Aua Nei Misia le Faigalotu Lenei

Matematika Faigofie mo le Faalatalata Atili Atu i le Alii

Saunia e Jennifer Kearon

Mai se lauga na tuuina atu i tamaiti aoga i le Kolisi Ensign i le aai o Sate Leki, Iuta, ISA, i le aso 1 o Tesema, 2020. Faitau le tusiga atoa i le ensign.edu.

O le fausiaina o la tatou sootaga ma le Alii e le faapea e tatau ona faigata.

tamaitai talavou o loo tatalo i le laulau

A mavae le tausaga ua tuanai, faatasi ai ma ona tulaga le lelei uma ma faaletonu ma feauauai e lei faamoemoeina, o le a atamai mo i tatou le iloiloina pe afai o tatou aoaoina lesona e tatau ona tatou aoaoina ma mafai mai lenei faama‘i pipisi ma isi mea na tutupu talu ai nei. Sa tuuina mai e Elder Jeffrey R. Holland o le Korama a Aposetolo e Toasefululua lenei manatu a o ia tomanatu i mea o loo ia aoaoina i lenei taimi e le masani ai:

“Ou te faamoemoe pe a toe foi i le masani ai—po o le a lava le tulaga masani o le a i ai—ia aua nei galo ia te a’u lagona ma aafiaga na ou oo i ai i nei masina o manatunatuga ma le tuufua. …

“… O le a tatou valelea i le misia o lenei avanoa paia e saili ai o tatou agaga, fai sina salamo laitiiti, ma vaavaai pe mafai faapefea ona tatou lelei atu ma agalelei atili.”¹

Faatasi ai ma lena mea o se manatu faavae, sei o tatou faia se lesona laitiiti o le matematika. Ou te fiafia i le matematika, faatasi ai ma ona manatu maelega ma le iloa lelei, ae o le a tatou faafaigofieina pea, aua o le matematika faigofie e na o le pau lea o le mea e mafai ona ou faia i nei aso! O le a tatou faaopoopo, toese, faateleina, ma vaevae.

Faaopoopo

Faatasi ai ma le pisapisao faalevao uma o loo siomia ai i tatou, faatasi ai ma leo eseese uma o loo fetagisi mo lo tatou gauai atu ma le faamaoni i luga o a tatou telefoni, i luga o a tatou lau, ma e oo lava i totonu o o tatou aiga, e manaomia ona tatou faaopoopo se nofoaga paia i o tatou olaga. Mafaufau i le mea o loo e nofo ai; vaai faalemafaufau i ai i lou mafaufau.

O e i ai i se fale mautotogi?

Nonofo i le fale ma le aiga?

I se potu i lalo?

Faatasi ma pe leai ni uo e potu faatasi?

O fea e te alu i ai mo le filemu, mo le tatalo, mo le fesootai atu i le Atua? Ma o aoga?

Po o le a lava lou tulaga o e ola ai, e mafai ona e faaopoopo atu i ai se nofoaga paia—o se avanoa e te maua ai le filemu ina ia mafai ai ona lagona le siufofoga o le Atua; ia “faalogo ia te Ia,” e pei ona fautuaina ai i tatou e lo tatou perofeta e fai;² ia talanoa ma saili le taitaiga ma le taiala mo lou olaga.

O fea o lou potu malolo e mafai ona e faaopoopo i ai se nofoaga paia? Taumafai e sue se nofoaga faapitoa po o se meafale e mafai ona avea ma ou nofoaga paia. Atonu o lou ie soosoo i le taimi lava e alu ai lau paga lua te potu faatasi mo le aso, po o se nofoa faapitoa i tafatafa o le masini faamafanafana lea e sau ai le ea vevela i le taimi o masina o le taumalulu. Atonu o se fala fulufulua e te maua i luga o le initoneti ma tuu i tafatafa o lou moega e tootuli ai. O lenei nofoaga paia e mafai ona avea ma malutaga mo oe. Mo nisi mafuaaga, ma ou te tautala atu mai aafiaga faaletagata lava ia, o le malosi ma le mafanafana e mafai ona oo mai ia te oe mai le iloaina o lou ie soosoo, o lou nofoa, o lau fala, po o le a lava, e faatusa i lou nofoaga paia ma o iina e tutupu ai mea paia. Tapē uma pisapisao. Fatua‘i le filemu—ma le loto i ai—ina ia mafai ona faalogo ia te Ia! Na aoao mai Iesu, “Aua ua i ai tagata uma i o‘u lima; ia filemu ma iloa o A’u o le Atua” (Mataupu Faavae ma Feagaiga 101:16).

Sa faapea mai Peresitene Russell M. Nelson, “Ou te valaaulia foi oe ina ia avea lou fale mautotogi, le fale o e nofo tumau ai, lou aiga, po o lou potumoe ma se nofoaga paia e mafai ona e nofo saogalemu ai mai faatosinaga leaga o le lalolagi.”³

Toese

O le mea e sosoo ai o le toese. Mafaufau pe faapefea ona e faaaluina le 24 itula e tuuina atu ia te oe i aso uma. O le tele o na itula e faaalu e moe ai (atonu e le o le tele e pei ona e manao ai!), ma o le tele o na itula e faaaluina i le vasega ma suesuega. E tele itula e faaalu e galulue ai ma maua ai tupe e ola ai. O itula (po o minute!) ua tuu atu ia te oe i le mavae ai o au tautinoga eseese i le aoga, galuega, ma le aiga atonu e te ta‘ua o lou “taimi atofaina.” O le taimi lenei e te maua ai le mana atoa e faia ai faaiuga. E faapefea ona e filifili e faaalu lena taimi?

Fai se lisi faalemafaufau i le auala na e faaaluina ai lou taimi atofaina i nai aso ua tuanai. Ona mafaufau lea i mea e manaomia ona toese mai mea e te faia i lena taimi atofaina. Pe o i ai ni mea faapasi taimi po o ni filifiliga o ala o faasalalauga po o ni faamaumauga o taimi o le a sili atu ona lelei a le o le aveese atoa po o le faatapulaaina foi? O le a se mea e manaomia ona toese mai lou olaga? Atonu o se fesili lena mo oe e mafaufau loloto i ai ma ole atu i le Tama Faalelagi e uiga i le taimi ua e i ai i lena nofoaga paia o le a e faaopoopo i ai!

Sei o tatou toeseina soo se mea mai o tatou olaga, aemaise lava mai o tatou taimi faigata, lea e faatiga ai i le Agaga, pe o ni gaoioiga po o ni amioga po o ni mausa moni, pe o ni mafaufauga po o ni uiga po o le gagana tatou te faaaogaina i nisi taimi. Afai e faatiga i le Agaga, toese. Ia faagalo. Aveese mai lou olaga. Ma faaopoopo atili le paia.

Faateleina

Sei o tatou agai atu i le faatele. O le a le mea tatou te mananao e faateleina i o tatou olaga? O le a se mea i lou olaga e te manao atili i ai, ma o le uiga o la‘u tala, o le tele lava? Atonu o le mea muamua na oo mai i lou mafaufau o se tupe! Pe le manaia ea lena mea le faateleina o le paleni i lau teugatupe i le faletupe po o le totogi e te mauaina, e tusa lava pe na o le lua pe tolu?

Ae ia mafaufau tele ai. O le a se mea e te manao e faatele i lou olaga? Ae faapefea le alofa ma sootaga alofa? Ae faapefea lagona o le filemu ma le olioli? Ae faapefea le faamagaloga ma le faamalologa? Pe tatou te le mananao uma ea i le tele o nei mea? E mafai ona tatou tuuina nei mea uma i lalo o le ulutala o “faamanuiaga.” Pe tatou te le mananao ea e faateleina o tatou faamanuiaga—mea lelei uma i o tatou olaga?

Tatou te talitonu i se Atua ua anoanoai mea, o se Atua o le gafatia ma punaoa e le iu—alofa, poto, ma le agalelei. E leai se mea e sili ona finagalo ai o ia nai lo le faateleina ma le alofa mutimutivale o o tatou faamanuiaga, ae e tatau ona tatou faalatalata atu ia te Ia e ala i se olaga o le salamo ma le tausia o Ana poloaiga. A o faateleina lo tatou tulitulimatagauina ma le mataalia o le malamalama, auaunaga, ma uiga o Iesu Keriso i o tatou olaga, a o tatou faateleina la tatou sailiga mo le salamo ma le usiusitai, ona faateleina faavavega lea e lo tatou Tama o o tatou faamanuiaga. O se faatusa faigofie.

Ma o nei faamanuiaga e toe faateleina a o tatou faasoa atu lo tatou olioli ma le faatuatua ma le filemu i isi. Tatou te fesoasoani e faateleina o latou faamanuiaga ma le agalelei i o latou olaga pe a tatou tuuina atu lo tatou alofa ma lo tatou manao e faia mea lelei, siitia isi, ma tuumamaina mafatiaga. E toe faateleina nei mea uma pe a tatou aufaatasi ma isi o a latou sini e tutusa ma a tatou lava sini. Ma o loo alu pea lava pea le faateleina o faamanuiaga.

Vaevae

Ia o le taimi mo le vaevae. Faatali mo se minute. Pe tatou te mananao ea i le fevaevaea’i i o tatou olaga? Na aoao manino mai i tatou e Iesu afai e le tasi, i tatou, afai tatou te le lotogatasi, e le o i tatou o Ni Ana. E finagalo o Ia ia tasi i tatou ma le tasi ma le isi, ia fatuina se lotogatasi mamana mai o tatou eseesega matagofie, ina ia mafai ona tasi i tatou ma Ia. Ina ia mafai ona ausia lenei ituaiga o lotogatasi ma le tasi, ioe, e i ai nisi o mea e tatau ona tatou vavaeeseina mai ai i tatou lava.

Sa aoao mai Iesu, “Aua e moni, e moni ou te fai atu ia te outou, o le ua i ai le agaga o le finauga e le mai ia te au lea, a e mai le tiapolo, o le tama lea o finauga, ua ia faaosoina foi loto o tagata e fefinauai ma ita” (3 Nifae 11:28–29). O lea e tatau ai ona tatou vaevae i tatou lava mai finauga, mai le faaosoina i le ita e faasaga ia i latou o siomia i tatou.

Sa aoao mai Iesu, “Alolofa i o outou fili, faamanuia atu ia i latou o e e fetuu mai ia te outou, fai mea lelei ia i latou o e e inoino mai ia te outou, ma tatalo mo i latou o e latou te faaaoga outou ma le inoino ma sauaina outou” (3 Nifae 12:44). Ina ia amata foi ona mulimuli i lena poloaiga faaKeriso, e tatau ona tatou vavaeese i tatou lava mai lo tatou faamaualuga, mai lo tatou manatu faapito, mai lo tatou faailoga tagata, mai soo se ita i vaega e ese mai ia i tatou, ma e patino lava mai soo se ituaiga o faailoga lanu. Ou te mautinoa e mafai e i tatou uma ona manatua le lagona o le faalogo atu ia Peresitene Nelson o saunoa mai: “Ou te faanoanoa ona o o tatou uso ma tuafafine Uli i le lalolagi o loo onosaia tiga o le faailoga lanu ma le faailoga tagata. O le asō ou te valaau atu ai i o tatou tagata o le Ekalesia i soo se mea ia taimua i le lafoa’i o uiga ma soo se faatinoga o le faailoga lanu.”⁴ Ma o lea e tatau ai ona tatou vaevae i tatou lava mai finauga, faamaualuga, ma faailoga lanu.

Liliu

E toe tasi lava le faatinoga o le matematika ou te fia sailiili i ai: o le liliu. Afai e te aveina le numera 5, mo se faataitaiga, o le mea moni e 5/1, a liliu o le 1/5. O e manatuaina le mea lena? E pei lava o le faafeagai—na o lou feliuai lava o le numera. O lea la, pe a e feagai ma faigata, lea e faatatau i taimi uma i le tasi ituaiga po o le isi, faaaoga le liliu ma faau mai i luga le ulu! Nai lo le fesili, “Aisea ua tupu ai ia te au? Aisea ua tupu ai lenei mea faigata ia te a’u?” taumafai e fesili, “Aisea e le tupu ai ia te a’u? O le a se mea e mafai ona ou aoao mai i lenei mea? O le a se mea e mafai ona ou suia? E mafai faapefea ona tuputupu ae lou faatuatua ia Iesu Keriso?” E i ai lena mana i lenei mea.

Pe a e feagai ma se faafitauli ua mafua ai ona e masalosalo i lou faatuatua, faaaoga le liliu. E ala i mea uma, ia suesue atoatoa i au fesili o i ai, ae faalilofia le manatu sese i lona ulu e ala i le faalatalata atu i au fesili mai se nofoaga o le faatuatua, mai se vaaiga e faavavau, mai se faailoaga o ala a le Atua e maualuga atu nai lo o outou ala, ma o Ona manatu e maualuga atu nai lo ou mafaufauga, po o mafaufauga o se isi lava tagata, mo lena mataupu (tagai Isaia 55:8–9).

O le a mautinoa lava le mafai ona e faailoa mai o isi auala e mafai ona e faaaogaina ai le liliu ma faau mai ai se vaaiga e itiiti ifo le faatuatua i luga le ulu!

Ia Faamuamua le Atua

Tatou te manatua uma lava le valaaulia a Peresitene Nelson ia faamuamua le Atua i o tatou olaga. Sa ia faia se faasologa o fesili: “O e naunau e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”⁹

O le faamuamuaina o le Atua i o tatou olaga o le faaaogaina lea o le faafeagai pe a tatou fetaiai ma faigata ma le le mautonu ma liliu atu ma le tonu i o latou ulu!

O lea la, ina ia iloiloina, o lenei lesona o le matematika na aoaoina ai i tatou e

faaopoopo se nofoaga paia ma faalogo ia te Ia;
toese mai soo se mea e faatausuai ai i le Agaga;
faateleina o tatou faamanuiaga e ala i le faalatalata atu i le Alii e ala i le salamo ma le usiusitai;
vavae ese i tatou lava mai finauga, faamaualuga, manatu faapito, faailoga tagata, ma le faailoga lanu; ma
faaaoga le liliu ma ia faamuamua le Atua.

O Iesu, le Matai o Matematika, o lo tatou Faaola ma Tupu. O Lona alofa atoatoa mo oe e moni, suia le olaga, ma le faasaoina o le ola. Ia faamuamua o Ia i lou olaga, ma o le a e maua ai le olioli e le mafaamatalaina.