Fakaʻilekitulōnika Pē: Ngaahi ʻAta ʻo e Tuí
Naʻá ku Maʻu ʻa e Tui ʻe Tataki ʻe he ʻOtuá ʻa ʻEne Palōfitá
Naʻe mahino kiate au naʻe ʻikai ke ʻiloʻi ʻe he kakaí ʻa e hingoa totonu ʻo e Siasí koeʻuhí kuo tau ui ʻaki e “Kau Māmonga” mo e “LDS.”
Laʻitā ne maʻu ʻi he angalelei ʻa e tokotaha faʻu tohí
Lolotonga ʻeku ʻaʻahi mo hoku hoá ki ha mēmipa ne toki papi ului, ne afe mai ai hano kaungāmeʻa ko ha faifekau. Naʻá ne pehē mai, “ʻOi, ko e ongo faifekau LDS!” Naʻá ma fiefia ʻi heʻene ʻiloʻi kimauá, pea naʻe lava ke ma tala naʻá ne fie ʻilo. ʻI heʻema talitali lelei iá, ne u ongoʻi ʻa e fie maʻu ko ia ke fakafeʻiloaki lelei ange kimauá.
Naʻá ma talaange, “Ko e ongo faifekau kimaua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻá ne tali mai, “ʻIo. “Kau Māmongá pe LDS.”
Naʻe ʻikai ongo lelei ia kiate au. Naʻá ku talaange ʻoku ui kimautolu ʻe he kakaí ko e kau Māmonga koeʻuhí ko e Tohi ʻa Molomoná.
Naʻá ne pehē mai, “ʻIkai. Naʻa mo homou kāingalotú ʻoku nau ui kinautolu ʻaki e hingoa ko iá.”
Naʻá ma feinga homa lelei tahá ke tokoni ke mahino kiate ia ʻa e hingoa totonu ʻo e Siasí, peá ma fakamoʻoni ki hono moʻoni ʻo e Siasí. Naʻá ma fakaafeʻi foki ʻema papi ului foʻoú ke fakahoko ʻene fakamoʻoní.
Naʻe fakamanatu mai ʻe he meʻá ni ʻa e mahuʻinga hono fakaʻaongaʻi e hingoa totonu ʻo e Siasí. Naʻá ku toʻo taʻeʻilo e huafa ʻo e Fakamoʻuí ʻi heʻeku fakanounouʻi e hingoa ʻo Hono Siasí. Naʻe kamata ʻeni ke mahino lelei ange kiate au ha ngaahi potufolofola kuó u lau tuʻo lahi. Naʻe tokoni e ngaahi veesi ʻi he 3 Nīfaí ke mahino kiate au ʻa e fie maʻu mālohi ko ia ke ʻoua naʻa liliu e hingoa ʻo e Siasi ʻo e ʻEikí kapau ʻoku ou fie toʻo moʻoni kiate au Hono huafá:
“Kuo ʻikai te [mou] lau koā ʻa e ngaahi folofolá, ʻa ia ʻoku pehē mai ai ʻoku totonu ke mou ʻai kiate kimoutolu ʻa e huafa ʻo Kalaisí, ʻa ia ko hoku hingoá? He ko e hingoa ia ʻe ui ʻaki ʻa kimoutolu ʻi he ʻaho fakaʻosí. …
“Ko ia, ko e meʻa kotoa pē te mou faí, ke mou fai ia ʻi hoku hingoá; ko ia ke mou ui ʻa e siasí ʻi hoku hingoá; pea ke mou ui ki he Tamaí ʻi hoku hingoá ke ne tāpuakiʻi ʻa e siasí koeʻuhi ko au” (3 Nīfai 27:5, 7).
Kimui ange ai, lolotonga ʻeku feinga ke maʻu ha meʻalele ke ma ō ai ki falelotú, naʻá ku fakaʻaongaʻi e hingoa kakato ʻo e Siasí ke fakahinohino ki he fakaʻulí e feituʻu naʻá ma ō ki aí. Naʻá ku tokanga ke ʻoua te u toʻo e “Sīsū Kalaisí.”
Naʻá ku ʻohovale ʻi hono talamai ʻe he fakaʻulí naʻe ʻikai ke ne ʻilo ʻa e feituʻú. ʻI he fehuʻi ʻe hoku hoá ki he tangatá pe kuó ne fanongo ʻi he Siasi LDS, naʻá ne pehē mai, “ʻIo.”
Koeʻuhí kuo tau fakaʻaongaʻi e “Kau Māmonga” mo e “LDS,” naʻe ʻikai ke fakatokangaʻi ai ʻe he kakaí ʻa e hingoa kakato ʻo e Siasí. Naʻá ku fakapapau ke u lotu ke ʻiloʻi ʻe kitautolu kāingalotu ʻo e Siasí ʻetau fehalākí. Lolotonga ʻeku fakakaukau ki he meʻá ni, naʻá ku manatuʻi ʻa e palōfitá. Naʻe mahino kiate au ko e palōfitá pē te ne lava ʻo lea maʻá e ʻEikí ki he māmaní kotoa, ko ia kapau ʻe hoko ha liliu, ʻe fie maʻu ke haʻu ia meiate ia.
Ka naʻá ku pehē loto pē, “ʻOku malava fēfē nai ʻeni? Naʻa mo e uepisaiti ʻa e Siasí, ʻoku fakanounouʻi ia ko e ʻLDS.org.ʼ ʻE liliu fēfē nai ia?”
ʻI heʻema ngaahi lotú, naʻá ma tautapa fakamātoato ki he Tamai Hēvaní ke ueʻi fakalaumālie ʻEne tamaioʻeiki, ko e palōfitá, ke tataki kitautolu ʻi he meʻa mahuʻingá ni. Naʻá ku tui ʻoku fakahā moʻoni ʻe he ʻOtuá ʻa Hono finangaló ki Heʻene palōfitá.
Naʻe fakataimi-tēpileʻi ke tukuange au mei he Misiona Nigeria Benin City ʻi Sepitema 2018. Ka naʻe liliu hoku ʻaho tukuangé ki ʻOkatopa—ko e ʻOkatopa tatau pē naʻe fakahoko ai ʻe Palesiteni Lāsolo M. Nalesoni ha pōpoaki mahuʻinga ki he Siasí fakaemāmani lahi:
“Ko e konga lahi ʻo e māmaní, ʻoku nau lolotonga fakapuliki ʻa e Siasi ʻo e ʻEikí ʻi hono ui ko e ʻSiasi Māmonga.’ Ka ʻoku ʻiloʻi ʻe kitautolu ko e kau mēmipa ʻo e Siasi ʻo e ʻEikí ko hai ʻoku takí: ko Sīsū Kalaisi Tonu pē. …
“… Mahalo ʻe muimui pe ʻikai muimui ʻa e toenga ʻo māmaní ʻi heʻetau takí, ʻaki hano ui kitautolu ʻaki e hingoa totonú. Ka ʻoku taʻe-fakapotopoto ke tau loto-mamahi kapau ʻe ui ʻe ha konga lahi ʻo e māmaní ʻa e Siasí pea mo hono kāingalotú ʻaki ha ngaahi hingoa hala kapau te tau fai e meʻa tatau.”1
ʻOku ʻikai ke ke lava ʻo fakakaukauloto ki heʻeku ʻohovalé mo e fiefiá! Naʻe mahino ʻaupito e pōpoaki ʻa Palesiteni Nalesoní, pea naʻá ku ongoʻi kuo tali ʻema ngaahi lotú. Naʻe ʻikai faʻa fakamatalaʻi ʻa ʻeku houngaʻiá.
Naʻe tānaki mai e aʻusiá ni ki heʻeku fakamoʻoni ʻoku tali ʻa e ngaahi lotú pea ʻoku ueʻi fakalaumālie ʻe he Tamai Hēvaní ʻEne kau palōfitá. Ko e Siasi ʻeni ʻo e ʻEikí, pea ʻokú Ne ʻafioʻi e meʻa ke fakahoko ʻi Hono Siasí. Naʻa mo e uepisaiti ʻa e Siasí, ʻa ia ne u pehē naʻe ʻikai malava ke liliú, naʻe liliu ia ki he ChurchofJesusChrist.org.
‘Oku ou ʻilo ko Palesiteni Nalesoní ʻoku uiuiʻi ia ʻe he ʻOtuá. ʻOku ou ʻiloʻi foki naʻe ʻikai ke fakahingoa ʻe he Palōfita ko Siosefa Sāmitá ʻa e Siasí ʻa ia ne fakafoki mai ʻiate iá. Pehē kia Molomona. Ko e Fakamoʻuí Tonu pē naʻe folofola, “He ʻe ui peheʻi ʻa hoku siasí ʻi he ngaahi ʻaho fakaʻosí, ʻio, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” (Tokāteline mo e Ngaahi Fuakava 115:4).