Autalavou Matutua
Mauaina o le Lagolago Faaleagaga Ina Ua Uma Ona Ou Auai Na o A’u i le Ekalesia
E alala le tusitala i Virgina, ISA.
Ou te lei lagonaina lava se mamao ese mai ou matua, ae na auina mai e le Tama Faalelagi ni agelu e faamalosia au.
Mo au lava ia, o le auai i le Ekalesia na o a’u, e aunoa ma ni molimau faamalosiau a au uo ma aiga, sa luitauina ma tuuatoatasi.
O le mauaina o le Ekalesia o se tali ua leva ona faatalitali mai i au tatalo ia ou malamalama atili ai i lou Faaola ma ola ai i lou olaga e pei ona sa Ia faia ai. Ae na ou sau mai se aiga tuuto na auai ma le mataalia i se lotu Papatiso, ma o lau faaiuga e avea ma se tagata o le Au Paia o Aso e Gata Ai sa malamalama sese i ai ma matua le taliaina.
Sa mananao ou matua i le mea sa la manatu e sili ona lelei mo au ma sa talitonu o lou tuua o mea faalelotu a lo matou aiga o le a faaumatia ai lou faatuatua.
Na sili atu le faigata o mea na oo i ai ina ua maliu lou tama mai le kanesa ae ou te lei papatiso. O le taulimaina o le toesea o lou tama agalelei, a o ou filifili foi i le va o le finagalo o le Atua ma lo’u aiga sa toetoe lava a le toe mafai ona tatalia.
Na ou lagona e pei na tuleia aʻu i loʻu tapulaʻa.
O Agelu a le Tama Faalelagi
A o mafatia Iesu Keriso i Ketesemane, na auina mai e le Atua se agelu e faamalosi ia te Ia (tagai Luka 22:43). Ou te talitonu na auina mai le agelu e fesoasoani ia Keriso o se faailoga o le alofa e le uma o le Tama Faalelagi. Sa faapena foi ona Ia auina mai agelu e faamalosi ia te au.
Sa i ai faatasi ma nei agelu ia Sister Neff ma Sister Smallcomb, o faifeautalai na muamua aoaoina au. Sa ia i laua le molimau ma le atamai e taialaina ai au e ala i au fesili ogaoga. Ma o le tele o le alofa o Keriso na ou molimauina e ala ia i laua, o le tele foi lea o lou fiafia i le talalelei.
Ina ua mavae le tele o tausaga talu ona ou papatiso, sa ou talanoa ai ma Sister Smallcomb ma faafetai atu ia te ia mo le naunau pea e tali au fesili. Sa ou faailoa atu foi talosia ou te le o faalavelave ia te ia.
“Marcus,” na ia fai mai ai, ma ata, “e mafai ona e auina mai ia te au ni fesili e uiga i le talalelei mo le vaega o totoe o le faavavau.”
Sa ese le mafanafana o le iloa sa i ai se tasi e mafai ona ou liliu atu i ai mo ni tali. I se auala, sa avea ai Sister Neff ma Sister Smallcomb ma au faufautua i le talalelei, o loo fesoasoani e taiala au i luga o lou ala o le liua ma fesoasoani mai ia ou malamalama i le uiga o le avea ma se tagata o le Ekalesia.
Ae le na o i la’ua e taitaia au.
Sailia o Isi Faufautua
Sa masani ona ou fiafia e faia ni talanoaga faaleagaga ma lou aiga. Ina ua ou auai i le Ekalesia, o na talanoaga — a itiiti mai mo se vaitau — na le mafai ona faia. O talanoaga faaleagaga ma lou aiga na tuua ai au e lagona le galala nai lo le faafouina.
O le ola ai i le talalelei e aunoa ma lou aiga e le o se tofotofoga e mafai ona ou onosaia na o au. O le mea e faafetai ai, o lou Tama Faalelagi ma le epikopo faatuatua sa i ai i lau uarota a talavou nofofua matutua, sa i ai iina e fesoasoani mai.
Po o le a lava le mea na ou talanoaina ma lou epikopo, sa ou tuputupu ae ai lava faaleagaga. Sa ou lagonaina le lagolago ma le alofa sa ou manaomia.
Atonu o ou manaoga faaleagaga e le o faatumuina e se epikopo. Ae o se faiaoga i le inisitituti, se peresitene o le misiona, se ulugalii faamisiona matutua, se uso po o se tuafafine o auaunaga, o se uo, ma le tele o isi e mafai ona i ai iina e lagolago ia te oe.
E faapefea ona tatou maua na faufautua i o tatou olaga? O se tasi o laasaga e sili ona taua o le faia o le mea sili e faaauau ai le ola ai i le talalelei. Ma e mafai ona e faalagolago o se Tama Faalelagi atoatoa e mafai (ma o le a) taialaina le tele o tagata e faapei o Keriso e fesoasoani ia te oe.
E mafai foi ona e maua se faufautua e ala i le tuuina o oe lava i ni tulaga lelei. O le faataunuuina o se tofiga o le auauna atu, faalauteleina o se valaauga, ofoina atu o meaai i faifeautalai ma le auai atu ma i laua i lesona, auai i le inisitituti, ma tuuina mai o lau molimau o auala uma ia e fatu ai ni avanoa e atiina ae ai ni sootaga lelei.
Faalagolago i le Tama Faalelagi
I lau malaga atoa, soo se taimi lava sa ou lagona ai le tuuatoatasi, sa faaauau pea ona auina mai e le Tama Faalelagi ni agelu i lou ala e faamafanafana ma faamalosia au.
Sa ou iloaina sa ou le i ai moni lava i se tulaga lea ou te lei maua ai se lagolagosua. E taitaiina lava au e le Tama Faalelagi i se fesoasoani, ae maise lava pe a tulaga faigata mea i le fale. Na pau lava le mea sa ou faia o le tausia o lou faatuatua ia te Ia ma faatumauina le matala o ou mata ma taliga faaleagaga mo Lana taitaiga ma faamanuiaga. Ou te molimau atu ma le faamaoni e moni fetalaiga a le Faaola:
“A ia outou muai saili le malo o le Atua ma lana amiotonu, ona faaopoopoina atu lea o ia mea uma ia te outou” (Mataio 6:33).
Ou te fautuaina ma le alofa outou ina ia outou auai i le talalelei a o outou tatalo mo le Tama Faalelagi e taialaina outou i le sootaga aoga ma le au faufautua lea o le a fesoasoani e te tumau ai i le ala o Feagaiga ma toe foi atu ai ia te Ia.