Ko e ʻUhinga e Temipalé Kiate Aú
ʻOku nofo ʻa e tokotaha naʻá ne faʻú ʻi Tasimēnia, ʻAositelēlia.
ʻOku tokoni hono maʻu ha lekomeni temipale ʻoku kei ʻaongá ke fakapapauʻi ʻoku kei ʻaonga pē ʻeku loto vēkeveke ki hono moʻui ʻaki e ongoongolelei ʻo Sīsū Kalaisí.
Temipale Melbourne Australia
Toʻohemá: faitā ʻa Karen Larsen
ʻOku ou nofo mo hoku husepānití ʻi Tasimēnia, ʻa e motu ʻi he fakatonga ʻo e fonua lahi ko ʻAositelēliá. Ko homau temipale “fakalotofonuá” ko e Temipale Melbourne Australia, ʻoku meimei maile ʻe 300 (km ʻe 480) hono mamaʻó.
Naʻá ma monūʻia ke ma ʻalu ki he Temipale Melbourne ʻi Nōvema 2019 ʻi ha ngaahi ʻaho siʻi. Naʻe ʻikai ke ma teitei ʻiloʻi ko ʻema fononga fakaʻosí ia ʻi ha taimi mahuʻinga lahi. Kimuʻa pea tōtuʻa e mahaki fakaʻauhá, naʻá ku ʻalu mo hoku husepānití ki he temipalé ʻi ha feituʻu pē ʻi he meimei tuʻo taha ki he tuʻo fā ʻi he taʻu. Ke aʻu ki aí, naʻá ma puna vakapuna pe ʻalu vaka. Ko e ngaahi taʻu ʻe niʻihi naʻe faingataʻa fakapaʻanga, ko ia ne siʻisiʻi ange ai ʻema faʻa fonongá. Ko e niʻihi ʻo e ngaahi fononga ko iá ko ha ʻaho pē ʻe taha; pea naʻe feʻunga mo ha ngaahi ʻaho siʻi pē ʻa e niʻihi.
Ko ha tokotaha ngāue ouau au ʻi he temipalé, ko ia ko e ngaahi ʻaho siʻi ko ia ne u ʻalu ai ki he temipalé ko ha faingamālie mahuʻinga ia ke u toe fakafehokotaki ai mo hoku uiuiʻí, ke ako lahi ange ki he palani ʻa e Tamai Hēvaní, pea tokoniʻi e niʻihi kehé mo mamata ki heʻenau aʻusia ʻa e fiefia mo e nēkeneka ʻi he temipalé.
ʻI he taimi ne tāpuni ai e temipalé mo e kauʻāfonua homau siteití lolotonga e mahaki fakaʻauha ʻo e COVID-19, naʻá ku fifili pe te u tauhi fēfē nai ʻa e temipalé ke hoko ko ha konga mahuʻingamālie ʻo ʻeku moʻuí. Naʻá ku ongoʻi ne fakamālohia au ʻe he ngaahi ongo ʻo e Laumālie Māʻoniʻoní neongo naʻe tāpuni ʻa e temipalé, ka naʻe ʻikai tāpuni ʻa e ngaahi tāpuaki ʻo ʻeku ngaahi fuakava ʻi he temipalé kiate au. Naʻá ku ongoʻi ha vāofi lahi ange mo e ʻEikí, tautautefito ki he taimi naʻá ku tokanga taha ai ki hono tokoniʻi ʻo e niʻihi kehé, ʻo tatau ai pē pe ʻi hoku fāmilí pe ko kinautolu ʻoku ou ngāue fakaetauhi ki aí.
Naʻá ku tuku ha taimi ke toe fakamanatu ʻi hoku ʻatamaí ʻa e ngaahi fuakava kuó u fakahokó, ngaahi ongo kuó u maʻu ʻi he temipalé, pea mo e ʻilo kuó u maʻú. Naʻá ku toe fakamanatu ʻi hoku ʻatamaí ʻa hono fakalea ʻo e ngaahi ouaú. Ne hokohoko atu ʻeku fekumi ki hoku hisitōlia fakafāmilí, fakahū e ngaahi hingoá mo e maʻuʻanga tokoní ki he FamilySearch, pea vahevahe e ngaahi hingoa ko iá mo e temipalé. ʻOku ou hanganaki atu ki haʻaku mamata ki he kamata ke kakato e lisi ʻo e ngaahi hingoa ʻoku fakaʻaongaʻí ʻi he taimi ʻe toe fakaava ai e ngaahi temipalé.
ʻI he ngaahi taʻu kuohilí, ne vahevahe mai ai ʻe ha fefine ʻofeina ʻi homau uōtí naʻe meimei houa ʻe ua e lōloa ʻo e taimi ʻenitaumení pea koeʻuhí ko ʻene nofo mamaʻo mei he temipalé, naʻá ne fakakaukau ai ke ʻoua naʻa toe siʻi hifo he houa ʻe ua ʻi he uiké ki he ngāue hisitōlia fakafāmilí. Naʻá ne fie fakahaaʻi ki he ʻEikí naʻá ne tukupā ki he ngāue fakatemipalé, neongo naʻe faingataʻa ke ne aʻu ki he temipalé. Naʻe ongo moʻoni kiate au ʻene taumuʻá, ko ia ne u fokotuʻu ʻa e taumuʻa tatau pē maʻaku.
Naʻe fakamanatu mai ʻe he lea ʻa ʻEletā Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he konifelenisi lahi ʻo ʻOkatopa 2020, ʻa e taumuʻa ko iá. Naʻá ne pehē: “ʻOku tau fakahoko ʻa e ngāue fakatemipalé ʻi heʻetau fekumi ki heʻetau ngaahi kuí pea fakahū honau hingoá ke fakahoko honau ngaahi ouaú. Neongo kuo tāpuni hotau ngaahi temipalé, ka ʻoku tau kei lava pē ʻo fekumi ki hotau ngaahi fāmilí. ʻI heʻetau maʻu ʻa e Laumālie ʻo e ʻOtuá ʻi hotau lotó, ʻoku tau fakafofonga maʻá e kau pekiá ke ʻtaau ki he ʻEikí.’”1
Naʻe hoko e taʻu ʻe 20 hono fakatapui ʻo e Temipale Melbourne ʻi he 2020, ʻo hoko ai ha ngaahi manatu ʻofa lahi ki he ngaahi tāpuaki naʻe maʻu ʻe homau fāmilí ʻi heʻemau ō ki he temipale ko ʻení mo e ngaahi temipale kehé talu mei hono fakatapui ko ia ʻi he 2000. Kuo hoko e temipalé ko ha fakavaʻe mālohi mo e fakamoʻoni homau fāmilí. Kuó ma ō mo ʻema fānau ʻe toko faá ki ha ngaahi temipale lahi ʻi ʻAositelēlia ke mamata ʻoku fakahoko ʻe heʻema fānaú ʻa e papitaisó, maʻu honau ʻenitaumení, pea silaʻi kinautolu ki honau ngaahi malí.
Ko Brother mo Sisitā Prebble mo ʻena fānaú mo honau ngaahi malí ʻi he Temipale Sydney Australia ke silaʻi hona ʻofefine siʻisiʻi tahá.
ʻOlungá: faitā ʻa Sally Crosbie
ʻOku tokoni hono maʻu ha lekomeni temipale ʻoku kei ʻaongá ke fakapapauʻi ʻoku kei ʻaonga pē ʻeku loto vēkeveke ki hono moʻui ʻaki e ongoongolelei ʻo Sīsū Kalaisí. Kuo hoko ʻeku ʻinitaviu foʻou ki he lekomení ko ha taimi ʻo e fakalaulauloto. Kuo nau ʻomi ʻa e faingamālie ke u fakahaaʻi ai ʻeku fakamoʻoní. Kuo nau fakaʻatā au ke fakamālohia ʻeku fakamoʻoní ke u tuʻu maʻu mo faivelenga ʻi he “ngaahi tāpuaki lahi ʻaupito” (Tokāteline mo e Ngaahi Fuakava 104:2) naʻe talaʻofa mai ʻe he ʻEikí kuó u maʻu mo hoku fāmilí pea fakamālohia ai au.
Ko ʻeku maʻu ha lekomeni temipale ʻoku kei ʻaongá ʻoku fekauʻaki ia mo ʻeku tuí, ʻeku tukupā ki he ongoongolelei ʻo Sīsū Kalaisí, ko ʻeku fiefiá, ʻeku ʻamanaki leleí, ʻeku houngaʻiá, talangofuá, mo ʻeku ʻofa ki hoku Fakamoʻui ko Sīsū Kalaisí pea mo ʻeku Tamai Hēvaní.