoani Muamua i le Au Peresitene Sili:
“O le matua taufaamata’u lava o le savali o lenei faataoto. O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia. …
Ua aoao mai le Tusi a Mamona, “O le olaga lenei o le taimi lea mo tagata e saunia ai e fetaiai ma le Atua” (Alema 34:32). … O saunia ea i tatou?”6 E le mafai ona tatou faatalitali seia oo ina afio mai le Alii e fafaga ai i tatou lava faaleagaga.
O Fesootaiga ma le Tatalo
I se faalavelave, o fesootaiga o se manaoga taua tele. I taimi o le pe o le paoa po o isi faalavelave, e vave lava ona lofituina ia ‘olo o telefoni feaveai, ma o le mafai ai ona fesootai, e matuai aafia ai lava. O le i ai o se fuafuaga o fesootaiga mo tagata o le aiga ma le uarota o se sauniuniga taua lea. O le a faapefea ona tatou fesootai atu i tagata o o tatou aiga pe afai e le o ola a tatou telefoni pe le mafai foi ona tatou fesootai atu faaletino? O le faia o se fuafuaga o se nofoaga o le a fesoasoani ai i tagata o le aiga ia iloa le mea e fai ina ia mafai ona fesootai.
Ua faavaeina e lo tatou Tama i le Lagi Lana fuafuaga o fesootaiga e ala i le uunaia o tatalo e le aunoa. O se mea e matua faamamaluina le talanoa atu i lo tatou Tama Faalelagi i soo se taimi ma soo se mea tatou te mananao i ai! “Ia faamaoni,” ua faapea mai ai le Faaola, “ma tatalo i taimi uma, ma teuteu ma faamumu a outou lamepa, ma ia i ai le suauu ia te outou, ina ia mafai ona outou saunia ai i le afio mai o le Faatoafaiava” (Mataupu Faavae ma Feagaiga 33:17).
O a tatou taumafaiga e tatalo ma le faamaoni, o le a tatou maua ai le mafanafana e talanoa atu ai ma mauaina le taitaiga mai lo tatou Tama i le Lagi, ma o lena mea o le a maua ai se fesootaiga taua e taiala ai i tatou ma o tatou aiga i taimi o faigata.
Malutaga ma Tutu i Nofoaga Paia
O le toatele o i tatou sa talosagaina e “nonofo i le fale” i le taimi o le faamai. Sa tatou iloaina lelei o le i ai o ni malutaga saogalemu e i ai ni sapalai talafeagai, e taua tele i le sauniaina. E atamai foi le sailia o nisi fale e o i ai, pe a faapea ua le saogalemu o tatou aiga ona o mala faalenatura po o isi tulaga ia e manaomia ai ona tatou o ese.
E faapena foi, ua uunaia i tatou e “malu” i le talalelei. Na aoao mai Peresitene Oaks: “Pe o tatou mulimuli ea i le poloaiga a le Alii, ‘Ia outou tutu ai i nofoaga paia, ma aua le masii ese, seia oo mai le aso o le Alii; aua faauta, e vave lava ona oo mai, ua fetalai mai ai le Alii’? (MF&F 87:8). O a na ‘nofoaga paia’? E aofia ai le malumalu ma ona feagaiga e tausia ma le faamaoni. E aofia ai se aiga, o i ai fanau e faatauaina ma matua e faaaloalogia. E moni lava, o nofoaga paia e aofia ai o tatou valaauga ua tofia i le pule o le perisitua, e aofia ai misiona ma valaauga ua faataunuuina ma le faamaoni.”7
Na lagona e tagata o le Ekalesia le misia i le taimi na le mafai ai ona tatou feiloai faatasi o ni faapotopotoga po o le auauna atu i le malumalu. Ae na tatou aoaoina foi le taua o le faatuina o o tatou aiga o ni nofoaga paia. O le auai i sauniga a le Ekalesia, auauna atu i le malumalu, ma le avea o o tatou fale o ni maluapapa o le faatuatua o le a faamalolosia ai i tatou ma o tatou aiga a o tatou sauniuni mo le Afio Mai Faalua.
Fesoasoani Muamua ma le Salamo
O sapalai lelei o le fesoasoani muamua ma tomai e taua i le saunia ai faaletino. Sa saili e le lalolagi atoa ni tali fofoga lelei ma ni sapalai faafomai i le taimi o le faamai. O le teuina o vailaau faafomai ma sapalai faafomai o se vaega taua o le saunia mo faalavelave faalenatura ma isi tofotofoga o le a oo mai.
E faapena foi, o le fesoasoani muamua faaleagaga e taua. Ua saunia e le Alii se ala mo i tatou ina ia faamaloloina ai. Ua ofoina mai e le salamo ia i tatou le avanoa e faasa’o ai ni mea i a tatou amioga ma ia i ai le pulupasama a Iesu Keriso ma Lana Togiola e faamamaina ai i tatou. Na taʻua e Elder Hans T. Boom o le Fitugafulu, “O nisi o i tatou ua manunua, ae o loo i ai i le ato fesoasoani muamua a le Alii ni fusi manu’a ua lava le tetelē e fusi ai o tatou manuaga uma.”8
O le salamo masani o le a fesoasoani e faaleleia ai i tatou i sauniuniga mo mea o le a oo mai. A o tatou salamo i taimi uma, o le a atili ona malolosi, lelei atu, ma atili ai ona tatou ogatasi ma le Alii. Na aoao mai Peresitene Nelson:
“Pe a fetalai mai Iesu ia te oe ma a’u ia ‘salamo,’ o loo Ia valaauliaina i tatou ia sui o tatou mafaufau, lo tatou iloa, o tatou agaga. …
“E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo. … Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.”9
Malosi Faalemafaufau ma Molimau
E toatele tagata sa tauivi ma le soifua maloloina o le mafaufau i le taimi o le faamai. O se vaega o la tatou sauniuniga e aofia ai le i ai o faatinoga e faalauiloa ai le soifua maloloina lelei o le mafaufau. O le toatele o i tatou sa tofotofoina ao faateteleina tofotofoga ma faatupulaia i le aluga o taimi. Ua uunaia i tatou e taitai o le Ekalesia ina ia faia le soifua maloloina faalemafaufau ma le malosi o se vaega o lo tatou saunia.
I le faaleagaga, e tatau ona tatou taulai atu i le faamalolosia o a tatou molimau ina ia latou tetee atu i tofotofoga o le a oo mai i e faamaoni uma. Na saunoa mai Peresitene Russell M. Nelson: “O lo tatou Faaola ma le Togiola, o Iesu Keriso, o le a faatinoina nisi o Ana galuega aupito mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga. Ae i aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”10
E pei ona aoao mai le Faaola, e tatau ia i tatou taitoatasi ona fausia lo tatou fale faaleagaga i luga o le papa—o lona uiga o le ola i le usiusitai i Ana aoaoga—ina ia tatou maua ai se faavae mautu (tagai i le 3 Nifae 14:24–25). O le a manaomia lenei mea e ola ai i taimi faigata faaleagaga ia e mautinoa o le a oo mai.
A o tatou galulue e saunia i tatou lava ma le lalolagi mo le Afio Mai Faalua o Iesu Keriso, e tatau ona tatou saunia o tatou aiga faaletino mo mea na muai tau mai e uiga i na aso. O mala faalenatura, mala faalauaitele, ma vaega faaupufai o loo faatalitali uma mai mo i tatou e pei ona valoia e o tatou perofeta. O nei mea e tutupu o le a manaomia ai se sauniuniga ma le faaeteete ia puipuia faaletino i tatou lava ma o tatou aiga.
E faapena foi, e tatau ona tatou puipuia i tatou lava ma o tatou aiga mai mea leaga o le a faatamaia ai i tatou. Faalagolago i faaaliga faaletagata lava ia; faatinoina o mausa masani o le fafagaina faaleagaga, e aofia ai le tatalo ma le salamo; ma o le tutu i nofoaga paia o le a fesoasoani ia i tatou e fausia ni molimau e malosi ma mausali.
Ona mafai lea ona tatou tumau ia mautinoa i le folafolaga a le Alii e faapea, afai tatou te saunia—i le faaletino ma le faaleagaga—e le tatau ona tatou fefefe (tagai Mataupu Faavae ma Feagaiga 38:30).