Fakaʻilekitulōnika Pē: Kakai Lalahi Kei Talavoú
ʻE Lava ke Tokoniʻi Kitautolu ʻe he Tamai Hēvaní mo Sīsū Kalaisi ke Tau Aʻu ki he Temipalé
Naʻá ku fehangahangai mo ha ngaahi fakafepaki lahi kimuʻa peá u toki maʻu hoku ʻenitaumení, ka naʻe tokoni ʻa e falala kia Kalaisí ke u teuteu ke fakahoko ʻa e ngaahi fuakava ko iá.
ʻI heʻeku kei siʻí, naʻe fononga hoku fāmilí ki he Temipale Tokyo Japan. Naʻe lōloa ʻa e fononga meʻalele houa ʻe 12, ka naʻa mau houngaʻia ʻi he taimi ke mau feohi fakataha aí, pea naʻa mau talanoaʻi lolotonga ʻemau fonongá ʻa ʻemau fiefia ʻi he ʻalu ki he temipalé.
Ne teʻeki ke u taʻu 12 he taimi ko iá, pea ko e loki talitali pē ʻi he hūʻanga ki he temipalé ne u lava ʻo hū ki aí. Ka naʻe hanga ʻe he ongo toputapu ʻo e feituʻu ko iá ʻo fakafonu hoku lotó ʻaki e ongo māfana ʻo e Laumālié.
Naʻá ku mei lava pē ʻo nofo ʻi he loki ko iá ʻo taʻengata. Ko ia ai ʻi he hokosia e taimi ke mau foki ki ʻapí, naʻe kamata ke tafe noa pē hoku loʻimatá. Naʻe fakaʻau ke fakapulipuli atu ʻa e temipalé ʻi he mamaʻo ange ʻemau lelé, pea ne u ʻosi ongoʻi ʻe au ʻeku mamaʻo mei he Laumālie mālohi ne u ongoʻi ʻi lotó.
Naʻá ku fakapapauʻi te u toe foki ki ai ʻi ha ʻaho. Kapau naʻe mālohi pehē ʻa e Laumālié ʻi he hūʻangá, naʻe ʻikai ke u faʻa tatali ke aʻusia ʻa e ongo ko iá ʻi he hū ki loto ʻo fakahoko e ngaahi ouaú. Naʻá ku fie fakahoko e meʻa kotoa pē te u lavá ke teuteu ke u hū ki loto ʻi ha ʻaho.
Fehangahangai mo e Fakafepakí
Neongo naʻá ku faifeinga maʻu pē ke tauhi e ngaahi fekaú mo moʻui taau, ka naʻe kamata moʻoni ʻeku teuteu ke maʻu hoku ʻenitaumení kimuʻa peá u ʻalu ʻo ngāue fakafaifekaú.
Naʻá ku toʻo ha kalasi teuteu temipale naʻe ʻaonga ʻaupito kiate au. Naʻe loto ha ongo fefine ngāue fakaetauhi ke na tali ha ngaahi fehuʻi mo tokoni mai ke u ʻiloʻi e meʻa ke u ʻamanaki atu ki aí. Pea ʻi heʻeku fanongo ki heʻena ngaahi aʻusiá mo ʻena fakamoʻoní, naʻe toe fakalalahi ange ʻeku vēkeveke ke hū ʻi he temipalé.
Ka naʻe fakaʻohovale kiate au, ʻi he ʻosi ʻeku toʻo e kalasi teuteu temipalé pea ʻi he fakaʻau ke ofi ange hoku ʻaho ʻenitaumení, naʻe kamata ke u fehangahangai mo ha ngaahi ʻahiʻahi lahi.
Pea naʻá ku mamata foki ki ha fakafepaki lahi ʻi heʻeku teuteu ke ngāue fakafaifekau taimi kakató. Ne u aʻusia ha loto-hohaʻa lahi. Naʻe kamata ke hōloa ʻeku moʻui lelei fakaeʻatamaí, pea naʻe pau ke u fakahoko e ngaahi meʻa naʻe fie maʻu ke u fehangahangai mo e ngaahi ongo ne u maʻú pea laka atu ki muʻa ʻi he tuí.
ʻI he hoko ʻa e meʻá ni, naʻá ku fakatokangaʻi naʻe ʻikai loto ʻa e filí ke u fakahoko e ngaahi sitepu fakalaumālie maʻongoʻonga ko ʻení.
Ko Hono Maʻu ha Mālohi ʻia Kalaisí
Ke tauʻi e fakafepakí ni, ne u lotu he ʻaho kotoa pē ke maʻu ha tokoni ke ikunaʻi e ngaahi ʻahiʻahí pea mo ʻeku ngaahi loto-hohaʻá. Naʻá ku fakafalala lahi ange ki he Tamai Hēvaní mo Sīsū Kalaisi ʻi ha toe taimi kimuʻa. Naʻá ku ʻaukai, ako e ngaahi folofolá, mo fekumi ki ha fakahā. Naʻá ku lotu ke maʻu ha mālohi ke fakahoko e ngaahi fili ʻoku totonú, ke ikunaʻi hoku ngaahi vaivaí, pea ke u ongoʻi nonga ʻi hoku lotó mo maʻu ha fakakaukau ʻoku taʻengatá.
Naʻe tokoniʻi au ʻe he fanga kiʻi ngāue fakalaumālie iiki ko iá ke u ʻiloʻi lelei ange mo muimui ki he ngaahi ueʻi ʻa e Laumālié. Naʻá ku toe ongoʻi foki ne siʻi ange ʻeku loto-hohaʻá. Naʻá ku maʻu ha mahino lahi ange ki he mālohi faifakamoʻui ʻo Sīsū Kalaisí pea naʻe faʻa ʻōʻōfaki au ʻi he nongá ʻi heʻeku tafoki kiate Iá.
Ko e mālié, he naʻe fakafou ʻi he fehangahangai mo e ngaahi ʻahiʻahí mo e ilifiá ʻeku malava ke ofi ange ai kia Kalaisi pea teuteu ke maʻu hoku ʻenitaumení.
Pea ʻi heʻeku hū ʻi he Temipale Sapporo Japan, naʻe ʻi ai ʻa e Laumālie angamaheni naʻá ku ongoʻi ʻi heʻeku kei siʻí ʻi he loki hūʻanga ki he Temipale Tokyo, ka naʻe toe mālohi ange ia ʻi he taimi ko ʻení, ʻo hangē pē ko ia ne u fakakaukauloto ki aí.
Hili hono maʻu hoku ʻenitaumení, ne u tangutu fakalongolongo pē ʻi he loki silesitialé ʻo fakahoko ha lotu, ʻo fehuʻi ki he Tamai Hēvaní ʻa e meʻa naʻá Ne finangalo ke u ʻiló.
Naʻe fakahā mai ʻe he Laumālié kiate au naʻe ʻafioʻi au ʻe he Tamai Hēvaní mo hoku ngaahi tūkungá (vakai Tokāteline mo e Ngaahi Fuakava 38:2). Naʻá ku ʻiloʻi naʻá Ne hoifua mai ʻi heʻeku fakahoko e ngaahi fuakavá pea ʻokú Ne finangalo ke tau haʻu ki Hono falé—ko ha fale ʻe lava ʻo fakamavaheʻi moʻoni ai kitautolu mei he māmani femoʻuekiná kae fakamālohia mo ʻomi kitautolu ke tau ofi ange kiate Ia mo Sīsū Kalaisi.
Naʻá ku ongoʻi ʻi hoku lotó ʻa e ongo mālohi taha ʻo e nongá. Pea naʻá ku lava foki ʻo maʻu ʻa e fakahā naʻe fie maʻu ke u ongoʻi ai ha loto-falala ʻi heʻeku fili ke ʻalu ʻo ngāue fakafaifekaú.
ʻOku ʻAfioʻi ʻe he Tamai Hēvaní Hotau Lotó
Kuó u fakatokangaʻi ʻi heʻeku fonongá ʻoku ʻafioʻi ʻe he ʻOtuá ʻa e ngaahi holi ʻa hotau lotó pea te Ne lava ʻo tokoniʻi kitautolu ke tau lavameʻa. Kapau te tau muimui kiate Ia ʻi he tui mo falala kiate Ia ke maʻu ha fakahinohino mo ha mālohi, te Ne lava ʻo tokoniʻi kitautolu ke tau teuteu ke moʻui taau pea hū ki Hono fale toputapú.
ʻE toe makehe ange kiate koe ʻa e ngaahi ouau ʻo e temipalé ʻi he taimi ʻokú ke teuteu ai ke hū ki aí pea mo e hokohoko atu hoʻo foki ʻo ngāue aí. ʻOku ou ʻiloʻi ʻoku finangalo ʻa e Tamai Hēvaní ke tau maʻu e ngaahi ouaú mo fakahoko e ngaahi fuakavá kae lava ke tau toe fakataha mo Ia. Pea neongo kapau ʻoku ʻikai faʻa lava ke tau ʻalu maʻu pē ki he temipalé, ka ʻi heʻetau moʻui taau ke maʻu ha lekomeni temipalé, ʻoku tau moʻui taau ai mo e ngaahi tāpuaki kotoa pē ʻokú Ne foaki mai ʻo fakafou ʻi hono tauhi ʻetau ngaahi fuakava fakatemipalé.1
ʻOku ou ʻilo ko e taimi ʻoku tau tauhi ai ʻetau ngaahi fuakavá mo faifeinga ke muimui ʻia Sīsū Kalaisí, ʻe fakamālohia kitautolu ke tau matuʻuaki e faingataʻa mo e ʻahiʻahi kotoa pē ʻoku tau fehangahangai mo iá. Pea te tau lava ʻo fakaafeʻi e Laumālié mo e ngaahi tāpuaki mo e fiefia ʻoku tafe mei he temipalé ki hotau lotó mo e ʻapí.