Mataupu Faavae o le Auaunaga
Auaunaga ma le Manatu i le Soifua Maloloina o le Mafaufau
E mafai ona tatou faasoa atu le alofa o le Faaola ia i latou o e ola i luitau o le soifua maloloina faalemafaufau ma le faalelagona.
Sa maitau e se tina talavou lona tauivi ai ma le atuatuvale. Sa ia galue ma fomai ia maua ni fualaau sa’o, ae na umi se taimi na alu ai le faagasologa. Sa faapitoa le faigata o se tasi aso, ma sa ia faatulagaina se taimi faanatinati ma lana fomai. Sa la filifili faatasi e tatau ona taofia o ia i le falemai.
Sa faatasitasi tagata o le uarota e fai ni asiasiga, tausia lana fanau, ma tuuina atu le fesoasoani i meaai mo le aiga. I vaiaso ma masina mulimuli ane, na oo atu ai le atuatuvale o le fafine i se tulaga na faigata ai ona aapa atu mo se fesoasoani, ma sa aoaoina ai tagata o le uarota e faia taumafaiga i le ofoina atu o le fesoasoani.
Mulimuli ane, na tau mai ai e le tina na oo mai fesoasoani i ni taimi musuia, e pei lava o le taimi sa sili ona manaomia ai. Sa ia taua o se tasi o mea e sili ona taua na oo mai i lena taimi o le iloaina lea sa alolofa ma popole ona uso ma ona tuagane ia te ia ma sa i ai iina e lagolagoina o ia. Sa ia lagonaina le alofa o le Faaola e ala i le auauna atu a tagata o lana uarota. Sa ia iloa ai mo ia lava sa Ia silafia o ia ma ona tauiviga ma faatasi ai ma Lana fesoasoani na mafai ai ona ia onosaia ona luitau ma le faatuatua.
Manatu mo le Auaunaga
O faafitauli o le soifua maloloina faalemafaufau ma faalelagona e taatele, e tusa lava pe le manaomia ai ona taofia nisi i le falemai. O nei luitau e ono i ai i tagata o uarota po o paranesi uma. E mafai ona aafia ai tagata o atunuu uma ma i soo se tulaga o le olaga.
A o e auauna atu, e te ono feiloai ma se tagata e i ai ni faafitauli faaagafesootai pe faalelagona. Afai e te faia, faamolemole ia mafaufau i le fautuaga na maua e Peresitene Henry B. Eyring, le Fesoasoani Lua i le Au Peresitene Sili: “A lua feiloai ma se tagata, ia fai e pei o la e i ai i se faalavelave matuia ona silia ai lea ma le afa o le taimi e te sa’o ai.”1 O se faafitauli faalemafaufau, faaagafesootai, pe faalelagona, e mafai ona tasi se mafuaaga atonu o loo tauivi ai se tagata.
O nisi nei o manatu i auala e auauna atu ai:
-
Faalogo e aoao. Tuʻu le avanoa i le tagata e faʻasoa mai ai ni mea se tele pe laʻitiiti e fua i le mafai ona ia faasoa mai. Ua e lagolagoina o ia e ala i le na o le faalogo; e mafai ona e maua musumusuga i auala e tuuina atu ai le faamafanafanaga. (Mo nisi manatu, tagai “E Lima Mea e Fai e Tagata e Faalogo Lelei,” Liahona, Iuni 2018, 6–9.)
-
Faaali atu le agaalofa. Taumafai e amata ma faaiu ia fegalegaleaiga uma ma se faailoaga faamaoni o le alofa ma le popole mo le tagata. (Mo nisi manatu, tagai “Aapa Atu ma le Agaalofa,” Liahona, Iulai 2018, 6–9.)
-
Tuuina atu le lagolago. O le toe faaleleia mai faigata faaagafesootai pe faalelagona e le faatauvaa pe faigofie. E i ai taimi e fia manao ai o ia i se avanoa pe ono talosaga ai foi mo se fesoasoani. Tuu atu le lagolago i le taimi ma le ala e mafai ai e le tagata ona taliaina. (Mo nisi manatu, tagai “Atiina ae o le Malamalama e Auauna Atu Ai,” Liahona, Fep. 2019, 8–11.)
-
Fefautuaa’i ma taitai. E le o tuua na o outou. Saili le lagolago mai taitai ma isi. Pe a faatagaina, ia faasoa atu i ai manaoga o le tagata o loo tauivi ma auala e mafai ai ona auauna atu isi. (Mo nisi manatu, tagai “Mauaina o le Fesoasoani e Fesoasoani Atu Ai i Isi,” Liahona, Oke. 2018, 6–9.)
Manatua: Afai o le tagata o loo e auauna i ai o se tulaga lamatia lea ia te ia lava po o isi, atonu e manaomia le faaaofia ai o ni faalapotopotoga talafeagai e fesoasoani atu ai.