E Na’o Tusiga Faatekinolosi: Talavou Matutua
O Faamanuiaga o le Fesootai ma Tuaa
Sa fesoasoani lo‘u tinamatua ua maliu ia te au e talia le talalelei a Iesu Keriso ma maua se molimau i le galuega o talafaasolopito o aiga.
I lo‘u olaga atoa, sa ou talitonu ai e tatau ona i ai se sootaga faaleagaga i le va o o’u tuaa ma a‘u.
Sa masani ona faamatala e o‘u matua matutua ni tala ma faaali atu ni ata o o’u tuaa, ma sa ou lagona le latalata atili atu ia i latou i taimi taitasi sa ma talanoaina ai. O i matou ma lo’u aiga e le o ni tagata o le Ekalesia, ae sa aoaoina pea a’u e lo’u tinamatua e tatalo i aso taitasi. Ma e ala i na tatalo, sa amata ai ona ou talitonu i le Atua ma i le manatu e faapea sa ola pea o‘u tuaa ua malaga ese atu.
Aso o le Au Paia Uma (All Saints’ Day)
I Hanikeri matou te faamanatuina ai se aso malolo e sosoo ma le aso malolo o le Halloween e taua o le All Saints Day (Aso o le Au Paia Uma). O le taimi lea, e asiasi atu ai tagata uma i fanuatanu lea e tanu ai e pele ia i latou ma tuaa, ma latou tuu ai fugalaau i luga o o latou tuugamau ma moliga’o e manatua ai ma faamamaluina i latou.
A o ou laitiiti, sa ou lagonaina le faamanuiaina i le i ai o se sootaga loloto atu ma o’u tuaa, e pei ona ou fanau moni ai i le All Saints’ Day (Aso o le Au Paia Uma). O se aso faapitoa lava mo a’u i taimi uma.
Ae e masani foi ona ou faitio e uiga i le asiasi atu i o’u tuaa, aua ou te lei manao e faaalu lou aso fanau i fanuatanu. Ou te lei vaai po o le a le mea sa tulaga ese e uiga i le asiasi atu i tuugamau lava e tasi i tausaga uma, aemaise lava i tuaa o e ou te lei feiloai i ai.
Peitai, a o ou tuputupu ae ma maua se molimau o le talalelei, ua tele atu mea ua ou iloa e uiga i le fuafuaga o le fiafia a le Atua ma le paia o le galuega o talafaasolopito o aiga. Ou te iloa e mafai e tagata uma ma e tatau ona faatauaina o latou tuaa ma taumafai ia maua se sootaga loloto ma nei tagata taua o o tatou aiga.
O Se Manao e Fesoasoani i Lo‘u Tinamatua
Sa faailoa mai ia te au le Ekalesia i le amataga o le 2018. Sa ou fiafia e aoao mai faifeautalai, ma ina ua latou ta’u mai ia te a’u le taua o talafaasolopito o aiga ma galuega o le malumalu, sa ou le te’i. Ua uma ona ou iloaina sa i ai se mea taua e uiga i le aoaoina ma le auauna atu i tagata o le aiga o e na muamua atu.
Na aoao mai Elder Dale G. Renlund o le Korama a Aposetolo e Toasefululua:
“O talafaasolopito o aiga ma galuega o le malumalu e le mo na o tagata ua maliliu ae ua faamanuiaina ai foi e o loo soifua. …
“… E sili atu lenei nai lo se mea e fiafia i ai ua uunaia ona o sauniga o le faaolataga e taua mo fanau uma a le Atua.”1
I le faalogo ai i lenei mea, sa ou fiafia lava e aoao pea e uiga i le talalelei ma iu ai ina faia galuega faalemalumalu mo o‘u tuaa ma fesootai atili ai ma i latou.
I le aso 1 Novema, 2018, sa matou asiasi atu ai ma lo’u aiga i le ma’afaamanatu a lo’u tinamatua. Sa ou iloaina lelei o ia i lo‘u olaga atoa, ma sa ou misia o ia talu ona maliu o ia. Sa ou aoao pea e uiga i le Ekalesia i lena taimi, ma sa ou mautinoa lava semanu e le ioeina e lo‘u tinamatua ma faalotovaivaia lo’u fiafia i le Ekalesia pe ana ola o ia. Sa matua masani lava o ia i lana tapuaiga.
O lea sa ou ofo ai ina ua ou tu i luma o lona tuugamau ma tatalo mo ia, sa ou maua se uunaiga manino ua uma ona ia iloa upumoni o le talalelei a Iesu Keriso. Sa ou lagonaina sa mitamita o ia ia te a’u aua sa ou maua le avanoa e ola ai i lo’u olaga e tusa ai ma le faataitaiga a le Faaola.
Na faateia au.
Sa aoaoina a‘u talu ai nei e faifeautalai e faapea o i latou o loo i le isi itu o le veli e maua avanoa e aoao ai e uiga i le talalelei pe afai latou te lei maua se avanoa e aoao ai e uiga i ai i le lalolagi (tagai Mataupu Faavae ma Feagaiga 138:22–24). I se isi itu, sa ou iloaina sa aoaoina lo‘u tinamatua i nei upumoni ma ua saunia e talia le talalelei. Sa ou iloaina sa ia manaomia la‘u fesoasoani e faataunuu ai lana galuega o le malumalu.
Ma ina ia faia lena galuega, sa manaomia ona papatisoina au.
Sa ou mafaufau pe ou te manao moni lava e avea ma se tagata o le Ekalesia a Iesu Keriso mo sina taimi. Ma o le aafiaga lenei i le tuugamau o lo‘u tinamatua na taitai atu ai a’u e faatulaga se aso o le papatisoga faatasi ma faifeautalai.
O Se Malaga Faavavega i le Malumalu
I ni masina mulimuli ane, sa fuafuaina ai e talavou nofofua matutua i la‘u eria se malaga e asiasi i le Malumalu o Freiberg Siamani i le tausaga na sosoo ai. Sa lu’iina i matou e saunia muamua igoa o o matou lava aiga e aumai faatasi ma i matou.
Sa ou asiasi i le toatele o tagata o le aiga ma se ositaulaga i se nuu sa nonofo ai ou tuaa e ao mai faamatalaga ma faamaumauga. Sa ou tatalo foi mo le taitaiga e fesoasoani ia te a’u e saili isi tagata o lo‘u aiga o e sa manaomia a latou galuega e faia.
I le faaiuga, sa ou aoina mai ma saunia pe tusa ma le 40 igoa o le aiga ina ia papatisoina i la’u malaga muamua lava i le malumalu. Ae sa i ai se tasi o tuaa faapitoa sa ou fiafia moni lava i ai.
I le aso na ma asiasi atu ai i le malumalu, sa uu mai e se tasi o a‘u uo pele (o le na iu ina avea ma o’u toalua) lo‘u lima ma taitai atu a’u i totonu o le faatanoa o le vai papatisoga e faamaea ai le papatisoga o lo‘u tinamatua. Ma ina ua ia tuu ifo a‘u i totonu o le vai ma toe faatu mai a’u i luga, sa taia a‘u i se lagona mafanafana mai le Agaga Paia.
Sa vave ona ou iloa sa faatasi lo‘u tinamatua ma a’u ma sa ia faafetai ina ua iu ina avea ma se tagata o le Ekalesia. Sa ou faafetai ia te ia mo le fesoasoani mai ia te a’u ia iloa moni le tele o le galuega tatou te faia i totonu o malumalu e taua i o matou tuaa.
Tatou te Manaomia le Tasi ma le Isi
Ou te matua faafetai lava mo lenei aafiaga ma lo‘u tinamatua, aua na faamautu mai ai ia te a’u le mea sa ou masalomia i lo‘u olaga atoa—o o tatou tuaa ma e pele ua maliliu ua ola pea ma e mafai ona tatou faalolotoina a tatou fesootaiga ma i latou.
E mafai ona tatou maua le malosi, alofa, ma le anoanoai o isi faamanuiaga mai o tatou tuaa a o tatou aoao e uiga i ai, faataitai le lotofaafetai mo i latou, ma faatino sauniga paia mo i latou i le malumalu.
Ina ua valaaulia tagata o le Ekalesia e faateleina lo latou taimi i le faia o galuega o talafaasolopito o aiga, sa folafola mai Elder David A. Bednar o le Korama a Aposetolo e Toasefululua: “A outou tali atu ma le faatuatua i lenei valaaulia, o le a liliu atu o outou loto i tamā. … O le a faateleina lou alofa ma lou lotofaafetai mo ou tuaa. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai uunaiga faateleina a le tiapolo.”2
Ou te faafetai e faavavau mo lo‘u tinamatua lelei. E le mafai ona ou faatali mo le aso pe a matou toe faatasia ma e mafai ona ou tau atu ia te ia le auala na ia fesoasoani ai ia te a’u e talia atoatoa le talalelei a Iesu Keriso. Ou te iloa a o tatou taumafai e fesootai ma o tatou tuaa ma faamalolosia a tatou sootaga ma i latou, e mafai ona tatou faalolotoina lo tatou faatuatua ma faalatalata atili atu ia Keriso.
Latou te manaomia i tatou—o loo latou faatalitali mai mo i tatou. Ma tatou te manaomia foi i latou (tagai i le Mataupu Faavae ma Feagaiga 128:18).